Leksyon 40: Doktrina ug mga Pakigsaad 102; 104

“Leksyon 40: Doktrina ug mga Pakigsaad 102; 104,” Manwal sa Magtutudlo sa Doktrina ug mga Pakigsaad (2017)

“Leksyon 40,” Manwal sa Magtutudlo sa Doktrina ug mga Pakigsaad

Leksyon 40

Doktrina ug mga Pakigsaad 102; 104

Pasiuna ug Timeline

Sukad sa panahon nga naorganisar ang Simbahan niadtong Abril 6, 1830, si Propeta Joseph Smith mipahigayon og mga komperensya kauban sa mga lider sa priesthood sa paghukom kabahin sa importanting mga butang sa Simbahan. Ang misunod nga mga pagpadayag naghatag og dugang katin-awan sa tahas ug sa buluhaton sa mga lider sa priesthood sa pagpangalagad sa Simbahan (tan-awa sa D&P 107:59–100; tan-awa usab sa D&P 107, sa ulohan nga seksyon). Pinasubay sa pagpadayag nga gihatag pagka Nobyembre 1831 (tan-awa sa D&P 107:78–79; tan-awa usab sa D&P 107, ulohan nga seksyon), pagka Pebrero 17, 1834, si Propeta Joseph Smith miorganisar sa unang high council, nga gisunod subay sa han-ay sa karaang mga council nga iyang nakita sa panan-awon. Ang minutes (o mugbong sulat nga pahinumdom) niana nga miting giusab sa Propeta ug girekord diha sa Doktrina ug mga Pakigsaad 102.

PagkaAbril 1832, agig pagsunod sa sugo sa Ginoo, si Propeta Joseph Smith miorganisar sa Nagkahiusang Kapunongan nga modumala sa mga pagpadagan sa patigayon sa Simbahan. Sa sayo nga bahin sa tuig 1834 ang Nagkahiusang Kapunongan nag-atubang og lisud kaayo nga mga problemang pinansyal, ug atol sa miting nga gipahigayon pagka Abril 10, 1834, ang mga sakop sa Nagkahiusang Kapunongan mihukom sa pagbungkag sa organisasyon. Hinoon, duha ka semana ang milabay, ang propeta nakadawat og pagpadayag, nga narekord sa Doktrina ug mga Pakigsaad 104, diin misugo ang Ginoo nga ang kapunungan iorganisar pag-usab ug mitambag sa mga lider sa Simbahan nga bayaran ang ilang mga utang ug moatiman sa mga kabus.

Marso–Abril, 1832Siyam ka lider sa priesthood ang gisugo pinaagi sa pagpadayag nga i-establisar ang Nagkahiusang Kapunongan (nailhan usab nga Nagkahiusang Han-ay) aron modumala sa negosyo ug sa mga buluhaton sa pagmantala sa Simbahan (tan-awa sa D&P 78; 82).

Tinglarag sa 1833Ang mga Santos sa Distrito sa Jackson, Missouri, gipugos sa pagpalayas gikan sa ilang panimalay.

Pebrero 17, 1834Giorganisar ni Propeta Joseph Smith ang unang high council sa Kirtland, Ohio. Ang Doktrina ug mga Pakigsaad 102 naglangkob sa minutes [mga rekord sa miting], o mugbong sulat pahinumdom, bahin sa miting nga giusab sa Propeta.

Abril 10, 1834Tungod sa pinansyal nga mga kalisdanan, ang mga sakop sa Nagkahiusang Kapunongan mihukom sa pagbungkag sa organisasyon.

Abril 23, 1834Ang Doktrina ug mga Pakigsaad 104 nadawat.

Mayo 5, 1834Si Propeta Joseph Smith mibiya sa Kirtland, Ohio, kauban sa Campo sa Israel (gitawag sa wala madugay og Zion’s Camp) aron mobiyahe ngadto sa Missouri.

Mga Sugyot alang sa Pagtudlo

Doktrina ug mga Pakigsaad 102:1–34

Giorganisar ni Propeta Joseph Smith ang unang high council pinaagi sa pagpadayag

Isulat sa pisara ang mga pulong nga Ang pamaagi sa kalibutan ug Ang pamaagi sa Ginoo. Hangyoa ang mga estudyante sa pagpaambit og mga ehemplo sa paghimo og mga butang sa pamaagi sa kalibutan ug sa mga ehemplo sa paghimo og mga butang sa pamaagi sa Ginoo.

Nganong importante kanato ang paghimo og mga butang sa pamaagi sa Ginoo?

