Institute
Leksyon 48: Doktrina ug mga Pakigsaad 124

“Leksyon 48: Doktrina ug mga Pakigsaad 124,” Manwal sa Magtutudlo sa Doktrina ug mga Pakigsaad (2017)

“Leksyon 48,” Manwal sa Magtutudlo sa Doktrina ug mga Pakigsaad

Leksyon 48

Doktrina ug mga Pakigsaad 124

Pasiuna ug Timeline

Sa dihang ang mga miyembro sa Simbahan giabug gikan sa Missouri sa tingtugnaw sa 1838–1839, nakakaplag sila og kadangpan sa Teritoryo sa Illinois ug Iowa. Human gitugutan sa pag-eskapo sa pagkabinilanggo kaniadtong Abril 1839, si Propeta Joseph Smith nakig-uban sa mga Santos sa Quincy, Illinnois, ug mitabang sa pagtukod sa bag-ong pundokanan nga dapit didto sa Commerce, Illinois, diin sa kadugayan giusab ang ngalan og Nauvoo. Hapit duha ka tuig wala madugay, sa Enero 19, 1841, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 124, diha diin ang Ginoo misugo kaniya sa pagsulat og “maligdong nga pamahayag sa [Iyang] ebanghelyo” ngadto sa mga pangulo sa “tanang mga nasud sa yuta” (D&P 124:2–3) ug ang mga Santos gisugo sa pagtukod og sak-anan nga balay alang sa mga dumuduong ug usa ka templo sa Nauvoo. Mitambag usab Siya sa indibidwal nga mga miyembro sa Simbahan ug mitudlo og mga kalalakin-an sa pagserbisyo diha sa mga katungdanan sa pagkapangulo sa pagkapari.

Tingtugnaw sa 1838–1839Ang mga miyembro sa Simbahan giabug gikan sa Missouri ug nakakuha og kadangpan diha sa Teritoryo sa Illinois ug Iowa.

Abril 16, 1839Samtang gibalhin ngadto sa Columbia, Missouri, alang sa husay, si Propeta Joseph Smith ug ang iyang mga kauban gitugutan sa pag-eskapo sa pagkabinilanggo.

Abril–Mayo 1839Namalit og yuta ang mga miyembro sa Simbahan didto sa Commerce, Illinois—sa kadugayan giusab ang ngalan og Nauvoo—ug gitukod kini isip usa ka dapit nga pundokanan.

Agosto 15, 1840Mihatag si Propeta Joseph Smith sa iyang unang publiko nga pagpamulong sa bunyag alang sa patay.

Disyembre 16, 1840Ang estado a Illinois mihatag og opisyal nga katungod ngadto sa siyudad sa Nauvoo.

Enero 19, 1841Ang Doktrina ug mga Pakigsaad 124 nadawat.

Abril 6, 1841Ang mga tukurang bato sa templo sa Nauvoo giugbok.

Mga Sugyot alang sa Pagtudlo

Doktrina ug mga Pakigsaad 124:1–21

Nagsugo ang Ginoo ni Propeta Joseph Smith sa pagpadala og “pamahayag [sa] ebanghelyo … ngadto sa tanan nga mga nasud sa yuta” ug nagtambag sa indibidwal nga mga miyembro sa Simbahan

Isulat ang mosunod nga mga pangutana diha sa pisara: Unsa ang labing dako nga pagdayeg nga imong madawat gikan sa lain nga tawo? Ngano?

Dapita ang pipila ka mga estudyante sa pagpakigbahin sa ilang mga tubag ngadto sa klase. Dayon isulat ang mosunod nga mga pangutana diha sa pisara: Unsa nga pagdayeg ang gusto ninyong madawat gikan sa Ginoo? Ngano?

Dapita ang mga estudyante sa pagpamalandong niini nga mga pangutana. Awhaga sila samtang ilang tun-an ang Doktrina ug mga Pakigsaad 124 sa pagpangita sa mga hiyas nga ang Ginoo naghatag og bili diha sa Iyang mga sulugoon.

