Leksyon 11: Doktrina ug mga Pakigsaad 26-28

Leksyon 11

Doktrina ug mga Pakigsaad 26–28

Pasiuna ug Timeline

Human sa pag-organisar sa Simbahan, mibiyahe si Propeta Joseph Smith sa makadaghang higayon tali sa Harmony, Pennsylvania, ug sa mga branch sa Simbahan sa New York aron sa paglig-on sa mga miyembro ug sa pagtukod sa Simbahan. Niadtong Hulyo 1830, mihatag ang Ginoo og pagpadayag nga nagtudlo nila ni Joseph Smith, Oliver Cowdery, ug John Whitmer kon unsaon paggamit ang ilang oras samtang nag-andam alang sa komperensya sa Simbahan sa tinglarag. Kini nga pagpadayag, nga girekord diha sa Doktrina ug mga Pakigsaad 26, mihatag og direksyon alang sa espiritwal ug temporal nga mga butang ug dugang nga panudlo kalabut sa baruganan nga inuyunan sa kadaghanan diha sa Simbahan.

Samtang didto sa Harmony niadtong Agosto 1830, mibiyahe si Joseph aron sa pagkuha og bino alang sa sakrament sa dihang gisugat siya sa usa ka langitnong mensahero. Gitudloan ang Propeta kalabut sa mga ilhanan sa sakrament ug ang importansya sa pagsul-ob sa tibuok nga taming sa Dios. Ang mga direksyon nga iyang nadawat girekord diha sa Doktrina ug mga Pakigsaad 27.

Tungod sa nagtubo nga pagpanggukod diha sa Harmony, Pennsylvania, gidawat ni Joseph ug Emma Smith ang imbitasyon ni Peter Whitmer Sr. nga mopuyo og balik uban sa iyang pamilya didto sa Fayette, New York. Sa ilang pag-abut og sayo sa Septyembre 1830, nahibaloan sa Propeta nga si Hiram Page nagpatuo nga nakadawat og mga pagpadayag alang sa Simbahan pinaagi sa usa ka bato. Nangutana si Joseph sa Ginoo ug nadawat ang pagpadayag nga girekord diha sa Doktrina ug mga Pakigsaad 28, diin giklaro sa Ginoo ang kahan-ayan sa pagdawat og pagpadayag alang sa Simbahan.

Hunyo 1830Pagpanggukod sa manggugubot didto sa Colesville, New York, mipugong sa bag-ong gibunyagan nga mga kinabig nga makumpirmahan.

Hunyo 1830Gisugdan ni Joseph Smith ang dinasig nga hinubad sa Biblia pinaagi sa pagdiktar sa “Mga Panan-awon ni Moises” (Moises 1).

Hulyo 1830Ang Doktrina ug mga Pakigsaad 26 nadawat.

Agosto 1830Ang Doktrina ug mga Pakigsaad 27 nadawat.

Agosto 1830Si Hiram Page nagpatuo nga nakadawat og pagpadayag alang sa Simbahan.

Sayo sa Septyembre 1830Mibalhin si Joseph ug Emma Smith ngadto sa Fayette, New York.

Septyembre 1830Ang Doktrina ug mga Pakigsaad 28 nadawat.

Septyembre 26–28, 1830Ang ikaduhang komperensya sa Simbahan gihimo didto sa Fayette, New York.

Oktubre 1830Mibiya si Oliver Cowdery ug uban sa usa ka misyon ngadto sa mga Lamanite.

Mga Sugyot alang sa Pagtudlo

Doktrina ug mga Pakigsaad 26

Nagtudlo ang Ginoo sa Iyang mga sulugoon kabahin sa baruganan nga inuyunan sa kadaghanan

Dapita ang mga estudyante sa paghunahuna og usa ka higala kinsa dili miyembro sa Simbahan nagtambong og miting uban kanila diin ang mga opisyales sa Simbahan gipaluyohan.

Unsaon ninyo sa pagpasabut ang inyong higala sa batasan nga pagpaluyo diha sa Simbahan?

