Leksyon 18: Doktrina ug mga Pakigsaad 46–49

Leksyon 18

Doktrina ug mga Pakigsaad 46–49

Pasiuna ug Timeline

Sa tingtugnaw sa 1831, ang mga miyembro sa Simbahan sa Kirtland, Ohio, nabalaka sa dihang nakakita sila og pipila ka bag-ong mga kinabig nga katingad-an kaayo og mga linihukan samtang nangangkon nga anaa ubos sa impluwensya sa Espiritu. Nangutana sa Ginoo si Propeta Joseph Smith mahitungod niini nga linihukan ingon man sa binuhatan sa mga Santos sa Kirtland nga dili paapilon ang mga dili miyembro sa mga miting sa sakrament ug ubang mga miting sa Simbahan. Agig tubag, pagka-Marso 8, 1831, mihatag ang Ginoo sa pinadayag nga karon narekord sa Doktrina ug mga Pakigsaad 46. Niini nga pinadayag, gipasabut sa Ginoo unsaon sa pagpahigayon og mga miting sa Simbahan ug unsaon nga makalikay sa pangpanglimbong pinaagi sa pagtinguha og mga gasa sa Espiritu.

Sa wala pa ang Marso 1831, si Oliver Cowdery ang tigsulat ni Joseph Smith ug tigrekord alang sa Simbahan. Hinoon, sa dihang gitawag siya sa pagmisyon, dili na siya makabuhat niini nga mga katungdanan. Sa pinadayag nga narekord diha sa Doktrina ug mga Pakigsaad 47, gitawag sa Ginoo si John Whitmer nga mopuli ni Oliver ug morekord sa kasaysayan sa Simbahan.

Atol niining panahona, ang mga Santos sa Ohio gusto usab nga masayud kon unsaon nila sa pagtabang ang mga miyembro sa Simbahan nga milalin gikan sa New York. Sa pinadayag nga karon narekord diha sa Doktrina ug mga Pakigsaad 48, ang Ginoo misulti sa mga Santos unsaon sa pagtabang niining nagsingabut nga mga miyembro.

Si Leman Copley, usa ka bag-ong kinabig sa Simbahan, gusto nga ang mga misyonaryo mosangyaw sa ebanghelyo ngadto sa mga sakop sa iyang kanhi relihiyusong grupo, ang mga Shaker. Bisan pa, mipadayon siya sa pagsunod sa pipila ka sayop nga mga tinuohan sa mga Shaker. Nabalaka bahin sa nagpabilin nga mga tinuohan ni Leman, si Joseph Smith nangutana sa Ginoo niadtong Mayo 7, 1831, ug nakadawat og pagpadayag nga narekord karon diha sa Doktrina ug mga Pakigsaad 49. Niini nga pinadayag, ang Ginoo mipatin-aw sa Iyang tinuod nga doktrina ug misaway sa pipila ka sayop nga mga tinuohan sa mga Shaker.

Tingpamulak sa 1831Ang bag-ong mga kinabig sa Kirtland, Ohio, nakasinati og mini nga espiritwal nga mga pagpakita.

Marso 8, 1831Ang Doktrina ug mga Pakigsaad 46 nadawat.

Marso 8, 1831Ang Doktrina ug mga Pakigsaad 47 nadawat.

Marso 10, 1831Ang Doktrina ug mga Pakigsaad 48 nadawat.

Marso 1831Gitudlo si John Whitmer sa pagserbisyo isip historian ug recorder sa Simbahan.

Sa ulahing bahin sa Marso o sayong bahin sa Abril, 1831Si Parley P. Pratt mibalik sa Kirtland gikan sa usa ka misyon ngadto sa Teritoryo sa mga Indian ug sa Missouri.

Mayo 7, 1831Ang Doktrina ug mga Pakigsaad 49 nadawat.

Mayo 1831Si Sidney Rigdon, Parley P. Pratt ug Leman Copley mibiya sa Kirtland aron sa pagbisita sa usa ka komunidad sa mga Shaker.

