Leksyon 30

Doktrina ug mga Pakigsaad 81–83

Pasiuna ug Timeline

Pagka-Marso 8, 1832, si Propeta Joseph Smith mitawag kang Jesse Gause ug Sidney Rigdon aron moserbisyo isip iyang mga magtatambag sa Kapangulohan sa Halangdon nga Pagkapari. Pagka-Marso 15, 1832, nadawat sa Propeta ang pinadayag nga narekord sa Doktrina ug mga Pakigsaad 81, diin giklaro sa Ginoo ang mga katungdanan ni Brother Gause isip magtatambag ni Joseph Smith. Hinoon, si Jesse Gause wala magpabilin nga matinud-anon, ug ang Ginoo mitawag ni Frederick G. Williams, kansang ngalan makita karon diha sa Doktrina ug mga Pakigsaad 81, aron mopuli sa pwesto ni Brother Gause diha sa Kapangulohan.

Pagka-Abril 1832, si Propeta Joseph Smith ug ang uban mibiyahe ngadto sa Independence, Missouri, misunod sa sugo sa Ginoo sa pag-establisar og organisasyon aron sa pagtukod sa Zion ug sa pag-atiman sa mga kabus (tan-awa sa D&P 78). Samtang naa didto, ang Propeta nakadawat og duha ka mga pagpadayag. Pagka-Abril 26, atol sa usa ka konseho sa mga high priest ug mga elder sa Simbahan sa Independence, nadawat sa Propeta ang pinadayag nga narekord sa Doktrina ug mga Pakigsaad 82, diin gipasaylo sa Ginoo ang mga kalapasan niini nga mga kaigsoonan ug mipahimangno kanila batok sa dugang nga pagpakasala. Gitudloan usab niya ang mga miyembro sa United Firm nga mopasalig sa ilang kaugalingon pinaagi sa pakigsaad sa pagdumala sa temporal nga mga kalihokan sa Zion. Paglabay sa upat ka adlaw, nadawat ni Joseph Smith ang pinadayag nga narekord diha sa Doktrina ug mga Pakigsaad 83, diin ang Ginoo mihatag og mga instruksyon mahitungod sa pag-atiman sa mga biyuda, mga ilo, ug mga kabus.

Enero 25, 1832Gi-orden si Joseph Smith isip Presidente sa Halangdon nga Pagkapari didto sa Amherst, Ohio.

Marso 8, 1832Gitudlo ni Joseph Smith si Sidney Rigdon ug Jesse Gause isip iyang mga magtatambag sa Kapangulohan sa Halangdon nga Pagkapari.

Marso 15, 1832Ang Doktrina ug mga Pakigsaad 81 nadawat.

Marso 24–25, 1832Si Joseph Smith ug Sidney Rigdon gisakmit panahon sa kagabhion ug gibun-og pag-ayo sa usa ka panon sa manggugubot sa Hiram, Ohio.

Marso 29, 1832Si Joseph Murdock Smith, ang sinagop nga anak nila ni Joseph ug Emma Smith, namatay.

Abril 1–24, 1832Si Joseph Smith ug ang ubang mga lider mibiyahe ngadto sa Independence, Missouri.

Abril 26, 1832Ang Doktrina ug mga Pakigsaad 82 nadawat.

Abril 30, 1832Ang Doktrina ug mga Pakigsaad 83 nadawat.

Mayo–Hunyo, 1832Si Joseph Smith nagpabilin uban ni with Newel K. Whitney sulod sa pipila ka semana sa Greenville, Indiana. Si Newel nabalian sa iyang tiil ug bitiis sa dihang milayat gikan sa karwahe nga wala na makontrol sa iyang pagpauli ngadto sa Ohio.

Mga Sugyot alang sa Pagtudlo

Doktrina ug mga Pakigsaad 81

Ang Ginoo milatid sa tahas sa mga magtatambag sa Kapangulohan sa Halangdong Pagkapari

Isulat ang mosunod nga mga pangutana diha sa pisara sa wala pay klase:

Nganong ang Ginoo mohatag man kanato og mga calling diha sa Iyang Simbahan?

