Leksyon 12

Doktrina ug mga Pakigsaad 29

Pasiuna ug Timeline

Niadtong Septyembre 1830, sa wala pa ang ikaduhang komperensya sa Simbahan nga gihimo didto sa Fayette, New York, pipila ka unang mga miyembro sa Simbahan mipaabut nga ang mga panagna sa Basahon ni Mormon mahitungod sa Zion ug ang pagpundok sa pinili sa Dios matuman sa dili madugay. Usa ka grupo sa unom ka elder ug tulo ka miyembro sa Simbahan nag-abut ug naghangyo sa Ginoo mahitungod niini nga mga panagna. Agi og tubag sa ilang pangutana, nadawat ni Propeta Joseph Smith ang pagpadayag nga girekord diha sa Doktrina og mga Pakigsaad 29. Niini nga pagpadayag, gitudlo sa Ginoo kanila ang mahitungod sa pagpundok sa pinili sa Manluluwas sa dili pa ang Iyang Ikaduhang Pag-anhi ug mahitungod sa atong kaluwasan gikan sa Pagkapukan ni Adan ug Eva pinaagi sa Pag-ula ni Jesukristo.

Hunyo–Oktubre 1830Gidiktar ni Joseph Smith ang Moises 1–5 samtang gitrabaho niya ang dinasig nga paghubad sa unang mga kapitulo sa Genesis.

Agosto–Septyembre 1830Nalibug ang mga miyembro sa Simbahan sa gipangangkon nga mga pagpadayag ni Hiram Page.

Septyembre 1830Ang Doktrina ug mga Pakigsaad 29 nadawat.

Septyembre 1830Ang Doktrina ug mga Pakigsaad 28 nadawat (malagmit human ang Doktrina ug mga Pakigsaad 29 nadawat).

Septyembre 26–28, 1830Ang ikaduhang komperensya sa Simbahan gihimo didto sa Fayette, New York.

Oktubre 1830Mibiya si Oliver Cowdery ug ang iyang misyonaryong mga kauban sa usa ka misyon ngadto sa mga Lamanite.

Mga Sugyot alang sa Pagtudlo

Doktrina ug mga Pakigsaad 29:1–29

Gipundok ni Jesukristo ang pinili agi og pagpangandam alang sa Iyang Ikaduhang Pag-anhi

Sa wala pa magklase, isulat ang mosunod nga mga pulong diha sa pisara: kalisdanan ug pagkabiniyaan.

Kon magsugod na ang klase, dapita ang mga estudyante sa pagpasabut kon sa unsa nga paagi kini nga mga pulong magamit sa paghulagway sa atong adlaw ug sa mga adlaw nga nagpadulong ngadto sa Ikaduhang Pag-anhi ni Jesukristo.

Ipasabut nga samtang pipila ka mga tawo maguol mahitungod sa kalisdanan ug pagkabiniyaan nga mahimo ug maanaa sa kalibutan, ang Ginoo mipadayag og mga kamatuoran nga mogiya ug motabang kanato atol niining malisud nga mga panahon. Dapita ang mga estudyante sa pagpangita og mga kamatuoran samtang sila magtuon sa Doktrina ug mga Pakigsaad 29 nga nagtudlo nga kita kinahanglan gayud nga mobuhat nga mapanalipdan ug maandam alang sa mga adlaw sa kalisdanan ug pagkabiniyaan.

Ipasabut nga kaniadtong Septyembre 1830, sa wala pa ang komperensya sa Simbahan gihimo didto sa Fayette, New York, unom ka elder ug tulo ka lain nga miyembro sa Simbahan nagpundok sa paghisgot og daghan nga mga hilisgutan, lakip ang kalapasan ni Adan ug Eva ug ang panagna kalabut sa pagtungha sa Zion (tan-awa sa Isaias 52:8; 3 Nephi 16:18; 21:22–24.) Naghiusa sila sa pag-ampo kabahin niining mga hilisgutan, ug agi og tubag, mihatag ang Ginoo og pagpadayag ni Joseph Smith nga girekord diha sa Doktrina ug mga Pakigsaad 29.