Mga Sugyot alang sa Pagtudlo

Doktrina ug mga Pakigsaad 46:1–33

Mitudlo ang Ginoo sa mga Santos mahitungod sa mga miting sa Simbahan ug sa mga gasa sa Espiritu

Pahinumdumi ang mga estudyante nga ang sayop nga mga matang sa espiritwalidad gisugdan sa pagsunod sa pipila ka mga miyembro sa Simbahan sa Kirtland. Ipasabut nga sa tingtugnaw sa 1831, ang mga miyembro sa Simbahan sa Kirtland nabalaka sa dihang nakita nila ang pipila ka bag-ong mga kinabig nga mipakita og kahibudngan nga mga lihok. Ang miyembro sa Simbahan nga si John Corrill misulat: “Katingalahan ang ilang mga linihukan, usahay mosundog sa lihok sa mga Indian, usahay managan ngadto sa umahan, mopatong sa mga tuod sa kahoy ug mosangyaw nga daw gipalibutan sa kongregasyon,—nagbuhat niining tanan samtang hingpit nga nakatutok diha sa panan-awon nga wala na makabantay sa mga panghitabo sa ilang palibut” (gikutlo sa Church History in the Fulness of Times Student Manual, 2nd ed. [manwal sa Church Educational System, 2003], 92). Ipasabut nga bisan ang mini nga espiritwal nga mga pagpakita sama niini dili komon sa Simbahan karon, kadtong nasayop sa pagsabut o dili pamilyar sa tinuod nga mga pagpakita sa Espiritu Santo mahimong madala sa mga pagpanglimbong.

Unsa ang pipila ka sitwasyon karon diin ang usa ka tawo mahimong madala sa pagpanglimbong tungod sa sayop o dili kompleto nga pagsabut sa mga kalihokan sa Espiritu Santo?

Samtang magtuon ang mga estudyante sa seksyon 46 karon, dapita sila sa pagpangita sa mga kamatuoran nga makatabang kanila nga mas makasabut sa mga kalihokan sa Espiritu Santo ug sa unsang paagi nga makalikay sila sa pagpanglimbong.

Sultihi ang mga estudyante nga nangayo og katin-awan sa Ginoo si Propeta Joseph Smith kabahin sa katuyoan ug kinaiya sa mga gasa sa Espiritu. Dugang pa, tungod kay adunay mitumaw nga binuhatan sa Kirtland nga ang mga miyembro lamang ang tugutan nga makatambong sa publiko nga mga miting sa Simbahan, ang Propeta nagtinguha sa direksyon sa Ginoo kon unsaon sa pagpangalagad ug pagpahigayon niini nga mga miting.

Hangyoa ang usa ka estudyante sa pagbasa og kusog sa Doktrina ug mga Pakigsaad 46:1–6. Hangyoa ang klase sa pagsunod, nga mangita kon unsay gitudlo sa Ginoo sa mga Santos mahitungod sa Espiritu ug mga miting sa Simbahan.

Unsa ang gisulti sa Ginoo diha sa mga bersikulo 3–6 kon si kinsa ang tugutan sa pagtambong sa publiko nga mga miting sa Simbahan?
Sumala sa bersikulo 2, unsaon man sa pagpahigayon sa mga miting sa Simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 46:7–8. Awhaga ang mga estudyante sa pagsunod, nga mangita sa giya nga gihatag sa Ginoo sa mga Santos sa pagtabang kanila nga modapit sa direksyon sa Espiritu.

Sumala sa bersikulo 7, unsa nga tambag ang gihatag sa Ginoo sa pagtabang sa mga Santos nga magiyahan sa Espiritu?
Unsa nga pasidaan ang gihatag sa Ginoo diha sa bersikulo 7?
Unsay gisulti sa Ginoo nga buhaton sa mga Santos aron makalikay sa pagpanglimbong?

