Doktrina ug mga Pakigsaad 19

Pasiuna ug Timeline

Sa hapit na mahuman ang paghubad sa Basahon ni Mormon niadtong Hunyo 1829, si Propeta Joseph Smith ug Martin Harris mibayad sa tig-imprinta nga si Egbert B. Grandin sa pag-imprinta og 5,000 ka kopya sa Basahon ni Mormon sa kantidad nga $3,000. Apan, wala sugdi ni Grandin ang pag-imprinta hangtud nga gigarantiyahan siya og bayad sa pagtrabaho. Nakigsabut si Martin Harris nga bayaran ang pag-imprinta pinaagi sa pag-prenda sa pipila sa iyang umahan.

Kausa human sa inisyal nga panagsabut, nabalaka si Martin Harris mahitungod sa pagprenda sa iyang umahan. Sa pagpadayag nga narekord isip Doktrina ug mga Pakigsaad 19, gibanabana nga gihatag niadtong ting-init sa tuig 1829, gisugo sa Ginoo si Martin Harris sa “[pag]hatag og bahin sa [iyang] kabtangan … [ug mo]bayad sa utang nga [iyang] gikauyunan uban sa tig-imprinta” (D&P 19:34–35). Mipadayag usab ang Ginoo og importanting mga kamatuoran mahitungod sa Iyang maulaon nga sakripisyo ug mitudlo mahitungod sa paghinulsol.

Sa sayo nga bahin sa Hunyo 1829Si Joseph Smith ug Martin Harris nakigsabut ni Egbert Grandin nga imantala ang 5,000 ka kopya sa Basahon ni Mormon.

Hulyo 1, 1829Nakompleto ni Joseph Smith ang paghubad sa Basahon ni Mormon.

Ting-init sa 1829Ang Doktrina ug mga Pakigsaad 19 was received.

Agosto 25, 1829Giprenda ni Martin Harris og $3,000 ang iyang umahan aron ibayad sa pag-imprinta sa Basahon ni Mormon.

Marso 26, 1830Ang mga kopya sa Basahon ni Mormon pwede nang mapalit.

Mga Sugyot alang sa Pagtudlo

Doktrina ug mga Pakigsaad 19:1–20

Gipasabut sa Ginoo ang mga sangputanan kon dili paghinulsol ug mihulagway sa Iyang pag-antus alang sa mga sala

Isulat sa pisara ang mga mosunod sa dili pa magklase: Unsa ang gihangyo sa Ginoo kanimo nga lisud para nimo?

Hisguti og kadali sa klase kini nga pangutana. Ipasabut nga si Martin Harris nag-atubang og ingon niana nga hagit ug gitudloan sa Ginoo og pipila ka impluwensyal nga mga kamatuoran nga makagiya kaniya. Dapita ang mga estudyante samtang tun-an nila ang Doktrina ug mga Pakigsaad 19 sa pagpangita sa mga kamatuoran nga gitudlo sa Ginoo ni Martin ug sa paggamit niini samtang sundon nila ang butang nga gipabuhat sa Ginoo kanila.

Ipasabut nga samtang ang paghubad sa Basahon ni Mormon hapit na mahuman niadtong Hunyo 1829, gihikay ni Joseph Smith ug Martin Harris ang pagsabut-sabot sa posibilidad nga maka-imprinta og 5,000 ka kopya sa Basahon ni Mormon sa tig-imprinta nga si Egbert B. Grandin sa Palmyra, New York. Si Grandin ug ang iyang tighan-ay sa pag-type, nga si John H. Gilbert, mibana-bana nga mogasto kini og $3,000 aron maimprinta ang ingon niadto kadaghang kopya. Isip kabahin sa pagsabut-sabot, miuyon si Martin Harris nga bayaran ang pag-imprinta pinaagi sa pag-prenda sa dakong bahin sa iyang umahan, apan daw makita nga ang pagbayad wala pa masabuti og tarung niadtong higayuna. Mipasabut si Grandin nga dili niya paliton ang gikinahanglang materyales ug dili niya sugdan ang pag-imprinta hangtud nga migarantiya si Martin Harris nga bayaran ang pag-imprinta (tan-awa sa Documents, Volume 1: July 1828–June 1831, ed. Michael Hubbard MacKay ug uban pa [2013], 86).

