Leksyon 32

Doktrina ug mga Pakigsaad 85–87

Pasiuna ug Timeline

Sa hinapos nga bahin sa Nobyembre 1832, ang ubang mga Santos nga mibalhin ngadto sa Zion wala mopahinungod sa ilang mga kabtangan sumala sa gisugo sa Ginoo. Tungod niini, wala sila makadawat sa kabilin sa yuta sumala sa mga balaod sa Simbahan. Si Propeta Joseph Smith namulong niini nga isyu sa usa ka dinasig nga sulat ngadto ni William W. Phelps, gipetsahan og Nobyembre 27, 1832, diin usa ka tipik niini narekord diha sa Doktrina ug mga Pakigsaad 85.

Niadtong Disyembre 6, 1832, si Joseph Smith nakadawat og pagpadayag nga narekord sa Doktrina ug mga Pakigsaad 86 samtang siya nagtrabaho sa dinasig nga hubad sa Biblia. Kini nga pagpadayag naghatag og dugang pagpasabut sa sambingay sa trigo ug bunglayon ug sa tahas sa priesthood sa pagtabang sa Ginoo pagpundok sa mga matarung sa katapusang mga adlaw.

Sa tibuok 1832, si Propeta Joseph Smith ug ang ubang mga miyembro sa Simbahan tingali nahibalo pinaagi sa mga balita sa pamantalaan sa mga kagubot nga milukop sa yuta. Sama pananglit, nasayud sila sa mga panaglantugi kalabut sa pagkaulipon sulod sa Estados Unidos, ug nasayud usab sila mahitungod sa panlimbasug batok sa federal nga mga taripa diha sa estado sa South Carolina. Pagka-Disyembre 25, 1832, nadawat ni Joseph Smith ang pinadayag nga narekord diha sa Doktrina ug mga Pakigsaad 87, nga naglakip sa mga propesiya mahitungod sa mga gubat ug mga paghukom nga “ibu-bu diha sa tanan nga mga nasud” (D&P 87:3) sa katapusang mga adlaw.

Nobyembre 6, 1832Si Emma Smith nanganak kang Joseph Smith III.

Nobyembre 6, 1832Mibalik si Joseph Smith gikan sa pagsangyaw ngadto sa silangang bahin sa Estados Unidos.

Nobyembre 8, 1832Nahimamat ni Joseph Smith si Brigham Young sa unang higayon.

Nobyembre 27, 1832Ang Doktrina ug mga Pakigsaad 85gisulat (kinuha gikan sa usa ka sulat nga gisulat ni Joseph Smith ngadto ni William W. Phelps).

Disyembre 6, 1832Ang Doktrina ug mga Pakigsaad 86 nadawat.

Disyembre 25, 1832Ang Doktrina ug mga Pakigsaad 87 nadawat.

Mga Sugyot alang sa Pagtudlo

Doktrina ug mga Pakigsaad 85

Ang Ginoo misugo nga ang usa ka rekord tipigan niadtong kinsa mipahinungod ug midawat og mga kabilin

Dapita ang mga estudyante sa paghunahuna nga sila kabahin sa usa ka sports team nga adunay mga lagda sa team nga gihimo aron sa pagtabang nila nga molampos.

• Unsa kahay mahitabo kon dunay usa sa team ang nakahukom nga dili mosunod sa mga lagda sa team?

Ipasabut nga ang susama nga sitwasyon misugod sa pagtunga niadtong 1832 samtang nagkadaghan ang mga Santos nga miabut sa Missouri. Ang pipila niini nga mga Santos wala mosunod sa mga balaod sa Ginoo nga gihatag alang sa katukuran sa Zion. Ang sayo nga mga pagpadayag nag-ingon nga ang mga miyembro sa Simbahan dili mopuyo sa Zion hangtud nga sila makadawat og sertipiko gikan sa mga lider sa Simbahan. Sa ilang pag-abut, kinahanglan nga ilang ipahinungod ang tanan nilang kwarta ug kabtangan ngadto sa Simbahan ug makadawat og kabilin gikan sa bishop. Agig dugang, kinahanglan silang mosunod sa tanang sugo sa Dios. (Tan-awa sa D&P 64:34–35; 72:15–19, 24–26.) Ang Doktrina ug mga Pakigsaad 85 naglakip og kinutlo gikan sa sulat nga gisulat ni Propeta ngadto ni William W. Phelps, usa ka lider sa Simbahan sa Missouri, nagpasabut unsay buhaton mahitungod niadtong mga miyembro nga wala mosunod sa mga balaod sa Ginoo.

