Leksyon 55

Doktrina ug mga Pakigsaad 137–38

Pasiuna ug Timeline

Niadtong Enero 21, 1836, si Propeta Joseph Smith ug ang ubang mga lider sa Simbahan naghimo og espesyal nga miting sa hapit na mahuman nga Templo sa Kirtland. Niini nga okasyon nakakita ang Propeta og panan-awon sa celestial nga gingharian, diin ang Ginoo mipasabut unsaon Niya sa paghukom kadtong “kinsa [namatay] nga walay kahibalo niini nga ebanghelyo” (D&P 137:7). Kini nga pagpadayag narekord diha Doktrina ug mga Pakigsaad 137.

Niadtong Oktubre 3, 1918, si Presidente Joseph F. Smith nakadawat sa panan-awon nga narekord sa Doktrina ug mga Pakigsaad 138, nga dugang miklaro sa doktrina sa kaluwasan alang sa mga patay. Niini nga panan-awon si Presidente Smith nakakat-on nga tali sa kamatayon sa Manluluwas ug Pagkabanhaw, Siya nangalagad ngadto sa mga matarung didto sa paraiso kinsa naghulat alang sa “katubsanan gikan sa gapos sa kamatayon” (D&P 138:16). Nakasaksi usab si Presidente Smith sa organisasyon sa misyonaryo nga buhat didto sa kalibutan sa espiritu.

Nobyembre 19, 1823Si Alvin Smith namatay didto sa Palmyra, New York.

Enero 1836Ang Templo sa Kirtland nga hapit na mahuman.

Enero 21, 1836Ang Doktrina ug mga Pakigsaad 137 nadawat.

1918Ang tibuok kalibutan nga influenza virus daling mikatap nga nakapatay og minilyon ka tawo sa tibuok kalibutan. Niadtong Nobyembre, ang Unang Gubat sa Kalibutan nahuman, diin 17 ka milyon ang namatay.

Oktubre 3, 1918Ang Doktrina ug mga Pakigsaad 138 nadawat.

Abril 3, 1976Ang mga miyembro sa Slimbahan mipaluyo ug miaprubar sa panan-awon ni Propeta Joseph Smith bahin sa celestial nga gingharian ug sa panan-awon ni Presidente Joseph F. Smith bahin sa pagtubos sa mga patay isip kabahin sa sumbanan nga mga buluhaton sa Simbahan. Gidugang kini ngadto sa Perlas nga Labing Bililhon.

Hunyo 1979Ang Unang Kapangulohan mipahibalo nga ang panan-awon ni Joseph Smith bahin sa celestial nga gingharian (karon Doktrina ug mga Pakigsaad 137) ug sa panan-awon ni Joseph F. Smith bahin sa pagtubos sa mga patay (karon Doktrina ug mga Pakigsaad 138) ilakip sa 1981 nga edisyon sa Doktrina ug mga Pakigsaad.

Mga Sugyot alang sa Pagtudlo

Doktrina ug mga Pakigsaad 137:1–10

Si Propeta Joseph Smith nakakita og usa ka panan-awon bahin sa celestial nga gingharian

I-display ang mosunod nga pamahayag ni Presidente Henry B. Eyring sa Unang Kapangulohan, ug dapita ang usa ka estudyante sa pagbasa niini og kusog. Hangyoa ang klase sa pagpaminaw sa mga sirkumstansya sa pagka-mortal nga ingon og dili patas.

“Diyutay ra kaayo sa mga anak sa Dios ang makabaton niining kinabuhia sa kompleto nga panabut sa plano sa Dios, uban sa pag-access sa mga ordinansa sa priesthood ug pakigsaad nga mohimo sa maulaong gahum sa Manluluwas nga hingpit nga magamit sa atong kinabuhi. Bisan kadtong dunay pinakamaayong mga ginikanan posibling magpakabuhing matinud-anon subay sa kahayag nga naa kanila apan wala gayud makadungog mahitungod ni Jesukristo ug sa Iyang Pag-ula o madapit sa pagpabunyag sa Iyang ngalan. Tinuod kini niadtong minilyon sa atong mga kaigsoonan sa tibuok kasaysayan sa kalibutan.

