Doktrina ug mga Pakigsaad 5; 17

Pasiuna ug Timeline

Mga pipila ka bulan human nawala ni Martin Harris ang 116 ka mga pahina sa manuskrito sa Basahon ni Mormon, nagtinguha siya og dugang ebidensya sa katinuod sa bulawang mga palid. Ang iyang asawa misulti batok ni Propeta Joseph Smith, miakusar kaniya nga giilad ang iyang bana ug ang uban pa tungod sa iyang pagpangangkon nga naa niya ang karaang rekord. Niadtong Marso 1829, mibalik si Martin sa Harmony, Pennsylvania, aron mohangyo kon mahimo bang makatan-aw siya sa mga palid. Nahibaloan ni Joseph pinaagi sa pagpadayag nga narekord sa Doktrina ug mga Pakigsaad 5 nga motawag ang Ginoo og tulo ka mga saksi nga pakitaon sa mga palid ug mopamatuod niini sa kalibutan. Misaad ang Ginoo kang Martin nga kon magpaubos siya sa iyang kaugalingon, tugutan siya nga makatan-aw sa mga palid.

Niadtong Hunyo 1829, sigun sa narekord sa Doktrina ug mga Pakigsaad 17, miingon ang Ginoo nga si Oliver Cowdery, David Whitmer, ug Martin Harris mahimo nang makatan-aw sa mga palid ug sa ubang sagrado nga mga butang sumala sa ilang pagtuo. Human nila maangkon ang pagsaksi sa mga palid, sila “magpamatuod [niini], pinaagi sa gahum sa Dios” (D&P 17:3).

Sayo sa tuig 1829Ang paghubad sa Basahon ni Mormon nagpadayon sa hinay-hinay.

Marso 1829Mihangyo si Martin Harris nga motan-aw sa mga palid; nadawat ang Doktrina ug mga Pakigsaad 5.

Abril–Mayo 1829Mitabang si Oliver Cowdery isip tigsulat [escriba] samtang gihubad ni Joseph Smith ang mga palid.

Hunyo 1829Namalhin si Joseph Smith ug Oliver Cowdery sa Fayette, New York.

Hunyo 1829Ang Doktrina ug mga Pakigsaad 17 nadawat.

Hunyo 1829Mibisita si Moroni kang Joseph Smith ug sa Tulo ka mga Saksi ug gipakita kanila ang mga palid.

Mga Hulyo 1, 1829Nahuman ni Joseph Smith ug Oliver Cowdery ang paghubad sa Basahon ni Mormon.

Mga Sugyot alang sa Pagtudlo

Doktrina ug mga Pakigsaad 5:1–22

Ipadala sa Ginoo ang Iyang pulong sa katapusang mga adlaw pinaagi ni Propeta Joseph Smith, ug tulo ka mga saksi ang mopamatuod niini

Isulat sa pisara ang mosunod nga mga pulong: Ang pagkakita makapatuo.

Unsa ang ubang paagi nga magamit sa mga tawo kini nga mga pulong ngadto sa mga butang bahin sa pagtuo ug relihiyon?

Pangutan-a ang mga estudyante kon usaon kaha nila sa pagsanong ang tawo kinsa moingon nga dili siya mahimong motuo sa Dios o sa Basahon ni Mormon kon walay pisikal nga ebidensya. Samtang magtuon ang mga estudyante sa Doktrina ug mga Pakigsaad 5 karon, dapita sila sa pagpangita sa mga kamatuoran nga makatabang nila aron mahibaloan kon unsaon nila sa pagtubag ang tawo nga moingon nga dili siya mahimong motuo kon walay pisikal nga ebidensya.

Sultihi ang mga estudyante nga niadtong Marso 1829, mibiyahi si Martin Harris gikan sa Palmyra, New York, aron mobisita ni Propeta Joseph Smith sa Harmony, Pennsylvania. Gibana-bana nga unom ka bulan ang milabay sukad nawala ni Martin ang 116 ka pahina sa manuskrito, ug wala na magkita si Martin ug Joseph sukad nianang panahona. Dapita ang usa ka estudyante sa pagbasa og kusog sa Doktrina ug mga Pakigsaad 5:1–3, ug hangyoa ang klase sa pagsunod, nga mangita kon unsay gitinguha ni Martin Harris kang Joseph Smith ug sa unsang paagi gisultihan sa Ginoo ang Propeta unsaon sa pagtubag ang hangyo ni Martin.

