Niadtong ting-init sa 1831, gidumala ni Propeta Joseph Smith ang pagpahinungod sa yuta sa Independence, Missouri, diin i-establisar sa mga Santos ang Zion. Sa dihang mibalik ang Propeta sa Kirtland, Ohio, pagka-Agosto 27, ang mga Santos didto matinguhaon nga makat-on pa og dugang kabahin niining bag-o nga yuta ug sa ilang tahas sa pag-establisar sa Zion.
Subo lang, sa panahon nga wala ang Propeta ang pipila ka mga miyembro sa Simbahan sa Kirtland Ohio misupak sa mga sugo sa Ginoo ug mibuhat og seryuso nga mga sala. Pagka-Agosto 30, 1831, nadawat sa Propeta ang pinadayag nga narekord diha sa Doktrina ug mga Pakigsaad 63, diin mipasidaan ang Ginoo sa mga Santos mahitungod sa mga sangputanan sa pagkadautan ug pagsukol. Gisultihan usab sa Ginoo ang mga Santos unsaon sa pagpangandam sa pagpundok ngadto sa Zion ug pagpangandam alang sa Iyang Ikaduhang Pag-anhi
Hulyo 14, 1831Si Joseph Smith ug ang uban miabut sa Independence, Missouri.
Agosto 2–3, 1831Ang yuta sa Distrito sa Jackson, Missouri, gipahinungod alang sa pag-establisar sa Zion, ug ang usa ka dapit alang sa templo gipahinungod diha sa Independence, Missouri.
Agosto 27, 1831Si Joseph Smith ug Oliver Cowdery mibalik ngadto sa Kirtland, Ohio.
Mipasidaan ang Ginoo mahitungod sa mga sangputanan sa pagkadautan ug misaad sa mga matinud-anon og usa ka kabilin
Ipakita o isulat sa pisara ang mosunod nga mga pangutana:
Nganong ang ubang mga tawo nga kanhi matinud-anon ngadto sa Ginoo mohunong man sa pagsunod Kaniya?
Unsa ang nakatabang kaninyo sa pagsunod sa mga sugo sa Ginoo ug sa pagpabiling matinud-anon ngadto Kaniya?
Dapita ang mga estudyante sa pagpamalandong niini nga mga pangutana, ug dayon hangyoa ang usa o duha ka mga estudyante sa pagpaambit sa ilang mga hunahuna. Awhaga ang mga estudyante sa pagpangita og mga kamatuoran samtang magtuon sila sa Doktrina ug mga Pakigsaad 63 nga makatabang kanila nga makasabut unsa ang mahimo nilang buhaton aron magpabiling matinud-anon ngadto sa Ginoo ug nganong importante ang pagbuhat niini.
Ipasabut nga pagka-Agosto 27, 1831, sa dihang mibalik ang Propeta sa Kirtland, Ohio, human sa iyang biyahe ngadto sa Missouri, iyang nakita nga ang pipila sa mga Santos sa Ohio nahisalaag ngadto sa pagpakasala ug mi-apostasiya samtang wala siya. Tulo ka adlaw human miabut sa Kirtland, nadawat ni Joseph Smith ang pinadayag nga narekord diha sa Doktrina ug mga Pakigsaad 63.
Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 63:1–6. Hangyoa ang klase sa pagsunod, nga mangita kon unsay gisulti sa Ginoo ngadto sa mga misukol Kaniya.
Unsaon man ninyo pag-summarize ang gisulti sa Ginoo mahitungod niadtong misukol?