Pahinumdumi ang mga estudyante nga sa dihang ang mga miyembro sa Simbahan gihinginlan gikan sa Missouri atol sa tingtugnaw sa 1838–1839, kadaghanan kanila namuyo sa gagmay nga mga komunidad sa Illinois ug Iowa subay sa daplin sa Suba sa Mississippi. Ang maloloy-ong mga tagilungsod niini nga mga komunidad mihimo sa unsay ilang mahimo apan sa kasagaran nakigbisog sa pagpangita og igo nga pagkaon ug kapasilongan alang sa daghan kaayo nga napugos sa pagpapahawa sa ilang panimalay [refugee].

I-display ang mosunod nga parapo [paragraph] ug dapita ang usa ka estudyante sa pagbasa niini og kusog:

Kaniadtong Abril 1839, si Propeta Joseph Smith ug ang iyang kauban nga mga binilanggo gitugutan sa pag-eskapo sa pagkabinilanggo ug milayas ngadto sa Quincy, Illinois, diin nakig-uban sila sa ilang mga pamilya. Human sa iyang pag-abut sa Quincy, ang Propeta ug ang uban namalit og yuta sa Teritoryo sa Illinois ug Iowa alang sa kapuy-an sa mga Santos. Ang Commerce, Illinois nahimo nilang bag-o nga mga punoang buhatan, nga ilang giusab ang ngalan og Nauvoo, Hebreo alang sa “maanindot.” Bisan pa niana, ang pagtukod sa ilang siyudad nagkinahanglan og daghan nga mga bulan sa malisud nga kahago tungod kay ang mga Santos—daghan kinsa mga kabus human sa ilang pagkagiw sa ilang mga kapanimuyoan sa Missouri—nagpunting sa ilang mga kahago sa paghawan sa yuta ug sa pagtukod og bag-o nga mga pinuy-anan ug sa mga panginabuhi. Sa pagkasunod nga tingtugnaw, nakahimo sila og igo nga pag-uswag nga ang mga pangulo sa Simbahan makahimo sa pag-usab sa pagkapangulo sa Simbahan, nga nakuhaan tungod sa apostasiya ug kamatayon atol sa panahon sa grabe nga kagubot sa Simbahan didto sa Missouri. Sa Enero 19, 1841, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 124, diha diin ang Ginoo mingalan sa Nauvoo isip “usa ka tukuranan nga bato sa Zion” (D&P 124:2) ug ang mga punoang buhatan sa Simbahan niana nga panahon, ug mitudlo og mga kaigsoonan sa pagserbisyo og mga katungdanan sa pagkapangulo diha sa Simbahan.

Ipasabut nga ingon nga gi-rekord diha sa Doktrina ug mga Pakigsaad 124:1–22, ang Ginoo midayeg ug mitambag sa nagkalain-alaing mga pangulo sa Simbahan sa Nauvoo. Isulat ang mosunod nga mga pakisayran sa kasulatan ug mga ngalan diha sa pisara:

Doktrina ug mga Pakigsaad 124:1–3—Joseph Smith

Doktrina ug mga Pakigsaad 124:12–14—Robert B. Thompson

Doktrina ug mga Pakigsaad 124:15—Hyrum Smith

Doktrina ug mga Pakigsaad 124:16–17—John C. Bennett

Doktrina ug mga Pakigsaad 124:18–19—Lyman Wight

Doktrina ug mga Pakigsaad 124:20–21—George Miller

Ipabuhat sa matag estudyante ang usa o daghan pa niini nga mga pakisayran, ug dapita ang mga estudyante sa pagbasa og hilum sa ilang gipabuhat nga bersikulo, nga mangita sa unsa ang gisulti sa Ginoo mahitungod niini nga mga indibidwal. Dapita ang mga estudyante sa pagreport unsa ang ilang nakit-an. Samtang sila nagreport isulat ang ilang mga tubag diha sa pisara tupad sa katugma nga mga pakisayran sa kasulatan ug mga ngalan.

  • Hain niini nga pagdayeg gusto nimo nga madawat gikan sa Ginoo? Ngano?

Dapita ang mga estudyante sa pagdali og ribyu sa mga pagdayeg nga gihatag sa Ginoo ni Hyrum Smith ug George Miller diha sa mga bersikulo 15 ug 20.