Dapita ang mga estudyante samtang magtuon sila sa Doktrina ug mga Pakigsaad 102 ug sa 104 sa pagpangita sa doktrina ug mga baruganan nga makatabang nila aron mas makasabut sa pamaagi sa Ginoo sa paghimo og mga butang.

Ipasabut nga sa wala madugay human sa pagkaorganisar sa Simbahan, gisunod ni Propeta Joseph Smith ang mga instruksyon sa Ginoo sa paghimo og panagsa nga mga komperensya sa Simbahan. Kini nga mga komperensya gitambungan ni bisan kinsang anaa nga mga elder ug mga high priest, kinsa mitabang sa pagdesisyon sa mahinungdanong mga butang sa Simbahan, lakip ang sa kon unsaon sa pagdisiplina ang mga miyembro nga nakahimo og seryusong mga sala. Hinoon, ang uban sa mga nanambong “naghinunghungay sa usag usa, klaro nga wala kauyon, o gani mibiya dapit sa tunga-tunga sa sesyon sa council. Personal paghukom ug mga kahuyang nakapalisud usab sa pagpangita sa kabubut-on sa Ginoo” (Joseph F. Darowski ug James Goldberg, “Restoring the Ancient Order,” sa Revelations in Context, ed. Matthew McBride and James Goldberg [2016], 208–10, o history.lds.org).

Ngano kahang lisud sa ingon niini nga mga kahimtang ang paghisgot og sagradong mga butang ug paghimo og importanting mga desisyon?

Dapita ang usa ka estudyante sa pagbasa og kusog sa mosunod nga parapo [paragraph]:

Pagka Pebrero 12, 1834, si Propeta Joseph Smith nakigkita sa mga high priest ug sa mga elder sa Simbahan didto sa iyang balay sa Kirtland. Gisultihan sila sa Propeta nga nasagmuyo siya sa kinaiya niadtong nanambong sa mga miting sa council. Mipasabut siya nga tungod kay wala sila mosunod sa sundanan sa Ginoo sa pagpahigayon og mga council, posibling mawagtangan sila og daghang panalangin. Lima ka adlaw human niadto, nakigmiting na usab si Joseph Smith sa mga high priest ug sa mga elder didto sa iyang balay. Giorganisar niya ang usa ka council “sumala sa balaod sa Dios” nga nadawat na niya sa una (tan-awa sa D&P 107:78–79). Gisultihan dayon sa Propeta kadtong mga mitambong nga “ipakita niya ang han-ay sa mga council sa karaang mga panahon” nga gibase sa panan-awon nga iyang nakita kang Apostol Pedro ug sa iyang mga magtatambag nga nagdumala sa usa ka council sa Jerusalem (sa “Minute Book 1,” 29, josephsmithpapers.org).

Dapita ang usa ka estudyante sa pagbasa og kusog sa Doktrina ug mga Pakigsaad 102:1–2. Hangyoa ang klase sa pagsunod, nga mangita sa matang sa council nga gipahiuli ni Propeta Joseph Smith.

Unsa nga council ang giorganisar sa Propeta nga gibase sa karaang sundanan?
Giunsa man sa pagpili ang high council?
Sumala sa bersikulo 2, unsa ang usa ka katuyoan sa high council?

Ipasabut nga ang mga high council nagserbisyo sa lain-laing mga katuyoan, daghan niini mga pang-administratiba. Hinoon, usa sa importanting katuyoan mao ang pagtabang sa kapangulohan sa “paghusay sa mahinungdanon nga mga kalisdanan” (bersikulo 2) pinaagi sa pagpaghigayon og mga disciplinary council alang sa mga miyembro nga nakahimo og seryusong mga sala.

Aron matabangan ang mga estudyante nga makasabut sa katuyoan sa mga disciplinary council, dapita ang usa ka estudyante sa pagbasa og kusog sa mosunod nga pamahayag:

“Ang mga katuyoan sa mga disciplinary council mao ang pagluwas sa mga kalag sa mga malapason, pagpanalipud sa inosente, ug pagpanalipud sa kalimpyo, kaligdong, ug sa maayong pangalan sa Simbahan.

“… Pinaagi niini nga proseso ug pinaagi sa Pag-ula ni Jesukristo, ang usa ka miyembro mahimo nga makadawat og pasaylo sa mga sala, makabaton pag-usab og kalinaw sa hunahuna, ug makabaton og kalig-on sa paglikay sa umaabot nga kalapasan” (Matinud-anon sa Tinuhoan: Usa ka Pakisayran sa Ebanghelyo [2004], 106).

