Doktrina ug mga Pakigsaad 30–34

Pasiuna ug Timeline

Human dayon sa ikaduhang komperensya sa Simbahan, nga gihimo hinapos sa Septyembre 1830 sa Fayette, New York, nadawat ni Propeta Joesph Smith ang mga pagpadayag alang kang David Whitmer, Peter Whitmer Jr, ug John Whitmer. Kini nga mga pagpadayag girekord diha sa Doktrina ug mga Pakigsaad 30. Sa samang panahon, ang Ginoo mitawag usab ni Thomas B. Marsh sa pagsangyaw sa ebanghelyo ug sa pagtabang sa pag-establisar sa Simbahan. Kini nga tawag, nga girekord diha sa Doktrina ug mga Pakigsaad 31, naglakip usab og mga saad ug tambag aron sa paggiya kaniya isip usa ka misyonaryo ug sa iyang personal nga kinabuhi.

Sa Oktubre 1830, nadawat sa Propeta ang pagpadayag nga karon narekord diha sa Doktrina ug mga Pakigsaad 32, diin gitawag sa Ginoo si Parley Pratt ug Ziba Peterson sa pag-uban ni Oliver Cowdery ug Peter Whitmer Jr. sa usa ka misyon ngadto sa mga Lamanite sa kasadpang Missouri. Sa laing pagpadayag, nga girekord diha sa Doktrina ug mga Pakigsaad 33, gitawag sa Ginoo si Ezra Thayre ug Northrop Sweet sa pagsangyaw sa ebanghelyo.

Ang pagpadayag nga girekord diha sa Doktrina ug mga Pakigsaad 34 gihatag kaniadtong Nobyembre 1830. Diha niini, gidayeg sa Ginoo si Orson Pratt sa iyang hugot nga pagtuo ug gisugo siya sa pagsangyaw sa ebanghelyo sa pagpangandam alang sa Ikaduhang Pag-anhi ni Jesukristo.

Ting-init 1830Gibasa ni Parley Pratt ang Basahon ni Mormon ug gibunyagan.

Septyembre 1830Mibalhin si Thomas B. Marsh ug ang iyang pamilya gikan sa duol sa Boston , Massachutes, ngadto sa Palmyra, New York, ug siya gibunyagan.

Septyembre 19, 1830Gibunyagan si Orson Pratt sa iyang magulang nga lalaki nga si Parley.

Septyembre 26–28, 1830Ang ikaduhang komperensya sa Simbahan gihimo didto sa Fayette, New York.

Hinapos sa Septyembre 1830Ang Doktrina ug mga Pakigsaad 30–31 nangadawat.

Oktubre 1830Ang Doktrina ug mga Pakigsaad 32–33 nangadawat.

Oktubre 1830Mibiya si Oliver Cowdery ug ang iyang mga kauban sa usa ka misyon ngadto sa mga Lamanite.

Nobyembre 4, 1830Ang Doktrina ug mga Pakigsaa 34 nadawat.

Mga Sugyot alang sa Pagtudlo

Doktrina ug mga Pakigsaad 30

Nagtudlo ang Ginoo ni David, Peter Jr. ug John Whitmer kalabut sa ilang misyonaryo nga pag-alagad

Dapita ang mga estudyante sa paghunahuna og isyu diin ang usa ka opinyon sa publiko supak sa mga pagtulun-an sa Ginoo ug sa Iyang mga propeta. Hangyoa ang mga estudyante sa pagpamalandong kon sila, o usa ka tawo nga ilang nailhan, nanlimbasug nga mahibalo o magbuhat kon unsa ang matarung kabahin niini nga isyu.

Samtang ang mga estudyante nagtuon sa Doktrina ug mga Pakigsaad 30 karon, awhaga sila sa pagpangita alang sa mga baruganan nga makagiya kanila niini nga mga sitwasyon.

Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 30. Hangyoa ang klase sa pagsunod, nga mangita kinsa ang gitumong sa Ginoo niini nga pagpadayag ug kanus-a kini gihatag.