Unsa man ang mga panalangin sa matinud-anon nga pagtuman sa calling?

Unsa kaha kon ang usa ka tawo mopili nga dili magmatinud-anon sa pagtuman sa iyang calling?

Sugdi ang klase pinaagi sa pagdapit sa mga estudyante sa pagtubag sa mga pangutana diha sa pisara. Isip kabahin sa panaghisgutan, ipasabut nga bisan ang usa ka lider sa Simbahan makadawat og inspirasyon sa pagtawag og indibidwal ngadto sa usa ka katungdanan, anaa ra sa maong indibidwal sa pagtubag sa matinud-anong paagi sa calling.

Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 81. Hangyoa ang mga estudyante sa pagsunod, nga mangita og usa ka tawo nga gitawag sa Ginoo apan wala magmatinud-anon sa iyang calling.

• Kinsa ang unang gitawag sa Ginoo sa pagserbisyo isip usa ka magtatambag ngadto ni Joseph Smith?

• Nganong nawad-an man si Jesse Gause sa iyang calling?

Paghatag og kopya sa mosunod nga impormasyon mahitungod ni Jesse Gause ngadto sa usa ka estudyante, ug hangyoa siya sa pagbasa niini og kusog:

Si Jesse Gause gitawag isip magtatambag ngadto ni Propeta Joseph Smith niadtong Marso 1832. Niadtong Agosto 1, 1832, nagmisyon siya uban ni Zebedee Coltrin. Samtang didto sa iyang misyon, si Brother Gause nakig-istorya sa iyang asawa ug naningkamot sa pagkumbinser kaniya sa kamatuoran, apan nagdumili siya sa pagpasakop sa Simbahan. Sa wala madugay, si Brother Coltrin nagkasakit ug mipauli ngadto sa Kirtland. Subo lang, si Brother Gause wala motiwas sa iyang misyon ug wala magpabilin nga matinud-anon diha sa Simbahan. Niadtong Enero 1833, ang Ginoo mitawag ni Frederick G. Williams sa pagpuli ni Jesse Gause isip magtatambag, ug ang ngalan nga Frederick gisulat ngadto sa transkripsyon niini nga pagpadayag puli ni Jesse. Ang pagpadayag gimantala uban sa ngalan ni Frederick sa 1835 nga edisyon sa Doktrina ug mga Pakigsaad (ug ang tanan nga misunod nga mga edisyon). Bisan og ang ngalan nausab, ang mga instruksyon sa pagpadayag kabahin sa mga katungdanan sa usa ka magtatambag nagpabilin nga tinuod tungod kay kini magamit ngadto sa calling, dili lang sa indibidwal nga gipangalanan.

Mahimo nimong isugyot nga markahan sa mga estudyante ang mosunod nga mga pulong diha sa pasiuna sa seksyon: “Ang pagpadayag … kinahanglan pagailhon nga usa ka lakang paingon sa tukma nga katukuran sa Unang Kapangulohan.” Ipasabut nga ang Ginoo wala mopadayag sa kompleto nga organisasyon sa Iyang Simbahan ngadto sa Propeta sa usa ra ka higayon. Gipadayag Niya ang lain-laing mga bahin sa organisasyon sumala sa panginahanglan ug sa dihang andam na ang mga Santos sa pagdawat niini. Sa ingon ang Presidente sa Simbahan ug ang iyang mga magtatambag (ang Kapangulohan sa Halangdon nga Pagkapari) wala tawaga nga “ang Unang Kapangulohan” hangtud sa kaulahian. Ang unang nadokumento nga paggamit sa pulong “Unang Kapangulohan” gikan sa ting-init niadtong 1835 (tan-awa sa The Joseph Smith Papers, Documents, Volume 4: April 1834–September 1835, ed. Matthew C. Godfrey and others [2016], 357, footnote 733; tan-awa usab sa xxvi, footnote 61).

