Niadtong Mayo 6, 1833, nadawat ni Propeta Joseph Smith ang pinadayag nga girekord diha sa Doktrina ug mga Pakigsaad 93. Niini nga pagpadayag, gitudloan sa Manluluwas ang mga Santos kon unsaon sa pagsimba ug unsaon nga “makaadto ngadto sa Amahan diha sa akong ngalan, … ug makadawat sa iyang kahingpitan” (D&P 93:19). Mitudlo usab Siya unsaon nga atong madawat ang kamatuoran ug kahayag, sa gipadayag nga mahangturong kinaiyahan sa tanang lalaki ug mga babaye, ug misugo kang Propeta Joseph Smith ug sa ubang mga lider sa Simbahan nga “mopahimutang sa kahusay” sa ilang mga panimalay (D&P 93:43–50).
Pebrero 2, 1833Nahuman ni Joseph Smith ang iyang paghubad sa Bag-ong Tugon.
Marso 8, 1833Gipadayon ni Joseph Smith ang iyang dinasig nga paghubad sa Daang Tugon.
Abril 1833Ang Tulunghaan sa mga Propeta sa Kirtland, Ohio, gitapos alang sa ting-init.
Mayo 4, 1833Usa ka komitiba ang gipili aron makatigom og kwarta nga itukod og building alang sa Tulunghaan sa mga Propeta sa Kirtland, Ohio.
Mitudlo ang Ginoo kon unsaon nato sa pagkaila Kaniya ug pagdawat og kahingpitan sa himaya
I-display ang litrato ni Jesukristo.
Unsa ang kalainan tali sa pagkahibalo mahitungod ni Jesukristo ug sa pagkaila ni Jesukristo? (Ang pagkahibalo mahitungod ni Jesukristo naglakip sa pagkat-on og mga kamatuoran mahitungod Kaniya. Ang pagkaila kang Jesukristo naglakip sa pagpalambo og personal nga relasyon uban Kaniya pinaagi sa pagkadawat og pagpamatuod bahin Kaniya pinaagi sa Espiritu Santo ug pinaagi sa pagpaningkamot sa pagtuman sa Iyang mga sugo.)
Nganong importante ang pagkahibalo mahitungod ni Jesukristo ug pagkaila Kaniya? (Kon gikinahanglan, ipasabut nga dili kita makahimo sa pagkab-ot sa atong hingpit nga potensyal isip mga anak sa Dios gawas kon makaila kita ni Jesukristo ug sa Langitnong Amahan [tan-awa sa Juan 17:3].)
Dapita ang mga estudyante sa pagpangita og mga kamatuoran samtang magtuon sila sa Doktrina ug mga Pakigsaad 93 nga makatabang kanila nga makaila pa og dugang mahitungod sa Manluluwas ug aron makaila usab Kaniya.
Dapita ang usa ka estudyante sa pagbasa og kusog sa Doktrina ug mga Pakigsaad 93:1. Hangyoa ang klase sa pagsunod, nga mangita sa unsay gitudlo sa Ginoo mahitungod sa pag-angkon og kahibalo kabahin ni Jesukristo.
Unsa nga baruganan ang atong makat-unan gikan sa bersikulo 1 mahitungod sa pag-angkon og kahibalo bahin ni Jesukristo? (Kinahanglang makita sa mga estudyante ang usa ka baruganan nga susama sa mosunod: Kon isalikway nato ang atong mga sala, moduol kang Kristo, motawag sa Iyang ngalan, mosunod sa Iyang tingog, ug motuman sa Iyang mga sugo, nan makakita kita sa Iyang nawong ug makaila Kaniya. Dapita ang mga estudyante sa pagkonsiderar nga markahan kini nga kamatuoran diha sa ilang mga kasulatan.)
Aron matabangan ang mga estudyante nga mas makasabut niini nga baruganan, dapita sila sa pag-cross reference sa bersikulo 1 diha sa Doktrina ug mga Pakigsaad 88:68. Hangyoa ang usa ka estudyante sa pagbasa og kusog sa Doktrina ug mga Pakigsaad 88:68. Dapita ang klase sa pagsunod, nga mangita sa dugang nga impormasyon kabahin sa saad sa Ginoo diha sa Doktrina ug mga Pakigsaad 93:1. (Kinahanglang madiskubrihan sa mga estudyante nga ang saad nga makakita sa nawong sa Ginoo matuman “diha sa kaugalingon nga higayon [sa Ginoo], ug sa iyang kaugalingon nga paagi,” [D&P 88:68].)
Dapita ang usa ka estudyante sa pagbasa og kusog sa Doktrina ug mga Pakigsaad 93:2–5. Hangyoa ang klase sa pagsunod, nga mangita kon unsay atong mahibaloan mahitungod sa Manluluwas kon gamiton nato ang baruganan nga naa sa bersikulo 1.
