Leksyon 29

Doktrina ug mga Pakigsaad 77–80

Pasiuna ug Timeline

Niadtong Marso 1832, mipadayon si Joseph Smith sa iyang paghubad sa Bag-ong Tugon. Samtang ang Propeta nagtuon sa basahon sa Pinadayag, ang Ginoo mipadayag sa kahulugan sa pipila ka simbolo ug mga hitabo nga gihulagway ni Apostol Juan. Kini nga pagpadayag narekord diha sa Doktrina ug mga Pakigsaad 77.

Niadtong Marso 1, 1832, sa pagpadayag nga narekord sa Doktrina ug mga Pakigsaad 78, ang Ginoo misugo sa Propeta sa pag-organisar og kompaniya (nga nailhan nga ang Nagkahiusa nga Kapunongan) sa pagdumala sa mga balay tipiganan ug mga paningkamot sa pagmantala sa Simbahan. Ang Ginoo mihulagway usab sa mga panalangin nga madawat sa mga Santos kon mosunod sila sa sugo sa pagtukod niini nga kompaniya. Sa ulahing bahin sa Marso, ang Propeta nakadawat og mga pagpadayag nga narekord sa Doktrina ug mga Pakigsaad 79–80, diin ang Ginoo mitawag ni Jared Carter, Stephen Burnett, ug Eden Smith sa pagpahayag sa ebanghelyo.

Pebrero–Marso, 1832Sila si Joseph Smith ug Sidney Rigdon nagpadayon sa dinasig nga rebisyon sa Bag-ong Tugon.

Marso 1832Ang Doktrina ug mga Pakigsaad 77 nadawat.

Marso 1, 1832Ang Doktrina ug mga Pakigsaad 78 nadawat.

Marso 7, 1832Ang Doktrina ug mga Pakigsaad 80 nadawat.

Marso 8, 1832Si Joseph Smith mitudlo ni Jesse Gause ug Sidney Rigdon isip iyang mga magtatambag diha sa Kapangulohan sa Halangdon nga Pagkapari.

Marso 12, 1832Ang Doktrina ug mga Pakigsaad 79 nadawat.

Marso 24–25, 1832Sila si Joseph Smith ug Sidney Rigdon mapintas nga gibunal-bunalan ug gibutangan og alkitran ug balahibo sa manggugubot nga panon sa Hiram, Ohio.

Marso 29, 1832Si Joseph Murdock Smith, ang sinagop nga anak nila ni Joseph ug Emma Smith, namatay.

Mga Sugyot alang sa Pagtudlo

Doktrina ug mga Pakigsaad 77

Ang Ginoo mipadayag sa mga tubag ngadto sa mga pangutana mahitungod sa basahon sa Pinadayag

Sa wala pay klase, isulat ang mosunod nga mga pamahayag diha sa pisara:

Wala kinahanglana nga ang Dios makigsulti nato sa atong panahon, tungod kay kita adunay igo sa Iyang pulong.

Wala nay laing gitugutan nga kasulatan gawas sa Biblia.

Kon magsugod na ang klase, ipasabut nga pipila ka tawo mohimo niini ug ubang susama nga mga pangangkon. Pangutan-a ang mga estudyante unsaon nila sa pagtubag niini nga mga pamahayag.

Dapita ang duha ka mga estudyante sa pagpuli-puli sa pagbasa og kusog gikan sa mga parapo [paragraph] 1 ug 3 sa pasiuna sa Doktrina ug mga Pakigsaad. Hangyoa ang klase sa pagsunod, nga mangita kon sa unsa nga paagi ang Doktrina ug mga Pakigsaad makatabang sa pagtubag niini nga mga pangangkon.

• Unsa nga mga pulong ang inyong nakita nga nagpakita sa mga sayop sa mga pangangkon diha sa pisara?

• Base sa mga parapo [paragraph] 1 ug 3, ngano nga importante alang nato nga magtuon sa pagpadayag sa ulahing mga adlaw nga makita diha sa Doktrina ug mga Pakigsaad?

Dapita ang usa ka estudyante sa pagbasa og kusog sa unang kapahayag [sentence] sa parapo [paragraph] 6 sa pasiuna sa Doktrina ug mga Pakigsaad. Hangyoa ang klase sa pagpangita sa mga sirkumstansya nga sa kasagaran mosangpot ngadto sa mga pagpadayag nga narekord sa Doktrina ug mga Pakigsaad.