Ipasabut nga ang mga pulong nga “pangitaa sa matinguhaon nga paagi ang labing maayo nga mga gasa” sa bersikulo 8 nagpasabut sa mga gasa sa Espiritu. Ang mga gasa sa Espiritu mao ang “mga panalangin o mga kahanas nga gihatag pinaagi sa gahum sa Espiritu Santo” (Matinud-anon sa Tinuhoan: Usa ka Pakisayran sa Ebanghelyo [2004], 34).

Dapita ang usa ka estudyante sa pagbasa og kusog sa Doktrina ug mga Pakigsaad 46:9–12, 26. Hangyoa ang klase sa pagsunod, nga mangita kon nganong gihatagan kita sa Dios og espiritwal nga mga gasa.

Unsa nga doktrina ang atong mahibaloan diha sa bersikulo 9 kon nganong gihatagan kita sa Dios og espiritwal nga mga gasa? (Ang mga estudyante mahimong mogamit og lahi nga mga pulong, apan siguroa nga mahibalo sila sa mosunod nga doktrina: Ang Dios naghatag og espiritwal nga mga gasa alang sa kaayohan niadtong nahigugma Kaniya ug nagsunod sa Iyang mga sugo. Isulat kini nga doktrina diha sa pisara.)
Sumala sa mga bersikulo 11–12, pila man kanato ang nakadawat og espiritwal nga mga gasa?
Sa unsang mga paagi ang espiritwal nga mga gasa makaayo kanato?

Hangyoa ang mga estudyante nga hilum nga mobasa sa Doktrina ug mga Pakigsaad 46:13–25, nga mangita sa pipila ka mga gasa sa Espiritu.

Human sa igong panahon, dapita ang mga estudyante sa pagpili og usa sa mga gasa sa Espiritu nga gihisgutan niini nga seksyon ug sa paghunahuna kon sa unsang paagi kana nga gasa makabenepisyo sa mga anak sa Dios. Dapita ang pipila ka mga estudyante sa pagpaambit sa ilang mga hunahuna diha sa klase.

Dapita ang usa ka estudyante sa pagbasa og kusog sa Doktrina ug mga Pakigsaad 46:27–29. Hangyoa ang klase sa pagsunod, nga mangita kon unsaon sa mga Santos sa pagkasayud hain nga mga gasa ang gikan sa Dios ug hain nga mga gasa ang dili gikan sa Dios.

Sa unsang paagi kaha nga ang mga pagtulun-an sa Ginoo niini nga mga bersikulo nakatabang sa mga Santos sa Kirtland kinsa nakasaksi sa pipila sa kahibudngan nga mga lihok sa bag-o nga mga kinabig?

Ipasabut nga ang espiritwal nga mga gasa nga gilista diha sa Doktrina ug mga Pakigsaad 46 dili kompleto nga lista sa espiritwal nga mga gasa nga magamit sa mga anak sa Dios.

Dapita ang usa ka estudyante sa pagbasa og kusog sa Doktrina ug mga Pakigsaad 46:30–33. Hangyoa ang klase sa pagsunod, nga mangita sa tambag nga gihatag sa Ginoo kalabut sa espiritwal nga mga gasa. Dapita ang mga estudyante nga ipasabut sa daklit ang unsay ilang nakit-an.

Awhaga ang mga estudyante nga magpasalamat sa Langitnong Amahan alang sa espiritwal nga mga gasa nga ilang nadawat ug kinasingkasing nga magtinguha sa mga gasa sa Espiritu nga mopanalangin sa ilang kinabuhi ug sa kinabuhi sa uban.

Doktrina ug mga Pakigsaad 47–48

Ang Ginoo mitawag ni John Whitmer isip Church historian ug misulti sa mga Santos unsaon sa pagtabang sa bag-ong mga kinabig nga nangabut sa Kirtland

I-summarize ang Doktrina ug mga Pakigsaad 47 pinaagi sa pagpasabut nga ang Ginoo mitawag ni John Whitmer nga mopuli ni Oliver Cowdery isip Church historian ug moserbisyo isip tigsulat sa Propeta.

