Leksyon 51

Doktrina ug mga Pakigsaad 131; 132:1–33

Pasiuna ug Timeline

Niadtong Mayo 16–17, 1843, si Propeta Joseph Smith nagpabilin kauban nila ni Benjamin ug Melissa Johnson sa Ramus, Illinois. Samtang didto, ang Propeta mitudlo sa mga Johnson sa balaod sa Ginoo sa kaminyoon ug mibugkos kanila sa kahangturan. Pagkasunod buntag ang Propeta misangyaw og usa ka sermon bahin sa 2 Pedro 1 sa Ramus ug mipasabut sa kahulugan sa mga pulong “labi pa gayud diay nga nahimatud-an ang pulong sa propesiya” (2 Pedro 1:19). Sa ulahing bahin nianang adlawa, human ang usa ka ministro sa Protestante mihatag og sermon ngadto sa mga Santos sa Ramus, ang Propeta mitudlo nga ang “tanan nga espiritu mga butang” (D&P 131:7). Ang mga porsyon sa mga pagtulun-an ni Propeta Joseph Smith niini nga mga okasyon narekord sa Doktrina ug mga Pakigsaad 131.

Niadtong Hulyo 12, 1843, si Propeta Joseph Smith midiktar og pagpadayag nga narekord sa Doktrina ug mga Pakigsaad 132, diin ang Ginoo mitudlo mahitungod “sa bag-o ug walay katapusan nga pakigsaad sa kaminyoon” (D&P 131:2). Ang makasaysayanong ebidensya nagsugyot nga ang Propeta nakadawat og pipila ka mga baruganan nga nakita niini nga pagpadayag sa sayong bahin niadtong 1831. Kini nga leksyon naglakip sa Doktrina ug mga Pakigsaad 132:1–33, diin ang Ginoo mitudlo og mga baruganan mahitungod sa mahangturong kaminyoon ug sa kaimportante sa pagsunod sa Iyang balaod. Ang Leksyon 52 naglakip sa Doktrina ug mga Pakigsaad 132:34–66, nga naglakip sa mga pagtulun-an sa Ginoo mahitungod sa dinaghan nga kaminyoon.

Sayo niadtong 1840Si Joseph Smith mitudlo ni Parley P. Pratt mahitungod sa mahangturon nga kaminyoon.

1840Si Joseph Smith pribadong misugod sa pagtudlo sa doktrina sa dinaghan nga kaminyoon sa Nauvoo, Illinois.

Mayo 16–17, 1843Ang mga pagtulun-an nga narekord sa Doktrina ug mga Pakigsaad 131 gihatag.

Mayo 28, 1843Sila si Joseph ug Emma Smith gibugkos sa kahangturan.

Mayo–Hulyo 1843Si Emma Smith miuyon sa dinaghan nga kaminyoon ni Joseph Smith apan naglisud sa pagdawat sa maong buhat.

Hulyo 12, 1843Ang pagpadayag nga narekord sa Doktrina ug mga Pakigsaad 132 gidiktar.

Mga Sugyot alang sa Pagtudlo

Doktrina ug mga Pakigsaad 131

Si Joseph Smith mitudlo mahitungod sa mahangturong kaminyoon ug miklaro sa ubang mga kamatuoran

I-display ang mosunod nga pamahayag ni Elder Richard G. Scott (1928–2015) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Hunahunaa ang taas nga talan-awon sa kinabuhi, dili lamang sa unsa ang mahitabo karon o sa ugma. Ayaw paghunong sa unsay inyong gitinguha kaayo sa kinabuhi alang sa butang nga gusto ninyo karon” (Richard G. Scott, “Jesus Christ, Our Redeemer,” Ensign, Mayo 1997, 54).

• Unsa ang pipila ka mga paagi diin ang tambag ni Elder Scott makatabang sa usa ka tawo sa paghimo og importanting mga desisyon?

• Ngano nga kini nga tambag makatabang gayud kon maghimo og mga desisyon mahitungod sa pagpakig-date, pagpangulitawo, ug sa kaminyoon?

Dapita ang mga estudyante samtang magtuon sila sa Doktrina ug mga Pakigsaad 131; 132:1–33 sa pagpangita sa doktrina ug mga baruganan nga makatabang nila nga makasabut sa kaimportante sa mahangturong kaminyoon.