Dapita ang usa ka estudyante sa pagbasa og kusog sa Doktrina ug mga Pakigsaad 29:1–3. Hangyoa ang klase sa pagsunod, nga mangita kon unsay gisulti sa Ginoo nga Iyang buhaton alang sa Iyang mga katawhan.

• Unsa ang giingon sa Ginoo nga Iyang buhaton alang sa Iyang mga katawhan?

Pakit-a ang mga estudyante og usa ka hulagway sa himongaan nga nagpundok sa iyang mga piso.

• Sa unsa nga paagi ang Ginoo sama sa usa ka himongaan kinsa nagpundok sa iyang mga piso ilawom sa iyang mga pako? (Ang Ginoo nagtinguha sa pagpundok ug sa pagpanalipod kanato tungod sa Iyang gugma alang kanato.)

• Unsa nga baruganan ang atong mailhan diha sa bersikulo 2 kabahin sa unsay kinahanglan gayud natong buhaton aron mapundok sa Manluluwas? (Bisan tuod mahimo silang mogamit og ubang mga pulong, ang mga estudyante kinahanglang moila nga samtang kita nagpatalinghug sa tingog sa Manluluwas, magpaubos sa atong mga kaugalingon, ug motawag sa Dios diha sa pag-ampo, ang Manluluwas mopundok ug mopanalipod kanato. Isulat diha sa pisara kini nga baruganan.)

• Unsa ang kahulugan sa “mopatalinghug” ngadto sa tingog sa Manluluwas?

• Unsa ang pipila ka mga butang nga kita nagkinahanglan og panalipod sa atong panahon?

Dapita ang duha ka mga estudyante sa pagpuli-puli og basa og kusog gikan sa Doktrina ug mga Pakigsaad 29:3–8, ug hangyoa ang klase sa pagsunod, nga mangita alang sa unsay gitawag sa Ginoo nga buhaton sa mga elder ug ngano.

• Sumala sa mga bersikulo 4, 7–8, unsa ang gitawag sa Ginoo nga buhaton sa mga elder? (Isangyaw ang ebanghelyo aron sa pagpundok sa pinili sa Ginoo.)

Ipasabut nga sa dihang kini nga pagpadayag gihatag, ang mga miyembro sa Simbahan diyutay ug ang mga Santos gisugo sa pagpundok diha sa “usa ka dapit” (D&P 29:8). Hinoon, samtang nagtubo ang Simbahan, misugo ang Ginoo sa mga Santos sa pagpabilin diha sa ilang kaugalingong mga yuta ug sa pagpundok diha sa ilang tagsa-tagsa ka mga dapit. Karon kita magpundok uban sa mga Santos diha sa mga stake sa Zion diin kita nagpuyo.

• Sumala sa bersikulo 7, giunsa sa paghulagway sa Ginoo ang pinili?

Dapita ang mga estudyante sa pag-ila sa doktrina nga gitudlo diha sa bersikulo 8 kalabut kon ngano ang Ginoo nagpundok sa Iyang pinili. (Kinahanglan ang mga estudyante moila nga ang Ginoo mipundok sa pinili aron sila makaandam sa tanang mga butang alang sa mga panahon sa kalisdanan ug pagkabiniyaan nga moabut diha sa mga dautan. Isulat kini nga doktrina diha sa pisara.)

• Unsa sa imong hunahuna ang kahulugan sa “makapangandam sa tanang mga butang” (bersikulo 8)?

• Ngano kaha nga ang pagpundok kauban sa ubang mga Santos makatabang kanato alang sa mga panahon sa kalisdanan?

• Unsa nga mga dapit kita isip mga Santos magpundok karon nga matabangan kita sa pag-andam alang sa mga kalisdanan?

I-summarize ang Doktrina ug mga Pakigsaad 29:9–13 pinaagi sa pagpasabut nga niini nga mga bersikulo, mipahayag ang Manluluwas nga Siya moanhi pag-usab uban sa “gahum ug dako nga himaya” (bersikulo 11), nga ang mga dautan pagasunugon diha sa Iyang pag-anhi, ug nga ang mga matarung mopuyo uban Kaniya sulod sa liboan ka mga tuig dinhi sa yuta.