Dapita ang usa ka estudyante sa pagbasa og kusog sa Doktrina ug mga Pakigsaad 81:1–2. Hangyoa ang klase sa pagsunod, nga mangita kon unsay gitudlo sa Ginoo Frederick G. Williams mahitungod sa Kapangulohan sa Halangdon nga Pagkapari.

• Sumala sa bersikulo 2, unsa ang gihuptan sa Kapangulohan sa Halangdon nga Pagkapari? (Ang mga estudyante kinahanglang moila sa doktrina nga susama sa mosunod: Ang Kapangulohan sa Halangdon nga Pagkapari naghupot sa mga yawe sa gingharian sa Dios dinhi sa yuta.)

Aron matabangan ang mga estudyante nga makasabut niini nga doktrina, ipakita ang mosunod nga pamahayag, ug dapita ang usa ka estudyante sa pagbasa niini og kusog:

“Ang matag usa sa Unang Kapangulohan ug Korum sa Napulog Duha ka mga Apostoles naghupot sa tanang mga yawe sa priesthood nga kinahanglan alang sa pagdumala sa Simbahan. Ang Presidente sa Simbahan mao lang ang adunay katungod sa paggamit sa tanan niana nga mga yawe. Iyang idelegar kini nga mga yawe ngadto sa uban kinsa nagdumala sa Simbahan—mga presidente sa templo, mga presidente sa misyon, mga presidente sa stake, mga presidente sa district, mga bishop, mga presidente sa branch, ug mga presidente sa korum, lakip sa mga presidente sa korum sa deacon ug teacher” (“Priesthood Keys,” New Era, Mayo 2012, 38–39).

• Unsa ang gitugot niini nga mga yawe sa priesthood nga mabuhat sa Unang Kapangulohan? (Pagdumala sa buhat sa Ginoo dinhi sa yuta.)

Dapita ang mga estudyante sa pagbasa sa hilum sa Doktrina ug mga Pakigsaad 81:3–5, nga mangita sa mga instruksyon nga gihatag sa Ginoo ngadto ni Frederick G. Williams mahitungod sa iyang calling.

• Unsa nga mga instruksyon ang gihatag sa Ginoo ngadto ni Frederick G. Williams?

• Unsa ang gisaad sa Ginoo ni Frederick G. Williams kon siya magmatinud-anon sa iyang calling?

• Unsa nga baruganan ang atong makat-unan gikan sa saad sa Ginoo ngadto ni Frederick G. Williams? (Human motubag ang mga estudyante, isulat ang mosunod nga baruganan diha sa pisara: Kon matinud-anon kita sa atong mga calling, makahimo kita og maayo alang niadtong atong gialagaran ug mapalambo ang himaya sa Dios.)

• Sa unsa nga paagi nga ang pagserbisyo nga matinud-anon sa atong mga calling makatabang nato sa pagbuhat og maayo alang niadtong kinsa atong gialagaran? Sa unsa nga paagi kini mopalambo sa himaya sa Dios?

Dapita ang mga estudyante sa pagpakigbahin og kasinatian sa dihang gipanalanginan sila tungod kay dunay nagmatinud-anon sa iyang calling.

Awhaga ang mga estudyante sa paghunahuna og mga paagi nga sila mas magmatinud-anon sa ilang mga calling. Dapita sila sa pagbuhat sa bisan unsang mga pag-aghat nga ilang madawat.

Dapita ang usa ka estudyante sa pagbasa og kusog sa Doktrina ug mga Pakigsaad 81:6–7. Hangyoa ang klase sa pagsunod, nga mangita sa mga panalangin nga gisaad sa Ginoo ngadto ni Frederick G. Williams kon siya magmatinud-anon hangtud sa katapusan. Hangyoa ang mga estudyante nga mo-report sa ilang nakit-an.

I-refer ang mga estudyante ngadto sa mga pangutana diha sa pisara, ug pangutan-a sila unsaon nila pagdugang sa ilang mga tubag base sa unsay ilang nakat-unan. Ipamatuod ang kaimportante sa pagkamatinud-anon sa atong mga calling ug pagtabang niadtong naglibut kanato.

