Sa ulahi nga bahin sa tuig 1833, gisulong [giatake] sa mga manggugubot ang mga miyembro sa Distrito sa Jackson, Missouri, ug gipugos sila sa pagbiya sa ilang mga panimalay. Dihang ang mga balita mahitungod sa kabangis miabut ni Propeta Joseph Smith sa Kirland, Ohio, nasubo siya alang sa mga Santos sa Missouri ug nangamuyo sa Ginoo nga ibalik sila sa ilang mga yuta ug mga panimalay. Pagka-Disyembre 16–17, 1833, gipadayag sa Ginoo ngadto sa Propeta nganong gitugutan Niya nga mag-antus ang Iyang mga Santos. Kini nga pagpadayag, nga narekord sa Doktrina ug mga Pakigsaad 101, naglakip usab og tambag ug mga pulong sa paghupay kabahin “sa katubsanan sa Zion” (D&P 101:43).
Hulyo 23, 1833Tungod sa hulga sa kapintas sa mga manggugubot, ang mga lider sa Simbahan sa Missouri mipirma og kasabutan nga ang tanang Mormon mobiya sa Distrito sa Jackson pagka-Abril 1, 1834.
Oktubre 20, 1833Ang mga lider sa Simbahan sa Missouri mipahibalo nga buot gayud sa mga Santos sa Missouri nga magpabilin sa Distrito sa Jackson aron mapanalipdan ang ilang mga katungod sa pagpanag-iya.
Oktubre 31–Nobyembre 8Misulong ang mga manggugubot sa mga pamuy-anan sa Distrito sa Jackson, misunog sa mga balay ug nakapugos sa mga Santos sa pagbiya sa distrito.
Nobyembre 25, 1833Nahibaloan ni Propeta Joseph Smith nga ang kapintas sa mga manggugubot mipalayas sa mga Santos gikan sa Distrito sa Jackson.
Ang Ginoo mipasabut nganong gitugutan Niya nga mag-antus ang mga Santos ug mitanyag og tambag ug paghupay
Dapita ang mga estudyante sa paghunahuna nga sila adunay higala nga nagtuo nga ang Dios dili na motabang kaniya tungod sa dili maayong mga pagpili nga iyang nahimo. Hangyoa ang mga estudyante sa paghunahuna mahitungod sa unsay ilang isulti niini nga higala.
Dapita ang mga estudyante sa pagpangita sa doktrina ug mga baruganan samtang magtuon sila sa Doktrina ug mga Pakigsaad 101 nga makatabang nila sa pagsabut kon unsay pagbati sa Ginoo mahitungod kanato, bisan kon kita makasala.
Pahinumdumi ang mga estudyante nga tungod sa kabangis sa mga manggugubot pagka Hulyo 1833, ang mga lider sa Simbahan sa Missouri nagkasabut nga ang tanang Mormon mobiya sa Distrito sa Jackson pagka Abril 1, 1834. Ipasabut nga pagka Agosto 1833, ang mga lider sa Simbahan sa Kirtland, Ohio, mitambag sa mga Santos sa Missouri sa pagpangayo og tabang ug panalipud gikan sa gobyerno. Human makigtagbo sa gobernador sa Missouri, ang mga lider sa Simbahan sa Missouri nagsuhol og mga abogado ug nangandam sa pagpanalipud sa ilang mga katungod ug kabtangan, diin pagkahuman niadto ang mga manggugubot misulong sa mga Santos ug bangis silang gipalayas gikan sa Distrito sa Jackson pagka Nobyembre 1833.
Dapita ang mga estudyante sa pagbasa og hilum sa ulohan nga seksyon sa Doktrina ug mga Pakigsaad 101, nga mangita sa mga kalisdanan nga nasinati sa mga Santos sa Missouri. Hangyoa ang mga estudyante nga moreport sa ilang nakit-an.
Dapita ang usa ka estudyante sa pagbasa og kusog sa mosunod nga sugilanon ni Elder Parley P. Pratt (1807–1857):
Imahe
Elder Parley P. Pratt
“Atol sa pagkatibulaag sa mga kababayen-an ug sa mga bata, may mga pundok nga nagpangita sa kalalakin-an, gipamusil ang uban, gipanggapos ug gipanglapdusan ang uban, ug ang uban ilang gigukod daghang milya ang gilay-on.