Ipasabut nga ang pipila niadtong mi-apostasiya misugod sa pagpamulong diha sa publiko batok ni Joseph Smith ug sa ubang mga lider sa Simbahan. Sama pananglit, sa tunga-tungang bahin sa Oktubre 1831, ang usa ka mi-apostasiya nga ginganlan og Ezra Booth nahimong usa sa labing banha nga mga kritiko ug ang una nga mimantala og literatura batok sa mga Mormon. Si Booth kaniadto usa ka Methodist nga tigsangyaw sa Ohio ug nahimong interesado sa Pagpahiuli human mabasa ang Basahon ni Mormon. Sa tingpamulak sa 1831, mibiyahe siya ngadto sa Kirtland uban ni John ug Alice (Elsa) Johnson aron makighimamat ni Joseph Smith. Atol sa ilang pagbisita iyang nasaksihan ang Propeta nga miayo sa naangol nga bukton ni Alice, ug wala madugay human makasaksi niini nga milagro, nabunyagan siya. (Tan-awa sa Manuscript History of the Church, vol. A-1, p. 153–54, josephsmithpapers.org; tan-awa usab sa “History of Brigham Young,” Millennial Star, Dis. 31, 1864, 834.)
Dapita ang usa ka estudyante sa pagbasa og kusog sa Doktrina ug mga Pakigsaad 63:7–9. Hangyoa ang klase sa pagsunod, nga mangita kon unsay gitudlo sa Ginoo mahitungod sa relasyon tali sa pagtuo ug mga timailhan.
Sumala niini nga mga bersikulo, nganong ang ubang mga Santos sa Kirtland nanlimbasug man sa ilang pagtuo?
Unsa nga doktrina ang gitudlo sa Ginoo niini nga mga bersikulo kabahin sa pagtuo ug mga timailhan? (Siguroa nga ang mga estudyante mahibalo sa mosunod nga kamatuoran: Ang pagtuo dili moabut tungod sa mga timailhan.)
Nganong ang malungtaron nga pagtuo dili man moabut gikan sa pagsaksi og mga timailhan?
Ipasabut nga si Ezra Booth usa ka ehemplo sa tawo nga nagsalig sa mga timailhan kay sa pagtuo. Human sa iyang bunyag, nadawat niya ang priesthood ug gipadala og misyon ngadto sa Missouri. Klaro nga naglaum siya nga makakabig og daghan pinaagi sa pagpakita og mga timailhan ug paghimo og mga milagro. Hinoon, human magsangyaw sulod sa mubong panahon ug wala makakita sa mga resulta nga iyang gipaabut, nasagmuyo si Booth ug mi-apostasiya sa wala madugay. (Tan-awa sa Manuscript History, vol. A-1, p. 153–54, josephsmithpapers.org.)
Dapita ang mga estudyante sa pagbasa og hilum sa Doktrina ug mga Pakigsaad 63:10–12, nga mangita og dugang nga kamatuoran nga gitudlo sa Ginoo mahitungod sa mga timailhan ug pagtuo.
Unsang dugang nga doktrina ang gitudlo sa Ginoo niini nga mga bersikulo mahitungod sa mga timailhan ug pagtuo? (Human makatubag ang mga estudyante, isulat sa pisara ang mosunod nga kamatuoran: Ang mga timailhan moabut pinaagi sa hugot nga pagtuo sumala sa kabubut-on sa Dios.)
Nganong importante man nga hinumduman nga ang mga timailhan moabut sumala sa kabubut-on sa Dios kay sa atong kabubut-on?
Sa unsang paagi kaha nahimong lahi ang misyon ni Ezra Booth kon nakasabut ug mituo siya niini nga kamatuoran?
Ipasabut nga agig dugang sa pagpangita og mga timailhan, daghang mga miyembro sa Simbahan “ang wala mosunod sa … mga sugo [sa Dios]” (D&P 63:13) samtang wala ang Propeta. Dapita ang mga estudyante sa pagbasa og hilum sa Doktrina ug mga Pakigsaad 63:14–16, nga mangita sa usa ka sala nga nabuhat sa ubang mga miyembro. Hangyoa ang mga estudyante sa pag-report kon unsay ilang makit-an.