  • Pinasikad sa unsay gisulti sa Ginoo mahitungod niining duha ka lalaki, unsa ang Iyang gibati mahitungod niadtong kinsa adunay kaligdong? (Ang mga estudyante kinahanglan nga moila og kamatuoran susama sa mosunod: Ang Ginoo naghigugma ug nagsalig niadtong adunay kaligdong sa kasingkasing.)

Ipasabut nga ang Ginoo nahigugma sa tanang katawhan. Hinoon, ang mga pulong sa gugma sa Ginoo alang ni Hyrum Smith ug George Miller diha sa mga bersikulo 15 ug 20 nagpakita sa Iyang pag-uyon sa ilang mga kinabuhi tungod sa ilang kaligdong, nagpasabut sa ilang kaputli, kamatinuoron, ug katarung.

Ipakita ang mosunod nga pamahayag ni Elder Joseph B. Wirthlin (1917–2008) sa Korum sa Napulog Duha ka mga Apostoles. Dapita ang usa ka estudyante sa pagbasa og kusog sa pamahayag, ug hangyoa ang klase sa pagsunod, nga mangita sa unsay gisulti ni Elder Wirthlin mahitungod sa kahulugan sa kaligdong.

“Alang kanako, ang kaligdong nagpasabut nga kanunayng maghimo kon unsa ang husto ug maayo, bisan unsa pa man ang hinanaling mga sangputanan. Nagpasabut kini nga magmatarung gikan gayud sa kahiladman sa atong kalag, dili lamang diha sa atong mga lihok apan, mas importante, diha sa atong mga hunahuna ug diha sa atong mga kasingkasing. Ang personal nga kaligdong nagpasabut sa ingon nga pagkamasaligan ug dili madala sa kahiwian nga kita dili makahimo sa ingon nga pagluib ngadto sa usa ka pagsalig o pakigsaad” (Joseph B. Wirthlin, “Personal Integrity,” Ensign, Mayo 1990, 30).

  • Unsa ang pipila ka mga sitwasyon nga masulayan ang kaligdong sa usa ka tawo?

  • Unsa ang pipila ka mga butang nga atong mabuhat nga makatabang kanato sa paghupot sa atong kaligdong bisan og kini malisud sa pagbuhat sa ingon?

Dapita ang mga estudyante sa paghunahuna og usa ka tawo nga ilang nailhan kinsa adunay kaligdong. Hangyoa ang pipila ka mga estudyante sa pagpakigbahin ngadto sa klase ngano ang tawo nga ilang gihunahuna usa ka ehemplo sa kaligdong.

Awhaga ang mga estudyante sa pagsulat unsa ang ilang buhaton sa pagpaninguha sa pagbaton og kaligdong diha sa ilang mga hunahuna, mga pulong, ug mga lihok.

Doktrina ug mga Pakigsaad 124:22–83

Nagsugo ang Ginoo sa mga miyembro sa Simbahan sa pagtukod og balay alang sa mga dumuduong ug usa ka templo sa Nauvoo

Ipasabut nga diha sa Doktrina ug mga Pakidsaad 124:22–83, ang Ginoo mihatag og piho nga mga sugo ngadto sa mga miyembro sa Simbahan. Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 124:22–27, 56, 60. Hangyoa ang klase sa pagsunod, nga mangita sa unsay gisugo sa Ginoo sa mga Santos nga buhaton.

  • Unsay gisulti sa Ginoo sa mga Santos nga tukuron diha sa Nauvoo? (Usa ka balay sak-anan, nga ilang paganganlan og Balay sa Nauvoo, ug usa ka templo.)

  • Sumala sa mga bersikulo 23 60, nganong gisugo ang mga Santos sa pagtukod sa Balay sa Nauvoo?

Pagpakita og litrato sa Templo sa Nauvoo.

Templo sa Nauvoo

Dapita ang usa ka estudyante sa pagbasa og kusog sa Doktrina ug mga Pakigsaad 124:28. Hangyoa ang klase sa pagsunod, nga mangita kon nganong misugo ang Ginoo sa mga Santos sa pagtukod og templo sa Nauvoo.