Pahinumdumi ang mga estudyante nga panahon sa ting-init sa 1830, si Joseph Smith ug ang uban nga mga miyembro sa Simbahan misinati og hilabihan kaayo nga pagpanggukod. Sa usa ka higayon, mga paghulga gikan sa manggugubot mipugong sa daghang bag-o nga mga kinabig nga makumpirmahan human sa ilang mga bunyag. Kaduha gidakop si Joseph Smith ug gikiha og bakak nga mga pasangil. Human sa iyang pagkadakop ug mga pagkiha didto sa New York, mipauli sa panimalay si Joseph ug si Emma didto sa Harmony, Pennsylvania, diin nadawat ni Joseph ang tulo ka mga pagpadayag gikan sa Ginoo sa panahon sa Hulyo 1830 (tan-awa sa D&P 24–26). Diha sa ikatulo nga pagpadayag (D&P 26), gitambagan sa Ginoo si Joseph Smith, Oliver Cowdery, ug John Whitmer kon sa unsa nga paagi igahin ang ilang oras ug gihatagan og direksyon alang sa pagbansay sa inuyunan sa kadaghanan.

Dapita ang usa ka estudyante sa pagbasa og kusog sa Doktrina ug mga Pakigsaad 26:1 ug hangyoa ang klase sa pagpangita sa tambag sa Ginoo ngadto sa iyang mga sulugoon kon unsaon pagpahinungod sa ilang oras.

Unsa ang gitambag sa Ginoo ni Joseph, Oliver, ug John nga buhaton sa ilang oras?
Unsa nga saad ang gihimo sa Ginoo kalabut sa umaabut nga komperensya sa Simbahan?

Dapita ang mga estudyante sa pagbasa og hilum sa Doktrina ug mga Pakigsaad 26:2 mangita sa mga panudlo nga gihatag sa Ginoo mahitungod kon unsaon pagpahigayon ang mga kalihokan sa Simbahan.

Unsa nga doktrina ang gipadayag sa Ginoo diha sa bersikulo 2 mahitungod sa unsa nga paagi buhaton ang tanang mga butang diha sa Simbahan? (Tabangi ang mga estudyante sa pag-ila sa mosunod nga doktrina: Ang tanan nga mga butang kinahanglan gayud nga mabuhat pinaagi nga inuyunan sa kadaghanan ug pinaagi sa hugot nga pagtuo.)
Unsa ang kahulugan sa “inuyunan sa kadaghanan”? (Ang “inuyunan sa kadaghanan” nagpasabut sa mga miyembro sa Simbahan nga naggamit sa ilang kabubut-on sa pagpahayag sa ilang pagkaandam o dili pagkaandam sa pagpaluyo sa usa ka tawo kinsa gitawag sa Ginoo sa pag-alagad sa Iyang Simbahan o i-orden ngadto sa usa ka katungdanan sa priesthood. Ang inuyunan sa kadaghanan gipakita pinaagi sa pagpataas sa tuong kamot.)
Unsa ang kalainan tali sa inuyunan sa kadaghanan ug pagpili o paghukom pinaagi sa kinadaghanang boto?

Dapita ang usa ka estudyante sa pagbasa og kusog sa mosunod nga pamahayag ni Presidente HenryB. Eyring sa Unang Kapangulohan. Hangyoa ang klase sa pagpaminaw sa unsay kahulugan kon kita nagpakita sa atong inuyunan sa kadaghanan:

“Pinaagi sa atong pagpaluyo nga boto, naghimo kita og solemne nga mga saad. Kita nagsaad nga mag-ampo alang sa mga sulugoon sa Ginoo ug nga Siya mogiya ug molig-on kanila (tan-awa sa D&P 93:51). Kita nagsaad nga kita mangita ug magdahum nga mobati og inspirasyon gikan sa Dios diha sa ilang tambag ug kon sila mobuhat sa ilang calling (tan-awa sa D&P 1:38). …

“Sa atong pag-isa sa kamot aron sa pagpaluyo sa usa ka tawo, kita nagpasalig nga molihok alang sa bisan unsa nga katuyoan sa Ginoo nga kana nga tawo gitawag aron sa pagtuman” (Henry B. Eyring, “Gitawag sa Dios ug gipaluyohan sa Katawhan” Liahona, Hunyo 2012, 4).

Sa unsa nga paagi kaha nga ang pagbansay sa inuyunan sa kadaghanan mahimo nga panalangin ug panalipod alang sa Simbahan?

Doktrina ug mga Pakigsaad 27:1–4

Gitudloan si Joseph Smith og mga kamatuoran kalabut sa mga ilhanan sa sakrament

Dapita ang mga estudyante sa paghunahuna mahitungod sa ilang labing bag-o nga kasinatian sa pag-ambit sa sakrament. Hangyoa sila sa paggrado sa hilum kon unsa ka makahuluganon ang ilang kasinatian og grado nga gikan sa 1 hangtud 10, nga ang 1 mao ang labing minos ka makahuluganon ug 10 mao ang labing makahuluganon.