• Unsay kasagaran nga mosangpot ngadto sa mga pagpadayag nga narekord sa Doktrina ug mga Pakigsaad?

Ipakita ang mosunod nga mensahe ni Elder M. Russell Ballard sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Adunay leksyon nga makat-unan gikan sa pagtuon sa Doktrina ug mga Pakigsaad. Ang mga pagpadayag sa kinatibuk-an nagtubag sa mga pangutana. Ang Ginoo wala moanhi ug mipikpik sa abaga ni Joseph ug moingon, ‘Duna koy pagpadayag alang nimo.’ Apan hinoon si Joseph miadto sa Ginoo ug nanghangyo nga makadawat og tubag. Matag karon ug unya si Joseph mosulti nato unsaon niya sa pagpangutana ug sa unsa nga paagi, agig tubag, moabut ang pagpadayag. Si Presidente Russell Nelson bag-o lang mipasabut pag-ayo niining importante nga baruganan. Miingon siya. ‘Makatudlo lamang ang Ginoo sa mausisahong hunahuna’”(M. Russell Ballard, “What Came from Kirtland” [Brigham Young University fireside, Nob. 6, 1994], 8, speeches.byu.edu).

• Ngano kaha nga ang usa ka tawo kinahanglan mangutana aron makadawat og kamatuoran ug pagpadayag gikan sa Ginoo?

Ipasabut nga kini nga kurso maghisgot sa Doktrina ug mga Pakigsaad 77–138 ug sa Opisyal nga mga Pahayag 1 ug 2. Awhaga ang mga estudyante sa paghimo og tumong sa pagtuon sa teksto sa kasulatan alang niini nga kurso. Dapita sila sa pagpangita diha sa mga kasulatan nga ilang gitun-an ang mga ehemplo sa Ginoo nga naghatag og pagpadayag agig tubag sa sinsero nga mga pangutana, ug moawhag sa mga estudyante sa pagpangita sa mga kamatuoran niadto nga mga pagpadayag nga makatabang pagtubag sa ilang kaugalingong mga pangutana.

Awhaga ang mga estudyante sa pagbasa sa teksto alang sa kurso

Ang tanang sumbanan nga mga kasulatan mao ang dinasig nga mga sinulat nga naglakip sa mga doktrina ug mga baruganan sa ebanghelyo. Naghulagway kini sa mga buhat sa Langitnong Amahan uban sa Iyang mga anak ug nagtudlo mahitungod sa Pag-ula ni Jesukristo. Naghatag kini og mas dako nga panabut sa ebanghelyo ug sa plano sa kaluwasan. Ang mga estudyante ug mga magtutudlo kinahanglang mobasa ug magtuon sa basahon sa kasulatan nga nagtukma sa matag kurso sa pagtuon.

Ipasabut nga sa Marso 1832 ang Propeta nagpuyo sa panimalay nila ni John ug Alice (Elsa) Johnson sa Hiram, Ohio, mga 30 ka milya sa habagatan sa Kirtland. Niining higayona, kadaghanan sa mga Santos nagpuyo sa Ohio ug sa Distrito sa Jackson, Missouri, diin ang Ginoo mipadayag nga ang siyudad sa Zion pagatukuron. Niadtong Pebrero ug Marso 1832, ang Propeta nagpadayon sa iyang dinasig nga paghubad sa King James Version sa Biblia, karon nailhan nga Hubad ni Joseph Smith. Samtang si Joseph Smith nagtrabaho sa Pinadayag ni San Juan ang Balaan (komon nga nailhan nga basahon sa Pinadayag), ang Ginoo mipadayag sa kahulugan sa pipila ka mga simbolo ug mga panghitabo nga gihulagway ni Apostol Juan. Kini nga pagpadayag narekord diha sa Doktrina ug mga Pakigsaad 77.