  • Nganong misugo ang Ginoo sa mga Santos sa pagtukod og templo sa Nauvoo?

Ipasabut nga gitudlo ni Propeta Joseph Smith nga ang “kahingpitan sa pagkapari” maangkon pinaagi sa pagdawat sa mga ordinansa sa templo ug sa paghupot sa kauban nga mga ordinansa (tan-awa sa Mga Pagtulun-an sa mga Presidente sa Simbahan: Joseph Smith [2007], 419). Bisan og ang mga yawe sa pagkapari gipahiuli didto sa Templo sa Kirtland kaniadtong 1836, dili tanan nga mga ordinansa sa templo gipadayag niana nga panahon. Sama pananglit, sa Agosto 15, 1840, unom ka bulan sa wala pa ang pagpadayag nga gi-rekord diha sa Doktrina ug mga Pakigsaad 124 nadawat, gitudlo ni Propeta Joseph Smith sa unang higayon ang doktrina sa katubsanan sa patay pinaagi sa pagpuli [proxy] nga bunyag. Human niana, daghang bunyag alang sa patay ang gipahigayon didto sa Suba sa Mississippi ug sa duol nga mga sapa.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 124:29–34. Hangyoa ang klase sa pagsunod, nga mangita sa unsay gisulti sa Ginoo sa mga Santos mahitungod sa bunyag alang sa patay.

  • Asa ang gisulti sa Ginoo ang mga bunyag alang sa patay kinahanglan nga ipahigayon?

  • Sumala sa bersikulo 30, ngano nga ang Ginoo mitugot sa mga Santos sa pagpahigayon og mga bunyag alang sa patay sa mga dapit gawas sa templo?

  • Unsa ang gisulti sa Ginoo ang mahitabo kon ang mga Santos nagpahigayon og mga bunyag alang sa patay sa gawas sa templo human sa gitakda nga panahon sa paghuman sa templo?

Ipasabut nga ang pagpuli nga mga bunyag [proxy baptism] diha sa Suba sa Mississippi gihunong sa Oktubre 3, 1841, sa dihang ang Propeta mi-anunsyo, “Wala nay mga bunyag alang sa mga patay, hangtud ang ordinansa pagahimoon didto sa Balay sa Ginoo. … Kay sa ingon namulong ang Ginoo!” Mga Pagtulun-an: Joseph Smith, 567, 569). Niadtong Nobyembre 1841, human ang bunyaganan natukod ug napahinungod didto sa silong sa wala pa mahuman nga Templo sa Nauvoo, mipadayon ang mga bunyag alang sa mga patay.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 124:37–41. Hangyoa ang klase sa pagsunod, nga mangita kon nganong misugo ang Ginoo sa mga Santos sa pagtukod og templo sa Nauvoo.

Isulat ang mosunod nga pahayag diha sa pisara: Ang templo mao lamang ang dapit diin …

  • Pinasikad sa unsay gitudlo sa Ginoo ingon nga gi-rekord diha sa Doktrina ug mga Pakigsaad 124:28–42, unsaon ninyo sa pagkompleto ang pahayag diha sa pisara? (Human matubag sa mga estudyante, kompletoha ang pahayag diha sa pisara ingon sa mosunod: Ang templo mao lamang ang dapit diin kita makabaton sa tanan nga mga ordinansa sa pagkapari nga gikinahanglan alang sa kaluwasan sa buhi ug sa patay.)

  • Sa unsa kaha nga paagi kini nga doktrina nakapadasig sa mga Santos sa paghimo og bisan unsa nga sakripisyo nga gikinahanglan sa pagtukod sa Templo sa Nauvoo?

I-summarize ang Doktrina ug mga Pakigsaad 124:41–83 pinaagi sa pagpasabut nga ang Ginoo misaad sa mga miyembro sa Simbahan nga kon sila motukod sa templo sila mapanalanginan. Kon dili, sila pagatungluhon. Misaad usab ang Ginoo nga Siya mohimo sa mga kaaway sa Simbahan nga may tulubagon alang sa pagkapakyas sa mga Santos sa pagtukod og templo diha sa Distrito sa Jackson, Missouri. Agi og dugang, mihatag ang Ginoo sa mga Santos og mga direksyon kabahin sa pagtukod sa Balay sa Nauvoo.