“… Ang kabaybayunan [sa Suba sa Missouri] nagsugod sa pagkapuno sa linya sa isig ka kilid sa sakayan kauban sa mga lalaki, babaye, ug mga bata. … “Gatusan ka mga tawo ang nakita sa matag direksyon, ang uban anaa sa mga tolda ug ang uban anaa sa gawas libut sa mga daob, samtang kusog ang bundak sa ulan. Ang mga bana nagpangita hain ang ilang mga asawa, ang mga asawa nagpangita hain ang ilang mga bana; ang mga ginikanan sa ilang mga anak, ug ang mga anak sa ilang mga ginikanan. …
“… Ang tanan nga akong mga probisyon alang sa tingtugnaw gipangguba o gipangkawat, ug ang akong mga lugas nabiyaan nga mitubo sa yuta nga ang akong mga kaaway na ang mag-ani. Pagkahuman ang akong balay gisunog, ug ang akong bungang kahoy ug ang mga kalamboan gipangguba o gipangawat” (Autobiography of Parley P. Pratt, ed. Parley P. Pratt Jr. [1938], 121–22).
Unsa kaha ang pangutana sa mga Santos human sila gipalayas sa Zion?
Dapita ang usa ka estudyante sa pagbasa og kusog sa Doktrina ug mga Pakigsaad 101:1–3, 6–7. Hangyoa ang klase sa pagsunod, nga mangita kon nganong gitugot sa Ginoo nga lutuson ang mga Santos. Hangyoa ang mga estudyante nga moreport sa ilang nakit-an.
Bisan og ang mga Santos may kalapasan, unsa ang gisaad sa Ginoo kanila? (Human makatubag ang mga estudyante, ipasabut ang mga pulong nga “sila mahimo nga akò niana nga adlaw sa panahon nga Ako moabut aron sa pagpundok sa akong mga bahandi,” ug ipasabut nga kini nagpasabut sa umaabut nga panahon kon ang Ginoo moganti na sa mga matinud-anon ug igahin sila isip Iyang mga bahandi.)
Dapita ang mga estudyante sa pagbasa og hilum sa Doktrina ug mga Pakigsaad 101:4–5, nga mangita kon unsay gisulti sa Ginoo nga maoy gikinahanglang masinati sa mga Santos aron mamahimo silang “mga bahandi” sa Ginoo.” Hangyoa ang mga estudyante nga moreport sa ilang nakit-an.
Unsay buot ipasabut sapagpanton? (Kon gikinahanglan, ipasabut nga ang pagpanton mao ang “pagtul-id o pagdisiplina nga gihatag ngadto sa tagsa-tagsa o mga pundok aron sa pagtabang kanila sa pag-uswag o sa paghimo nga lig-on” [Ang Giya ngadto sa mga Kasulatan, “Panton, Pagpanton,” scriptures.lds.org].)
Ngano kaha nga gihisgutan man sa Ginoo si Abraham dihang nagtudlo sa mga Santos mahitungod sa paglahutay sa mga pagsulay? (Ang kabug-aton sa pagsulay ni Abraham naghulagway sa kaimportante sa pagpabiling matinud-anon kon kita sulayan sa hilabihan.)
Unsa nga baruganan ang atong makit-an diha sa bersikulo 5 kabahin sa kon unsay mahitabo kon dili kita magmatinud-anon sa paglahutay sa mga pagpanton sa Ginoo? (Kinahanglang makit-an sa mga estudyante ang usa ka baruganan nga susama sa mosunod: Kon dili kita molahutay sa matinud-anong paagi sa pagpanton, dili kita mabalaan.)
Sa unsang paagi ang matinud-anong paglahutay sa pagpanton ug mga pagsulay makatabang aron kita mabalaan?
Ipasabut nga ang Ginoo mogamit og daghang paagi sa pagpanton kanato. Ang pagtul-id maggikan sa Espiritu Santo, dinasig nga mga lider sa Simbahan, o mga higala ug pamilya. Alang sa mga Santos sa Zion, ang pagpanton miabut dihang ang Ginoo wala mopugong kanila nga pagalutuson.
Dapita ang usa ka estudyante sa pagbasa og kusog sa Doktrina ug mga Pakigsaad 101:9. Hangyoa ang klase sa pagsunod, nga mangita sa malaumong mensahe nga gihatag sa Ginoo niini nga mga Santos.
Unsa nga kamatuoran ang atong makita gikan sa bersikulo 9 nga makatabang nato kon mag-antus kita sa mga sangputanan sa atong mga sala? (Human makatubag ang mga estudyante, isulat sa pisara ang mosunod nga doktrina: Bisan makasala kita, sa gihapon ang Ginoo adunay kalooy kanato.)
Ipasabut nga tungod kay ang Ginoo dunay kalooy kanato, gusto siya nga gamiton nato ang atong pagtuo Kaniya ug maghinulsol sa atong mga sala aron sa katapusan makabalik kita uban Kaniya.
Sa unsang paagi kaha kini nga kamatuoran makatabang sa paghupay sa mga Santos sa Missouri?
Sa unsang paagi kaha kini nga kamatuoran makatabang sa usa ka tawo sa atong panahon kinsa mibati nga dili siya takus sa tabang ug gugma sa Ginoo?