Ipasabut nga bisan tuod si David Whitmer usa sa Tulo ka mga Saksi ug nagmatinud-anon sa daghang mga paagi, gilingla siya sa iyang bayaw nga si Hiram Page kinsa nagpatuo og mga pagpadayag pinaagi sa usa ka bato ug sa makadiyot nahimong usa sa nag-unang mga dumadapig ni Hiram. Ang butang kabahin sa dili tinuod nga mga pagpadayag ni Hiram Page gitubag sa Ginoo (tan-awa sa D&P 28) ug gihisgutan atol sa komperensya nga bag-o pa lamang nahuman. Si Hiram Page ug ang iyang mga dumadapig, lakip ni David Whitmer, mapainubsanong midawat sa ilang mga kasaypanan ug gisalikway ang bato ug ang bakak nga mga pagpadayag.

Dapita ang usa ka estudyante sa pagbasa og kusog sa Doktrina ug mga Pakigsaad 30:1–4. Hangyoa ang klase sa pagsunod, nga mangita kon unsay gisulti sa Ginoo ngadto ni David Whitmer human sa komperensya.

Sumala sa mga bersikulo 1–2, nganong gipanton sa Ginoo si David Whitmer?

Dapita ang mga estudyante sa pagbasa pag-usab sa hilum sa bersikulo 3 nga mangita sa mga sangputanan nga nasinati ni David tungod sa iyang mga kasaypanan.

Unsa kaha ang kahulugan nga si David “magpabiling mangutana alang sa [iyang] kaugalingon”?
Unsaon nimo sa pag-summarize ang pagpanton sa Ginoo ni David Whitmer diha sa mga bersikulo 1–3 isip usa ka pahayag nga baruganan? (Kinahanglan nga ang mga estudyante moila og usa ka baruganan nga susama sa mosunod: Kon atong hatagan og bili ang mga opinyon sa uban ug ang mga butang sa kalibutan labaw sa paggiya sa Espiritu ug sa mga sulugoon sa Ginoo, magpabilin kita nga mangutana alang sa atong mga kaugalingon. Gamit ang kaugalingong mga pulong sa mga estudyante, isulat diha sa pisara kini nga baruganan.)
Unsa ang pipila ka mga ehemplo sa mga paagi nga mahimo kitang mosalig niadtong kinsa wala pilia sa Dios kay sa mopatalinghug sa mga sulugoon sa Ginoo ug sa paggiya sa Espiritu? (Ang mga ehemplo mahimong maglakip sa pagsalig sa popular nga opinyon, dili kasaligan nga impormasyon diha sa internet, sa mga hunahuna sa pamilya ug mga higala, o sa atong kaugalingon nahibaloan o kaalam.)
Sa unsa nga paagi kini nag-abli ngadto sa paglingla, ingon nga nahimo ngadto ni David Whitmer?

Dapita ang usa ka estudyante sa pagbasa og kusog sa Doktrina ug mga Pakigsaad 30:5–8. Hangyoa ang klase sa pagsunod, nga mangita sa unsay gitambag sa Ginoo nga buhaton sa igsoong lalaki ni David nga si Peter Whitmer Jr. Dapita ang pipila ka mga estudyante sa pagreport unsay ilang nakit-an.

Sumala sa bersikulo 8, unsay gisaad sa Ginoo ni Peter Whitmer Jr. kon siya dili mahadlok, mopatalinghug sa tambag ni Oliver Cowdery, ug makugihon nga mosunod sa mga sugo?
Base niini nga mga bersikulo, unsa ang ipanalangin kanato sa Ginoo kon kita mopatalinghug sa Iyang mga pulong nga gihatag pinaagi sa Iyang mga sulugoon ug makugihon nga mosunod sa mga sugo? (Tabangi ang mga estudyante sa pag-ila sa mosunod nga baruganan: Samtang kita mopatalinghug sa mga pulong sa Ginoo nga gihatag pinaagi sa Iyang mga sulugoon ug makugihon nga mosunod sa Iyang mga sugo, mapanalanginan kita og kinabuhing dayon.)
Sa unsa nga paagi kini nga baruganan kalabut ngadto sa kamatuoran nga atong nailhan diha sa mga bersikulo 1–3?
Sa unsa nga mga paagi kaha nga ang pagpatalinghug sa mga pulong sa Ginoo nga gihatag pinaagi sa Iyang mga sulugoon motabang kanato sa pag-angkon og kinabuhing dayon?