Doktrina ug mga Pakigsaad 124:84–145

Ginganlan sa Ginoo kadtong kinsa moserbisyo sa nagkalain-laing mga katungdanan sa pagkapangulo sa priesthood

Pahinumdumi ang mga estudyante nga ang mga kalisud didto sa Missouri nakakuha og dako nga kadautan diha sa pagkapangulo sa Simbahan. Atol niana nga panahon, ang pipila sa mga pangulo mibiya sa Simbahan, ug ang uban namatay o gipatay. Human ang mga Santos gipapahawa gikan sa Missouri sa tingtugnaw sa 1838–1839, ang mga pangulo sa Simbahan migahin sa kadaghanan sa ilang mga paningkamot sa pag-andam sa mga dapit nga mapundokan sa mga Santos sa Illinois ug Iowa. Sa tingtugnaw sa 1840–1841, ang pagkapangulo sa Simbahan sa katapusan makaatiman na sa paghulip sa bakante nga mga katungdanan sa Simbahan. Ang Doktrina ug mga Pakigsaad 124:84–145 naglangkub sa mga ngalan sa mga lalaki nga moserbisyo diha sa Simbahan, uban sa mga saad ug mga pasidaan sa Ginoo ngadto kanila.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 124:91–95. Hangyoa ang klase sa pagsunod, nga mangita sa mga kausaban nga gihimo sa Ginoo ngadto sa pagkapangulo sa Simbahan.

  • Unsa nga calling ang nadawat ni William Law?

  • Unsa nga calling ang nadawat ni Hyrum Smith?

Mahimo nga gusto kang mopasabut nga sa dihang gitawag si Hyrum Smith nga mahimong Patriyarka sa Simbahan, usa lamang ka patriyarka ang nagserbisyo sa tibuok Simbahan. Samtang nagkadaghan ang mga stake nga gitukod, mga patriyarka gi-orden sa matag stake.

  • Unsa nga mga panalangin ang gisaad ngadto ni Hyrum Smith isip kabahin sa iyang bag-o nga calling? (Si Hyrum gihatagan sa mga panalangin nga sa makausa gisaad ngadto ni Oliver Cowdery, kinsa gipahimulag tungod sa rebelyon kaniadtong 1838 [tan-awa sa bersikulo 95].)

I-summarize ang Doktrina ug mga Pakigsaad 124:103–42 pinaagi sa pagpasabut nga gitawag si Sidney Rigdon sa Ginoo sa pagpadayon sa pagserbisyo isip magtatambag ngadto ni Propeta Joseph Smith. Giila usab sa Ginoo si Joseph Smith isip ang Propeta ug Presidente sa Simbahan ug si Brigham Young isip ang Presidente sa Korum sa Napulog Duha ka mga Apostoles ug gilista ang mga miyembro niana nga korum. Agi og dugang, ginganlan sa Ginoo ang mga miyembro sa halangdong konseho, ang presidente sa halangdong mga pari (ang presidente sa stake), ang presidente sa elders quorum, ang mga Presidente sa mga Korum sa mga Kapitoan, ug ang bishopric.

Dapita ang usa ka estudyante sa pagbasa og kusog sa Doktrina ug mga Pakigsaad 124:143. Hangyoa ang klase sa pagsunod, nga mangita kon nganong gitukod sa Ginoo kini nga “mga katungdanan” ug “mga yawe” sa pagkapari.

  • Sumala sa bersikulo 143, ngano nga ang Ginoo mitukod sa mga yawe ug mga katungdanan sa pagkapari sa paghan-ay ug pagdumala sa Iyang buhat? (Ang Ginoo mitukod sa mga yawe ug mga katungdanan sa pagkapari sa paghan-ay ug pagdumala sa Iyang buhat aron mahingpit ang Iyang mga Santos.)

Taposa pinaagi sa pagpamatuod niini nga baruganan ug sa ubang mga kamatuoran nga nailhan diha niini nga leksyon. Dapita ang mga estudyante sa paggamit niini nga mga kamatuoran diha sa ilang mga kinabuhi.