“Magtuo ang uban nga dili kini patas. Gani ang pag-ingon nga walay plano gamiton nila nga ebidensya, nga walay pihong mga rekisito para sa kaluwasan—mobati nga ang makiangayon, mahigugmaong Dios dili mohimo og plano nga para lang sa diyutayng gidaghanon sa Iyang mga anak. Ang uban tingali moingon nga gitino nang daan sa Dios kinsa sa Iyang mga anak ang Iyang luwason ug ipaabut kanila ang ebanghelyo, samtang kadtong wala makadungog sa ebanghelyo siyempre dili “pinili’” (Henry B. Eyring, “Pagpundok sa Pamilya sa Dios,” Liahona, Mayo 2017, 20).

• Sumala niini nga pamahayag, unsa nga mga sirkumstansya sa pagka-mortal ang ingon og dili patas?

• Unsa ang gisulti sa pipila ka tawo mahitungod sa Dios base lamang sa ilang pagsabut niining yutan-ong mga sirkumstansya?

Dapita ang mga estudyante sa pagpangita sa doktrina ug mga baruganan samtang sila magtuon sa Doktrina ug Pakigsaad 137–38 nga naghulagway sa gugma, hustisya, ug kalooy nga gipakita sa Langitnong Amahan ngadto sa Iyang mga anak.

Aron matabangan ang mga estudyante nga makasabut sa konteksto sa Doktrina ug mga Pakigsaad 137, ipasabut nga niadtong Enero 21, 1836, si Propeta Joseph Smith nagpundok uban sa iyang amahan ug sa ubang mga lider sa Simbahan didto sa itaas nga kwarto sa hapit na nga mahuman nga Templo sa Kirtland. Atol sa miting, ang Propeta nakakita og panan-awon.

Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 137:1–6. Hangyoa ang klase sa pagsunod, nga mangita unsay nakita ni Propeta Joseph Smith sa panan-awon.

• Sa unsa nga paagi gihulagway sa Propeta ang celestial nga gingharian?

• Kinsa ang iyang nakita sa celestial nga gingharian?

• Sumala sa bersikulo 6, ngano nga si Joseph Smith “natingala” sa dihang iyang nakita nga ang iyang igsoong lalaki nga si Alvin didto sa celestial nga ginaharian?

Aron matabangan ang mga estudyante nga makasabut ngano nga kini makahuluganon kaayo alang sa Propeta, ipakita ang mosunod nga parapo [paragraph] ug dapita ang usa ka estudyante sa pagbasa niini og kusog:

Sa edad nga 17, si Joseph Smith naguol sa kalit nga kamatayon sa iyang magulang nga igsoon nga si Alvin, nga iyang gihigugma pag-ayo ug gidayeg. Ang pamilyang Smith “mihangyo sa usa ka ministro nga Presbyterian sa Palmyra, New York, nga modumala sa iyang lubong. Tungod kay si Alvin wala man mahimong sakop sa kongregasyon sa mga ministro, ang pari nangusog sa iyang sermon nga si Alvin dili maluwas. Si William Smith, ang manghod nga lalaki ni Joseph, nahinumdom: “[Ang ministro] … mipasabot og maayo nga [si Alvin] maadto sa impyerno, tungod kay si Alvin dili man miyembro sa simbahan’” (Mga Pagtulun-an sa mga Presidente sa Simbahan: Joseph Smith [2007], 488–89).

• Kon kamo ang anaa sa dapit ni Joseph Smith, unsa kahay inyong bation atol sa sermon sa ministro sa haya ni Alvin? Ngano?

• Unsa kahay inyong pagbati nga nakakita ni Alvin sa panan-awon sa celestial nga gingharian?

Dapita ang mga estudyante sa pagbasa og hilum sa Doktrina ug mga Pakigsaad 137:7–8, nga mangita kon unsay gisulti sa Ginoo sa pangutana sa Propeta.

• Base sa unsay gitudlo sa Ginoo sa Propeta, unsa nga doktrina ang atong makita mahitungod kon kinsa ang makapanunod sa celestial nga gingharian? (Ang mga estudyante kinahanglang moila sa mosunod nga kamatuoran: Ang tanang mga tawo nga nangamatay nga wala makahibalo sa ebanghelyo, nga modawat unta niini, makapanunod sa celestial nga gingharian.)

• Sa unsa nga paagi kaha kini nga doktrina makahupay niadtong mga minahal nga namatay nga wala makadungog sa ebanghelyo?