Dapita ang mga estudyante sa paghunahuna kon unsa ka maayo sila nga nagpatalinghug sa mga pulong sa mga sulugoon sa Ginoo. Dapita sila sa paghukom kon unsa ang ilang mabuhat nga mas maayong makapatalinghug sa ilang mga pulong.

Dapita ang usa ka estudyante sa pagbasa og kusog sa Doktrina ug mga Pakigsaad 30:9–11. Hangyoa ang klase sa pagsunod, nga mangita sa tambag nga gihatag sa Ginoo ni John Whitmer. Dapita ang pipila ka mga estudyante nga moreport sa unsay ilang nakit-an.

Doktrina ug mga Pakigsaad 31–32

Nagtawag ang Ginoo ni Thomas B. Marsh, Parley P. Pratt, ug Ziba Peterson sa pagsangyaw sa ebanghelyo

Dapita ang mga estudyante sa paghunahuna og panahon nga sila o ubang tawo nga ilang kaila, naghimo og mga sakripisyo sa pag-alagad sa Ginoo, mahimong isip usa ka misyonaryo o diha sa lain nga calling sa Simbahan. Hangyoa ang mga estudyante sa pagpamalandong sa mga paagi nga kini nga pag-alagad nagpanalangin sa ilang pamilya. Samtang ang mga estudyante nagtuon sa Doktrina ug mga Pakigsaad 31, dapita sila sa pagpangita og baruganan nga motabang kanila sa pagsabut kon sa unsa nga paagi ang atong mga miyembro sa pamilya mapanalanginan samtang kita nag-alagad sa Ginoo.

Ipasabut nga ang pagpadayag nga girekord diha sa Doktrina ug mga Pakigsaa 31 gihatag ngadto sa usa ka bag-ong kinabig nga ginganlan og Thomas B. Marsh human sa komperensya sa Simbahan niadtong Septyembre 1830. Nakat-unan ni Thomas B. Marsh ang mahitungod sa Pagpahiuli sa ebanghelyo ug ang Basahon ni Mormon niadtong 1829 sa dihang siya mibiyahe agi sa Palmyra, New York. Human ma-organisar ang Simbahan, gibalhin niya ang iyang asawa ug gagmay nga mga anak gikan sa duol sa Boston, Massachusetts, ngadto sa Palmyra, diin gibunyagan siya ug gi-orden ni Oliver Cowdery nga elder sa Septyembre 1830.

Dapita ang usa ka estudyante sa pagbasa og kusog sa Doktrina ug mga Pakigsaad 31:1–6 ug hangyoa ang klase sa pagsunod, nga mangita alang sa unsay gisulti sa Ginoo niining bag-ong gibunyagan nga miyembro.

Unsa ang gitawag sa Ginoo kang Thomas B. Marsh nga buhaton?
Ngano kaha nga ang pagbaton og gagmay nga mga bata sa panimalay malisud alang sa usa ka tawo sama ni Thomas sa pagsunod sa tawag sa Ginoo sa pag-alagad og usa ka misyon?
Sumala sa bersikulo 2, unsa nga panalangin ang gisaad sa Ginoo ni Thomas kalabut sa iyang pamilya?
Base sa unsay gisaad sa Ginoo ni Thomas B. Marsh, unsa ang atong paabuton sa Ginoo nga buhaton sa atong mga pamilya samtang kita matinud-anong nag-alagad Kaniya? (Mahimong moila ang mga estudyante og daghang mga baruganan, apan siguroha nga ilang mailhan nga samtang kita matinud-anong nag-alagad sa Ginoo, ang atong mga miyembro sa pamilya mapanalanginan.)