Tinoa ang gipaspason

Likaye ang pagkasayop nga mogahin og dakong panahon sa unang bahin sa leksyon ug magdali-dali na hinoon sa nahibilin nga bahin. Samtang mangandam ka, bana-banaa kon unsa kadugayon itudlo ang matag seksyon sa leksyon gamit ang mga pamaagi sa pagtudlo nga imong gipili. Tungod kay kanunay kang dunay daghang materyal nga itudlo kay sa oras sa pagtudlo niini, hibaloi kon asa nga porsyon sa scripture block ang angay hatagan og gibug-aton ug asa niini ang i-summarize.

Doktrina ug mga Pakigsaad 82:1–7

Ang Ginoo mipasidaan niadtong kinsa daghan og nadawat gikan Kaniya

Aron matabangan ang mga estudyante sa pagsabut sa konteksto sa Doktrina ug mga Pakigsaad 82 dapita ang usa ka estudyante sa pagbasa og kusog sa mosunod nga parapo [paragraph]:

Sulod sa pipila ka bulan adunay ngil-ad nga mga pagbati tali ni Sidney Rigdon sa Ohio ug Bishop Edward Partridge sa Missouri. Niadtong Abril 1832, si Propeta Joseph Smith ug ang ubang mga lider sa Simbahan mibiyahe gikan sa Ohio ngadto sa Lalawigan sa Jackson Missouri sa pagsunod sa sugo sa Ginoo nga sila “molingkod diha sa konseho uban sa mga santos nga anaa sa Zion” (D&P 78:9). Sa ilang pag-abut, duha ka adlaw nga konseho sa mga high priest sa Simbahan ang gipahigayon. Tali sa buntag ug hapon nga mga sesyon sa unang adlaw sa konseho, sila si Sidney Rigdon ug Edward Partridge misulbad sa ilang mga panagsumpaki. Ang pinadayag sa Doktrina ug mga Pakigsaad 82 nadawat atol sa sesyon sa hapon. (Tan-awa sa The Joseph Smith Papers, Documents, Volume 2: Hulyo 1831–Enero 1833, ed. Matthew C. Godfrey ug ang uban [2013], 229–34.)

Dapita ang mga estudyante sa pagbasa og hilum sa Doktrina ug mga Pakigsaad 82:1, nga mangita kon unsay gisulti sa Ginoo ni Sidney Rigdon ug Edward Partridge mahitungod sa pagsulbad sa ilang panagsumpaki. Hangyoa ang usa ka estudyante nga mo-report sa unsay iyang nakit-an.

Dapita ang usa ka estudyante sa pagbasa og kusog sa Doktrina ug mga Pakigsaad 82:2. Hangyoa ang klase sa pagsunod, nga mangita sa pahimangno nga gihatag sa Ginoo sa mga Santos.

• Unsa ang gisulti sa Ginoo nga mahitabo kon sila dili molikay sa pagpakasala?

Dapita ang usa ka estudyante sa pagbasa og kusog sa Doktrina ug mga Pakigsaad 82:3–4. Dapita ang klase sa pagsunod ug sa pagpangita og rason nganong ang mga paghukom nga gihisgutan diha sa bersikulo 2 moabut niadtong nagpadayon sa pagpakasala.

• Sumala niini nga mga bersikulo, ngano nga ang mga paghukom moabut diha sa mga Santos kinsa nagpadayon sa pagpakasala?

• Unsa nga mga kamatuoran sa doktrina ang gitudlo sa Ginoo mahitungod sa pagka may tulubagon sa bersikulo 3? (Kinahanglang ilhon sa mga estudyante ang mga pamahayag sa doktrina nga susama sa mosunod: Ang Ginoo nagkinahanglan og daghan niadtong Iyang gihatagan og daghan. Siya kinsa nakasala batok sa labaw nga dako nga kahayag makadawat sa labaw nga dako nga panghimaraut.)

• Sumala sa bersikulo 4, sa unsa nga paagi nga ang mga Santos mibati nga nakasala batok sa mas dako nga kahayag?