Unsa ang mabuhat sa usa ka tawo nga mahimo ang pag-ambit sa sakrament nga mas makahuluganon? (Isulat ang tubag sa mga estudyante diha sa pisara.)

Hangyoa ang mga estudyante nga mangita sa mga kamatuoran samtang ilang tun-an ang Doktrina ug mga Pakigsaad 27 nga makatabang kanila sa pag-ambit sa sakrament nga mas makahuluganon nga kasinatian alang kanila.

Aron matabangan ang mga estudyante nga masabtan ang kinatibuk-ang kahulugan sa Doktrina ug mga Pakigsaad 27, ipasabut nga niadtong Agosto 1830, mibisita si Newel ug Sally Knight ni Joseph ug Emma didto sa Harmony, Pennsylvania. Si Sally ug si Emma nabunyagan sa Hunyo 28, 1830, apan walay usa nga nakumpirmahan tungod sa pagpanggukod sa manggugubot. Sa panahon sa pagbisita sa mga Knight, gisugyot nga si Sally ug si Emma pagakumpirmahan ug nga ang grupo moambit sa sakrament.

Dapita ang mga estudyante sa pagbasa og hilum sa ulohan sa seksyon alang sa Doktrina ug mga Pakigsaad 27 mangita alang sa unsay nahitabo sa dihang ang Propeta milakaw aron sa pagkuha og bino alang sa sakrament.

Dapita ang pipila ka mga estudyante sa pagpuli-pulig basa og kusog gikan sa Doktrina ug mga Pakigsaad 27:1–4, ug hangyoa ang klase sa pagpangita alang sa unsay gipadayag sa langitnong mensahero ngadto ni Joseph Smith mahitungod sa sakrament.

Unsa ang gitudlo sa mensahero ngadto ni Joseph Smith mahitungod sa unsay kinahanglan natong kan-on ug imnon isip ang mga ilhanan sa sakrament?
Sumala sa bersikulo 2, kinahanglang unsa ang atong tutukan samtang kita nag-ambit sa sakrament? (Samtang kita nag-ambit sa sakrament, gimandoan kita sa pagbaton og bug-os nga tinguha ngadto sa himaya sa Dios ug sa paghinumdom sa maulaong sakripisyo ni Jesukristo. Mahimo nimong dapiton ang mga estudyante sa pagmarka sa mga pulong nga nagtudlo niini nga doktrina diha sa bersikulo 2.)
Unsa ang kahulugan sa pagbaton og bug-os nga tinguha ngadto sa himaya sa Dios? (Aron sa pagtutok diha Kaniya ug sa paglinya sa atong kabubut-on uban sa Iya.)
Sa unsa nga paagi nga ang pagpamalandong sa maulaong sakripisyo sa Manluluwas sa panahon sa sakrament mitabang kanimo nga adunay mas makahuluganong kasinatian?

Dapita ang mga estudyante sa pagpamalandong kon unsa ang ilang mabuhat aron mas maayong makahinumdom sa sakripisyo ni Jesukristo ug sa pag-ambit sa sakrament “uban ang bug-os nga tinguha ngadto sa kahimayaan sa [Dios]” (D&P 27:2). Awhaga sila sa paglihok sa ilang mga ideya sa sunod panahon nga sila modawat sa sakrament.

Doktrina ug mga Pakigsaad 27:5–18

Naghulagway ang Ginoo og dako kaayo nga pagpundok sa Iyang mga sulugoon gikan sa tanang mga dispensasyon aron sa pag-ambit sa sakrament sa dili pa ang Ikaduhang Pag-anhi

Dapita ang usa ka estudyante sa pagbasa og kusog sa Doktrina ug mga Pakigsaad 27:5 ug hangyoa ang klase sa pagpangita sa unsay gisulti sa Manluluwas nga Iyang buhaton kon moanhi Siya pag-usab.

Sultihi ang mga estudyante nga diha sa Doktrina ug mga Pakigsaad 27:5–14, nakat-unan ni Joseph Smith nga ang matinud-anong mga Santos gikan sa tanang dispensasyon moambit sa sakrament uban sa Manluluwas isip kabahin sa usa ka dako nga pagpundok didto sa Adam-ondi-Ahman sa dili pa moanhi ang Manluluwas diha sa kahimayaan. Dapita ang mga estudyante sa pagtan-aw niini nga mga bersikulo ug sa pagpangita alang sa pipila niadtong kinsa moapil.