Pahinumdumi ang mga estudyante nga ang Ginoo mahimong mopanalangin sa mga pamilya sa Iyang mga sulugoon sa lain-laing mga paagi. Sa pipila ka mga sitwaswon, ang pag-alagad ug ehemplo sa matinud-anong Santos sa Ulahing mga Adlaw makatabang sa mga miyembro sa pamilya sa pagdawat sa mga panalangin sa ebanghelyo, sama nga gisaad nga mahitabo alang sa pamilya ni Thomas B. Marsh. Hinoon, tungod kay ang Ginoo nagtahud sa kabubut-on sa Iyang mga anak, dili Siya mopugos ni bisan kinsa sa pagtuo sa Iyang ebanghelyo. Bisan pa, panalanginan Niya ang mga miyembro sa pamilya niadtong kinsa nag-alagad Kaniya uban sa tanang oportunidad sa pag-abli sa ilang mga kasingkasing ngadto sa ebanghelyo.

Sa unsa nga paagi ikaw ug ang imong pamilya napanalanginan tungod kay usa ka miyembro sa imong pamilya matinud-anong nag-alagad sa Ginoo?

I-summarize ang Doktrina ug mga Pakigsaad 31:7–13 pinaagi sa pagpasabut nga niini nga mga bersikulo, misaad ang Ginoo nga magauban ni Brother Marsh samtang siya nagsangyaw sa ebanghelyo. Mitambag usab ang Ginoo kaniya nga magmainantuson sa mga kalisdanan, sa pag-adto diin ang Tighupay nagsugo kaniya, ug sa pag-ampo sa kanunay.

Pahibaloa ang mga estudyante nga usa ka bulan human madawat kini nga pagpadayag, nadawat ni Joseph Smith ang pagpadayag nga anaa sa Doktrina ug mga Pakigsaad 32. Niini nga pagpadayag, gitawag sa Ginoo si Parley P. Pratt ug Ziba Peterson sa pagkuyog ni Olivery Cowdery ug Peter Whitmer Jr. sa usa ka misyon ngadto sa mga Lamanite sa kasadpang Missouri. Misaad usab ang Ginoo nga magauban niini nga mga tawo diha sa ilang misyonaryong mga paningkamot.

Doktrina ug mga Pakigsaad 33–34

Ang Ginoo mitawag kang Ezra Thayre, Northrop Sweet, ug Orson Pratt sa pagsangyaw sa ebanghelyo

Ipasabut nga niadtong Oktubre 1830, nadawat usab ni Joseph Smith ang pagpadayag nga anaa sa Doktrina ug mga Pakigsaad 33, diin ang Ginoo mitawag ni Ezra Thayre ug Northrop Sweet sa pagpahayag sa ebanghelyo. Niini nga pagpadayag, gitudlo sa Ginoo niini nga mga tawo kon nganong gitawag sila sa pagsangyaw sa ebanghelyo ug sa unsa nga paagi ilang buhaton kini.

Tungaa ang klase. Dapita ang katunga sa klase sa pagbasa og hilum sa Doktrina ug Pakigsaad 33:1–6 nga mangita sa mga katarungan kon ngano ang Ginoo gusto ni Ezra Thayre ug Northrop Sweet sa pagpakigbahin sa ebanghelyo. Dapita ang laing katunga sa pagbasa og hilum sa Doktrina ug mga Pakigsaad 33:7–12 nga mangita sa unsa nga paagi isangyaw ni Ezra ug Northrop ang ebanghelyo.

Nganong si Ezra ug Northrop gisugo sa pagsangyaw sa ebanghelyo?
Unsa nga mga panudlo ang gihatag sa Ginoo niini nga mga tawo mahitungod kon sa unsa nga paagi isangyaw ang ebanghelyo?