• Ngano kaha nga kadtong daghan og nadawat gikan sa Ginoo daghan usab og gikinahanglan kanila?

Dapita ang mga estudyante sa paghunahuna mahitungod sa unsay gihatag sa Ginoo kanila ug mamalandong unsay ilang gibati nga gipaabut sa Ginoo nga ilang buhaton tungod kay sila nakadawat niadto nga mga panalangin. Awhaga sila sa pagbuhat sa bisan unsang mga pag-aghat nga ilang madawat.

I-summarize ang Doktrina ug mga Pakigsaad 82:5–7 pinaagi sa pagpasabut nga ang Ginoo mipasidaan sa mga Santos nga ang gahum ni Satanas sa tibuok yuta nagkadako. Mitudlo usab Siya nga kon tuyo kitang mobiya gikan sa pagkamatarung ngadto sa pagpakasala, ang atong kanhi nga mga sala mobalik.

Doktrina ug mga Pakigsaad 82:8–24

Ang Ginoo misugo og siyam ka tawo sa pagtukod og usa ka kompaniya sa pagdumala sa temporal nga mga kalihokan sa Simbahan

Ipasabut nga human mipasidaan ang Ginooo sa konseho sa mga high priest mahitungod sa mga paghukom sa Dios ug sa nagkadako nga gahum ni Satanas dinhi sa yuta, mihatag usab Siya og makapasiguro nga saad ngadto niadtong mosunod sa Iyang mga sugo.

Dapita ang usa ka estudyante sa pagbasa og kusog sa Doktrina ug mga Pakigsaad 82:8–10. Hangyoa ang klase sa pagsunod, nga mangita sa mga panalangin nga gisaad sa Ginoo niadtong kinsa nagsunod sa Iyang mga sugo. Sa dili pa mobasa ang estudyante, ipasabut nga ang mga pulong “bag-o nga sugo” sa bersikulo 8 nagpasabut sa dugang nga pagpadayag nga hapit na ihatag sa Ginoo mahitungod kon unsaon sa pag-establisar sa Nagkahiusa nga Kapunongan.

• Unsa atong makat-unan gikan sa mga bersikulo 8–9 mahitungod kon ngano nga ang Ginoo mihatag nato og mga sugo?

• Unsa ang gisaad sa Ginoo niadtong kinsa mosunod sa Iyang mga sugo? (Tabangi ang mga estudyante sa pag-ila sa mosunod nga baruganan: Kon kita magmatinud-anon sa mga sugo sa Ginoo, Siya sa kanunay motuman sa Iyang mga saad aron sa pagpanalangin kanato.)

• Unsay mahitabo kon dili nato buhaton unsay gisugo sa Ginoo?

• Sa unsa nga paagi nga ang pagtuo niini nga baruganan makaimpluwensya sa atong mga tumong ug mga desisyon?

Hatagi og gibug-aton nga ang mga saad sa Ginoo dili kanunay matuman kanus-a o sa atong gilauman o gipaabut, ni sila mogarantiya nga kita dili makasinati og mga kalisud o pag-antus. Hinoon, ang mga saad sa Ginoo kanunay nga matuman.

• Sa unsa nga mga paagi imong nakita nga ang Ginoo mituman sa Iyang mga saad sa pagpanalangin kanimo samtang ikaw naningkamot sa pagtuman sa Iyang mga saad?

Dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith(1876–1972). Hangyoa ang klase sa pagpaminaw sa kon unsa nga paagi si Presidente Smith mihulagway sa mga panalangin nga atong madawat kon kita masulundon.

“Kon talikdan nato ang mga sugo nga gihatag sa Ginoo nga atong giya nan dili kita makapangangkon sa iyang mga panalangin. …

“Tumana ang mga sugo. … Pagmatinuoron sa matag pakigsaad ug obligasyon, ug ang Ginoo manalangin kaninyo lapas pa sa inyong gipangandoy” (Mga Pagtulun-an sa mga Presidente sa Simbahan: Joseph Fielding Smith [2013], 264, 270).