Nganong importante nga atong mahibaloan nga si Jesukristo mao lang ang “tinuod nga kahayag nga nagdan-ag sa matag [tawo]” (bersikulo 2)?
Unsa kaha ang gipasabut sa Manluluwas dihang miingon Siya nga ang Langitnong Amahan “ mihatag [Kaniya] sa Iyang kahingpitan” (bersikulo 4)? (Tabangi ang mga estudyante sa pagsabut nga si Jesukristo nakadawat sa tanan nga anaa sa Amahan, lakip ang Iyang himaya, gahum, kahibalo, ug kalipay. Mao kini ang usa ka paagi nga nahiusa si Jesukristo sa Langitnong Amahan.)
Ipasabut nga diha sa Doktrina ug mga Pakigsaad 93:6–18, mipadayag ang Ginoo kang Joseph Smith og usa ka porsyon sa pagsaksi ni Juan Bautista sa Manluluwas nga kausa girekord ni Apostol Juan.
Dapita ang mga estudyante sa pagbasa og hilum sa Doktrina ug mga Pakigsaad 93:6–11, nga mangita kon unsay atong makat-unan mahitungod sa Manluluwas gikan sa rekord ni Juan. Hangyoa ang mga estudyante nga moreport sa ilang nakit-an.
Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 93:12–17. Hangyoa ang klase sa pagsunod, nga mangita kon giunsa ni Jesukristo sa pagkadawat og kahingpitan sa himaya sa Amahan.
Giunsa ni Jesukristo sa pagkadawat og kahingpitan sa himaya sa Amahan? (Human makatubag ang mga estudyante, isulat sa pisara ang mosunod nga doktrina: Si Jesukristo nagpadayon grasya ug dugang pa nga grasya, hangtud nga siya nakadawat sa kahingpitan sa himaya sa Amahan.)
Sa bersikulo 13, unsa kaha ang ipasabut sa mga pulong nga “siya wala makadawat sa kahingpitan sa sinugdanan, apan nakaangkon og grasya ug dugang pa nga grasya”?
Kon gikinahanglan, ipasabut nga ang “nakaangkon [Siya] og grasya ug dugang pa nga grasya” nagpasabut nga ang Manluluwas kinahanglan nga magkat-on ug molambo “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Ang pulong nga grasya nagpasabut og “diosnon nga panabang o kalig-on … gihatag pinaagi sa kalooy ug gugma sa Dios” (Ang Giya ngadto sa mga Kasulatan, “Grasya,” scriptures.lds.org). Si Jesukristo nagtinguha sa matag adlaw sa grasya sa Langitnong Amahan, o balaanong tabang ug kalig-on, ug nakaangkon og mas dakong kahibalo ug gahum hangtud naangkon niya ang kahingpitan sa himaya.
I-display ang mosunod nga pamahayag ni Presidente Joseph Fielding Smith (1876–1972), ug dapita ang usa ka estudyante sa pagbasa niini og kusog:
Imahe
Presidente Joseph Fielding Smith
“Ang atong Manluluwas usa ka Dios sa wala pa siya matawo niini nga kalibutan, ug iyang gidala uban niya kanang mao nga kahimtang sa iyang pag-anhi dinhi. Usa siya ka Dios sa dihang natawo siya sa kalibutan ingon man kaniadto. Apan kini nga kinabuhi dinhi makita nga kinahanglan siya nga magsugod sama sa tanang mga anak ug mag-angkon sa iyang kahibalo pagtulun-an human sa laing pagtulun-an. …
“… Walay duha-duha, mianhi si Jesus sa kalibutan ubos sa samang kondisyon nga gikinahanglan sa matag usa nato—nakalimot siya sa tanan, ug siya nagtubo gikan sa grasya ug dugang pa nga grasya” (Mga Pagtulun-an sa mga Presidente sa Simbahan: Joseph Fielding Smith [2013], 357–59).
Dapita ang usa ka estudyante sa pagbasa og kusog sa Doktrina ug mga Pakigsaad 93:19–20. Hangyoa ang klase sa pagsunod, nga mangita kon nganong mipadayag ang Ginoo og usa ka porsyon sa rekord ni Juan Bautista.
Sumala sa bersikulo 19, nganong mipadayag man ang Ginoo sa rekord ni Juan Bautista?
Ipakita ang mosunod nga pamahayag ni Elder Bruce R. McConkie (1915-1985) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:
“Ang hingpit nga pagsimba mao ang pagsunod. Mipasidungog kita niadtong kinsa atong gisunod” (Bruce R. McConkie, The Promised Messiah: The First Coming of Christ [1978], 568).