Sumala sa bersikulo 14, kinsa pa ang moambit sa sakrament uban sa Manluluwas?

Human makatubag ang mga estudyante, ipakita ang mosunod nga pamahayag ni Elder Bruce R. McConkie (1915–1985) sa Korum sa Napulog Duha ka mga Apostoles:

“Ang tanang matinud-anong tawo sa tibuok kasaysayan sa kalibutan, ang tanang tawo kinsa nabuhi nga takus sa kinabuhing dayon diha sa gingharian sa Amahan motambong ug moambit, uban sa Ginoo, sa sakrament” (Bruce R. McConkie, The Promised Messiah [1978], 595).

Unsa ang imong pagabation kon ikaw makaambit sa sakrament uban sa Manluluwas?

Dapita ang usa ka estudyante sa pagbasa og kusog sa Doktrina ug mga Pakigsaad 27:15–18 ug hangyoa ang klase sa pagpangita alang sa unsay kinahanglan gayud natong buhaton aron makasarang alang sa mga panalangin sa Ginoo, lakip ang pagpakatakos sa pakig-uban sa Ginoo niining sagrado nga miting. Dapita ang pipila ka mga estudyante sa pagreport unsay ilang nakit-an.

Unsa nga baruganan ang inyong nailhan gikan sa mga bersikulo 15–18 mahitungod sa mga panalangin nga atong madawat kon atong isul-ob ang tibuok nga taming sa Dios? (Bisan tuod og sila mogamit og uban nga mga pulong, ang mga estudyante kinahanglan nga moila sa mosunod nga baruganan: Kon atong isul-ob ang tibuok nga taming sa Dios, kita makasugakod sa dautan ug magpabilin nga matinud-anon hangtud ang Ginoo moanhi.)
Unsay imong mahimo sa kada adlaw aron masul-ob ang tibuok nga taming sa Dios? Sa unsa nga paagi kining mga butanga nagtabang kanimo sa pagsugakod sa dautan ug sa pagpabilin nga matinud-anon?
Ngano kaha nga importante nga isul-ob ang tibuok nga taming sa Dios ug dili lang ang usa ka bahin niini?

Ipakigbahin ang imong pagpamatuod kon giunsa sa imong mga paningkamut sa pagsul-ob sa taming sa Dios pag-apekto sa imong hugot nga pagtuo ug sa abilidad sa pagsugakod sa dautan. Dapita ang mga estudyante sa pagkonsiderar kon unsay ilang mahimo aron mas maayo ang pagsul-ob sa tibuok nga taming sa Dios. Awhaga sila sa pagbuhat sa bisan unsang mga pag-aghat nga ilang madawat.

Doktrina ug mga Pakigsaad 28

Nakat-unan ni Oliver Cowdery nga ang propeta lamang ang makadawat og pagpadayag alang sa Simbahan

Ipasabut nga tungod sa nagtubo nga pagpanggukod diha sa Harmony, Pennsylvania, gidawat ni Joseph ug Emma ang imbitasyon ni Peter Whitmer Sr. nga mopuyo og balik uban sa iyang pamilya didto sa Fayette, New York. Wala madugay sa pag-abut sa mga Smith niadtong Septyembre 1830, giatubang sa Propeta ang lain nga mahagitong sitwasyon. Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 28. Hangyoa ang mga estudyante sa pagsunod, nga mangita alang sa mahagitong sitwasyon nga giatubang sa Propeta niini nga panahon.

Unsa nga mga problema sa imong hunahuna ang moresulta gikan sa pagpatuo ni Hiram Page nga nakadawat og mga pagpadayag alang sa Simbahan?