Dapita ang usa ka estudyante sa pagbasa og kusog sa Doktrina ug mga Pakigsaad 85:1–2. Hangyoa ang klase sa pagsunod, nga mangita sa unsay gisulti ngadto sa klerk sa Missouri nga irekord.

• Unsa ang gisugo nga irekord sa klerk?

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 85:3, 5, 9, 11. Hangyoa ang klase sa pagsunod, nga mangita sa unsay gisulti sa Propeta nga buhaton sa mga lider sa Simbahan sa Missouri kabahin niadtong kinsa wala magsunod sa mga balaod nga gilatid sa Ginoo alang sa pag-establisar sa Zion. Dapita ang pipila ka mga estudyante nga mo-report sa unsay ilang nakit-an.

• Unsay atong makat-unan gikan sa instruksyon sa Propeta kabahin niadtong kinsa wala mosunod sa mga balaod sa Dios?

Doktrina ug mga Pakigsaad 86

Ang Manluluwas mipasabut og dugang sa sambingay sa mga trigo ug mga bunglayon

Pahibaloa ang mga estudyante nga niadtong Disyembre 6, 1832, samtang nagtrabaho sa dinasig nga hubad sa Biblia, nakadawat si Joseph Smith sa pagpadayag nga makita sa Doktrina ug mga Pakigsaad 86, nga nagpalapad sa pagpasabut sa sambingay sa trigo ug mga bunglayon nga gihatag diha sa Biblia.

Dapita ang usa ka estudyante sa pagbasa og kusog sa sambingay nga makita sa Mateo 13:24–30. Samtang magbasa ang estudyante, isulat sa pisara ang mosunod nga mga pulong: trigo, mga bunglayon, umahan, mga tigpugas sa mga binhi, ang kaaway.

• Unsa ang girepresentar sa trigo ug sa bunglayon? (Kon gikinahanglan, ipasabut nga ang trigo nagsimbolo sa mga matarung, ug ang bunglayon nagsimbolo sa mga dautan [tan-awa sa Mateo 13:38].)

• Nganong ang tawo sa sambingay gusto man nga mohulat sa dili pa ibton ang mga bunglayon?

Ipakita ang litrato sa trigo ug mga bunglayon. Ipasabut nga ang mga bunglayon usa ka matang sa makahilo nga sagbut. Ang trigo ug mga bunglayon morag pareha ra kon moturok kini, apan mailhan kini sa higayon nga modako na kini. Kon ang tig-ani mosulay og ibut sa mga bunglayon sa dili pa managko ang mga trigo ug mga bunglayon, malagmit iya usab nga maibut ang kadaghanan sa mga trigo.

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 86:1–6. Hangyoa ang klase sa pagsunod, nga mangita sa mga kahulugan sa umahan, mga tigpugas sa mga binhi, ug sa kaaway. Dapita ang mga estudyante sa pag-report sa unsay ilang nakat-unan.

• Base sa pagpasabut sa Ginoo sa mga simbolo, unsaon man ninyo pag-summarize ang kahulugan niini nga sambingay?

Kon gikinahanglan, ipasabut nga kini nga sambingay nagrepresentar sa panahon sa unang Kristiyano nga Simbahan, sa dihang ang orihinal nga mga Apostoles sa Manluluwas buhi pa, hangtud sa katapusan sa kalibutan. Ang mga pulong nga “siya [Satanas] nagsabwag sa mga sagbut” ug “ang mga sagbut … nag-abug sa simbahan ngadto sa kamingawan” sa bersikulo 3 nagpasabut sa Dakong Apostasiya, ug ang mga pulong “ang udlot migitib ” sa bersikulo 4 nagpasabut sa Pagpahiuli sa ebanghelyo.

Dapita ang mga estudyante sa pagbasa sa hilum sa Doktrina ug mga Pakigsaad 86:7, nga mangita unsay gitudlo pa sa Ginoo mahitungod sa sambingay sa trigo ug mga bunglayon.

• Unsay atong makat-unan gikan sa bersikulo 7 mahitungod sa han-ay sa pagpundok sa katapusang mga adlaw?

• Unsa ang gitudlo niini mahitungod sa unsa ang mahitabo sa mga matarung ug sa mga dautan sa katapusang mga adlaw? (Ang mga estudyante kinahanglang moila sa kamatuoran nga susama sa mosunod: Ang Ginoo mopundok sa mga matarung sa katapusang mga adlaw ug dayon molaglag sa mga dautan sa Iyang Ikaduhang Pag-anhi.)

