Niadtong Agosto 17, 1835, ang mga miyembro sa Simbahan sa Kirtland, Ohio, mihimo og espesyal nga miting aron aprobahan ang umaabut nga pagmantala sa Doktrina ug mga Pakigsaad. Atol sa miting ang mga miyembro sa Simbahan mibotar nga iapil diha sa Doktrina ug mga Pakigsaad ang “usa ka pahayag sa pagtuo mahitungod sa mga pangagamhanan ug sa mga balaod” (D&P 134, ulohan sa sekyon). Kini nga pamahayag narekord sa Doktrina ug mga Pakigsaad 134.
Niadtong Hunyo 27, 1844, si Propeta Joseph Smith ug ang iyang igsoon nga si Hyrum, kinsa mao ang Kaabag sa Presidente sa Simbahan ingon man Patriyarka sa Simbahan, gimartir didto sa Carthage, Illinois. Usa ka pahibalo sa pagkamartir gilakip sa 1844 nga edisyon sa Doktrina ug mga Pakigsaad ug gibase sa istorya sa nasaksihan nila ni Elder John Taylor ug Elder Willard Richards, mga sakop sa Korum sa Napulog Duha ka mga Apostoles. Kini nga pahibalo narekord sa Doktrina ug mga Pakigsaad 135.
Niadtong Pebrero 1846, ang mga miyembro sa Simbahan nagsugod sa pagbiya sa Nauvoo ug mibiyahe sa kasadpan tabok sa Teritoryo sa Iowa. Nakadawat si Brigham Young og pagpadayag nga narekord sa Doktrina ug mga Pakigsaad 136didto sa Winter Quarters, Nebraska, niadtong Enero 1847. Niini, ang Ginoo mitambag sa mga Santos sa pag-organisar sa ilang mga kaugalingon ug mangandam sa pagpadayon sa ilang panaw sa kasadpan.
Agosto 17, 1835Ang Doktrina ug mga Pakigsaad 134 giaprobahan nga iapil diha sa Doktrina ug mga Pakigsaad sa mga miyembro sa Simbahan didto sa Kirtland, Ohio.
Hunyo 27, 1844Si Propeta Joseph Smith ug ang iyang igsoon nga si Hyrum Smith gimartir didto sa Bilanggoan sa Carthage, sa Carthage, Illinois.
Ang mga responsibilidad sa mga gobyerno ug sa ilang mga lumulupyo gilatid
Pahinumdom: Ikonsiderar ang pagkanta sa “Praise to the Man” (Hymns,nu. 27) isip kabahin sa debosyonal.
Ipakita o isulat sa pisara ang mosunod nga pangutana, ug dapita ang mga estudyante sa pagtubag: Unsa kaha ang mahitabo kon wala pay gobyerno sa yuta?
Dapita ang mga estudyante sa pagpangita og doktrina ug mga baruganan samtang magtuon sila sa Doktrina ug mga Pakigsaad 134 karon nga maoy makatabang nila nga makasabut sa tukma nga tahas sa gobyerno.
Aron matabangan ang mga estudyante nga makasabut sa konteksto sa Doktrina ug mga Pakigsaad 134, dapita ang usa ka estudyante sa pagbasa og kusog sa mosunod nga parapo [paragraph]:
Human ang manggugubot nga panon sa Distrito sa Jackson, Missouri miabug sa mga miyembro sa Simbahan gikan sa ilang mga panimalay sa ulahing bahin niadtong 1833, ang mga lider sa Simbahan mihangyo sa estado ug sa federal nga mga opisyal sa gobyerno nga panalipdan ug tabangan nga makuha pagbalik ang nawala nilang mga kabtangan, apan ang ilang hangyo sa panabang pakyas. Niadtong Agosto 1835, samtang ang mga miyembro sa Simbahan nanghangyo gihapon sa gobyerno nga mahibalik ang kabtangan ug kaangayan, sila si Oliver Cowdery ug Sidney Rigdon mipresentar og dokumento ngadto sa kinatibuk-ang asembliya sa Simbahan sa Kirtland, Ohio, nga naglatid sa mga pagtuo sa mga Santos sa Ulahing mga Adlaw kabahin sa mga gobyerno ug mga balaod. (Tan-awa sa Spencer W. McBride, Of Governments and Laws,” sa Revelations in Context, ed. Matthew McBride and James Goldberg [2012], 295, o history.lds.org Kini nga pamahayag narekord sa Doktrina ug mga Pakigsaad 134.
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 134:1–3. Hangyoa ang klase sa pagsunod, nga mangita kon kinsa ang nagpasiugda sa ideya sa mga gobyerno ug ngano.