Sumala sa bersikulo 16, unsay mahitabo niadtong dili maghinulsol sa pagpanapaw? (Mawad-an sila sa Espiritu ug molimud sa hugot nga pagtuo.)
Ipasabut nga sa gibana-bana nga unom ka bulan ang milabay, sa usa ka pagpadayag ngadto ni Propeta Joseph Smith, ang Ginoo misugo sa mga Santos nga dili magpanapaw ug dili motan-aw nga may kahigal (tan-awa sa D&P 42:22–26), apan klaro nga ang uban sa mga Santos wala mopatalinghug sa sugo sa Ginoo.
Dapita ang usa ka estudyante sa pagbasa og kusog sa Doktrina ug mga Pakigsaad 63:17–19. Hangyoa ang klase sa pagsunod, nga mangita kon unsa pa ang gisulti sa Gino nga mahitabo niadtong mibuhat og seryusong mga sala.
Ngano kaha nga ang Ginoo prangka man kaayo sa mga Santos samtang namulong Siya kanila mahitungod sa mga sangputanan sa sala?
Ipasabut nga bisan tuod ang ubang mga miyembro sa Kirtland nakahimo og seryusong mga sala ug mi-apostasiya samtang wala ang Propeta, ang kadaghanan sa mga Santos nagpabiling matinud-anon. Dapita ang usa ka estudyante sa pagbasa og kusog sa Doktrina ug mga Pakigsaad 63:20–21. Hangyoa ang klase sa pagsunod, nga mangita kon unsay gisaad sa Ginoo niadtong magpabiling matinud-anon ug mobuhat sa Iyang kabubut-on. Sa dili pa mobasa ang estudyante, ipasabut nga ang mga pulong nga “adlaw sa pagkabalhin sa panagway” diha sa bersikulo 20 nagpasabut sa panahon nga ang Ginoo moanhi pag-usab ug ang yuta makadawat sa iyang paraisohanon nga himaya.
Unsa nga baruganan ang atong mahibaloan sa bersikulo 20 mahitungod sa unsay buhaton sa Ginoo alang kanato kon molahutay kita diha sa pagtuo ug mobuhat sa Iyang kabubut-on? (Ang mga estudyante kinahanglang mahibalo og baruganan nga sama sa mosunod: Kon molahutay kita diha sa pagtuo ug mobuhat sa kabubut-on sa Ginoo, atong mabuntog ang kalibutan ug makadawat og kabilin gikan sa Ginoo. [Tan-awa usab sa D&P 63:47.])
Unsay gipasabut sa mga pulong nga “makabuntog sa kalibutan”? (Makabuntog sa mga sala ug mga tintasyon sa kalibutan.)
Hangyoa ang mga estudyante sa pagpamalandong kon sa unsang paagi ang ilang hugot nga pagtuo sa Langitnong Amahan ug sa Manluluwas nakatabang kanila sa pagbuntog sa mga tintasyon ug mga hagit nga ilang giatubang. Ikonsiderar ang pagdapit sa usa o duha ka estudyante sa pagpaambit sa ilang mga kasinatian kalabut niini nga baruganan. (Pahinumdumi ang mga estudyante nga dili ipaambit ang bisan unsa nga personal ra kaayo.)
Mitudlo ang Ginoo sa mga Santos mahitungod sa pag-establisar sa Zion ug misaad og mga panalangin sa mga matinud-anon
Dapita ang mga estudyante sa paghunahuna og higayon dihang nabalaka sila mahitungod sa usa ka lisud nga buluhaton. Dapita ang pipila ka estudyante sa pagpaambit kon unsay ilang gibuhat sa dihang nag-atubang niini nga buluhaton.