I-summarize ang Doktrina ug mga Pakigsaad 86:8–10 pinaagi sa pagpasabut nga human mapadayag ang kahulugan niini nga sambingay, ang Ginoo mitawag sa mga miyembro sa Simbahan nga “may katungod nga manununod” (bersikulo 9). Nagpasabut kini nga ang mga miyembro sa Simbahan kabahin sa pakigsaad nga gihimo uban kang Abraham, nga pinaagi niini si Abraham gisaaran nga ang iyang kaliwatan makatagamtam sa mga panalangin sa priesthood ug mopaambit niadto nga mga panalangin ngadto sa uban (tan-awa sa Abraham 2:9–11).

Dapita ang usa ka estudyante sa pagbasa og kusog sa Doktrina ug mga Pakigsaad 86:11. Hangyoa ang klase sa pagsunod, nga mangita kon sa unsa nga paagi atong mapakigbahin ang mga panalangin sa priesthood ngadto sa uban.

• Unsaon nato sa pagpakigbahin sa mga panalangin sa priesthood ngadto sa uban? (Human motubag ang mga estudyante, isulat ang mosunod nga baruganan diha sa pisara: Samtang magpadayon kita sa kaayo sa Ginoo, kita mahimong kahayag sa kalibutan ug manluluwas sa uban pinaagi sa pagtabang kanila nga makadawat sa mga panalangin nga giandam pinaagi sa priesthood.)

• Unsa kaha ang gipasabut niini sa “pagpadayon diha sa pagkamaayo [sa Ginoo]” (bersikulo 11)?

• Sa unsa nga paagi nga ang baruganan nga anaa sa pisara may kalabutan sa sambingay sa trigo ug mga bunglayon? (Isip kabahin sa pakigsaad ni Abraham, kita adunay responsibilidad sa pagtabang sa pagpundok sa matarung agig pagpangandam alang sa Ikaduhang Pag-anhi ni Jesukristo.)

• Sa unsa nga mga paagi kini nga baruganan may kalabutan sa family history ug sa serbisyo sa templo ingon man usab sa misyonaryo nga buhat?

Hangyoa ang mga estudyante sa paghunahuna og panahon sa dihang ang usa ka tawo nahimong kahayag ngadto kanila, o sa usa ka tawo nga ilang nailhan, ug mitabang sa paggiya kanila sa pagdawat sa mga ordinansa sa priesthood. Hangyoa ang pipila ka mga estudyante sa pagpakigbahin sa ilang mga kasinatian uban sa klase. Dapita ang mga estudyante sa paghunahuna unsay ilang mahimo sa pagpadayon sa pagkamaayo sa Ginoo ug mahimong kahayag niadtong anaa sa ilang palibut ingon man usab isip usa ka manluluwas ngadto sa uban, lakip na sa ilang mga katigulangan.

Doktrina ug mga Pakigsaad 87

Ang Ginoo mipadayag nga ang gubat ibu-bu diha sa tanan nga mga nasud

Hangyoa ang mga estudyante sa paghunahuna og panahon sa dihang nakasugat sila og tawo nga misaway ni Propeta Joseph Smith.

Ipasabut nga niadtong Disyembre 25, 1832, ang Ginoo mipadayag og usa ka panagna ngadto ni Joseph Smith nga maoy hinungdan nga ang pipila ka tawo misaway sa Propeta.

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 87:1–4. Hangyoa ang klase sa pagsunod, nga mangita sa panagna nga gihatag sa Ginoo ngadto ni Joseph Smith. Dapita ang mga estudyante sa pag-report sa unsay ilang nakit-an.

Ipasabut nga si Joseph Smith nakat-on mahitungod sa politikanhong panagbangi tali sa estado sa South Carolina ug sa gobyerno sa Estados Unidos bahin sa mga taripa (mga buhis sa mga produkto nga ginama sa gawas sa nasud). Tungod kay ang mga residente sa South Carolina mas nagsalig sa mga produkto nga ginama sa gawas sa nasud kay sa mga tawo sa Amihanan nga mga estado, gibati nila nga dili makiangayon ang federal nga mga taripa ug nga tuyo kining gipahamtang aron sa pagdaot sa mga estado sa Habagatan. Ang mga lider sa gobyerno sa South Carolina mipasar og balaod nga nag-imbalido, o nagpawalay bili, sa federal nga mga balaod, ug daghan nga taga-South Carolina ang misugod sa pagpangandam alang sa gubat batok sa federal nga gobyerno. Ang presidente sa Estados Unidos mipahayag nga iyang ipatuman ang mga balaod sa Estados Unidos pinaagi sa kusog. Niadtong Disyembre 1832, ang mga pamantalaan sa tibuok Estados Unidos mi-report kabahin niini nga kasungian. Niining higayuna nadawat ni Joseph Smith ang pagpadayag nga narekord diha sa Doktrina ug mga Pakigsaad 87. Sa sayo nga bahin sa 1833, wala madugay human mahatag kini nga panagna, ang gobyerno sa Estados Unidos miresolbar sa isyu uban sa estado sa South Carolina.