Pagsensitibo sa mga panginahanglan ug mga kabalaka sa mga estudyante

Posibling dunay mga estudyante sa imong klase nga maglisud sa paghisgot bahin sa mahangturong kaminyoon. Kini nga hilisgutan posibling lisud alang kanila kon, pananglitan, ang ilang mga ginikanan nagdiborsyo, kon usa o duha ka ginikanan dili mga miyembro sa Simbahan, o kabahin sila sa mga pamilya nga adunay mga anak sa unang mga kaminyoon. Samtang ikaw nagtudlo sa doktrina sa mahangturong kaminyoon, pagmasensitibo sa mga panginahanglan ug mga kabalaka niining mga estudyante.

Ipasabut nga niadtong Mayo 16, 1843, sila si Propeta Joseph Smith ug William Clayton mibiyahe ngadto sa Ramus, Illinois, ug nagpuyo sa panimalay nila ni Benjamin ug Melissa Johnson. Samtang didto, ang Propeta mitudlo sa mga Johnsons sa importante nga doktrina mahitungod sa mahangturon nga kaminyoon ug mibugkos kanila sa kahangturan. Si William Clayton mirekord sa mga pagtulun-an sa Propeta niana nga okasyon (tan-awa sa Matthew McBride, “Our Hearts Rejoiced to Hear Him Speak,” sa Revelations in Context, ed. Matthew McBride and James Goldberg [2016], 279–80, o history.lds.org). Ang pipila niining mga pagtulun-an narekord sa Doktrina ug mga Pakigsaad 131:1–4.

Dapita ang usa ka estudyante sa pagbasa og kusog sa Doktrina ug mga Pakigsaad 131:1–4. Hangyoa ang klase sa pagsunod, nga mangita sa unsay gitudlo sa Propeta mahitungod sa mahangturong kaminyoon.

• Unsa nga baruganan ang atong makita sa mga bersikulo 1–2 mahitungod sa unsay atong buhaton aron makaangkon sa labing taas nga ang-ang sa celestial nga gingharian? (Tabangi ang mga estudyante sa pag-ila sa mosunod nga baruganan: Aron makaangkon sa labing taas nga ang-ang sa celestial nga gingharian, kinahanglang mosulod kita sa bag-o ug walay katapusan nga pakigsaad sa kaminyoon.)

Ipasabut nga niini nga konteksto ang pulong nga bag-o nagpasabut nga ang pakigsaad bag-o nga gipahiuli sa atong dispensasyon; ang walay katapusan nagpasabut nga ang pakigsaad, naglakip sa mga panalangin niini, diha na gikan sa sinugdanan ug pareha ra sa kahangturan.

• Sumala sa mga bersikulo 3–4, unsay mahitabo kon dili kita mosulod ngadto sa bag-o ug walay katapusan nga pakigsaad sa kaminyoon? (Mahimo nimong ipasabut nga ang mga pulong nga “dili siya makabaton og mga anak” nagpasabut nga kadtong dili mosulod ug motuman sa bag-o ug walay katapusan nga pakigsaad sa kaminyoon dili makabaton og mga anak human sa Pagkabanhaw.)

• Base sa mga kamatuoran nga gitudlo niini nga mga bersikulo, unsaon nimo sa pagpasabut ngano nga ang celestial nga kaminyoon mao ang importante sa plano sa Dios alang sa atong kahimayaan?

I-summarize ang Doktrina ug mga Pakigsaad 131:5–8 pinaagi sa pagpasabut nga niini nga mga bersikulo si Propeta Joseph Smith mipasabut sa kahulugan sa mga pulong nga “labi pa gayud diay nga nahimatud-an ang pulong sa propesiya” nga gihisgutan sa 2 Pedro 1:19, ug mitudlo siya nga ang “tanan nga espiritu mga butang” (bersikulo 7).

Doktrina ug mga Pakigsaad 132:1–20

Ang Ginoo mipasabut sa mga kondisyon ug mga panalangin sa bag-o ug walay katapusan nga pakigsaad

Ipasabut nga niadtong Hulyo 12, 1843, si Joseph Smith ug ang iyang igsoong lalaki nga si Hyrum naghisgot sa doktrina sa dinaghan nga kaminyoon, nga si Emma ang asawa ni Joseph taud-taod nang naglisud sa pagdawat. Atol sa ilang panag-istoryahanay, giawhag ni Hyrum si Joseph sa pagrekord sa pagpadayag nga iyang nadawat bahin sa celestial nga kaminyoon, nga naglakip usab sa mga instruksyon sa Ginoo bahin sa dinaghan nga kaminyoon. Ang Propeta midiktar dayon sa pagpadayag nga narekord sa Doktrina ug mga Pakigsaad 132. “Bisan og ang pagpadayag nga narekord niadtong 1843, ang ebidensya nagpakita nga ang pipila sa mga baruganan nga nalakip niini nga pagpadayag nahibaloan sa Propeta sa sayo pa niadtong 1831” (Doktrina ug mga Pakigsaad 132, ulohan sa seksyon).