Unsa nga kamatuoran ang atong makita sa bersikulo 1 mahitungod sa katuyoan sa mga gobyerno? (Tabangi ang mga estudyante sa pag-ila sa mosunod nga kamatuoran: Ang gobyerno gipasiugdahan sa Dios alang sa kaayohan sa tanang katawhan.)
Itudlo nga ang mga gobyerno sa bersikulo 1 nagpasabut sa gobyerno sa kinatibuk-an, dili piho nga matang sa gobyerno.
Sumala sa bersikulo 2, unsa nga mga katungod ang kinahanglang panalipdan sa mga gobyerno?
Sumala sa bersikulo 3, ngano nga importante sa mga gobyerno nga adunay “sibil nga mga opisyal”?
Dapita ang usa ka estudyante sa pagbasa og kusog sa Doktrina ug mga Pakigsaad 134:4. Hangyoa ang klase sa pagsunod, nga mangita kon unsay gitudlo niining bersikulo mahitungod sa kagawasan sa relihiyon.
Unsa ang gitudlo sa bersikulo 4 mahitungod sa kagawasan sa relihiyon?
Sa unsa nga paagi nga ang kagawasan sa relihiyon makaapekto sa atong abilidad sa pagsunod sa plano sa atong Langitnong Amahan sa kaluwasan?
I-summarize ang Doktrina ug mga Pakigsaad 134:5–12 pinaagi sa pagpasabut nga ang pamahayag nag-ingon nga ang tanang lumulupyo kinahanglan nga “[mo]bulig ug [m]ag-amping” sa makiangayon nga mga gobyerno ug motahud sa balaod (bersikulo 5). Ang mga gobyerno kinahanglang moestablisar og mga balaod nga manalipod sa relihiyuso nga pagtuo, apan sila kinahanglang dili mopabor og usa ka relihiyon kay sa lain. Agig dugang, ang relihiyuso nga mga grupo makadisiplina sa ilang mga miyembro kon gikinahanglan pinaagi sa excommunication, apan dili sila makaimbargo sa kabtangan sa ilang miyembro o pasakitan sila sa pisikal nga paagi.
Ipakita ang litrato ni Propeta Joseph Smith. Itudlo nga sama sa ilang nasinati atol sa nangaging mga panahon sa pagpanggukod batok sa Simbahan, ang mga opisyal sa gobyerno napakyas na usab sa pagpanalipod sa mga katungod sa mga Santos sa Ulahing mga Adlaw sa dihang si Propeta Joseph Smith ug ang iyang igsoon nga si Hyrum gimartir didto sa Bilanggoan sa Carthage niadtong Hunyo 27, 1844. Pagkahuman, ang mga miyembro sa Simbahan mirekord sa mga pasidungog ngadto sa Propeta diha sa mga journal, mga sulat, ug pampublikong mga sulat. Kini nga mga miyembro sa kanunay mihulagway sa ilang mga pagbati sa pagkahibalo sa kamatayon sa Propeta ingon man usab sa ilang mga pagpamatuod sa iyang balaan nga tahas ug misyon (tan-awa sa Jeffrey Mahas, Remembering the Martyrdom,” sa Revelations in Context,ed. Matthew McBride and James Goldberg [2012], 299–306, o history.lds.org). Usa niadto nga mga pasidungog narekord sa Doktrina ug mga Pakigsaad 135 ug gibase sa mga istorya sa mga nasaksihan nila ni Elder John Taylor ug Elder Willard Richards, nga kauban sa Propeta sa dihang siya namatay.
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 135: Dugang nga Makasaysayanong Background sa Manwal sa Estudyante sa Doktrina ug mga Pakigsaad. Hangyoa ang klase sa pagsunod, nga mangita sa unsay hinungdan sa pagkamartir nila ni Joseph ug Hyrum Smith.
Dapita ang mga estudyante sa pagbasa og hilum sa Doktrina ug mga Pakigsaad 135:1–2, nga mangita sa mga detalye mahitungod sa pagkamartir.
Unsa kahay inyong bation kon nagpuyo pa kamo sa Nauvoo ug nakadungog mahitungod sa kamatayon sa Propeta?
Dapita ang pipila ka estudyante sa pagpuli-puli sa pagbasa og kusog sa Doktrina ug mga Pakigsaad 135:3–7. Hangyoa ang klase sa pagsunod, nga mangita kon unsay gisulti mahitungod ni Propeta Joseph Smith. Ikonsiderar ang pagdapit sa mga estudyante sa pagmarka sa mga pulong nga nakadani kanila.
Unsa may nakadani kaninyo niini nga mga bersikulo?
Unsa nga kamatuoran ang atong makita sa bersikulo 3 mahitungod kon unsay nahimo ni Joseph Smith “alang sa kaluwasan sa [mga anak sa Dios]”? (Tabangi ang mga estudyante nga makakita sa mosunod nga kamatuoran: Mas daghan og nahimo si Joseph Smith alang sa kaluwasan sa mga tawo sa Dios niining kalibutan kay ni bisan kinsang tawo gawas ni Jesus.)