Ipasabut nga sa dihang si Propeta Joseph Smith mibalik sa Kirtland, bisan pa sa mga sala ug mga pag-apostasiya sa pipila ka mga miyembro sa Simbahan didto, daghang mga Santos ang matinguhaon nga masayud unsaon sa pagtuman sa sugo sa Ginoo sa pag-establisar sa Zion. Dapita ang mga estudyante sa pagbasa og hilum sa ulohan sa seksyon alang sa Doktrina ug mga Pakigsaad 63, nga mangita kon unsay gibuhat sa Propeta sa dihang nag-atubang siya niini nga mga sirkumstansya.
Dapita ang usa ka estudyante sa pagbasa og kusog sa Doktrina ug mga Pakigsaad 63:22–23. Hangyoa ang klase sa pagsunod, nga mangita sa tubag nga gihatag sa Ginoo ngadto sa Propeta.
Sumala sa bersikulo 23, unsaon nato pagkahibalo sa kabubut-on sa Ginoo ug sa mga misteryo sa Iyang gingharian? (Tabangi ang mga estudyante nga mahibalo sa mosunod nga baruganan: Kon mosunod kita sa mga sugo, ang Ginoo motabang kanato nga masayud sa Iyang kabubut-on ug sa mga misteryo sa Iyang gingharian.)
Unsa ang mga misteryo sa gingharian sa Ginoo? (Diha sa konteksto sa ebanghelyo, ang mga misteryo mao ang mga kamatuoran nga mahimo lang mahibaloan ug masabtan pinaagi sa pagpadayag.)
Unsa ang kahulugan sa mga pulong nga “ang mao maanaa diha kaniya ang usa ka atabay sa buhi nga tubig, nga magtubod ngadto sa walay katapusan nga kinabuhi” (D&P 63:23)? (Kon gikinahanglan, ipasabut nga ang “buhi nga tubig” nagpasabut sa mga kamatuoran mahitungod sa Dios ug sa Iyang gingharian nga makatabang kanato nga mahimong sama sa Dios ug makaangkon og kinabuhing dayon.)
Dapita ang usa ka estudyante sa pagbasa og kusog sa Doktrina ug mga Pakigsaad 63:24–27. Hangyoa ang klase sa pagsunod, nga mangita sa tambag nga gihatag sa Ginoo mahitungod sa pag-establisar sa Zion.
Unsa nga tambag ang gihatag sa Ginoo ngadto sa mga Santos mahitungod sa pag-establisar sa Zion?
Ipasabut nga diha sa Doktrina ug mga Pakigsaad 63:28–48, ang Ginoo misulti sa mga Santos nga dili mogamit og pwersa sa pag-angkon sa yuta diha sa Zion. Misulti usab ang Ginoo sa mga Santos sa pagpundok ngadto sa Zion alang sa proteksyon sa ulahing mga adlaw. Dugang pa, ang ubang mga Santos gisultihan sa paghimo og mga pagpangandam aron sa pagbalhin ngadto sa Missouri sa pagkasunod nga tingpamulak, ug ang uban magpabilin una og dugay-dugay sa Ohio.
Dapita ang usa ka estudyante sa pagbasa og kusog sa Doktrina ug mga Pakigsaad 63:41, 46–48. Hangyoa ang klase sa pagsunod, nga mangita sa dugang nga mga pagtulun-an nga gihatag sa Ginoo sa mga Santos kalabut sa pag-establisar sa Zion.
Sumala sa bersikulo 41, unsaon pagkasayud sa Propeta kon kinsa ang paadtuon sa Zion ug kinsa ang magpabilin sa Ohio?
Unsa nga saad ang gihatag sa Ginoo niadtong andam nga mopadala og kwarta sa pagtabang sa pag-establisar sa Zion?