Ipakita diha sa ulohan sa seksyon nga bisan si “Oliver Cowdery sayop nga pagka-impluwensya” ni Hiram Page sa pagpatuo kabahin sa pagpadayag. Ipasabut nga agi og dugang ngadto sa sitwasyon ni Hiram Page, usa ka nag-unang hitabo nga nag-apil ni Oliver Cowdery nagklaro sa panginahanglan alang sa Ginoo sa pagtudlo sa mga Santos kalabut sa husto nga paagi sa pagpadayag diha sa Iyang Simbahan. Sa hinapos sa ting-init sa 1830, misulat si Oliver ngadto ni Propeta Joseph Smith ug mipaila nga siya nagtuo nga usa ka tudling diha sa pagpadayag nga karon girekord diha sa Doktrina ug mga Pakigsaad 20 may sayop. Misulat si Oliver ngadto sa Propeta, “Nagsugo ako kanimo diha sa ngalan sa Dios sa pagpapas niadto nga mga pulong ” (Manuscript History of the Church, vol. A-1, p. 51, josephsmithpapers.org). Bisan tuod og sa kadugayan si Joseph nakakombinsir ni Oliver sa iyang sayop nga naninguha sa pagkorihir og usa ka pagpadayag gikan sa Ginoo ngadto sa Iyang Propeta, kini nga hitabo nagpakita sa panginahanglan sa mga Santos sa pagsabut kon sa unsang paagi ang Ginoo nagpadayag sa Iyang kabubut-on ngadto sa Iyang Simbahan.

Pares-paresa ang klase. I-assign ang usa ka kauban sa matag pares sa pagtuon sa Doktrina ug mga Pakigsaad 28:1–3 ug ang lain nga kauban sa pagtuon sa Doktrina ug mga Pakigsaad 28:4–8. Dapita ang mga estudyante sa pagbasa og hilum sa ilang mga bersikulo, nga mangita sa unsay gitudlo sa Ginoo aron matabangan ang mga Santos sa pagsabut kon sa unsang paagi ang pagpadayag moabut sa Simbahan. Hangyoa ang mga estudyante sa paghisgot uban sa ilang kauban kon unsa ang ilang nakit-an. Human sa igong panahon, pangutan-a ang klase:

Unsa nga importanting doktrina mahitungod sa pagpadayag ang atong mailhan gikan sa mga bersikulo 1–3? (Human ang mga estudyante motubag, isulat ang mosunod diha sa pisara: Ang Presidente sa Simbahan mao lamang ang tawo nga awtorisado sa pagdawat og mga pagpadayag alang sa tibuok Simbahan.)
Unsa nga mga baruganan ang atong makat-unan gikan sa mga bersikulo 4–8? (Human ang mga estudyante motubag, isulat ang mosunod nga kamatuoran diha sa pisara: Mahimo kitang makadawat og personal nga pagpadayag alang sa atong kaugalingon nga kaayohan ug sa pagtabang sa atong mga calling.)
Sa unsa kaha unta nga paagi kini nga mga kamatuoran makatabang ni Oliver Cowdery ug sa uban kinsa nalingla sa giangkon ni Hiram Page nga mga pagpadayag?
Sa unsa nga paagi kaha nga ang pagsabut niini nga mga kamatuoran magtabang kanato sa atong panahon?

Dapita ang mga estudyante sa paghunahuna og ehemplo kabahin sa panahon nga ang Presidente sa Simbahan nakadawat og pagpadayag alang sa tibuok Simbahan. Hangyoa usab ang mga estudyante sa paghunahuna mahitungod og usa ka panahon nga sila nakadawat og pagpadayag alang sa ilang kaugalingon nga kaayohan o alang sa pagtabang sa ilang mga calling. Dapita ang pipila ka mga estudyante sa pagpakigbahin sa ilang mga hunahuna uban sa klase.

I-summarize ang Doktrina ug mga Pakigsaad 28:9–16 pinaagi sa pagsulti sa mga estudyante nga niini nga mga bersikulo misugo ang Ginoo ni Oliver Cowdery sa pagsulti ni Hiram Page nga ang iyang giingon nga mga pagpadayag dili gikan sa Dios ug nga siya nalingla ni Satanas. Gibalik usab sa Ginoo ang panginahanglan sa pagbuhat sa tanang mga butang diha sa Simbahan pinaagi nga inuyunan sa kadaghanan.

Ipasabut nga human madawat ni Joseph Smith kini nga pagpadayag, mipahigayon siya og usa ka komperensya niadtong Septyembre 26 ug gihan-ay og tarung ang Simbahan. Diha sa komperensya, “Si Brother Page, ingon man usab ang tibuok Simbahan nga kinsa mitambong, misalikway sa giingon nga bato, ug sa tanang mga butang nga kabahin niadto” (Mga Pagtulun-an sa mga Presidente sa Simbahan: Joseph [2007], 197).

Tapusa ang leksyon pinaagi sa pagpamatuod sa mga kamatuoran nga inyong nailhan dinhi niini nga leksyon.