Ipares-pares ang mga estudyante. Isulat ang mosunod nga mga tudling sa kasulatan diha sa pisara, ug i-assign ang matag pares sa usa sa mosunod nga basahunon nga mga assignment:

1. Pinadayag 4:2–8; Doktrina ug mga Pakigsaad 77:1–5

2. Pinadayag 5:1; 7:1–4; Doktrina ug mga Pakigsaad 77:6–11

3. Pinadayag 8:2; 9, ulohan sa kapitulo; 10:10; 11:3; Doktrina ug mga Pakigsaad 77:12–15

Hangyoa ang mga estudyante sa pagbasa og una uban sa ilang partner sa gi-assign nila nga mga bersikulo diha sa basahon sa Pinadayag, nga mangita sa mga simbolo o mga hitabo nga gihulagway ni Juan. Dayon hangyoa ang mga estudyante sa pagbasa uban sa ilang partner sa na-assign nila nga mga bersikulo gikan sa Doktrina ug mga Pakigsaad 77, nga mangita kon sa unsa nga paagi nga ang mga pagpasabut sa Ginoo makatabang sa pagklaro sa kahulugan sa mga simbolo ug mga hitabo nga gihulagway diha sa basahon sa Pinadayag. Hangyoa ang pipila ka estudyante sa pag-report sa naangkon nilang pagsabut.

• Unsa ang atong makat-unan gikan sa Doktrina ug mga Pakigsaad 77 mahitungod sa tahas sa usa ka propeta sa pagtabang kanato nga makasabut sa kahulugan sa kasulatan? (Ang mga estudyante kinahanglang moila sa usa ka doktrina susama sa mosunod: Ang Ginoo nagpadayag sa interpretasyon sa kasulatan pinaagi sa Iyang mga propeta.)

• Ngano kaha nga importante nga masabtan nga ang Ginoo mopadayag sa interpretasyon sa kasulatan pinaagi sa Iyang mga propeta, mga manalagna, ug mga tigpadayag?

• Unsaon nato nga mapahisama sa kon unsay gihimo ni Joseph Smith aron makasabut sa mga kasulatan ngadto sa atong personal nga pagtuon sa kasulatan? (Bisan og ang mga estudyante mahimong mogamit og laing mga pulong, kinahanglan silang moila og baruganan nga susama sa mosunod: Sa atong pagpangutana sa Dios, motabang Siya nato nga makasabut sa mga kasulatan.)

Tabangi ang mga estudyante nga matuman ang ilang katungdanan sa proseso sa pagkat-on

Ang espirituhanon nga pagkat-on nagkinahanglan og paningkamot ug paggamit sa kabubut-on. Alang sa daghang estudyante, ang pagpaningkamot nga makat-on gikan sa mga kasulatan mahimong dili kaayo pamilyar ug medyo lisud. Hinoon, mahimo nimo silang tabangan sa pagsabut, pagdawat, ug pagtuman sa ilang katungdanan sa pagkat-on sa ebanghelyo. Samtang aktibo ang mga estudyante sa pagtuman sa ilang mga katungdanan diha sa pagkat-on sa ebanghelyo, ilang giabli ang ilang mga kasingkasing ngadto sa impluwensya sa Espiritu Santo.

Aron matabangan ang mga estudyante nga makasabut niini nga baruganan, ipakita ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Unsay nakalahi nato gikan sa kadaghanang ubang mga Kristiyano sa paagi sa atong pagbasa ug paggamit sa Biblia ug sa ubang mga kasulatan mao ang atong pagtuo sa nagpadayon nga pagpadayag. Alang kanato, ang mga kasulatan dili mao ang labing mahinungdanong tinubdan sa kahibalo, apan mao ang nag-una sa labing mahinungdanong tinubdan. Ang labing mahinungdanong kahibalo moabut pinaagi sa pagpadayag. …

“Ang pulong sa Ginoo diha sa mga kasulatan susama sa usa ka lampara nga mogiya sa atong mga tiil (tan-awa sa Sal 119:105), ug ang pagpadayag susama sa gamhanang pwersa nga hilabihan nga nagpakusog sa kahayag sa lampara. Among giawhag ang tanan sa paghimo og mainampingon nga pagtuon sa mga kasulatan ug sa mga propetikanhong pagtulun-an mahitungod niini ug mainampuong magtinguha og personal nga pagpadayag aron masayud sa kahulugan niini alang sa ilang kaugalingon” (Dallin H. Oaks, “Scripture Reading and Revelation,” Ensign, Ene. 1995, 7).

• Ngano kaha nga importante ang pagtuon pag-ayo sa mga kasulatan uban sa “mapanagnaong mga pagtulun-an kabahin niini” samtang mainampoon kamong magtinguha og personal nga pagsabut? (Hisguti nga ang Manwal sa Estudyante sa Doktrina ug mga Pakigsaad [Church Educational System manual, 2017] adunay daghang mga pagtulun-an sa mga propeta sa ulahing mga adlaw nga makatabang sa mga estudyante nga mas makasabut sa mga kamatuoran nga gitudlo sa Doktrina ug mga Pakigsaad.)