I-summarize ang Doktrina ug mga Pakigsaad 102:3–11 pinaagi sa pagpasabut nga ang bersikulo 3 naglista sa mga sakop sa unang high council ug nga ang mga bersikulo 6–11 nag-outline kon sa unsang paagi idumala sa council ang pagkabakante ug kon si kinsa ang modumala.

Dapita ang mga estudyante sa pagbasa og hilum sa Doktrina ug mga Pakigsaad 102:12–14 nga mangita kon sa unsang paagi ang high council mohukom sa han-ay sa mga mamulong atol sa mga disciplinary council. Hangyoa ang mga estudyante nga moreport sa ilang nakit-an.

Dapita ang usa ka estudyante sa pagbasa og kusog sa Doktrina ug mga Pakigsaad 102:15–18. Hangyoa ang klase sa pagsunod, nga mangita kon nganong ang mga high councilor nagbunot-bunot og numero.

Base niini nga mga bersikulo, unsay atong makat-unan mahitungod sa pamaagi sa paghimo og mga disciplinary council?

I-summarize ang Doktrina ug mga Pakigsaad 102:20–22 pinaagi sa pagpasabut nga kini nga mga bersikulo naghulagway kon unsaon sa pagpadayon kon dunay mga sakop sa council mobati nga dili sigurado mahitungod sa desisyon sa council.

Dapita ang usa ka estudyante sa pagbasa og kusog sa Doktrina ug mga Pakigsaad 102:23. Hangyoa ang klase sa pagsunod, nga mangita kon unsay angay buhaton sa council bahin sa mga kalisdanan nga motumaw sulod sa Simbahan. Dapita ang mga estudyante sa pagreport sa unsay ilang nakit-an.

Ipasabut nga ang mga pulong nga “ang presidente” diha sa bersikulo 23 nagpasabut kang Propeta Joseph Smith, nga maoy nangulo sa unang high council sa Kirtland, Ohio. Isip Presidente sa Simbahan, siya dunay awtoridad nga “magpakisayud ug makadawat sa hunahuna sa Ginoo pinaagi sa pagpadayag” bahin sa “doktrina o baruganan” ingon man usab sa mga sugo nga gihatag ngadto sa Simbahan (bersikulo 23; tan-awa usab sa D&P 28:2). Agig dugang, makat-unan usab nato ang usa ka mas lapad nga kamatuoran gikan sa bersikulo 23 nga may kalabutan sa tahas sa mga indibidwal (sama sa mga presidente sa stake) nga maoy mangulo sa lokal nga mga council sa Simbahan ug kinahanglang maoy mohukom bahin sa mga butang ubos sa ilang hurisdiksyon.

Unsa nga kamatuoran ang narekord diha sa bersikulo 23 mahitungod sa tahas niadtong mangulo sa mga council sa Simbahan? (Tabangi nga makita sa mga estudyante ang mosunod nga kamatuoran: Kadtong mangulo sa mga council sa Simbahan pwede nga makapangayo ug makadawat og pagpadayag sa Ginoo.)
Ngano kaha nga importante man alang kanato nga makasabut niini nga kamatuoran?

I-summarize ang Doktrina ug mga Pakigsaad 102:27–34pinaagi sa pagpasabut nga ang mga desisyon sa konseho sa disciplinary council sa stake mahimong i-apelar sa Unang Kapangulohan (tan-awa sa bersikulo 27).

Doktrina ug mga Pakigsaad 104:1–77

Ang Ginoo mihatag og mga instruksyon mahitungod sa Nagkahiusang Kapunongan

Dapita ang mga estudyante sa paghunahuna sa mga pakigsaad nga ilang gihimo uban sa Ginoo. Hangyoa sila sa pagpasabut nganong importante ang pagtuman sa ilang mga pakigsaad. Dapita sila sa pagpangita og doktrina ug mga baruganan samtang magtuon sila sa Doktrina ug mga Pakigsaad 104 nga makatabang nila sa pagtuman niini nga mga pakigsaad.

Sultihi ang mga estudyante nga niadtong tingpamulak sa tuig 1832, agig pagsunod sa sugo sa Ginoo, si Propeta Joseph Smith miorganisar sa Nagkahiusang Kapunongan, nga maoy responsable sa pagdumala sa mga pagpadagan sa patigayon sa Simbahan. Ang mga lider sa Priesthood nga gitawag sa pagserbisyo sa Nagkahiusang Kapunongan mihimo niini pinaagi sa paghimo og “mahangturong pakigsaad” (tan-awa sa D&P 78:11–12; 82:11, 15).