Dapita ang usa ka estudyante sa pagbasa og kusog sa Doktrina ug mga Pakigsaad 137:9–10. Hangyoa ang klase sa pagsunod, nga mangita alang sa dugang nga mga kamatuoran nga gipadayag sa Ginoo ngadto ni Propeta Joseph Smith. Dapita ang mga estudyante sa pagreport sa unsay ilang nakit-an. Samtang sila motubag, isulat ang mosunod nga mga kamatuoran diha sa pisara: Ang Ginoo mohukom nato pinaagi sa atong mga buhat ug mga tinguha sa atong mga kasingkasing. Ang tanang mga bata kinsa namatay sa wala pa sila mahimong may tulubagon maluwas diha sa celestial nga gingharian.

• Unsa ang gitudlo sa mga kamatuoran nga ang atong nakita diha sa Doktrina ug mga Pakigsaad 137 mahitungod sa kinaiya sa Dios?

Doktrina ug mga Pakigsaad 138:1–11

Si Presidente Joseph F. Smith namalandong sa mga kasulatan ug nakakita og usa ka panan-awon bahin sa kalibutan sa espiritu

Ipasabut nga niadtong Oktubre 3, 1918, sobra na sa 82 ka tuig human si Propeta Joseph Smith nakakita sa iyang panan-awon sa celestial nga gingharian, si Presidente Joseph F. Smith adunay panan-awon nga nagklaro kon sa unsa nga paagi nga kadtong nangamatay nga wala makahibalo sa ebanghelyo maluwas. Kini nga pagpadayag narekord sa Doktrina ug mga Pakigsaad 138.

Aron matabangan ang mga estudyante nga makasabut sa konteksto alang niini nga pagpadayag, dapita ang usa ka estudyante sa pagbasa og kusog sa mosunod nga mga parapo [paragraph].

“‘Ang akong kalag nawataswatas sa pagkagisi. Nadugmok ang akong kasingkasing ug nagkurapkurap aron mabuhi! O akong pinalanggang anak, akong hingpit nga kalipay, akong paglaum! … O Dios, tabangi ako!’

“Mao nga si Presidente Joseph F. Smith misulat sa iyang journal sa kamatayon sa iyang kinamagulangang anak nga lalaki, si Hyrum Mack Smith, ang 45 anyos nga Apostol kinsa namatay niadtong Enero 1918 tungod sa mibuto nga apendiks. Paglabay sa walo ka bulan, niadtong Septyembre 24, ang biyuda ni Hyrum, si Ida Bowman Smith, namatay tungod sa sakit sa kasingkasing mga usa lamang ka semana human nanganak sa usa ka batang lalaki. Ang magtiayon mibiya og lima ka anak. Nianang higayuna, ang Unang Gubat sa Kalibutan … nagsige pa. …

“Ang kamatayon ug ang gubat siguradong anaa sa hunahuna ni Presidente Smith nianang tuiga” (George S. Tate, “I Saw the Hosts of the Dead,” Ensign, Dis. 2009, 54; tan-awa usab sa Mga Pagtulun-an sa mga Presidente sa Simbahan: Joseph F. Smith [1998], 493).

Dapita ang usa ka estudyante sa pagbasa og kusog sa Doktrina ug mga Pakigsaad 138:1–4. Hangyoa ang klase sa pagsunod, nga mangita kon unsay gibuhat ni Presidente Joseph F. sa wala pa madawat ang panan-awon nga girekord diha sa Doktrina ug mga Pakigsaad 138.

• Unsa nga doktrina ang “gihunahuna” ni Presidente Smith “samtang namalandong sa mga kasulatan” (mga bersikulo 1–2)? (Kinahanglang makit-an sa mga estudyante ang mosunod nga doktrina: Pinaagi sa Pag-ula ni Jesukristo ug pinaagi sa pagkamasulundon sa mga baruganan sa ebanghelyo, ang tanang katawhan maluwas. Ipasabut nga kini nga doktrina mao ang sukaranang mensahe sa Doktrina ug mga Pakigsaad 138.)

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 138:5–10. Hangyoa ang klase sa pagsunod, nga mangita sa mga pagtulun-an nga nagustohan ni Presidente Smith samtang nagbasa siya sa Biblia. Hangyoa ang mga estudyante sa pagreport sa unsay ilang nakit-an.

Dapita ang mga estudyante sa pagbasa og hilum sa Doktrina ug mga Pakigsaad 138:11, nga mangita sa unsay nakita ni Presidente Smith samtang namalandong siya niini nga mga tudling sa kasulatan.