Hangyoa ang mga estudyante sa paghunahuna og usa ka panahon sa dihang ang Dios mitabang kanila nga mas makasabut sa mga kasulatan pinaagi sa mapanagnaong mga pagtulun-an o personal nga pagpadayag nga moabut human sa pag-ampo. Dapita ang pipila ka mga estudyante sa pagpakigbahin sa ilang mga kasinatian kon komportable sila sa paghimo niini. Mahimong ikaw usab gustong mopakigbahin og usa ka kasinatian sa imong kaugalingon.

Awhaga ang mga estudyante sa pagbasa kada adlaw gikan sa Doktrina ug mga Pakigsaad ug sa pagpangita og mas dakong pagsabut sa doktrina ug mga baruganan niini pinaagi sa pagtuon sa mapanagnaong mga pagtulun-an ug sa pagpangutana sa Dios pinaagi sa pag-ampo.

Doktrina ug mga Pakigsaad 78

Ang Ginoo misugo ni Joseph Smith sa pagtukod sa Nagkahiusa nga Kapunongan ug nagsaad og mga panalangin niadtong kinsa nagtuman sa Iyang mga sugo

Ipasabut nga agig dugang sa pagdawat og pagpadayag mahitungod sa kahulugan sa mga kasulatan, si Propeta Joseph Smith nakadawat usab og pagpadayag kabahin sa temporal nga mga kalihokan sa Simbahan. Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 78. Hangyoa ang klase sa pagsunod, nga mangita kon unsay gisulti sa Ginoo sa Propeta sa pag-organisar aron makatabang sa pagdumala sa mga pundo sa Simbahan. Hangyoa ang mga estudyante nga mo-report sa ilang nakit-an.

Ipasabut nga ang komersyal nga panimpalad nga dumalahon sa Nagkahiusa nga Kapunongan nagpasabut sa balay tipiganan sa Ginoo sa Kirtland, Ohio, nga gidumala ni Newel K. Whitney, ug sa balay tipigananan sa Ginoo sa Independence, Missouri, nga gidumala ni Sidney Gilbert. Kini nga mga balay tipiganan mao ang mosangkap sa mga Santos sa gikinahanglang mga butang samtang mokita usab og kwarta aron ipalit og mga yuta ug igasto sa pagmantala sa mga pinadayag sa Ginoo ngadto ni Joseph Smith.

Hangyoa ang usa ka estudyante sa pagbasa og kusog sa Doktrina ug mga Pakigsaad 78:3–6. Hangyoa ang klase sa pagsunod, nga mangita kon unsa pay ikatabang niini nga kompaniya nga buhaton sa mga Santos.

• Sumala sa mga bersikulo 3–4, sa unsa nga paagi nga ang Nagkahiusa nga Kapunongan makabenepisyo ug makapanalangin sa mga Santos?

• Sumala sa mga bersikulo 5–6, ngano nga ang Ginoo misugo sa mga Santos sa pagtabang sa mga kabus?

• Unsa kaha ang kahulugan sa mga pulong “kon kamo dili managsama diha sa yutan-on nga mga butang kamo dili managsama diha sa pagbaton sa langitnon nga mga butang” sa bersikulo 6?

Ipasabut nga sa unang pagpadayag ang Ginoo mihatag og kahulugan sa managsama kabahin sa mga pamilya nga adunay igong kapanguhaan sa pagtubag sa ilang panginahanglan ug mga gusto sumala sa ilang indibidwal nga mga sirkumstansya (tan-awa sa D&P 51:3). Sa ingon, ang pagkamanagsama sa yutan-ong mga butang wala magpasabut nga ang tanan adunay samang gidaghanon sa mga kapanguhaan.

Dapita ang usa ka estudyante sa pagbasa og kusog sa Doktrina ug mga Pakigsaad 78:7. Hangyoa ang klase sa pagpangita unsay gisulti sa Ginoo nga mahitabo sa mga Santos kon sila magmasulundon sa Iyang mga sugo nga mahimong managsama sa yutan-ong mga butang. Hangyoa ang mga estudyante nga mo-report sa ilang nakit-an.