Dunay panahon human ang inisyal nga pagsabut-sabot, nagduha-duha si Martin Harris mahitungod sa pag-prenda sa iyang umahan. Agig tubag sa mga kabalaka ni Martin, nadawat ni Joseph Smith ang pagpadayag atol sa ting-init sa 1829 nga narekord wala madugay isip Doktrina ug mga Pakigsaad 19. Dapita ang mga estudyante samtang tun-an nila ang Doktrina ug mga Pakigsaad 19 sa pagpangita kon unsa ang gitudlo sa Ginoo ni Martin Harris aron matabangan siya sa pagkahimong andam nga mohimo sa ingon niadto kadako nga sakripisyo.

Dapita ang usa ka estudyante sa pagbasa og kusog sa Doktrina ug mga Pakigsaad 19:1–3, ug hangyoa ang klase sa pagpangita sa doktrina nga gitudlo sa Manluluwas kang Martin Harris.

Unsa nga Doktrina ang gitudlo sa Ginoo mahitungod sa Iyang kaugalingon diha sa bersikulo 2? (Gituman ni Jesukristo ang kabubut-on sa Amahan. Mahimo nimong isugyot nga markahan sa mga estudyante kini nga doktrina.)
Sa unsang mga paagi gituman ni Jesukristo ang kabubut-on sa Langitnong Amahan?
Sumala sa mga bersikulo 2–3, unsay anaa nga gahum sa Manluluwas tungod kay natuman Niya ang kabubut-on sa Langitnong Amahan?
Diha sa bersikulo 3, gihulagway sa Manluluwas ang Iyang responsibilidad sa paghukom sa tanang binuhat sa katapusang adlaw. Sumala sa Manluluwas, unsa ang gamiton nga basihan sa Iyang katapusan nga paghukom? (Hukman kita sumala sa atong mga gipangbuhat ug gipanghimo.)

Aron matabangan ang mga estudyante nga mas makasabut sa unsang paagi ang atong mga gipangbuhat ug gipanghimo makaapektar kon sa unsang paagi kita hukman, dapita ang usa ka estudyante sa pagbasa og kusog sa Doktrina ug mga Pakigsaad 19:4–5. Hangyoa ang klase sa pagsunod ug sa pagpangita sa dugang nga mga detalye nga gitudlo sa Ginoo mahitungod sa Iyang paghukom.

Sumala sa mga bersikulo 4–5, unsa ang masinati niadtong dili maghinulsol? (Mahimo nimong ipasabut nga ang mga pulong nga “ang mga kaalautan modangat” diha sa bersikulo 5 nagpasabut sa pag-antus nga moabut niadtong dili maghinulsol.)

Isulat sa pisara ang walay katapusang silot ug ang mahangturong silot. Ipasabut nga kini ug ang susama pang mga termino usahay gamiton diha sa kasulatan sa paghulagway sa silot nga moabut sa tanang dili maghinulsol. Dapita ang mga estudyante sa pagbasa og hilum sa Doktrina ug mga Pakigsaad 19:6–12, nga mangita kon giunsa paghulagway sa Ginoo ang walay katapusan o mahangturong silot. Human sa igo nga panahon, dapita ang pipila ka estudyante sa pagpasabut unsay ilang nakat-unan gikan sa gihimong paghulagway sa Ginoo bahin niini nga mga termino. (Tabangi nga masabtan sa mga estudyante nga ang mga termino nga walay katapusang silot ug ang mahangturong silot wala magpasabut sa gidugayon sa panahon nga mag-antus ang mga tawo sa ilang mga sala. Apan, tungod kay ang Manluluwas Walay Katapusan ug Mahangturon, kini nga mga pulong nagpasabut sa silot nga Iyang ipahamtang sumala sa balaanong balaod sa kaangayan.)

Dapita ang usa ka estudyante sa pagbasa og kusog sa Doktrina ug mga Pakigsaad 19:13–15, ug hangyoa ang klase sa pagpangita kon unsay gisugo sa Ginoo nga buhaton ni Martin Harris human mahulagway ang walay katapusan ug mahangturong silot.

Unsa ang rason nga gihatag sa Ginoo sa pagsugo kang Martin Harris sa paghinulsol?

Dapita ang usa ka estudyante sa pagbasa og kusog sa Doktrina ug mga Pakigsaad 19:16–17, ug ipapangita sa klase kon unsay gipamatuod sa Ginoo nga mahitabo niadtong mopili sa paghinulsol ug unsay mahitabo niadtong dili mopili sa paghinulsol.

Unsa nga mga baruganan ang atong makita gikan sa mga bersikulo 16–17 mahitungod niadtong mopili sa paghinulsol ug niadtong mopili sa dili paghinulsol? (Human makatubag ang mga estudyante, isulat sa pisara ang mosunod nga mga baruganan gamit ang kaugalingong mga pulong sa mga estudyante: Nag-antus si Jesukristo alang sa atong mga sala aron makahinulsol kita ug dili na mag-antus sama sa Iyang gihimo. Kon pilion nato ang dili paghinulsol, kinahanglan mag-antus kita sama sa pag-antus ni Kristo.)