I-summarize ang Doktrina ug mga Pakigsaad 82:11–24 pinaagi sa pagpasabut nga ang Ginoo misugo sa mga lider sa Simbahan kabahin sa organisasyon sa Nagkahiusa nga Kapunongan, mitudlo sa mga miyembro niini, ug mipasabut sa katuyoan niini nga organisasyon ug sa mga sangputanan sa pagkamasinupakon.

Doktrina ug mga Pakigsaad 83

Ang Ginoo mipadayag kon unsaon pag-atiman sa mga biyuda ug mga ilo, ug sa mga kabus

I-summarize ang Doktrina ug mga Pakigsaad 83 pinaagi sa pagpasabut nga niadtong Abril 30, 1832, si Joseph Smith midiktar og pagpadayag nga nagklaro unsaon, ubos sa balaod sa pagpahinungod, sa pag-atiman sa mga babaye ug mga bata kinsa nawad-an sa ilang mga bana o mga amahan.

Tapusa pinaagi sa pagpamatuod sa doktrina ug mga baruganan nga gihisgutan niini nga leksyon, ug dapita ang mga estudyante sa paggamit unsay ilang nakat-unan.

Dugang nga Ideya sa Pagtudlo

Doktrina ug mga Pakigsaad 83. Ang Ginoo mipadayag kon unsaon pag-atiman sa mga biyuda ug mga ilo, ug sa mga kabus

Ipasabut nga samtang si Propeta Joseph Smith naglingkod diha sa konseho uban sa iyang kaigsoonan niadtong Abril 30, 1832, sa Independence, Missouri, iyang gidiktar ang usa ka pagpadayag nga naghisgot unsaon sa pag-atiman sa temporal nga mga panginahanglan sa mga Santos.

Dapita ang usa ka estudyante sa pagbasa og kusog sa Doktrina ug mga Pakigsaad 83:1. Hangyoa ang klase sa pagsunod, nga mangita kang kinsa nga panginahanglan ang gihisgutan niini nga pagpadayag.

• Kang kinsang mga panginahanglan ang gihisgutan niini nga pagpadayag?

Pahinumdumi ang mga estudyante nga daghan sa mga Santos ang naningkamot sa pagsunod sa balaod sa pagpahinungod ug nakadawat og usa ka “kabilin”, o kabtangan, gikan sa Simbahan. Niini nga pagpadayag ang Ginoo mipadayag kon unsa ang mahitabo sa kabilin sa pamilya kon ang bana o amahan mamatay.

Dapita ang mga estudyante nga hilum nga mobasa sa Doktrina ug mga Pakigsaad 83:2–3 ,nga mangita sa mga instruksyon sa Ginoo kabahin sa pag-atiman sa mga biyuda.

• Kon ang tawo namatay ug ang iyang asawa nagpabilin nga matinud-anon, unsa nga panalangin ang iyang nadawat?

Ipasabut nga sa panahon nga gihatag kini nga pagpadayag, kadaghanan sa mga babaye nagsalig sa ilang mga bana alang sa ilang temporal nga suporta. Ang “makaangkon og panagdait diha sa simbahan” (bersikulo 2) nagpasabut nga, tungod kay nawala na ang tigsangkap sa asawa, ang Simbahan motabang kaniya samtang iyang giako ang tahas nga bugtong tigsangkap.

Dapita ang usa ka estudyante sa pagbasa og kusog sa Doktrina ug mga Pakigsaad 83:4–6. Hangyoa ang klase sa pagsunod, nga mangita kon sa unsang paagi ang Simbahan makatabang sa mga ilo ug mga biyuda.

• Unsa ang gitudlo niini nga mga bersikulo kaninyo kon unsa ang gibati sa Ginoo mahitungod sa mga biyuda, mga ilo, ug niadtong tanan nga nanginahanglan?

Awhaga ang mga estudyante nga mas makahibalo sa mga panginahanglan niadtong naglibut kanila ug mangita og mga paagi nga magamit ang tambag sa Ginoo “sa pagtinguha sa kaayohan sa [ilang] mga silingan” (D&P 82:19).