• Base sa unsay gitudlo sa Ginoo sa bersikulo 7, unsa nga baruganan ang atong makat-unan mahitungod sa kon unsa nga ang pagkamasulundon ngadto sa mga sugo sa Ginoo makatabang nato nga makaandam? (Ang mga estudyante kinahanglang moila og baruganan susama sa mosunod: Ang pagkamasulundon sa mga sugo sa Ginoo nag-andam nato alang sa usa ka dapit sa celestial nga gingharian.)

Hangyoa ang mga estudyante sa paghunahuna mahitungod sa pipila ka mga sugo sa Ginoo. Dapita sila sa pagpasabut sa unsa nga paagi nga kini nga mga sugo, lakip sa mga sugo sa pagtabang sa kabus, makaandam nato alang sa celestial nga gingharian (tan-awa sa D&P 105:3–5).

I-summarize ang Doktrina ug mga Pakigsaad 78:8–16 pinaagi sa pagpasabut nga ang Ginoo mitudlo nila ni Joseph Smith, Newel K. Whitney, ug Sidney Rigdon sa pag-organisar sa Nagkahiusang Kapunongan (tan-awa D&P 82). Ang mga miyembro sa kompaniya kinahanglang pagabugkuson sa ilang mga kaugalingon pinaagi sa pakigsaad sa pagdumala sa komersyal ug pagmantala nga mga paningkamot sa Simbahan. Pinaagi sa pagsunod sa mga instruksyon sa Ginoo, ang Simbahan mobarug nga independente sa tanang ubang yutan-ong mga butang.

Dapita ang mga estudyante sa pagbasa og hilum sa Doktrina ug mga Pakigsaad 78:17–20 nga mangita sa dugang nga tambag nga gihatag sa Ginoo ngadto sa mga lider sa Simbahan.

• Sa unsa nga paagi nga ang mensahe sa Ginoo sa mga bersikulo 17–18 makapahimo nga mapainubsanon ug makahupay ngadto niini nga mga lider sa Simbahan?

Hangyoa ang mga estudyante sa pagpamalandong sa mga panalangin sa gingharian sa Ginoo ug sa mga katigayunan sa kahangturan nga ilang nadawat. Dapita ang pipila ka mga estudyante sa pagpakigbahin kon sa unsa nga paagi kini nakapanalangin sa ilang mga kinabuhi.

• Unsa ang gitambag sa Ginoo nga buhaton sa mga lider sa Simbahan sa bersikulo 19?

• Base sa bersikulo 19, unsay mahitabo kanato kon kita modawat sa tanang mga butang uban sa pasalamat? (Human motubag ang mga estudyante, isulat ang mosunod nga baruganan diha sa pisara: Kon kita modawat sa tanang mga butang uban sa pasalamat, kita mahimo nga mahimayaon, ug ang Ginoo mopilo-pilo sa atong mga panalangin. Ipasabut nga ang “mahimo nga mahimayaon” nagpasabut gayud sa pagdawat og kahimayaan.)

• Unsa ang gipasabut nganha kaninyo sa pagdawat sa tanang mga butang uban sa pasalamat?

• Ngano kaha nga ang tanang mga butang nga atong madawat gikan sa Dios, ilabi na sa Iyang mga sugo, kinahanglang dawaton uban ang pasalamat?

Hatagi ang mga estudyante og usa ka minuto sa paghimo og lista sa mga butang nga sila mapasalamaton. Dapita ang mga estudyante sa pagplano unsay ilang mahimo nga mas hingpit nga modawat sa tanang mga butang gikan sa Dios uban sa pasalamat.

Doktrina ug mga Pakigsaad 79–80

Ang Ginoo mitawag ni Jared Carter, Stephen Burnett, ug Eden Smith sa pagserbisyo og mga misyon

I-summarize ang Doktrina ug mga Pakigsaad 79–80 pinaagi sa pagpasabut nga ang Ginoo mitawag nila ni Jared Carter, Stephen Burnett, ug Eden Smith sa pagserbisyo og mga misyon. Ang Ginoo misaad ni Jared Carter nga ang Maghuhupay motudlo kaniya sa kamatuoran ug mogiya niya asa paingon (tan-awa sa D&P 79:2). Ang Ginoo misulti nila ni Stephen Burnett ug Eden Smith sa pagpahayag sa mga butang nga ilang nadungog, gituohan, ug nahibaloan nga tinuod (tan-awa sa D&P 80:4).

Tapusa pinaagi sa pagpamatuod sa mga kamatuoran nga gitudlo niini nga leksyon.