Dapita ang usa ka estudyante sa pagbasa og kusog sa Doktrina ug mga Pakigsaad 132:1–3. Hangyoa ang klase sa pagsunod, nga mangita sa pangutana nga gipangutana ni Propeta Joseph Smith sa Ginoo. Hangyoa ang mga estudyante sa pagreport sa unsay ilang nakit-an.

Itudlo nga ang mga pulong “Ako … motubag kaninyo mahitungod niini nga butang” sa bersikulo 2, ug pahibaloa ang mga estudyante nga sa wala pa motubag ang Ginoo sa pangutana sa Propeta mahitungod sa dinaghan nga kaminyoon, Iyang gitudlo ang importanting mga baruganan mahitungod sa pakigsaad sa mahangturong kaminyoon ug pagkamasulundon sa Iyang balaod. Ang tubag sa Ginoo sa pangutana sa Propeta mahitungod sa dinaghan nga kaminyoon narekord sa Doktrina ug mga Pakigsaad 132:34–65, nga pagahisgutan sa sunod nga leksyon.

Dapita ang usa ka estudyante sa pagbasa og kusog sa Doktrina ug mga Pakigsaad 132:4–6. Hangyoa ang klase sa pagsunod, nga mangita kon unsa ang gipadayag sa Ginoo sa Propeta mahitungod sa mahangturon nga kaminyoon ug pagkamasulundon sa Iyang balaod. Sa dili pa basahon sa estudyante, pahinumdumi ang mga estudyante nga ang mga pulong nga “bag-o ug walay katapusan nga pakigsaad” diha sa bersikulo 4 nagpasabut sa pakigsaad sa mahangturong kaminyoon (tan-awa sa D&P 131:2).

• Sumala sa mga bersikulo 4–5, unsay mahitabo kon ang usa ka tawo dili “motuman,” o mosunod, sa pakigsaad sa mahangturong kaminyoon?

• Unsay mahitabo niadtong kinsa motuman niini nga balaod?

Ipasabut nga ang mga pulong nga “bag-o ug walay katapusan nga pakigsaad” diha sa bersikulo 6 nagpasabut sa kahingpitan sa ebanghelyo ni Jesukristo, nga naglakip sa tanang mga ordinansa ug mga pakigsaad nga importante sa kaluwasan ug kahimayaan (tan-awa sa D&P 66:2). Ang mahangturong kaminyoon usa ka gikinahanglan nga bahin sa bag-o ug walay katapusan nga pakigsaad.

• Sumala sa Doktrina ug mga Pakigsaad 132:6, ngano nga ang Ginoo mi-establisar sa bago ug walay katapusan nga pakigsaad? (Mahimo nimong ipasabut nga ang mga pulong nga “kahingpitan sa akong himaya” nagpasabut sa kahimayaan sa mga anak sa Dios [tan-awa sa Moises 1:39].)

Pahinumdumi ang mga estudyante nga ang usa ka pakigsaad mao ang “usa ka panagsabut tali sa Dios ug sa tawo, apan dili sila molihok ingon nga managsama diha sa kasabutan. Ang Dios naghatag sa mga kondisyon alang sa pakigsaad, ug ang mga tawo miuyon sa pagbuhat unsay Iyang gipangayo kanila nga buhaton. Ang Dios dayon misaad sa mga tawo sa pipila ka mga panalangin alang sa ilang pagkamasulundon” (Giya ngadto sa mga Kasulatan, “Pakigsaad,” scriptures.lds.org).

Dapita ang usa ka estudyante sa pagbasa og kusog sa Doktrina ug mga Pakigsaad 132:7. Hangyoa ang klase sa pagsunod, nga mangita sa mga kondisyon nga gihatag sa Ginoo mahitungod sa bag-o ug walay katapusan nga pakigsaad.