• Unsa ang nahitabo samtang si Presidente Smith namalandong niini nga mga tudling sa kasulatan?

• Unsa nga baruganan ang atong makita gikan sa kasinatian ni Presidente Joseph F. Smith mahitungod kon unsaon sa pagpangandam sa pagdawat sa pagpadayag? (Tabangi ang mga estudyante sa pag-ila og baruganan susama sa mosunod: Samtang magbasa ug mamalandong kita sa mga kasulatan, giandam nato ang atong kaugalingon sa pagdawat og pagpadayag.)

Doktrina ug mga Pakigsaad 138:12–24

Si Presidente Joseph F. Smith nakakita sa mga matarung nga naghulat sa Manluluwas didto sa kalibutan sa espiritu

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 138:12–17. Hangyoa ang klase sa pagsunod, nga mangita kon kinsay nakita ni Presidente Smith sa iyang panan-awon sa kalibutan sa espiritu. Hangyoa ang mga estudyante sa pagreport sa unsay ilang nakit-an.

• Ngano nga kining matarung nga mga espiritu “napuno sa kamaya ug kalipay” (bersikulo 15)? (Mahimo nimong dapiton ang mga estudyante sa pagbasa sa Doktrina ug mga Pakigsaad 138:50 ug ikonsiderar ang pagsulat sa cross-reference niini nga bersikulo tupad sa bersikulo 15.)

I-summarize ang mga bersikulo 18–24 pinaagi sa pagpasabut nga atol sa iyang panan-awon, si Presidente Smith nakakita sa Manluluwas nga nagtudlo “sa walay katapusan nga ebanghelyo” (bersikulo 19) ngadto sa matarung nga mga espiritu samtang ang Iyang pisikal nga lawas diha sa sulod sa lubnganan. Nahibaloan usab niya nga ang Manluluwas wala mobisita sa dautan nga mga espiritu (bersikulo 20).

Doktrina ug mga Pakigsaad 138:25–60

Si Presidente Joseph F. Smith nakahibalo giunsa sa Manluluwas sa pag-organisar ang pagsangyaw sa ebanghelyo didto sa kalibutan sa espiritu

Isulat sa pisara ang mosunod nga mga pangutana ug mga pakisayran [reference] sa kasulatan:

Unsa ang pangutana ni Presidente Smith mahitungod sa pagpangalagad sa Ginoo didto sa kalibutan sa espiritu (D&P 138:25–28)?

Unsa ang gibuhat ni Jesukristo samtang didto pa Siya sa kalibutan sa espiritu (D&P 138:29–32)?

Unsa ang gitudlo sa awtorisadong mga mensahero sa Ginoo didto sa kalibutan sa espiritu (D&P 138:33–35)?

Ginagmayng panaghisgutan sa grupo ug mga buluhaton

Ang ginagmayng grupo nga mga kalihokan kasagaran makatugot og daghang estudyante sa pag-apil ug makahatag og luwas nga palibut diin ang mga estudyante makahimo sa pagpakigbahin sa ilang mga pagbati, mga hunahuna, ug mga pagpamatuod sa usag usa. Makatabang ka sa mga estudyante nga moapil nga malampuson sa ginagmay nga panaghisgutan sa grupo ug mga buluhaton pinaagi sa paghatag og klaro nga mga instruksyon ug maghatag sa gikinahanglan nga impormasyon diha sa pisara o sa mga handout.

Bahina ang klase ngadto sa tulo ka grupo, ug i-assign ang matag grupo sa usa sa mga pangutana diha sa pisara. Dapita ang mga sakop sa matag grupo sa pagpangita alang sa tubag sa ilang natudlo nga pangutana pinaagi sa pagtuon sa nalakip nga pakisayran sa kasulatan. Human sa igong panahon, dapita ang usa o daghan pang estudyante gikan sa matag grupo sa pagreport sa unsay ilang nakat-unan.

I-summarize ang Doktrina ug mga Pakigsaad 138:38–52 pinaagi sa pagpasabut nga si Presidente Smith milista sa mga ngalan sa daghang “dungganan ug gamhanan” nga mga espiritu nga iyang nakita nga “gitigum niining dako kaayo nga katiguman sa mga matarung” nga naghulat sa pagpakita sa Manluluwas human sa Iyang Pagkabanhaw (bersikulo 38). Ang pipila niini mao si “Mama Eva, uban sa iyang daghan nga matinud-anong mga anak nga babaye” (bersikulo 39). Agig dugang, si Presidente Smith nakakita sa daghang mga propeta sa Daang Tugon, ingon man usab sa mga propeta sa Basahon ni Mormon.