Dapita ang mga estudyante sa pagbasa og hilum sa Doktrina ug mga Pakigsaad 29:14–21 nga mangita alang sa mga kalisdanan nga mahitabo sa katapusang mga adlaw. Sa dili pa mobasa ang mga estudyante, ipasabut nga daghan sa unsay gihulagway diha sa mga bersikulo 18–21 mahitabo ngadto sa dautan nga mga kasundalohan nga nagpundok batok sa Israel sa katapusang gubat sa Armagedon (tan-awa sa D&P 29:21; tan-awa usab ang mga ulohan sa kapitulo alang sa Ezequiel 36–39 ug alang sa Zacarias 12–14). Dapita ang pipila ka mga estudyante sa pagreport unsay ilang nakit-an.

• Nganong gusto ninyo nga magkapundok isip usa sa pinili sa Manluluwas kon mahitabo kining mga kalisdanan?

Ipasabut nga bisan tuod og ang mga pinili pagapundukon ug pagaandamon alang sa kalisdanan sa katapusang mga adlaw, kini wala magpasabut nga sila makalikay sa tanang mga kalisud. Dapita ang usa ka estudyante sa pagbasa og kusog sa mosunod nga pahayag ni Propeta Joseph Smith (1805–1844), kinsa mipasabut kon ngano nga pipila sa mga matarung maapektuhan sa mga panghitabo sa katapusang mga adlaw:

“Kini usa ka sayop nga pagtuo nga ang mga Santos makalingkawas sa tanang mga paghukom, samtang ang dautan mag-antus; kay ang tanang tawo ubos sa pag-antus, ug ‘ang matarung maglisud sa pag-ikyas’ [tan-awa sa D&P 63:34]; bisan pa man daghang mga Santos makaikyas, kay ang matarung mabuhi pinaagi sa hugot nga pagtuo [tan-awa sa Habacuc 2:4]; unya daghang mga matarung mabiktima sa sakit, sa katalagman, ug uban pa, nga ang hinungdan gumikan sa kahuyang sa unod, ug bisan pa niana mangaluwas ngadto sa Gingharian sa Dios” (Mga Pagtulun-an sa mga Presidente sa Simbahan: Joseph Smith [2007], 304).

Pagpamatuod nga kon kita mopili nga pagapundukon ngadto sa Ginoo, kita maandam alang sa mga kalisdanan ug pagkabiniyaan nga mahitabo sa katapusang mga adlaw.

Dapita ang usa ka estudyante sa pagbasa og kusog sa Doktrina ug mga Pakigsaad 29:17 ug hangyoa ang klase sa pagsunod, nga mangita alang sa unsay mahitabo niadtong kinsa modumili sa paghinulsol ug sa pagpamati sa tingog sa Ginoo.

• Sumala sa bersikulo 17, unsa ang mahitabo niadtong kinsa modumili sa paghinulsol ug sa pagpamati sa tingog sa Ginoo? (Human matubag sa mga estudyante, isulat ang mosunod nga baruganan diha sa pisara: Kon kita modumili sa paghinulsol ug sa pagpamati sa tingog sa Ginoo, ang Iyang maulaong dugo dili molimpyo kanato.)

• Unsa ang pipila ka mga ehemplo kabahin sa unsa nga paagi kita makapamati sa tingog sa Ginoo? (Posibling mga tubag mahimong maglakip sa pagsunod sa buhing propeta, pagtuon sa mga kasulatan, ug sa pagsunod sa mga pag-aghat sa Espiritu Santo.)

• Unsa ang pipila ka mga sangputanan sa pagkadili malimpyo pinaagi sa Pag-ula ni Jesukristo?

Aron matabangan ang mga estudyante sa pagtubag niini nga pangutana, i-summarize ang Doktrina ug mga Pakigsaad 29:22–29 pinaagi sa pagpasabut nga gipadayag sa Ginoo kon unsay mahitabo sa katapusan sa Milenyum, lakip ang Pagkabanhaw sa patay ug ang Katapusang Paghukom sa matarung ug sa dautan. Dapita ang usa ka estudyante sa pagbasa og kusog sa paghulagway sa Ginoo kabahin sa Katapusang Paghukom diha sa bersikulo 27.