• Unsa nga mga kondisyon ang gihatag sa Ginoo kabahin sa bag-o ug walay katapusan nga pakigsaad? (Kinahanglan kini nga “mabugkos pinaagi sa Espiritu Santo sa saad” ug mosulod pinaagi sa tukma nga awtoridad sa priesthood.)

Aron matabangan ang mga estudyante nga mas makasabut unsay gipasabut sa “mabugkos pinaagi sa Espiritu Santo sa saad” (bersikulo 7), dapita ang usa ka estudyante sa pagbasa og kusog sa mosunod nga parapo [paragraph]:

“Ang Espiritu Santo mao ang Balaan nga Espiritu sa Saad (Mga Buhat 2:33). Siya nagmatuod nga madawat sa Dios ang matarung nga mga buhat, ordinansa, ug mga pakigsaad sa mga tawo. Ang Balaang Espiritu sa Saad mosaksi ngadto sa Amahan nga ang mga ordinansa sa pagluwas gipahigayon sa matarung nga paagi ug nga ang mga pakigsaad nga nauban [niini] giampingan” (Giya ngadto sa mga Kasulatan, “Balaan nga Espiritu sa Saad,” scriptures.lds.org).

• Unsay buot ipasabut sa “gibugkos pinaagi sa Espiritu Santo sa saad” (D&P 132:7)?

• Unsa nga doktrina ang atong makit-an gikan sa Doktrina ug mga Pakigsaad 132:7 mahitungod sa unsay gikinahanglan alang sa usa ka pakigsaad nga mahimong mahangturon? (Tabangi ang mga estudyante nga moila sa mosunod nga doktrina: Kon gihimo ang pakigsaad pinaagi sa awtoridad sa priesthood ug gisilyuhan sa Balaang Espiritu sa Saad, kini molungtad hangtud sa kahangturan.)

I-summarize ang Doktrina ug mga Pakigsaad 132:8–14 pinaagi sa pagpasabut nga ang Ginoo nagpadayon sa pagpasabut sa mga kondisyon sa Iyang mga balaod ug mga ordinansa. Mipahayag Siya nga ang tanan nga nahimo “pinaagi [Kaniya] o pinaagi sa [Iyang] pulong” (bersikulo 13) magpabilin sa kahangturan apan ang uban sa katapusan malaglag.

Ipasabut nga human ang Ginoo mitudlo sa kondisyon sa bag-o ug walay katapusan nga pakigsaad, Iyang gigamit ang pakigsaad sa kaminyoon sa paghulagway sa kaimportante sa pagtuman niini nga mga kondisyon.

Dapita ang tulo ka estudyante nga magpuli-puli sa pagbasa og kusog sa Doktrina ug mga Pakigsaad 132:15–18. Hangyoa ang klase sa pagsunod, nga mangita sa nagkalain-laing matang sa kaminyoon nga gihulagway niini nga mga bersikulo.

• Unsa nga matang sa kaminyoon ang gihulagway sa bersikulo 15? Sa bersikulo 18?

• Sumala sa mga bersikulo 16–18, unsay mahitabo niadtong kinsa dili motuman sa balaod sa Dios kabahin sa mahangturong kaminyoon?

Isulat ang mosunod nga dili kompleto nga pamahayag sa baruganan diha sa pisara:

Kon ang usa ka bana ug usa ka asawa motuman sa bag-o ug walay katapusan nga pakigsaad sa kaminyon, nan …

Ipares-pares ang klase. Dapita ang mga estudyante sa pagbasa sa Doktrina ug mga Pakigsaad 132:19–20 sa ilang pagpares-pares, nga mangita sa mga panalangin sa pagtuman sa mga kondisyon sa Ginoo alang sa mahangturon nga kaminyoon. Dapita ang mga estudyante sa pagkonsiderar nga markahan ang unsay ilang nadiskobrehan. Hangyoa ang matag pares sa pagsulat og usa ka kapahayag [sentence] nga magkompleto sa pamahayag sa baruganan diha sa pisara. Human sa igong panahon, dapita ang mga estudyante sa pagreport unsay gisulat. Ang mga tubag posibling maglakip sa mosunod:

… sila makapanunod og mga trono, mga gingharian, mga kayutaan, mga kagamhanan, ug mga kamandoan.

… ang ilang kaminyoon adunay kahulugan kon sa panahon nga sila wala na sa kalibutan.

… sila makadawat og kahimayaan ug himaya sa tanang mga butang.

… sila mga dios.