I-display ang mosunod nga pamahayag ni Presidente Joseph F. Smith. Smith (1838–1918), ug dapita ang usa ka estudyante sa pagbasa niini og kusog:
Imahe
Presidente Joseph F. Smith
“Ang buhat nga gihimo ni Joseph Smith dili lamang kutob niining kinabuhia, apan may kalabutan usab kini sa umaabut nga kinabuhi, ug sa kinabuhi nga nanglabay na. Sa laing pagkasulti, may kalabutan kini niadtong nakapuyo sa kalibutan, niadtong kasamtangang namuyo ug niadtong umaabut pa nga mamuyo human kanato” (Joseph F. Smith, Gospel Doctrine, 5th ed. [1939], 481).
Sa unsa nga paagi kini nga pamahayag makatabang nato nga makasabut sa kaimportante sa misyon ni Propeta Joseph Smith?
Dapita ang mga estudyante sa pagsulat unsay nahimo ni Propeta Joseph Smith alang sa ilang kaluwasan. Human sa igo nga panahon, dapita ang pipila ka estudyante sa pagreport unsay ilang gisulat.
Ipakigbahin ang imong pagpamatuod bahin ni Propeta Joseph Smith, ug dapita ang pipila ka estudyante kinsa komportable sa pagbuhat sa ingon sa pagpakigbahin usab sa ilang mga pagpamatuod.
Ang Ginoo miorganisar ug mitambag sa mga miyembro sa Simbahan agig pagpangandam alang sa ilang panaw padulong sa kasadpan
Ipasabut nga paglabay sa duha ka semana nga si Joseph ug Hyrum Smith gipatay didto sa Bilanggoan sa Carthage, Illinois, usa ka pamantalaan ang mireport sa kamatayon sa Propeta ug sa iyang igsoon. “Ang artikulo … mitapos niining lima ka pulong isip panapos ug panagna: ‘Sa ingon natapos ang Mormonismo’” (Lawrence R. Flake, “Of Pioneers and Prophets” [Brigham Young University devotional, Hulyo 18, 1995], 3, speeches.byu.edu).
Unsa ang wala masabti niini nga tagsulat mahitungod sa gipahiuli nga Simbahan ni Jesukristo?
I-display ang litrato ni Presidente Brigham Young, ug dapita ang usa ka estudyante sa pagbasa og kusog sa mosunod nga parapo [paragraph]:
Sa wala pa ang iyang kamatayon, si Propeta Joseph Smith mihatag sa mga yawe sa priesthood ngadto sa mga sakop sa Korum sa Napulog Duha ka mga Apostoles. Human sa iyang kamatayon, ang Korum sa Napulog Duha ka mga Apostoles, nga gidumala ni Brigham Young, nagpadayon sa paggiya sa Simbahan. Taliwala sa grabe nga pagpanggukod, ang mga Santos nagsugod sa pagbiya sa Nauvoo, Illinois, niadtong Pebrero 1846 ug mipaingon sa kasadpan ngadto sa Rocky Mountains. Hinoon, ang ilang panaw hinay, tungod sa grabe nga pag-ulan ug kakulang sa mga suplay, ug milungtad og hapit upat ka bulan ang pagbiyahe og 480 ka kilometro tabok sa Iowa. Ang mga lider sa Simbahan mihukom nga maghulat hangtud sa mosunod nga tingpamulak aron mopadayon sa ilang panaw padulong sa kasadpan, mao nga miestablisar sila og temporaryong panimuyo sa daplin sa Suba sa Missouri, usa sa labing dako nga gitawag og Winter Quarters. Dinhi nadawat ni Presidente Brigham Young ang pagpadayag nga narekord sa Doktrina ug mga Pakigsaad 136. (Tan-awa sa Church History in the Fulness of Times Student Manual, 2nd ed. [Church Educational System manual, 2003], 291–93, 306–14, 319, 330.)
Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 136:1–5. Hangyoa ang klase sa pagsunod, nga mangita kon unsay gipadayag sa Ginoo pinaagi ni Presidente Brigham Young. Hangyoa ang mga estudyante sa pagreport sa unsay ilang nakit-an.
Sa unsa nga paagi ang pagkahibalo nga ang Ginoo nagpadayon sa pagpadayag sa Iyang kabubut-on ngadto kanila nakatabang sa mga miyembro sa Simbahan?