Unsa ang gisugyot niini nga pamahayag ni Elder McConkie ug sa mga pagtulun-an nga atong natun-an diha sa Doktrina ug mga Pakigsaad 93 mahitungod sa unsaon nato sa pagsimba ang Langitnong Amahan? (Tabangi ang mga estudyante sa pagsabut nga kinahanglan nga simbahon nato ang Langitnong Amahan pinaagi sa pagsunod sa ehemplo ni Jesukristo.)
Sumala sa Doktrina ug mga Pakigsaad 93:20, unsa ang gisaad sa Ginoo alang niadtong kinsa mosunod sa Iyang ehemplo pinaagi sa pagtuman sa Iyang mga sugo? (Human makatubag ang mga estudyante, isulat sa pisara ang mosunod nga baruganan: Kon motuman kita sa mga sugo, makadawat kita og grasya ug dugang pa nga grasya, hangtud nga kita makadawat sa kahingpitan sa himaya sa Amahan, sama sa naangkon ni Jesukristo.)
Ngano kaha nga importanting mahibaloan nga kita, sama sa Manluluwas, makadawat og kahingpitan sa himaya sa Amahan ug mamahimong sama Kaniya kon motuman kita sa mga sugo ug makadawat sa grasya ug dugang nga grasya?
Aron matabangan ang mga estudyante nga mas makasabut kon unsaon nila sa paggamit ang baruganan nga nasulat sa pisara, i-display ang mosunod nga pamahayag ni Presidente Lorenzo Snow (1814–1901), ug dapita ang usa ka estudyante sa pagbasa niini og kusog:
Imahe
Presidente Lorenzo Snow
“Ayaw pagdahum nga mahimong hingpit sa usa lamang ka higayon. Kon kamo nagdahum, kamo masagmuyo. Magmahimong mas maayo karon kay sa kagahapon, ug mas maayo ugma kay sa unsa kamo karon. Ang mga tintasyon nga medyo mibuntog kanato karon, ayaw tuguti nga mobuntog usab kanato ugma. Apan padayon nga mahimong mas maayo og gamay matag adlaw; ug ayaw tuguti nga ang inyong kinabuhi matapos nga walay nahimong maayo ngadto sa uban ingon man usab sa atong kaugalingon” (Mga Pagtulun-an sa mga Presidente sa Simbahan: Lorenzo Snow [2012], 121).
Dapita ang mga estudyante sa paghunahuna mahitungod sa espirituhanong paglambo nga ilang nahimo sulod sa milabayng pipila ka tuig.
Unsa ang usa ka ehemplo kon giunsa nimo sa pagkat-on ug paglambo atol sa miaging pipila ka tuig samtang gituman nimo ang mga sugo? (Mahimo usab nga mopaambit ka og usa ka kasinatian.)
Ipamatuod nga sama nga si Jesukristo nahimong sama sa Langitnong Amahan pinaagi sa pagtuman sa mga sugo ug padayon gikan sa grasya ug dugang pa nga grasya, mahimo usab nato kini.
Awhaga ang mga estudyante sa paghimo og tumong sa unsay angay nilang buhaton aron mas maayo ang ilang ugma kay sa karon aron ilang masunod ang Manluluwas ug sa ngadto-ngadto mas mahisama Kaniya ug sa atong Langitnong Amahan.
Ang Ginoo mitudlo unsaon sa pagkadawat og kamatuoran ug kahayag
Dapita ang usa ka estudyante sa pagbasa og kusog sa Doktrina ug mga Pakigsaad 93:21–23. Hangyoa ang klase sa pagsunod, nga mangita unsay gipadayag sa Manluluwas mahitungod sa Iyang Kaugalingon ug kanato didto sa premortal nga kinabuhi.
Unsa ang gipadayag sa Manluluwas mahitungod sa Iyang Kaugalingon diha sa bersikulo 21?
Ipasabut nga tungod kay si Jesukristo mao ang Unang Natawo sa tanang espiritu nga anak sa Langitnong Amahan ug misunod sa kabubut-on sa Amahan sa tanang butang, Siya “gitudlo nga manununod” sa tanan nga anaa sa Amahan (Mga Hebreohanon 1:2).
Ipasabut nga kita mga anak pinaagi ni Jesukristo ug makaambit sa himaya sa Amahan sama nga kita natawo pag-usab sa espirituhanong paagi ug malimpyo gikan sa sala pinaagi sa Pag-ula sa Manluluwas. Mamahimo dayon kitang kabahin sa Simbahan sa Unang Natawo. Niining paagiha, mamahimo kitang “isigkamanununod uban kang Kristo” (Mga Taga-Roma 8:17) ug makadawat sa tanan nga iya sa Amahan” (tan-awa sa D&P 76:55).
Nganong importante nga mahibalo nga kita “[didto usab] sa sinugdanan uban sa Amahan” (D&P 93:23)?