Ipasabut nga niadtong 1831, daghan nga bag-ong mga kinabig ang mibalhin sa Kirtland agig pagsunod sa sugo sa Ginoo nga magpundok sa Ohio (tan-awa sa D&P 37:1–3). Gipadayag sa Ginoo diha sa Doktrina ug mga Pakigsaad 48 ang pamaagi nga sundon sa Simbahan sa pag-angkon og mga yuta nga katukuran sa bag-ong mga kinabig sa ilang mga balay. Misulti usab Siya sa mga Santos kon unsaon sa pagtabang kanila sa ilang pag-abut.

Doktrina ug mga Pakigsaad 49:1–28

Gitawag sa Ginoo si Sidney Rigdon, Parley P. Pratt, ug Leman Copley aron sa pagsangyaw ngadto sa mga Shaker sa amihanang Ohio

Hangyoa ang mga estudyante sa paghunahuna og tawo nga ilang kaila kinsa adunay lahi nga estilo sa pagpakabuhi o relihiyusong background sa wala pa moapil sa Simbahan.

Unsa nga mga hagit kaha ang mahimong atubangon sa usa ka tawo nga nahimong miyembro sa Simbahan kon gikan siya sa usa ka background nga adunay lahi nga mga tradisyon ug tinuohan?
Sa unsang paagi ang kanhi nga mga tradisyon ug tinuohan makahimong lisud sa usa ka tawo sa pagdawat ug pagsunod sa mga baruganan sa ebanghelyo?

Ipasabut nga sa sayong bahin sa 1831, usa ka tawo nga ginganlan og Leman Copley nabunyagan sa Simbahan, apan mituo gihapon siya sa pipila sa sayop nga mga pagtulun-an sa iyang kanhi nga relihiyusong grupo, ang mga Shaker. Drowinga ang mosunod nga tsart sa pisara, nga isulat lamang ang mga ulohan sa mga kolum ug pasagdan nga blanko ang uban. Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 49, ug hangyoa ang klase sa pagsunod, nga mangita kon unsa ang gituohan sa mga Shaker. Hangyoa ang mga estudyante sa pagreport sa unsay ilang nakit-an, ug isulat ang ilang mga tubag diha sa kolum nga giulohan og “Ang mga Gituohan sa mga Shaker.”

Ang mga Gituohan sa mga Shaker	Ang Tinuod nga Doktrina sa Ginoo
Ang Ikaduhang Pag-anhi ni Kristo nahitabo na.	D&P 49:5–7
Si Jesukristo mipakita isip usa ka babaye nga ginganlan og Ann Lee.	D&P 49:22
Ang bunyag pinaagi sa tubig dili mahinungdanon.	D&P 49:11–14
Kinahanglang isalikway ang kaminyoon.	D&P 49:15
Kinahanglang hingpit nga dili makigminyo ang mga tawo.	D&P 49:16–17
Ang pagkaon sa karne gidili sa uban.	D&P 49:18–21

Ipasabut nga si Joseph Smith nabalaka sa nagpabiling pagtuo ni Leman Copley sa mga pagtulun-an sa mga Shaker, busa nagpakisayud siya sa Ginoo. Isip resulta, iyang nadawat ang pinadayag nga narekord diha sa Doktrina ug mga Pakigsaad 49.

Dapita ang usa ka estudyante sa pagbasa og kusog sa Doktrina ug mga Pakigsaad 49:1–4. Hangyoa ang klase sa pagsunod, nga mangita kon giunsa sa Ginoo sa paghulagway ang mga Shaker.

Unsa ang gisulti sa Ginoo nga gitinguha sa mga Shaker?
Unsa kaha ang ipasabut sa mga pulong nga “sila nagtinguha nga masayud og tipik sa kamatuoran, apan dili sa tanan” diha sa bersikulo 2?
Unsa ang mahimong peligro sa pagsunod lamang og mga parte sa gipahiuli nga ebanghelyo?
Unsa ang gisulti sa Ginoo mahitungod ni Leman Copley diha sa bersikulo 4?