I-summarize ang Doktrina ug mga Pakigsaad 101:10–21 pinaagi sa pagpasabut nga miingon ang Ginoo nga silutan Niya kadtong milutos sa mga Santos. Misaad usab Siya nga Iyang pundukon ang Iyang katawhan ug motukod sa Zion ug sa iyang mga stake.
Ang Ginoo mihulagway sa mga kahimtang atol unya sa Milenyum ug namahayag sa Iyang katawhan nga mamahimong asin sa yuta
I-summarize ang Doktrina ug mga Pakigsaad 101:22–34 pinaagi sa pagpasabut nga gitambagan sa Ginoo ang mga Santos sa pagpundok og pagbarug sa balaang mga dapit agig pagpangandam alang sa Ikaduhang Pag-anhi ni Jesukristo. Ang Ginoo mihulagway usab sa mga timailhan sa ubang panalangin nga madawat sa mga matarung human sa Iyang Ikaduhang Pag-anhi.
Isulat sa pisara ang Pagpanglutos. Hangyoa ang mga estudyante sa paghulagway og mga paagi nga ang mga miyembro sa Simbahan makasinati og mga pagpanglutos karon.
Dapita ang usa ka estudyante sa pagbasa og kusog sa Doktrina ug mga Pakigsaad 101:35–38. Hangyoa ang klase sa pagsunod, nga mangita kon unsay gisaad sa Ginoo alang niadtong matinud-anong makalahutay sa “pagpanggukod tungod og alang sa [Iyang] ngalan” (bersikulo 35).
Unsa nga baruganan ang atong makita gikan sa saad sa Ginoo diha sa bersikulo 35? (Tabangi ang mga estudyante sa pagpangita sa mosunod nga baruganan: Kadtong nag-antus og pagpanglutos alang sa ngalan ni Jesukristo ug molahutay diha sa hugot nga pagtuo moambit sa Iyang himaya.)
Sumala sa mga bersikulo 36–38, unsaon nato sa paglahutay ang mga pagpanglutos sa atong pagtuo?
I-display o basaha og kusog ang mosunod nga mga pangutana ug dapita ang mga estudyante sa pagsulat sa ilang mga tubag. Human ang mga estudyante dunay igong panahon sa pagsulat, ikonsiderar ang pagdapit nga ipaambit ang ilang mga tubag diha sa ilang kapares. O pwede nimong hangyoon ang pipila ka estudyante kinsa komportable nga mohimo niini sa pagpaambit sa ilang mga tubag diha sa klase.
Kanus-a kamo o ang tawo nga inyong nailhan nag-antus sa pagpanglutos tungod sa pagtuo kang Jesukristo ug sa Iyang ebanghelyo?
Sa unsang paagi, kamo, o ang tawo nga inyong nailhan, milahutay pinaagi sa pagtuo?
Awhaga ang mga estudyante sa pagpasalig nga molahutay pinaagi sa pagtuo kon gilutos sila tungod sa ilang mga gituohan diha ni Jesukristo.
I-summarize ang D&P 101:39–42 pinaagi sa pagpasabut nga ang Ginoo nag-refer sa mga Santos isip “ang asin sa yuta” (bersikulo 39). Sama nga ang asin mawad-an sa iyang lami kon isagol sa kahugawan, ang pagkahimong hugaw tungod sa mga sala sa kalibutan magpugong kanato gikan sa pagkahimong ehemplo ug panalangin sa uban.
Ang Ginoo mihatag sa sambingay sa halangdong tawo ug sa mga kahoy nga oliba ug miawhag sa mga Santos nga magpadayon sa pagpundok
Ipasabut nga aron matabangan ang mga Santos sa pagsabut kon sa unsang paagi matubos ang Zion, o mabawi, ang Ginoo mihatag sa sambingay bahin sa halangdon nga tawo ug sa mga kahoy nga oliba sigun sa narekord sa Doktrina ug mga Pakigsaad 101:43–62.
Isulat sa pisara o i-display ang mosunod nga mga pakisayran sa kasulatan ug mga pangutana:
Sa unsa nga paagi nga ang mga panghitabo niini nga sambingay may kalabutan sa unsay nahitabo sa mga Santos sa Missouri?
Unsa ang gitudlo sa Ginoo kabahin sa katubsanan sa Zion?
Ipares-pares ang mga estudyante, ug hangyoa sila sa pagbasa sa Doktrina ug mga Pakigsaad 101:43–62 ug sa paghisgot sa mga pangutana diha sa ilang mga kapares. Human sa igo nga panahon, dapita ang pipila ka estudyante sa pagreport unsay ilang nahisgutan.