Ipasabut nga samtang nagpuyo kita uban sa Langitnong Amahan ug ni Jesukristo sa premortal nga kinabuhi, ila kitang gitudloan ug pwede natong dawaton o isalikway ang kamatuoran. Dapita ang mga estudyante sa pagbasa og hilum sa Doktrina ug mga Pakigsaad 93:24–28 nga mangita sa unsay gitudlo sa Ginoo mahitungod sa kamatuoran.
Unsay inyong nakat-unan gikan sa depinisyon sa kamaturoan diha sa bersikulo 24?
Ipasabut ang mga pulong nga “kinsa mao ang usa ka bakakon gikan pa sa sinugdanan” bersikulo 25, ug ipasabut nga ang gipasabut niini nga mga pulong mao si Satanas. Sama sa iyang gibuhat didto sa premortal nga kinabuhi si Satanas padayon nga maningkamot sa pagpugong nga makadawat kita sa kamatuoran.
Unsa ang atong makat-unan mahitungod kang Jesukristo gikan sa bersikulo 26?
Sumala sa bersikulo 28, unsa ang mahitabo kanato kon padayon kitang makadawat og kamatuoran ug kahayag pinaagi sa pagtuman sa mga sugo sa Ginoo? (Human makatubag ang mga estudyante, isulat sa pisara ang mosunod nga mga baruganan: Pinaagi sa pagdawat sa kamatuoran ug kahayag, mahimo kitang sama ni Jesukristo ug sa Langitnong Amahan.)
Sa unsang paagi kini nga baruganan may kalabutan sa ubang baruganan nga nasulat sa pisara?
Ipasabut nga sa dihang nagpuyo kita uban sa Dios sa wala pa kita matawo, aduna kitay kabubut-on—ang abilidad sa pagpili ug paglihok alang sa atong kaugalingon. Dapita ang usa ka estudyante sa pagbasa og kusog sa Doktrina ug mga Pakigsaad 93:29–32. Hangyoa ang klase sa pagsunod, nga mangita kon sa unsang paagi ang atong kabubut-on makaapekto sa atong abilidad sa pagdawat sa kahayag ug kamatuoran.
Unsa ang sangputanan kon mopili kita sa dili pagdawat og kahayag?
I-summarize ang Doktrina ug mga Pakigsaad 93:33–35 pinaagi sa pagpasabut nga mitudlo ang Ginoo nga makadawat lamang kita og kahingpitan sa kalipay kon ang atong lawas ug espiritu magkahiusa na sa Pagkabanhaw.
Dapita ang usa ka estudyante sa pagbasa og kusog sa Doktrina ug mga Pakigsaad 93:36–39. Hangyoa ang klase sa pagsunod, nga mangita sa dugang nga mga kamatuoran nga gitudlo sa Ginoo mahitungod sa kahayag ug kamatuoran.
Unsa ang atong makat-unan mahitungod sa kahayag ug kamatuoran diha sa mga bersikulo 36–37?
Unsa nga baruganan ang atong makat-unan gikan sa bersikulo 39 mahitungod sa unsay hinungdan nga mawad-an kita sa kahayag ug kamatuoran? (Human makatubag ang mga estudyante, isulat sa pisara ang mosunod nga kamatuoran: Ang pagkamasinupakon ug sayop nga mga tradisyon maoy hinungdan nga mawala kanato ang kahayag ug kamatuoran.)
Unsa ang pipila ka ehemplo sa mga kalihokan o mga tradisyon karon nga maoy hinungdan nga mawad-an kita sa kahayag ug kamatuoran?
Ipamatuod nga kon mogamit kita sa atong kabubut-on aron sa pagdawat sa kahayag ug kamatuoran, mas mahisama kita kang Jesukristo ug sa Langitnong Amahan ug sa kadugayan makadawat og kahingpitan sa himaya sa Dios ug kahimayaan sa celestial nga gingharian. Dapita ang mga estudyante sa pagpamalandong kon unsa kahay nakababag sa ilang mga paningkamot nga makadawat og kahayag ug kamatuoran. Awhaga sila sa paghimo og tumong nga dili na ipadayon kini nga mga buhat aron padayon silang makadawat og kahayag ug kamatuoran ug mas mahisama ni Jesukristo ug sa Langitnong Amahan.
Ang Ginoo misugo sa Iyang mga sulugoon sa pagdala sa ilang mga anak diha sa kahayag ug kamatuoran
I-summarize ang Doktrina ug mga Pakigsaad 93:40–53 pinaagi sa pagpasabut nga gisugo sa Ginoo ang mga Santos “sa pag-amuma sa [ilang mga anak] pinaagi sa kahayag ug kamatuoran” [bersikulo 40]. Gipanton usab sa Ginoo ang pipila ka mga lider sa Simbahan tungod sa wala nila paghimo niini.