Unsa ang gitinguha ni Martin ug unsa ang gisulti sa Ginoo sa Propeta nga isulti agig tubag sa hangyo ni Martin?
Sa pagtuman sa hangyo ni Martin, unsa gyud kaha ang gibati niya nga pinakamaayong paagi aron makaangkon og saksi sa kamatuoran bahin sa gipangangkon ni Joseph?

Ipasabut nga ang katawhan sa atong panahon moingon usab nga kon duna man silay pisikal nga ebidensya, motuo sila nga ang Basahon ni Mormon tinuod. Dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith (1876–1972):

“Sa kanunay kon ang [mga tawo] … makadungog sa istorya sa pagtungha sa Basahon ni Mormon, mangutana sila kon ang mga palid anaa ba sa museum kon asa kini makita. Ang pipila kanila nga adunay pipila ka siyentipikanhong pagbansay, [nagsugyot] nga kon ang mga iskolar makakita ug maka-eksamen sa mga palid ug makakat-on sa pagbasa niini, sila niana mopamatuod sa katinuod sa Basahon ni Mormon ug sa katinuod bahin ni Joseph Smith, ug ang tibuok kalibutan sa ingon makabig” (Joseph Fielding Smith, Church History and Modern Revelation [1953], 1:40).

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 5:4–10. Hangyoa ang klase sa pagsunod, nga mangita kon giunsa pagsulti sa Ginoo si Joseph Smith nga dili ipakita sa kalibutan ang mga palid.

Unsa ang gihatag sa Ginoo nga mga rason sa pagsugo kang Joseph Smith nga dili ipakita sa kalibutan ang mga palid? (Kon ang mga tawo wala motuo sa mga pulong sa Ginoo nga gipadayag pinaagi ni Joseph Smith, sila sa gihapon dili motuo kon ilang makita ang mga palid [tan-awa sa D&P 5:7]; gitipigan sa Ginoo ang mga palid gikan sa kalibutan “alang sa usa ka maalamon nga katuyoan” [tan-awa sa D&P 5:9].)
Unsa ang gitudlo sa mga pulong sa Ginoo kang Joseph niini nga mga bersikulo mahitungod sa mga pulong nga gisulat sa pisara (“Ang pagkakita makapatuo”)?

Isulat sa pisara ang mosunod nga pangutana ubos sa “Ang pagkakita makapatuo”: Unsaon nako sa pag-angkon o pagpalawom sa akong pagsaksi sa kamatuoran sa Basahon ni Mormon?

Dapita ang mga estudyante sa pagpangita og bisan duha lang ka tubag niini nga pangutana gamit ang mga pulong sa Ginoo ngadto ni Joseph ug Martin. Dapita ang usa ka estudyante sa pagbasa og kusog sa Doktrina ug mga Pakigsaad 5:11–15. Hangyoa ang klase sa pagsunod, nga mangita sa gisulti sa Ginoo nga usa ka paagi sa Iyang pagtabang nga ang kalibutan mahibalo sa kamatuoran sa Basahon ni Mormon.

Sumala sa bersikulo 11, unsa ang gisulti sa Ginoo nga Iyang buhaton aron matabangan ang kalibutan nga motuo sa pagpamatuod ni Joseph Smith sa Basahon ni Mormon? (Human makatubag ang mga estudyante, isulat sa pisara ang mosunod nga kamatuoran: Ang pagpamatuod ni Joseph Smith ug sa Tulo ka mga Saksi mobarug nga ebidensya sa pagkatinuod sa Basahon ni Mormon.)
Sumala sa mga bersikulo 12–13, sa unsang paagi ang Tulo ka mga Saksi makabaton sa ilang pagsaksi sa pagkatinuod sa Basahon ni Mormon?
Sa unsang paagi ang pagpamatuod sa Tulo ka mga Saksi lahi kay sa pagpamatuod nga madawat sa uban?

Sa unsang paagi ang pagpamatuod ug ang mga pagsaksi sa uban, lakip kang Propeta Joseph Smith ug sa Tulo ka mga Saksi, molig-on sa kaugalingon ninyong pagsaksi sa pagkatinuod sa Basahon ni Mormon?

Dapita ang usa ka estudyante sa pagbasa og kusog sa Doktrina ug mga Pakigsaad 5:16, ug hangyoa ang klase sa pagsunod, nga mangita sa baruganan nga gitudlo sa Ginoo kon unsaon nato nga makaangkon og pagsaksi sa kamatuoran. (Kon ang mga estudyante nagkinahanglan og tabang sa pagsabut niini nga bersikulo, isugyot nga i-cross reference nila ang bersikulo 16 sa Ether 4:11.)