Dapita ang mga estudyante sa pag-summarize sa gibalik-balik nga tambag ug saad sa Ginoo ngadto ni Ezra ug Northrop nga narekord diha sa Doktrina ug mga Pakigsaad 33:8–10 isip usa ka pahayag nga baruganan. (Kinahanglan usab ang mga estudyante moila og usa ka baruganan nga susama sa mosunod: Samtang kita nag-abli sa atong mga ba-ba sa pagpakigbahin sa ebanghelyo, madasig kita sa Espiritu Santo nga mahibalo kon unsa ang atong isulti.)

Nganong importante alang kanato sa pagtuo niini nga saad samtang naninguha kita sa pagpakigbahin sa ebanghelyo ngadto sa uban?

Hangyoa ang mga estudyante sa paghunahuna og panahon sa dihang ang Ginoo midasig kanila nga makahibalo unsay isulti samtang sila moukab sa ilang mga ba-ba sa pagpakigbahin sa ebanghelyo. Dapita ang pipila ka mga estudyante sa pagpakigbahin sa ilang mga kasinatian.

Sa unsa nga paagi ang imong kinabuhi napanalanginan tungod kay usa ka tawo adunay kaisug sa pag-ukab sa iyang ba-ba ug nakigbahin sa mga kamatuoran sa gipahiuli nga ebanghelyo uban kanimo?

I-summarize ang Doktrina ug mga Pakigsaad 33:12–18 pinaagi sa pagpasabut nga gisultihan sa Ginoo si Ezra Thayre ug Northrop Sweet nga sila kinahanglan mahinumdom sa paghupot sa ilang mga pakigsaad ug nga ang mga kasulatan gihatag diha kanila aron sa pagtudlo kanila. Mitambag usab ang Ginoo kanila nga magmatinud-anon ug sa pagpangandam alang sa Ikaduhang Pag-anhi ni Jesukristo.

Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 34 ug hangyoa ang klase sa pagsunod, nga mangita alang sa kinsa ang napanalanginan kon moukab ang lain nga tawo sa iyang ba-ba aron sa pagpakigbahin sa ebanghelyo.

Ipasabut nga tungod sa kakabus sa mga kahimtang sa pamilya ni Orson Pratt, ang iyang mga ginikanan, mipadala kaniya sa edad nga 11 sa pagtrabaho sa laing uma sa mga mag-uuma agi og baylo sa pagpuyo nga walay bayad. Dul-an sa siyam ka tuig, mitrabaho si Orson isip usa ka sinuhulang katabang sa daghang nagkalain-lain nga mga mag-uuma. Sa tinglarag sa 1829, misugod og mainitong pag-ampo si Orson alang sa espiritwal nga direksyon. Kon ang uban nangatulog, moadto siya sa umahan o sa kakahoyan ug mag-ampo sulod sa daghang oras aron mahibalo sa kabubut-on sa Ginoo alang kaniya. Mipadayon siya sa iyang pag-ampo hangtud sa Septyembre 1830, sa dihang ang iyang bag-ong kinabig nga igsoong Parley mibiyahe sa silangan aron sa pagpakigbahin sa iyang bag-o nga tinuohan uban sa iyang pamilya. Diha dayon si Orson mituo sa mensahe sa Pagpahiuli ug gibunyagan. Sulod sa pipila ka semana, mibiyahe siya og 320 ka kilometro ngadto sa Fayette, New York, naningkamot nga mahibalo sa kabubut-on sa Ginoo pinaagi ni Propeta Joseph Smith.

Dapita ang mga estudyante sa pagbasa og hilum sa Doktrina ug mga Pakigsaad 34:1–4 nga mangita alang sa unsay gitawag sa Ginoo ni Orson Pratt.

Ngano kaha gitawag sa Ginoo si Orson Pratt sa ingon kalumo nga paagi?

I-summarize ang Doktrina ug mga Pakigsaad 34:5–11 pinaagi sa pagpasabut nga gitawag sa Ginoo si Orson Pratt sa pagsangyaw sa ebanghelyo aron motabang sa pag-andam sa agianan alang sa Ikaduhang Pag-anhi ni Jesukristo.

Taposa ang leksyon pinaagi sa pagpamatuod sa mga kamatuoran nga gitudlo niini nga leksyon.