• Sa unsa nga paagi nga ang pipila ka mga tawo migamit niini nga mga hitabo aron magduha-duha ni Joseph Smith isip usa ka propeta?

Pahibaloa ang mga estudyante nga bisan og ingon nga nasulbad ang problema, niadtong 1843 si Joseph Smith mipamatuod pag-usab sa panagna nga ang gubat magsugod sa South Carolina bahin sa isyu sa pagkaulipon (tan-awa sa D&P 130:12–13). Wala kini mahitabo hangtud sa 1861 nga, tungod sa walay pagsinabtanay bahin sa pagkaulipon, ang barkong iggugubat sa Habagatan mipabuto sa federal nga mga kasundalohan nga nag-estasyon sa Fort Sumter, sa Charleston Harbor, South Carolina. Ang ubang mga estado sa Habagatan miapil sa sibil nga gubat batok sa Amihanang Estado. Sa wala madugay, ang mga estado sa Habagatan nangayo og tabang gikan sa Britanya. Dugang pa, daghan sa mga ulipon diha sa Habagatan miapil sa kasundalohan sa Amihanan ug nakig-away batok sa ilang kanhi nga mga agalon. Ang Gubat Sibil sa Amerika milungtad hangtud 1865 ug miresulta sa kamatayon sa mga 620,000–750,000 ka mga sundalo. Laing porsyon niini nga panagna pagatumanon pa ug nagpasabut sa dagkong mga kalamidad ug mga gubat nga maoy makahatag og katapusan sa tanang nasud.

• Unsa nga doktrina ang atong makat-unan gikan niini nga istorya mahitungod sa mga panagna sa mga propeta sa Ginoo? (Ang mga estudyante kinahanglan nga moila sa doktrina nga susama sa mosunod: Ang mga panagna sa mga propeta sa Ginoo matuman ang tanan.)

• Unsa nga ubang mga ehemplo ang inyong mahatag nga magpakita nga natuman ang mga panagna sa mga propeta sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 87:5–8. Hangyoa ang klase sa pagsunod, nga mangita kon unsay gisulti sa Ginoo nga mahitabo sa katapusang mga adlaw. Dapita ang mga estudyante sa pag-report sa unsay ilang nakit-an.

• Sumala sa mga bersikulo 6–7, unsa ang pipila ka mga rason nga gihatag sa Ginoo alang niining trahedya nga nahitabo? (Ang pulong nga “pagpanton” gikan sa Dios sa bersikulo 6 nagpasabut sa kamatuoran nga ang Ginoo migamit sa Iyang mga paghukom sa pag-aghat sa mga tawo sa paghinulsol ug sa pagsilot sa dautan.)

• Sumala sa bersikulo 8, unsay gisugo sa Ginoo nga atong buhaton aron kita makaandam alang sa mga gubat ug mga katalagman nga mahitabo sa katapusang mga adlaw? (Tabangi ang mga estudyante nga makakita sa mosunod nga kamatuoran: Ang Ginoo misugo nato sa pagbarug sa balaang mga dapit ug dili mobalhin.)

• Unsa kaha ang gipasabut alang nato nga “mobarug … sa balaan nga mga dapit ug “ayaw pagbalhin” (bersikulo 8)?

• Unsa ang pipila ka balaan nga mga dapit nga makahatag kanato og kalinaw ug seguridad?

Dapita ang mga estudyante sa pagpakigbahin sa mga kasinatian diin ilang gibati nga napanalanginan sa kalinaw o kaluwasan pinaagi sa pagbarug sa balaan nga dapit. Dapita ang mga estudyante sa paghimo og tumong sa pagbarug niining balaan nga mga dapit pirme ug sa pagpalig-on sa ilang mga paningkamot nga dili mobalhin gikan niini.

Tapusa pinaagi sa pagpakigbahin sa imong pagpamatuod mahitungod sa mga kamatuoran nga nahibaloan diha sa leksyon karon.