I-summarize ang Doktrina ug mga Pakigsaad 136:6–16 pinaagi sa pagpasabut nga ang Ginoo misulti ni Presidente Brigham Young unsaon sa “pag-andam alang niadto [kinsa] magpabilin,” o kinsa ang mosunod sa dili madugay (bersikulo 6), ug mitawag og mga indibidwal sa paggiya sa nagkalain-laing mga pundok sa mga Santos.
Isulat ang mosunod nga pakisayran diha sa pisara: Doktrina ug mga Pakigsaad 136:17–31. I-assign sa matag estudyante ang usa o dugang niini nga mga bersikulo (aron ang tanang mga bersikulo ma-assign). Dapita ang mga estudyante sa pagbasa og hilum sa na-assign diha nila nga mga bersikulo, nga mangita sa tambag nga gihatag sa Ginoo sa mga Santos. Human sa igong panahon, hangyoa ang pipila ka mga estudyante sa pagreport sa unsay ilang nakit-an.
Sa unsa nga paagi nga ang tambag sa Ginoo nakapanalangin sa mga miyembro sa Simbahan sa ilang pagpaingon sa kasadpan?
Dapita ang usa ka estudyante sa pagbasa og kusog sa Doktrina ug mga Pakigsaad 136:30–33. Hangyoa ang klase sa pagsunod, nga mangita sa mga saad sa Ginoo ngadto sa mga Santos.
Unsa nga mga baruganan ang atong makita gikan sa mga saad sa Ginoo ngadto sa mga Santos? (Tabangi ang mga estudyante nga makaila sa mga baruganan nga susama sa mosunod: Dili angay nga kita mahadlok sa atong mga kaaway tungod kay ang ilang dangatan pagatinuon sa Ginoo. Ang atong mga pagsulay makaandam nato sa pagdawat sa umaabut nga himaya. Kon magpaubos kita ug motawag sa Ginoo, lamdagan kita Niya pinaagi sa Iyang Espiritu. Isulat kining mga baruganan diha sa pisara.)
Sa unsa nga paagi nga kini nga mga baruganan nakatabang sa mga miyembro sa Simbahan sa ilang panaw padulong sa kasadpan?
Dapita ang mga estudyante sa pagpamalandong sa unsa nga paagi nga kini nga mga baruganan makatabang nila samtang sila mopanaw niining kinabuhia. Ihatag ang imong pagpamatuod mahitungod kon sa unsa nga paagi nga ang paggamit niini nga mga baruganan nakapanalangin kanimo.
Ang Ginoo mipasalig sa mga Santos ug mitambag kanila nga magmakugihon sa pagtuman sa Iyang mga sugo
Ipatan-aw nila pag-usab ang litrato ni Propeta Joseph Smith nga imong gipakita sa sayo nga bahin. I-summarize ang Doktrina ug mga Pakigsaad 136:34–40 pinaagi sa pagpasabut nga ang Ginoo misulti ni Brigham Young nga bisan daghan ang “natingala tungod sa kamatayon” ni [Joseph Smith] (bersikulo 39), o nahibulong ngano nga siya namatay, matinud-anong gikompleto ni Joseph ang iyang misyon (bersikulo 38). Ang Ginoo mipasabut nga ang Propeta gipatay aron nga siya “makasilyo sa iyang pagpamatuod uban sa iyang dugo, nga siya unta mapasidunggan ug ang mga dautan unta masilotan” (bersikulo 39).
Ipasabut nga ang Ginoo mitapos niini nga pagpadayag uban sa mga pulong sa pagdasig. Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 136:37, 40–42. Hangyoa ang klase sa pagsunod, nga mangita kon unsay gisulti sa Ginoo aron sa paghatag og kasiguroan sa mga Santos.
Sa unsa kaha nga paagi nga ang mga pulong sa Ginoo nakahatag og kasiguroan ngadto sa mga Santos?
Sumala sa bersikulo 37, unsa nga mga panalangin ang atong madawat “kon [kita] matinud-anon nga maghupot sa tanan nga [mga pulong sa Ginoo,” o sa mga sugo? (Human ang mga estudyante makatubag, isulat ang mosunod nga baruganan sa pisara: Kon kita magmatinud-anon sa paghupot sa tanan nga mga pulong sa Ginoo, moabut ang adlaw nga kita makakita sa Iyang himaya.)
Itudlo nga ang Ginoo nasayud nga lisud ang pagtuman, o pagsunod, sa tanan Niyang mga pulong sa tanang higayon, apan nagpaabut Siya nga atong buhaton ang atong labing maayo.
Sa unsa nga paagi nga kini nga baruganan makaawhag ninyo sa pagsunod sa ebanghelyo?
Ipamatuod ang kamatuoran niini nga pagtulun-an. Dapita ang mga estudyante sa pagpaningkamot sa paghupot sa tanan nga mga pulong sa Ginoo ug mapainubsanon nga maghulat sa Iyang mga saad.