… ang ilang pamilya ug ang ilang kaliwatan magpadayon hangtud sa hangtud.

• Unsa kaha ang kinahanglang buhaton sa bana ug asawa aron makatuman sa pakigsaad sa mahangturon nga kaminyoon?

• Sa unsang paagi nga ang pagsabut sa mga panalangin sa mahangturon nga kaminyoon makaapekto sa paagi sa panghunahuna sa usa ka tawo ug mangandam alang sa kaminyoon?

Ipakigbahin ang imong pagpamatuod sa balaod sa Ginoo sa mahangturon nga kaminyoon ug sa mga panalangin nga atong madawat pinaagi sa pagsunod niana nga balaod. Ipaniguro sa mga estudyante nga bisan dili ang tanan adunay oportunidad sa kaminyoon niini nga kinabuhi, ang Ginoo misaad nga dili Niya ihikaw ang bisan unsang panalangin nga naggikan sa matinud-anon.

Hangyoa ang mga estudyante sa pagpamalandong unsay ilang buhaton sa pagpangandam alang niini o, kon nahimo na nila kini nga pakigsaad, tumanon sa matinud-anong paagi ang pakigsaad sa mahangturon nga kaminyoon. Awhaga sila sa pagsunod sa bisan unsang mga pag-aghat nga ilang madawat.

Doktrina ug mga Pakigsaad 132:21–33

Ang Ginoo mipasabut unsaon sa pag-ila sa Amahan ug sa Anak

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 132:21–25. Hangyoa ang klase sa pagsunod, nga mangita sa imahe nga gigamit sa Ginoo sa paghulagway sa kaimportante sa pagsunod sa Iyang balaod kabahin sa mahangturon nga kaminyoon.

• Sa unsang mga paagi ang imahe sa “higpit … [nga] pultahan” ug “pig-ot … [nga] agianan” (bersikulo 22) nagrepresentar sa balaod sa Ginoo kabahin sa mahangturon nga kaminyoon?

• Sa unsang mga paagi nga ang imahe sa “dako … [nga] pultahan” ug “lapad … [nga] dalan” (bersikulo 25) nagrepresentar sa kasamtangang mga opinyon sa katilingban mahitungod sa kaminyoon?

• Sumala sa mga bersikulo 22 ug 25, nganong daghan ang napakyas sa pagsulod sa higpit nga agianan paingon sa kahimayaan?

• Unsa nga baruganan ang atong makat-unan gikan sa mga bersikulo 23–25 mahitungod sa unsa gayud ang atong buhaton aron makabaton og kinabuhing dayon? (Tabangi ang mga estudyante sa pag-ila sa mosunod nga baruganan: Kon dawaton nato ang Ginoo ug ang Iyang balaod, nan makaila kita sa Amahan ug sa Anak ug sa katapusan makadawat sa kahimayaan ug kinabuhing walay katapusan.)

Ipasabut nga ang mga pulong nga “kinabuhi nga walay katapusan” (mga bersikulo 22, 24) nagpasabut sa abilidad niadtong kinsa nakaangkon og kahimayaan aron sa paghimo sa ilang kaugalingong mahangturong mga pamilya pinaagi sa pagpanganak ug pag-amuma sa espiritu nga mga anak (tan-awa sa D&P 131:4; 132:19, 22, 24, 30).

I-summarize ang D&P 132:26–33 pinaagi sa pagpasabut nga ang Ginoo mipasidaan unsay mahitabo niadtong kinsa nakasala human makadawat sa bag-o ug walay katapusang pakigsaad sa kaminyoon (tan-awa sa mga bersikulo 26–27). Mitudlo usab siya nga tungod kay si Abraham andam nga modawat ug mosunod sa tanang balaod sa Dios, naglakip sa balaod sa mahangturong kaminyoon, makaangkon siya og kahimayaan—lakip sa saad nga ang iyang pamilya ug kaliwat magpadayon sa kahangturan (tan-awa sa mga bersikulo 29–30).

Ipamatuod nga kon kita “mobuhat sa mga gibuhat ni Abraham” (D&P 132:32) pinaagi sa pagsulod ug pagtuman sa bag-o ug walay katapusang pakigsaad, kita usab makadawat sa mga panalangin sa kahimayaan ug mahangturong mga pamilya. Dapita ang mga estudyante nga magmainampoong magtinguha sa pagsunod sa mga kamatuoran nga nakat-unan sa leksyon karon.