Ipasabut nga nakita usab ni Presidente Smith sa kalibutan sa espiritu ang “pinili nga mga espiritu kinsa gitagana sa pagtungha diha sa kahingpitan sa mga panahon” (bersikulo 53). Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 138:53–56. Hangyoa ang klase sa pagsunod, nga mangita kon unsay gikatampo niining mga indibidwal diha sa pagka-mortal sa kaluwasan niadtong anaa sa bilanggoan sa mga espiritu.

• Sa unsang paagi nga ang mga lider sa Simbahan sa ulahing mga adlaw nakatabang niadtong anaa sa bilanggoan sa espiritu?

• Kanus-a nagsugod kini nga mga lider sa pagpangandam alang sa ilang buhat sa yuta?

Dapita ang usa ka estudyante sa pagbasa og kusog sa Doktrina ug mga Pakigsaad 138:57. Hangyoa ang klase sa pagsunod, nga mangita unsay nakat-unan ni Presidente Smith mahitungod “sa matinud-anong mga anciano [elder] niining mao nga kapaigoan.”

• Unsay ipadayon nga buhaton sa matinud-anon nga mga elder human sa kamatayon?

Ipasabut nga bisan og ang bersikulo 57 piho nga naghisgot og mga elder, si Presidente Joseph F. Smith mitudlo usab nga ang matinud-anong mga babaye nga Santos sa Ulahing mga Adlaw kinsa namatay “hingpit nga tugutan ug hatagan og gahum sa pagsangyaw sa ebanghelyo ug pagpangalagad ngadto sa mga babaye” didto sa kalibutan sa espiritu (Gospel Doctrine,5th ed. [1939], 461).

Dapita ang usa ka estudyante sa pagbasa og kusog sa Doktrina ug mga Pakigsaad 138:58–60. Hangyoa ang klase sa pagsunod, nga mangita kon sa unsang paagi nga kadtong mga espiritu “kinsa anaa sa kangitngit, ug ubos sa pagkaulipon sa sala” (bersikulo 57) matubos.

• Unsa nga doktrina ang atong mahibaloan gikan niini nga mga bersikulo kon unsay buhaton sa dili matarung aron matubos? (Tabangi ang mga estudyante nga makaila sa mosunod nga doktrina: Ang mga espiritu nga maghinulsol, masulundon sa mga ordinansa sa templo, ug gilimpyohan pinaagi sa Pag-ula ni Kristo pagatubson ug makadawat sa ilang ganti.)

• Sa unsang paagi nga ang pagsangyaw sa ebanghelyo didto sa kalibutan sa espiritu ug katubsanan sa mga patay naghulagway sa kalooy sa Amahan ug sa Iyang gugma alang sa Iyang mga anak?

Pahinumdumi ang mga estudyante nga kita makatabang sa pagtubos niadtong atua sa bilanggoan sa espiritu pinaagi sa pag-ila sa ilang mga ngalan pinaagi sa family history ug pag-index ug pagpahigayon sa mga ordinansa alang kanila diha sa mga templo.

• Sa unsang paagi nga kamo napanalanginan pinaagi sa pag-apil sa family history ug pag-alagad sa templo?

Tapusa pinaagi sa pagpakigbahin sa imong pagpamatuod sa gugma sa Langitnong Amahan alang sa Iyang mga anak, nga gipakita sa Iyang plano sa kaluwasan. Dapita ang mga estudyante sa paghunahuna unsay ilang buhaton aron makatabang niadtong atua sa bilanggoan sa espiritu—ilabi na sa ilang kaugalingong mga katigulangan—nga makadawat sa makaluwas nga mga ordinansa aron sila matubos.

Dugang nga Ideya sa Pagtudlo

Doktrina ug mga Pakigsaad 138:1–11. Pasundayag sa video—“A Vision of the Redemption of the Dead”

Aron matabangan nga ipaila ang Doktrina ug mga Pakigsaad 138ikonsiderar ang pagpakita sa video A Vision of the Redemption of the Dead”3:06), nga naglatid sa makasaysayanong konteksto sa Doktrina ug mga Pakigsaad 138ug sa mga panghitabo gikan sa kinabuhi ni Presidente Joseph F. Smith. Kini nga video anaa sa LDS.org.