Ipasabut nga ang tore nga anaa sa sambingay nagpasabut sa templo nga gisugo sa Ginoo nga tukuron sa mga Santos sa Distrito sa Jackson, Missouri (tan-awa sa D&P 57:2–3; 84:1–5; 97:10–12). Sa mas maayong kahulugan, ang tore magrepresentar sa Zion, nga matukod lamang sa mga Santos pinaagi sa kamasulundon sa balaod sa Ginoo (tan-awa sa D&P 101:11–12; 105:3–6). Ipasabut nga ang sulugoon nga gihisgutan sa mga bersikulo 55–62 mao si Propeta Joseph Smith (tan-awa sa D&P 103:21). Pipila ka bulan human makadawat sa pagpadayag nga narekord sa Doktrina ug mga Pakigsaad 101, giorganisar sa Propeta ang grupo nga gitawag og Kampo sa Israel (sa kadugayan gitawag kini nga Zion’s Camp) alang sa pagtubos sa Zion ug pagpahiuli sa mga Santos sa ilang mga yuta ug mga panimalay (tan-awa sa D&P 103:29–40).
Ipasabut nga human gipalayas gikan sa Distrito sa Jackson, ang uban nga mga Santos sa Missouri naghunahuna kon kinahanglan ba silang mamuyo na lang sa ubang nasud. Dapita ang usa ka estudyante sa pagbasa og kusog sa Doktrina ug mga Pakigsaad 101:63–67. Hangyoa ang klase sa pagsunod, nga mangita kon unsay gitudlo sa Ginoo ngadto sa mga Santos mahitungod sa kaimportante sa panagpundok.
Sumala sa mga bersikulo 64–65, ngano nga gisultihan sa Ginoo ang mga Santos nga ipadayon ang panagpundok?
Ipasabut ang mga pulong nga “ang trigo mapanalipdan diha sa balay tipiganan aron makabaton og kinabuhi nga dayon” diha sa bersikulo 65. Ipasabut nga sa kapanahunan ni Joseph Smith, ang naani nga trigo ibutang ngadto sa mga balay tipiganan, o kamalig, aron matipigan sa luwas nga paagi ug mapanalipdan. Elder David A. Bednar sa Korum sa Napulong Duha ka mga Apostoles mitudlo nga ang mga balay tipiganan nga anaa sa mga kasulatan mahimong magrepresentar sa “balaang mga templo” (“Madungganon nga Paghupot og usa ka Pangalan ug Katungdanan,”Liahona, May 2009, 97).
Unsa nga baruganan ang atong mahibaloan gikan sa bersikulo 65? (Tabangi ang mga estudyante sa pag-ila sa mosunod nga baruganan: Samtang magkapundok kita sa balaang mga templo, makadawat kita og mga panalipud ug maandam ang atong kaugalingon alang sa kinabuhing dayon.)
Sa unsang paagi ang pagpundok ngadto sa mga templo alang sa pagsimba, pagserbisyo, ug pagdawat sa makaluwas nga mga ordinansa makapanalipud kanato ug makapaandam alang sa kinabuhing dayon?
Gitambagan sa Ginoo ang mga Santos sa pagpangita og mga paagi nga makabalik sila sa ilang mga panimalay sa Missouri
Sultihi ang mga estudyante nga sigun sa narekord sa Doktrina ug mga Pakigsaad 101:76–101, gipahayag sa Ginoo nga Siya “motukod sa Batakang Balaod [sa Estados Unidos], pinaagi sa mga kamot sa maalamon nga mga tawo” (tan-awa sa bersikulo 80) ug nga ang mga Santos kinahanglang mosandig sa mga balaod sa yuta ug magtinguha og “kahusayan,” o kahupayan, gikan sa gobyerno (tan-awa sa verse 76).
Dapita ang usa ka estudyante sa pagbasa og kusog sa Doktrina ug mga Pakigsaad 101:77–78. Hangyoa ang klase sa pagsunod, nga mangita kon nganong midasig ang Ginoo sa pag-establisar sa Batakang Balaod sa Estados Unidos.
Sumala niini nga mga bersikulo, nganong gidasig man sa Ginoo ang pag-establisar og Batakang Balaod?
Ngano nga ang moral nga kabubut-on, o ang abilidad sa pagpili ug paglihok sa atong kaugalingon, mahinungdanon sa plano sa Dios alang sa kaluwasan?
Sa unsang paagi kaha ang mga bersikulo 77–78 makatabang nato sa pagsabut sa kaimportante sa relihiyusong kagawasan sa pagsiguro nga ang matag indibidwal makagamit sa ilang moral nga kabubut-on kon hisgutan ang pagtuo?
Tapusa pinaagi sa pagpamatuod sa mga kamatuoran nga nakita niini nga leksyon, ug dapita ang mga estudyante nga lihukon kini nga mga kamatuoran.