Unsay gisulti sa Ginoo nga Iyang buhaton niadtong motuo sa Iyang mga pulong? (Human makatubag ang mga estudyante, isulat sa pisara ang mosunod nga baruganan: Kon motuo kita sa mga pulong sa Dios, hatagan kita Niya og usa ka pagsaksi sa katinuod niini pinaagi sa Iyang Espiritu.

Aron matabangan ang mga estudyante nga makasabut niini nga baruganan, dapita ang usa ka estudyante sa pagbasa og kusog sa mosunod nga pamahayag ni Bishop Glenn L. Pace, kanhi sakop sa Presiding Bishopric:

“Walay laing paagi nga makaangkon og pagpamatuod gawas kon pinaagi sa pagsaksi sa Espiritu Santo. Wala kay laing masaligan. … Duna kitay daghang ehemplo sa kasulatan sa pagkawalay pulos sa usa ka pisikal nga manipestasyon kon kini walay kauban nga pagkadawat og saksi sa Espiritu Santo. Ang pagkakabig dili moabut tungod sa pisikal nga mga manipestasyon gikan sa langit” (Glenn L. Pace, “The Elusive Balance,” New Era, Mar. 1989, 49).

Ngano kaha nga pamatud-an man sa Ginoo ang Iyang mga pulong pinaagi sa Espiritu ug dili lang puro pisikal nga ebidensya?

Dapita ang mga estudyante sa paghunahuna og higayon dihang ang Ginoo mipakita sa katinuod sa Iyang mga pulong kanila pinaagi sa Iyang Espiritu. Hangyoa ang pipila ka andam nga mga estudyante sa pagpaambit sa ilang mga kasinatian uban sa klase.

I-summarize ang Doktrina ug mga Pakigsaad 5:17–22 pinaagi sa pagpasabut nga giingnan sa Ginoo si Joseph Smith nga ang pagpamatuod sa Tulo ka mga Saksi molibut sa tibuok kalibutan ug mohukom niadtong magmagahi sa ilang kasingkasing batok niini. Mipasabut usab ang Ginoo nga ang kasakit ibubu ngadto sa katawhan sa kalibutan kon dili sila maghinulsol.

Doktrina ug mga Pakigsaad 5:23–35

Gisultihan sa Ginoo Si Martin Harris nga mamahimo siyang usa sa Tulo ka mga Saksi kon maghinulsol siya

Dapita ang mga estudyante sa paghunahuna og balik sa panahon dihang ang Ginoo mipakita sa kamatuoran sa Iyang mga pulong ngadto kanila pinaagi sa Iyang Espiritu. Hangyoa sila nga isulat sa usa ka pirasong papel unsay ilang gihimo aron tabangan nga maandam ang ilang kaugalingon sa pagdawat niana nga pagpakita.

Dapita ang mga estudyante sa pagbasa og hilum sa Doktrina ug mga Pakigsaad 5:23–25, nga mangita kon unsay gisulti sa Ginoo kang Martin Harris nga kinahanglan niyang buhaton aron makabaton og saksi bahin sa mga palid.

Unsa nga pagkaparehas ang anaa tali sa lista nga inyong gihimo ug sa unsay gisulti sa Ginoo kang Martin Harris niini nga mga bersikulo?
Base sa unsay gisulti sa Ginoo kang Martin Harris sa bersikulo 24, unsa nga baruganan ang atong makat-unan mahitungod sa pag-angkon og saksi sa kamatuoran alang sa atong kaugalingon? (Human makatubag ang mga estudyante, isulat sa pisara ang mosunod nga baruganan: Kon magpaubos kita sa atong kaugalingon ug mangayo sa Dios pinaagi sa pag-ampo inubanan sa pagtuo ug sa sinserong kasingkasing, makadawat kita og saksi sa kamatuoran.)
Unsay ipasabut sa pag-ampo uban ang pagpaubos, pagtuo, ug sinseridad?
Kanus-a kamo nakaampo uban ang pagpaubos, pagtuo, ug sinseridad? Unsay naghimo niini nga pag-ampo nga lahi sa ubang pag-ampo nga inyong nadungog o nahalad?

Awhaga ang mga estudyante sa pag-ampo uban ang pagpaubos, pagtuo, ug sinseridad aron makaangkon o malig-on ang ilang pagsaksi sa kamatuoran.