Ipasabut nga sa Doktrina ug mga Pakigsaad 63:49–54, ang Ginoo misaad og mga panalangin sa mga matinud-anon nga mamatay sa wala pa ang Iyang Ikaduhang Pag-anhi ingon man usab niadtong buhi pa nianang panahona. Sa mga bersikulo 55–56, ang Ginoo mipanton ni Sidney Rigdon tungod sa iyang garbo. Nakadawat si Sidney og buluhaton sa pagsulat og usa ka deskripsyon sa yuta sa Zion (tan-awa sa D&P 58:50) aron ang mga miyembro sa Simbahan nga nagpuyo sa layo masayud kon sama sa unsa ang yuta. Kini nga deskripsyon gamiton sa pagdasig sa mga Santos nga modonar og kwarta aron ipalit og yuta sa Missouri. Ang unang paningkamot ni Sidney wala gibuhat sa paagi nga gitudlo sa Ginoo, mao nga gipanton Niya si Sidney ug gisultihan sa pagsulat og lain nga deskripsyon.
Mitudlo si Jesukristo sa Iyang mga sulugoon sa paghinumdom sa kasagrado sa Iyang ngalan
Dapita ang usa ka estudyante sa pagbasa og kusog sa mosunod nga istorya gikan sa kinabuhi ni Presidente Spencer W. Kimball (1895–1985):
Imahe
Presidente Spencer W. Kimball
“Didto sa ospital usa ka adlaw niana gitulod ako sa wheelchair pagawas sa operating room sa usa ka tig-atiman kinsa nadakin-as, ug dihay migawas nga masuk-anong pamalikas nga tunglo gikan sa iyang mga ngabil nga giapilan og ngalan sa Manluluwas. Bisan og danag lang nga pagkamatngon, nahasibug ako ug nangamuyo: ‘Palihug! Palihug! Ako kana nga Ginoo kansang ngalan imong gipanamastamasan’” (Mga Pagtulun-an sa mga Presidente sa Simbahan: Spencer W. Kimball [2006], 195–196).
Sa unsang paagi ang balaanong pagtahud ni Presidente Kimball alang sa ngalan sa Ginoo lahi sa paagi nga gigamit sa kadaghanan sa mga tawo ang ngalan sa Ginoo?
Pagdapit og duha ka estudyante nga magpuli-puli sa pagbasa og kusog sa Doktrina ug mga Pakigsaad 63:59–64. Awhaga ang klase sa pagsunod, nga mangita kon unsay gisulti sa Manluluwas mahitungod sa paggamit sa Iyang ngalan.
Base sa unsay gitudlo sa Ginoo niini nga mga bersikulo, unsa nga kamatuoran ang atong mahibaloan kon sa unsang paagi nato gamiton ang ngalan sa Ginoo? (Human makatubag ang mga estudyante, isulat kini nga doktrina sa pisara: Ang ngalan ni Jesukristo sagrado ug kinahanglan gayud nga ipamulong uban ang pag-amping.)
Ngano kaha nga gimandoan kita sa Ginoo sa paggamit sa Iyang ngalan uban sa balaanong pagtahud?
Sa unsang paagi ang bersikulo 62 nakadugang sa inyong pagsabut kon unsay kahulugan sa kawang nga paggamit sa ngalan sa Ginoo?
Dapita ang mga estudyante sa pagbasa og usab sa hilum nga paagi ang Doktrina ug mga Pakigsaad 63:64, nga mangita og dugang nga mga pagtulun-an nga gihatag sa Ginoo kalabut sa pag-istorya mahitungod sa sagradong mga butang.
Unsa pa ang ubang mga pulong, mga kamatuoran, o mga hilisgutan nga “gikan sa kahitas-an” ug mga sagrado?
Unsaon nato sa pagsiguro nga namulong kita mahitungod niini uban sa pag-amping?
Pagpamatuod sa mga panalangin nga moabut pinaagi sa pagtahud sa ngalan ni Jesukristo diha sa atong pinulongan ug mga lihok. Dapita ang mga estudyante sa pagkonsiderar og piho nga paagi nga magamit o molihok sila sa ngalan sa Ginoo uban sa mas dakong balaanong pagtahud ug pasidungog. Awhaga sila sa pagbuhat niini nga mga hunahuna sa umaabut nga semana.