Ipakita ang litrato nga Jesus Nag-ampo sa Getsemani (Libro sa mga Hulagway sa Ebanghelyo [2009], nu. 56; tan-awa usab sa lds.org/media-library). Aron matabangan ang mga estudyante nga makasabut sa gibug-aton sa pag-antus sa Manluluwas, ipasabut nga ang Doktrina ug mga Pakigsaad 19:18–19 mao lamang ang tudling sa kasulatan diin gihulagway sa Manluluwas sa kaugalingon Niyang mga pulong ang Iyang pag-antus. Ang ubang mga istorya bahin sa pag-antus ni Jesukristo atol sa Iyang maulaon nga sakripisyo hinatag sa uban (tan-awa sa Mateo 26:36–39; Lucas 22:39–44; Marcos 14:32–41; Mosiah 3:7). Dapita ang mga estudyante sa pagbasa og hilum sa Doktrina ug mga Pakigsaad 19:18–19, nga mangita sa mga pulong nga gigamit sa Manluluwas sa paghulagway sa Iyang pag-antus. Ikonsiderar ang pagdapit sa mga estudyante nga markahan ang unsay ilang nakit-an.

Unsa nga mga pulong ang importante kaninyo? Ngano man?
Unsa ang gitudlo niini nga mga pulong o hugpong sa mga pulong mahitungod sa kaandam sa Maluluwas nga mag-antus para sa atong mga sala?
Unsay inyong mga gibati dihang gipamalandungan ninyo ang pag-antus sa Manluluwas alang sa inyong mga sala?

Ipasabut nga ang mga pulong nga “buot nga Ako unta dili moinom sa mapait nga kopa” (D&P 19:18) nagpasabut sa pag-ampo sa Manluluwas didto sa Tanaman sa Getsemani nga kon mahimo, dili Siya magsagubang og sama niana nga pag-antus. Ipasabut nga ang mga pulong nga “bisan pa niana, … Ako nakaambit ug nakahuman sa akong mga pagpangandam alang sa mga katawhan” (D&P 19:19) nagpasabut nga bisan sa dili matugkad nga kantidad, mitugyan si Jesukristo sa kabubut-on sa Langitnong Amahan pinaagi sa pagkompleto sa Pag-ula.

Sa unsang paagi kaha nga ang pagsabut nga ang Manluluwas mitugyan sa Iyang kabubut-on ngadto sa Langitnong Amahan nakaimpluwensya ni Martin Harris dihang gipamalandungan niya ang pag-prenda sa iyang umahan aron ibayad sa publikasyon sa Basahon ni Mormon?

Dapita ang usa ka estudyante sa pagbasa og kusog sa Doktrina ug mga Pakigsaad 19:20. Hangyoa ang klase sa pagsunod, nga mangita kon unsay gisulti sa Ginoo kang Martin Harris human Niya gihulagway ang Iyang pag-antus alang sa sala.

Unsa na usab ang gisugo sa Ginoo kang Martin Harris nga buhaton? Ngano man?
Ngano kaha nga gipahinumduman sa Ginoo si Martin bahin sa usa ka panahon dihang mipalayo ang Espiritu kaniya? (Alang sa dugang nga panabut bahin niini nga pangutana, tan-awa ang komentaryo sa manwal sa estudyante para sa Doktrina ug mga Pakigsaad 19:20.)
Sa unsang paagi ang pagsabut sa pag-antus sa Manluluwas makaapekto sa inyong tinguha nga maghinulsol ug mobuhat sa bisan unsay Iyang isugo, bisan unsa pa kini kalisud?

Awhaga ang mga estudyante sa paghimo og tumong nga motahud sa sakripisyo sa Manluluwas pinaagi sa regular nga paghinulsol.

Doktrina ug mga Pakigsaad 19:21–41

Mihatag ang Ginoo kang Martin Harris og pipila ka sugo, lakip sa sugo nga ipaambit ang iyang umahan para sa pag-imprinta sa Basahon ni Mormon

Ipasabut nga human ang Ginoo misugo ni Martin Harris sa paghinulsol, mihatag ang Ginoo kaniya og dugang pa nga mga sugo ug tambag. Dapita ang usa ka estudyante sa pagbasa og kusog sa Doktrina ug mga Pakigsaad 19:21–24, ug ipapangita sa klase unsay gisugo sa Ginoo nga buhaton ni Martin Harris. Dapita ang pipila ka mga estudyante sa pagreport unsay ilang nakit-an.