Dapita ang usa ka estudyante sa pagbasa og kusog sa mosunod nga parapo [paragraph]:

“Pagka 1834, ang [Nagkahiusang Kapunongan] nag-atubang og ubay-ubay nga dagkong problema. Tungod sa kabangis nga mipalagpot sa mga miyembro sa Simbahan gikan sa Distrito sa Jackson niadtong ting-init ug tinglarag sa tuig 1833, ang imprintahanan ni William W. Phelps ug ang tindahan ni [Sidney] Gilbertmagnabli. Apan ang kapunongan mao gihapon ang responsable sa mga nautang nga gigamit pagsuplay niini nga mga establisemento.” Ang tindahan ni Newel K. Whitney sa Ohio may dako usab nga utang niining panahona. Agig dugang, duha ka sakop sa Nagkahiusang Kapunongan sa Missouri gipasanginlan nga wala motabang sa mga kabus ug nanginahanglan, nga sa ingon niana nakasupak sa ilang mga pakigsaad. Pagka Abril 10, 1834, ang mga miyembro sa Nagkahiusang Kapunongan sa Kirtland mihukom sa pagbungkag sa kapunongan (tan-awa sa The Joseph Smith Papers, Documents, Volume 4: Abril 1834–Septyembre 1835, ed. Matthew C. Godfrey ug ang uban [2016], 20-21). Niadtong Abril 23, nadawat sa Propeta ang pagpadayag nga narekord sa Doktrina ug mga Pakigsaad 104, diin gitambagan sa Ginoo ang mga sakop sa Nagkahiusang Kapunongan.

Ipasabut nga “ubos sa direksyon ni Joseph Smith, ang mga pulong nga ‘Nagkahiusang Kapunongan’ sa wala madugay gipulihan og ‘Nagkahiusang Han-ay’ diha sa pinadayag” (D&P 104, ulohan nga seksyon).

Ipares-pares ang mga estudyante, ug dapita sila sa pagbasa sa Doktrina ug mga Pakigsaad 104:1–10. Hangyoa ang usa ka estudyante sa matag pares sa pagpangita sa mga saad sa Ginoo ngadto sa mga miyembro sa Nagkahiusang Kapunongan kinsa mituman sa ilang mga pakigsaad, ug paghangyo sa laing estudyante sa pagpangita sa mga pasidaan sa mga miyembro kinsa misupak sa ilang mga pakigsaad. Human sa igo nga panahon, dapita ang mga estudyante sa pagreport sa unsay ilang nakit-an.

Base sa mga gisaad sa Ginoo diha sa bersikulo 2, unsa ang Iyang ihatag kanato kon magmatinud-anon kita sa atong mga pakigsaad? (Tabangi ang mga estudyante sa pagpangita sa mosunod nga baruganan: Kon magmatinud-anon kita sa atong mga pakigsaad, ang Ginoo mohatag kanato og daghang panalangin. Isulat sa pisara kini nga baruganan.)
Sa unsang paagi ang paghinumdom sa mga gisaad sa Ginoo nga mga panalangin makatabang nato sa pagkahimong matinud-anon sa atong mga pakigsaad?
Unsa nga mga panalangin ang inyong nadawat dihang nagmatinud-anon kamo sa inyong mga pakigsaad?

Awhaga ang mga estudyante sa pagdesisyon na karon nga magmatinud-anon sa pagtuman sa ilang mga pakigsaad aron ilang mapadayon ang pagdawat sa mga panalangin sa Ginoo.

Dapita ang usa ka estudyante sa pagbasa og kusog sa Doktrina ug mga Pakigsaad 104:11–14. Hangyoa ang klase sa pagsunod, nga mangita sa responsibilidad nga gihatag sa Ginoo ngadto sa mga miyembro sa Nagkahiusang Kapunongan.

Sumala sa bersikulo 11–12, ngano nga ang Ginoo “mitudlo” og tinugyanan sa matag sakop sa Nagkahiusang Kapunongan?
Unsa nga doktrina ang gipamahayag sa Ginoo diha sa bersikulo 14? (Kinahanglang makit-an sa mga estudyante ang mosunod nga doktrina: Ang Ginoo milalang sa yuta, ug ang tanang mga butang nga anaa niini Iyaha.)
Ngano kaha nga makatabang man sa mga miyembro sa Nagkahiusang Kapunongan ang pagkahibalo ug paghinumdom niini nga doktrina?