I-summarize ang Doktrina ug mga Pakigsaad 5:26–35 pinaagi sa pagpasabut nga giingnan sa Ginoo si Martin Harris nga gawas kon angkunon niya ang iyang mga sayop sa atubangan sa Ginoo ug tumanon ang mga sugo, wala siyay pribilehiyo nga makakita sa mga palid. Ang Ginoo misulti usab ni Joseph Smith nga mohunong sa paghubad sulod sa mubo nga panahon. Misaad ang Ginoo nga padad-an si Joseph og tabang aron mahuman ang paghubad.

Doktrina ug mga Pakigsaad 17:1–9

Gimandoan sa Ginoo ang Tulo ka mga Saksi sa pagpamatuod bahin sa mga palid

Ipasabut nga niadtong Abril 1829, gipadala sa Ginoo si Oliver Cowdery aron makatabang ni Joseph Smith sa paghubad sa Basahon ni Mormon. Pagka Hunyo 1829, hapit na makompleto ni Joseph Smith ug Oliver Cowdery ang paghubad samtang nagpuyo sa balay ni Peter Whitmer Sr. sa Fayette, New York.

Dapita ang usa ka estudyante sa pagbasa og kusog sa ulohan nga seksyon sa Doktrina ug mga Pakigsaad 17. Hangyoa ang klase sa pagsunod, nga mangita kon unsay hinungdan nga gihatag kini nga pagpadayag. Dapita ang mga estudyante sa pagreport sa ilang nadiskubrihan.

Dapita ang usa ka estudyante sa pagbasa og kusog sa Doktrina ug mga Pakigsaad 17:1-2, ug hangyoa ang klase sa pagsunod, nga mangita kon unsay gikinahanglang buhaton sa Tulo ka mga Saksi aron makakita sa mga palid ug kon unsa ang dugang nga mga butang nga gisaad sa Ginoo nga ipakita kanila.

Unsa ang gikinahanglang buhaton sa Tulo ka mga Saksi aron makakita sa mga palid?
Gawas sa mga palid, unsa pa ang ubang gisaad sa Ginoo nga ipakita kanila?

Dapita ang mga estudyante sa pagbasa og hilum sa Doktrina ug mga Pakigsaad 17:3–6, nga mangita sa responsibilidad sa Tulo ka mga Saksi human makakita sa mga palid.

Sumala sa bersikulo 3, unsa ang gilauman sa Ginoo kang Oliver, David, ug Martin human gipakita kanila ang mga palid?
Base sa gisulti sa Ginoo ngadto sa Tulo ka mga Saksi diha sa bersikulo 3, unsa man ang atong responsibilidad human nato madawat ang saksi sa kamatuoran? (Kinahanglang makita sa mga estudyante ang usa ka baruganan nga susama sa mosunod: Human kita makaangkon og saksi sa kamatuoran, aduna kitay responsibilidad sa pagpamatuod niini.)
Ngano kaha nga nagkinahanglan ang Ginoo nga kita mopamatuod sa kamatuoran human kita makaangkon og saksi bahin niini?
Kanus-a kamo nagmapasalamaton nga inyong napaambit ang inyong pagsaksi sa kamatuoran ngadto sa uban?
Sa unsang paagi napanalanginan ang inyong kinabuhi pinaagi sa uban kinsa mipaambit ug mipamatuod sa kamatuoran human sila makaangkon og saksi?

Ipasabut nga wala madugay human nadawat kini nga pagpadayag, si Joseph Smith, Martin Harris, David Whitmer, ug Oliver Cowdery nangadto sa kakahoyan duol sa balay sa mga Whitmer sa Fayette, New York, sa pag-ampo aron madawat nila ang gisaad nga saksi. Agig tubag sa ilang pag-ampo, nakakita sila og usa ka anghel nga may gigunitang mga palid, ug nadungog nila ang tingog sa Dios nga nagpahayag nga ang Basahon ni Mormon gihubad “pinaagi sa gasa ug gahum sa Dios” (“Ang Pagpamatuod sa Tulo ka mga Saksi,” Basahon ni Mormon). Agig pagsunod sa sugo sa Ginoo, “Ang Pagpamatuod sa Tulo ka mga Saksi” gimantala diha sa matag kopya sa Basahon ni Mormon sukad sa una pa niini nga publikasyon.

Dapita ang mga estudyante sa paghunahuna kon unsa nga mga kamatuoran ang pwede nilang ipamatuod. Awhaga sila nga mopasalig sa pagpaambit sa ilang pagsaksi sa kamatuoran ngadto sa uban.