Bahina ang klase ngadto sa unom ka grupo. I-assign ang matag grupo og usa sa unom nga mga pakisayran sa kasulatan diha sa tsart. (Kon gamay ra ang imong klase, ikonsiderar ang pag-assign sa tagsa-tagsa ka mga estudyante og usa o daghan pa niini nga mga pakisayran sa kasulatan.) Dapita ang mga estudyante nga dungan nga basahon diha sa ilang mga grupo ang gi-assign kanila nga mga tudling, nga mangita sa doktrina ug mga baruganan nga gitudlo sa Ginoo aron sa pagkorihir sa sayop nga mga tinuohan sa mga Shaker. Human sa igong panahon, dapita ang usa ka estudyante gikan sa matag grupo sa pagduol sa pisara ug, diha sa box tupad sa tukma nga sayop nga pagtuo sa mga Shaker, sa pagsulat sa pakisayran sa kasulatan sa iyang grupo ug ang tinuod nga doktrina nga nakita sa iyang grupo niana nga tudling.

Hain niining sama nga sayop nga mga pilosopiya ang anaa sa kalibutan karon?

Patan-awa ang mga estudyante sa mga kamatuoran nga gisulat diha sa pisara alang sa Doktrina ug mga Pakigsaad 49:15 ug 49:16–17. (Ang kaminyoon gi-orden sa Dios. Ang mga bana ug asawa gimandoan nga maghiusa ug magbaton og mga anak.)

Unsa nga mga katuyoan ang gituman sa kaminyoon tali sa lalaki ug babaye diha sa plano sa Langitnong Amahan?
Sa unsang paagi ang pagdili sa pagminyo sukwahi sa plano sa Langitnong Amahan?
Sumala sa bersikulo 16, giaprubahan sa Dios ang tradisyonal nga kaminyoon ug pisikal nga kasuod tali sa mga bana ug mga asawa. Unsa ang pipila ka mga paagi nga ang mga tawo mosulay sa pagbugal-bugal o pagdaut sa tradisyonal nga kaminyoon o sa sagradong kinaiyahan sa pisikal nga kasuod tali sa bana ug asawa?

Dapita ang mga estudyante sa pagkonsiderar sa unsay ilang mahimo aron maandam ang ilang kaugalingon alang sa kaminyoon ug sa ilang tahas isip mga ginikanan. Awhaga sila sa paghimo og tumong aron mas maandam ang ilang kaugalingon alang niana nga sagradong responsibilidad.

Dapita ang mga estudyante sa pagbasa og hilum sa Doktrina ug mga Pakigsaad 49:26–28, nga mangita sa tambag sa Ginoo. Dapita ang pipila ka mga estudyante nga moreport sa unsay ilang nakat-unan.

Sa unsang paagi kini nga tambag dunay kalabutan sa mga Shaker? Sa unsang paagi kini dunay kalabutan kanatong tanan?

Ipasabut nga agig pagsunod sa sugo sa Ginoo diha sa Doktrina ug mga Pakigsaad 49:1, si Sidney Rigdon, Parley P. Pratt, ug Leman Copley mibiyahe ngadto sa kanhi komunidad ni Copley sa mga Shaker sa amihanang Ohio ug mibasa niini nga pinadayag ngadto kanila. Ang mga Shaker misalikway niini nga mensahe. Sa samang higayon, nahuyang ang pagtuo ni Leman Copley ug nagduha-duha kon mobalik ba ngadto sa mga Shaker o magpabilin diha sa gipahiuli nga Simbahan. Sa katapusan nakahukom siya nga dili mobalik sa mga Shaker apan subo lang nga wala magpabiling matinud-anon sa gipahiuli nga ebanghelyo.

Ipasabut nga tungod kay ang mga Shaker ug si Leman Copley misalikway sa pulong sa Dios, dili nila madawat ang mga panalangin nga ila untang maangkon (tan-awa sa D&P 49:4). Dapita ang andam nga mga estudyante sa pagpaambit sa ilang mga pagpamatuod sa kaimportante sa pagpaminaw ug pagsanong sa kamatuoran sa Ginoo. Ikonsiderar usab ang pagpaambit sa imong pagpamatuod.