Base sa mga pulong sa Ginoo ngadto kang Martin diha sa bersikulo 23, unsa ang atong madawat samtang magkat-on kita bahin ni Kristo, maminaw sa Iyang mga pulong, ug maglakaw uban sa kaaghup sa Iyang Espiritu? (Samtang magkat-on kita kang Kristo, maminaw sa Iyang mga pulong, ug maglakaw uban sa kaaghop sa Iyang Espiritu, aduna kitay kalinaw. Mahimo nimong isulat sa pisara kini nga baruganan.)
Unsa ang atong mahimo aron makakat-on bahin ni Kristo?
Unsa ang atong mga oportunidad aron makapaminaw sa Iyang mga pulong?
Unsay buot ipasabut sa pagkamaaghup? (Kon gikinahanglan, ipasabut nga ang kaaghup maglakip sa “matinahuron sa Dios, matarung, mapainubsanon, matudloan, ug mapailubon ubos sa pag-antus. Ang mga maaghup andam nga mosunod sa mga pagtulun-an sa ebanghelyo” [Giya ngadto sa mga Kasulatan, “Maaghup, Pagkamaaghup,” scriptures.lds.org ]).

Kanus-a ang paglakaw uban sa kaaghup sa Espiritu sa Manluluwas midala og kalinaw sa inyong kinabuhi?
Sa unsang paagiha kaha ang pagsunod sa mga baruganan nga naa sa Doktrina ug mga Pakigsaad 19:23 nakatabang ni Martin Harris sa pagdesisyon nga i-prenda ang iyang umahan?

Dapita ang mga estudyante sa pagpakli sa Doktrina ug mga Pakigsaad 19:25–35, nga mangita sa dugang nga mga sugo ug tambag nga gihatag sa Ginoo ngadto ni Martin Harris. Mahimo nimong isugyot nga markahan sa mga estudyante ang mga pulong nga “Ako magsugo” ug “ikaw.” Human sa igong panahon, dapita ang pipila ka estudyante sa pagpaambit sa unsay ilang nadiskubrihan.

Unsa nga sugo ang gihatag sa Ginoo kang Martin Harris bahin sa iyang umahan?
Sa unsang paagiha kaibgan sa tawo ang kaugalingon niyang kabtangan?
Sumala sa mga bersikulo 26–27, ngano nga importante man kaayo ang pag-imprinta sa Basahon ni Mormon?
Sumala sa bersikulo 33, unsa ang gisulti sa Ginoo nga mahitabo “kon dili igsapayan [ni Martin] kini nga mga tambag”?

Ipares-pares ang mga estudyante, ug dapita sila sa pagbasa og dungan sa Doktrina ug mga Pakigsaad 19:36–41, nga mangita sa dugang nga mga baruganan nga midasig kang Martin Harris nga mosunod sa mga sugo sa Ginoo. Dapita ang mga estudyante sa pagpaambit unsay ilang nakit-an.

Base sa gisaad sa Ginoo kang Martin Harris diha sa bersikulo 38, unsay atong madawat kon buhaton nato ang kabubut-on sa Ginoo? (Posibling mogamit ang mga estudyante og lain-laing mga pulong apan siguroa nga makit-an nila ang usa ka baruganan nga susama sa mosunod: Kon buhaton nato ang kabubut-on sa Ginoo, makadawat kita og mga panalangin nga mas dako og bili kay sa mga bahandi sa kalibutan.)
Unsa ang pipila ka mga panalangin ang gibati ninyong mas dako og bili kay sa mga bahandi sa kalibutan?
Sa unsang mga paagi ang Basahon ni Mormon mas dako og bili kay sa umahan ni Martin Harris?

Ipasabut nga niadtong Agosto 25, 1829, agig pagsunod sa sugo sa Ginoo, gi-prenda ni Martin Harris ang iyang kabtangan isip bayad sa pag-imprinta sa Basahon ni Mormon. Giisip na ni Egbert Grandin nga nabayaran na siya og kompleto, ug nagsugod dayon sa wala madugay ang pag-imprinta.

Mo-refer sa pangutana nga naa sa pisara nga inyong gihisgutan sa pagsugod sa leksyon. Awhaga ang mga estudyante sa pagtuman sa Ginoo bisan kon lisud, ug pahinumdumi sila nga pwede silang makadawat og mga panalangin nga mas dako og bili kay sa bahandi sa kalibutan.