Dapita ang usa ka estudyante sa pagbasa og kusog sa Doktrina ug mga Pakigsaad 104:15–18. Hangyoa ang klase sa pagsunod, nga mangita kon sa unsang paagi gisugo sa Ginoo ang Iyang mga sulugoon nga gamiton ang mga kapanguhaan nga anaa sa yuta. Dapita ang pipila ka mga estudyante sa pagreport unsay ilang nakit-an.

Unsa ang pamaagi sa Ginoo sa pagsangkap alang sa mga kabus ug timawa?
Unsa nga mga baruganan ang atong makat-unan gikan niini nga mga bersikulo mahitungod sa atong responsibilidad sa pagtabang sa uban? (Tabangi ang mga estudyante sa pagpangita sa mosunod nga baruganan: Kinahanglan nga gamiton nato kon unsa man ang gihatag sa Ginoo kanato sa pagtabang sa uban.)

I-summarize ang Doktrina ug mga Pakigsaad 104:19-53 pinaagi sa pagpasabut nga ang Ginoo mi-outline og piho nga mga buluhaton nga gihatag ngadto sa mga sakop sa Nagkahiusang Kapunongan. Isulat sa pisara ang mosunod nga mga pakisayran: D&P 104:23, 25, 31, 33, 35, 38, 42, 46. Dapita ang mga estudyante sa pagpangita og hilum niini nga mga bersikulo, nga mangita sa saad nga gihatag sa Ginoo ngadto sa mga miyembro sa Nagkahiusang Kapunongan. Hangyoa ang mga estudyante nga moreport sa ilang nakit-an.

Ngano kaha nga ang gihatagan sa Ginoo og gibug-aton ang mga pulong nga “Ako mopilo-pilo sa mga panalangin diha kanila” (bersikulo 33)?

I-summarize ang Doktrina ug mga Pakigsaad 104:47–77 pinaagi sa pagpasabut nga misugo ang Ginoo sa Nagkahiusang Kapunongan sa Kirtland nga ibulag ang ilang kaugalingon gikan sa Nagkahiusang Kapunongan sa Missouri. Gisultihan usab sa Ginoo ang mga sakop sa Nagkahiusang Kapunongan nga kinahanglan silang motabang sa “pag-imprinta sa mga pulong [sa Ginoo]” ug “[pagtukod] sa [Iyang] Simbahan” (mga bersikulo 58–59). Misugo usab Siya kanila sa pag-establisar og “mga tipiganan,” o mga sugilanon, bahin sa kwarta nga ilang gikita gikan sa ilang pagkatinugyanan (mga bersikulo 60–68).

Doktrina ug mga Pakigsaad 104:78–86

Ang Ginoo misugo sa mga lider sa Simbahan kabahin sa mga utang sa Nagkahiusang Kapunongan

Pahinumdumi ang mga estudyante nga niadtong tingpamulak sa tuig 1834, daghan og utang ang Nagkahiusang Kapunongan. Ang daghang hitabo, sama sa kalihokan sa manggugubot sa Missouri, maoy nakapugong nga mabayaran ang mga utang.

Dapita ang klase sa pagbasa og hilum sa Doktrina ug mga Pakigsaad 104:78, nga mangita sa instruksyon sa Ginoo kabahin sa mga utang sa Simbahan.

Unsay gisugo sa Ginoo nga buhaton sa mga sakop sa Nagkahiusang Kapunongan?

Ipasabut nga ang pagbayad niini nga mga utang daw nakita nga imposible alang niini nga mga Santos. Dapita ang usa ka estudyante sa pagbasa og kusog sa Doktrina ug mga Pakigsaad 104:79–82. Hangyoa ang klase a pagsunod, nga mangita kon unsay gisulti sa Ginoo nga buhaton sa mga Santos kon sila “mapainubsanon ug matinud-anon ug motawag diha sa [Iyang] ngalan” (bersikulo 82) samtang nagtinguha sila sa pagbayad sa ilang mga utang.

Unsa nga baruganan ang atong makat-unan gikan sa saad sa Ginoo kabahin sa kon unsay Iyang buhaton kanato kong mapaubsanon ug matinud-anon kita ug motawag sa Iyang ngalan? (Kinahanglan nga makit-an sa mga estudyante ang usa ka baruganan nga susama sa mosunod: Kon mapaubsanon ug matinud-anon kita ug motawag sa ngalan sa Ginoo, Iya kitang tabangan sa pagtuman sa Iyang mga sugo.)

Tapusa pinaagi sa pagpamatuod bahin sa doktrina ug mga baruganan nga nakita dinhi niini nga leksyon. Dapita ang mga estudyante nga lihukon kini nga mga kamatuoran.