• Unsa ang mahitabo niadtong kinsa nalimpyohan sa ilang mga sala? Unsay mahitabo niadtong wala malimpyohi ug nagpabilin diha sa ilang mga sala?

Pagpamatuod nga ang labing importanting pagpangandam nga mahimo sa usa ka tawo alang sa Ikaduhang Pag-anhi ni Jesukristo ug sa Katapusang Paghukom mao ang pagpatalinghug ngadto sa Manluluwas , paghinulsol, ug pagpalimpyo gikan sa sala.

Dapita ang mga estudyante sa pagbalik og basa sa hilum sa Doktrina ug mga Pakigsaad 29:4, 7. Idirekta ang atensyon sa mga estudyante ngadto sa tulo ka mga baruganan nga gilista diha sa pisara, ug pangutana:

• Ngano nga ang tawag sa Ginoo sa pagpahayag sa ebanghelyo ug sa pagtabang og pundok sa Iyang pinili makahuluganon kaayo sumala niini nga mga kamatuoran?

Dapita ang mga estudyante sa pagpamalandong kon unsay ilang mabuhat aron mapundok ngadto sa Manluluwas ug usab sa pagtabang sa uban nga mapundok ngadto sa Manluluwas ug sa Iyang Simbahan. Awhaga sila sa pagbuhat sa bisan unsang mga pag-aghat nga ilang madawat.

Gamita ang mga doktrina ug mga baruganan

Human nailhan sa mga estudyante, nasabtan, ug gibati ang kamatuoran ug ang importansya sa usa ka doktrina o baruganan nga nakit-an diha sa mga kasulatan, kinahanglan nga awhagon sa mga magtutudlo ang mga estudyante sa paggamit niana nga kamatuoran diha sa ilang mga kinabuhi. Gamiton sa mga estudyante ang doktrina ug mga baruganan kon sila naghunahuna, nagsulti, ug nagpuyo sumala niadtong unsay ilang nakat-unan. Samtang ang mga estudyante nagbuhat sa mao, makadawat sila sa gisaad nga mga panalangin ug makaangkon og mas lawom nga pagsabut ug pagpamatuod niini nga mga kamatuoran.

Doktrina ug mga Pakigsaad 29:30–50

Ang Manluluwas nagpahayag nga Siya nagtubos kanato gikan sa Pagkapukan ug nga Siya nagtanyag kanato og kaluwasan gikan sa atong mga sala

Pahinumdumi ang mga estudyante nga ang Doktrina ug mga Pakigsaad 29 miabut agi og tubag ngadto sa gamay nga grupo sa mga elder ug ubang mga miyembro sa Simbahan kinsa nagpundok aron sa paghisgot og daghang mga punto sa doktrina, lakip ang Pagkapukan ni Adan ug ni Eva. Ang pipila diha sa grupo may lahi nga mga panan-aw mahitungod sa kalapasan ni Adan ug ni Eva didto sa Tanaman sa Eden.

Isulat ang pulong nga Paglalang diha sa pisara. Dapita ang usa ka estudyante sa pagbasa og kusog sa Doktrina ug mga Pakigsaad 29:30–33. Hangyoa ang klase sa pagsunod, nga mangita sa unsay gitudlo sa Manluluwas mahitungod sa Paglalang.

Aron matabangan ang mga estudyante sa pagsabut sa mga pagtulun-an dinhi niini nga mga bersikulo, pahibaloa sila nga human ang Paglalang natapos, si Adan ug si Eva, ang yuta, ug ang tanang butang dinhi sa yuta diha sa espiritwal nga kahimtang. Kini nagpasabut nga bisan tuod si Adan ug si Eva adunay pisikal nga mga lawas dili sila mortal (ubos sa kamatayon) ug makapuyo unta sa presensya sa Dios hangtud sa kahangturan. Hinoon, isip kabahin sa plano sa Langitnong Amahan, ang Iyang tanan nga mga nilalang nahimong temporal, o mortal, tungod sa Pagkapukan. Human sa Pagkabanhaw, mobalik sila sa espiritwal nga kahimtang—pisikal apan usab imortal.

Dapita ang usa ka estudyante sa pagbasa og kusog sa Doktrina ug mga Pakigsaad 29:34–35. Hangyoa ang klase sa pagsunod, nga mangita alang sa unsay gitudlo sa Ginoo mahitungod sa Iyang mga sugo, lakip sa sugo nga Iyang gihatag ni Adan ug ni Eva didto sa Tanaman sa Eden sa dili pagkaon sa bunga sa kahoy sa kahibalo sa maayo ug sa dautan.

• Unsa ang atong makat-unan gikan niini nga mga bersikulo mahitungod sa tanang mga sugo sa Dios, lakip sa Iyang sugo ngadto ni Adan ug ni Eva sa dili pagkaon sa bunga?

Isulat Ang Pagkapukan diha sa pisara, ug dapita ang pipila ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 29:36–41. Hangyoa ang klase sa pagsunod, nga mangita unsay gitudlo sa Ginoo mahitungod sa Pagkapukan ni Adan ug ni Eva.

• Unsa ang pipila ka mga sangputanan sa Pagkapukan? (Uban sa lain nga mga butang, tungod sa Pagkapukan kita ubos sa espiritwal ug pisikal nga kamatayon.)

Ipasabut nga diha sa bersikulo 41 gitudlo sa Ginoo nga tungod sa kalapasan ni Adan ug ni Eva, gihinginlan sila gikan sa Tanaman sa Eden ug sa presensya sa Ginoo. Ang pagkabulag gikan sa presensya sa Dios gitawag og espiritwal nga kamatayon. Tungod sa Pagkabanhaw ni Jesukristo, ang tanang mga tawo mabanhaw ug mabalik ngadto sa presensya sa Dios aron pagahukman. Kadtong kinsa tinuyong mirebelde batok sa kamatuoran pagahinginlan gikan sa presensya sa Dios ug makasinati og ikaduhang espiritwal nga kamatayon.

Isulat ang pulong nga Pag-ula diha sa pisara. Dapita ang usa ka estudyante sa pagbasa og kusog sa Doktrina ug mga Pakigsaad 29:42–45 ug hangyoa ang klase sa pagsunod, nga mangita alang sa unsay gisulti sa Ginoo nga Iyang pagabuhaton alang ni Adan ug sa Iyang binhi. Dapita ang pipila ka mga estudyante sa pagreport unsay ilang nakit-an.

• Sumala sa mga bersikulo 42–43 unsa ang gitanyag sa Manluluwas ngadto niadtong kinsa adunay hugot nga pagtuo diha Kaniya ug naghinulsol sa ilang mga sala? (Human matubag sa mga estudyante, isulat ang mosunod nga baruganan diha sa pisara: Pinaagi sa Iyang Pag-ula, nagtanyag si Jesukristo og kapasayloan ug kinabuhing dayon ngadto sa tanan kinsa adunay hugot nga pagtuo diha Kaniya ug naghinulsol sa ilang mga sala.)

• Sumala sa mga bersikulo 44–45, unsay mahitabo niadtong kinsa dili maghinulsol sa ilang mga sala?

I-summarize ang Doktrina ug mga Pakigsaad 29:46–50 pinaagi sa pagpasabut nga ang Manluluwas nagpahayag nga tungod kay ang gagmay nga mga bata ug kadtong walay pagsabut walay tulubagon, matubos usab sila pinaagi sa Iyang Pag-ula.

Ipamatuod nga tungod sa Pag-ula ni Jesukristo, ang matag usa kanato, mobuntog sa temporal nga kamatayon pinaagi sa Pagkabanhaw. Pinaagi sa Pag-ula ni Jesukristo, makabuntog usab kita sa espiritwal nga kamatayon kon kita maghinulsol sa atong mga sala ug magpatalinghug ngadto sa tingog sa Manluluwas.

Dapita ang mga estudyante sa paggamit unsay ilang nakat-unan karon pinaagi sa pagpili sa pagpatalinghug ngadto sa tingog sa Manluluwas, paghinulsol sa ilang mga sala, ug sa pagpundok ngadto Kaniya.