Leksyon 41: Doktrina ug mga Pakigsaad 103, 105

“Leksyon 41: Doktrina ug mga Pakigsaad 103, 105,” Manwal sa Magtutudlo sa Doktrina ug mga Pakigsaad (2017)

“Leksyon 41,” Manwal sa Magtutudlo sa Doktrina ug mga Pakigsaad

Leksyon 41

Doktrina ug mga Pakigsaad 103, 105

Pasiuna ug Timeline

Sa Pebrero 24, 1834, si Parley P. Pratt ug Lyman Wight nakigkita ni Propeta Joseph Smith ug sa halangdong konseho sa Kirtland aron sa pagpasabut sa kahimtang sa mga Santos sa Missouri ug sa pagpangayo og tambag ug panabang. Diha sa samang adlaw, nadawat sa Propeta ang pagpadayag nga gi-rekord diha sa Doktrina ug mga Pakigsaad 103, diha diin ang Ginoo misaad nga ang mga Santos “[ipahiuli] ngadto sa yuta sa Zion” kon sila dili “mohugaw-hugaw sa ilang mga kabilin” (D&P 103:13–14) ug migiya sa mga pangulo sa Simbahan sa pagtigum og mga kapanguhaan ug mga sakop aron sa pagtabang sa mga Santos sa Missouri.

Agi og pagsunod sa sugo sa Ginoo, si Propeta Joseph Smith ug sobra sa mga 200 ka mga boluntaryo mitukod sa Kampo sa Israel (sa kadugayan nailhan og Kampo sa Zion) aron motabang sa mga Santos kinsa gipugos sa pagpalayas gikan sa ilang mga panimalay sa Distrito sa Jackson, Missouri. Sa Hunyo 22, 1834, samtang nagkampo sa 6.44 ka kilometro amihanan sa Suba sa Fishing sa Missouri ug mga 38.62 ka kilometro gikan sa Independence, gidiktar ni Joseph ang pagpadayag nga gi-rekord diha sa Doktrina ug mga Pakigsaad 105, diha diin ang Ginoo mipasabut nga ang mga Santos kinahanglan gayud nga “mohulat sa mubo nga panahon alang sa katubsanan sa Zion” (D&P 105:9). Ang Ginoo mihatag usab og mga panudlo kabahin sa unsay kinahanglan nga mahitabo aron matubos ang Zion, o mabawi pag-usab sa mga Santos, sa umaabut nga panahon.

Nobyembre—Disyembre 1833Ang mga Santos gipugos sa pagpabiya sa Distrito sa Jackson, Missouri.

Pebrero 24, 1834Ang Doktrina ug mga Pakigsaad 103 nadawat.

Marso–Mayo 1834Ang mga pangulo sa Simbahan nanawag og mga lalaki ug nagtigum og salapi agi og pangandam alang sa lakaw ngadto sa Missouri.

Mayo 1834Ang mga miyembro sa Kampo sa Zion misugod sa ilang lakaw gikan sa Ohio ngadto sa Missouri.

Hunyo 15, 1834Nahibaloan ni Propeta Joseph Smith nga si Gobernador Daniel Dunklin dili mohatag og tagilungsod nga mga sundalo aron sa pagtabang sa mga Santos sa pagbalik ngadto sa ilang mga pinuy-anan sa Distrito sa Jackson, Missouri.

Hunyo 22, 1834Ang Doktrina ug mga Pakigsaad 105 nadawat.

Ulahing bahin sa Hunyo 1834Ang mga miyembro sa Kampo sa Zion nasakit og kolera.

Sayo sa Hulyo 1834Mga miyembro sa Kampo sa Zion gipapahawa.

Mga Sugyot alang sa Pagtudlo

Doktrina ug mga Pakigsaad 103:1–20

Nagsaad ang Ginoo nga ang Zion pagatubson

Isulat ang hugpong sa pulong nga Nabuntog sa kalibutan diha sa pisara.

Unsaon ninyo pagpasabut kon unsa ang kahulugan sa mabuntog sa kalibutan? (Posible nga mga tubag mahimong maglakip sa pagkanasanapan ug nadaut pinaagi sa dili matarung nga mga impluwensya, tintasyon, ug sala.)
Unsa ang pipila ka mga paagi nga ang mga young adult mabuntog sa kalibutan karon?

Dapita ang mga estudyante sa pagpangita og usa ka baruganan samtang nagtuon sila sa Doktrina ug mga Pakigsaad 103 nga motabang kanila nga makahibalo unsaon sa pagdawat og gahum sa pagdaug batok sa dili matarung nga mga impluwensya sa kalibutan.

Ipasabut nga sa dihang ang mga Santos gipugos sa pagbiya sa Distrito sa Jackson, Missouri, sila nanlimbasog sa pagpangita og igo nga kapasilongan ug pagkaon ug naghunahuna kon sila kinahanglan ba nga mopahiluna sa laing dapit kay sa mosulay sa pagbalik ngadto sa ilang mga pinuy-anan sa Distrito sa Jackson. Samtang ang mga pangulo sa Simbahan mihangyo ngadto sa lokal ug estado nga mga opisyal alang sa panabang, ang mga Santos gipatuo nga kon sila motukod sa ilang kaugalingon nga pwersa sa panalipod, ang gobernador sa Missouri, si Daniel Dunklin, motawag sa estado nga mga sundalo sa pag-uban sa mga Santos balik ngadto sa ilang mga yuta sa Distrito sa Jackson. Wala masiguro og unsay buhaton sunod, ang mga Santos sa Missouri mipadala ni Parley P, Pratt ug Lyman Wight ngadto sa Ohio sa pagpangayo og direksyon ni Propeta Joseph Smith. Sila ni Parley ug Lyman miabut sa Kirtland sa ulahi sa Pebrero 1834 ug nakigkita sa Propeta ug ang bag-ong gitukod nga halangdong konseho kaniadtong Pebrero 24 aron sa paghisgot sa mga gikinahanglan sa mga Santos sa Missouri. Nianang sama nga adlaw, nadawat sa Propeta ang pagpadayag nga gi-rekord diha sa Doktrina ug mga Pakigsaad 103.

Dapita ang usa ka estudyante sa pagbasa og kusog sa Doktrina ug mga Pakigsaad 103:1–4. Hangyoa ang klase sa pagsunod, nga mangita sa mga rason nga ang Ginoo mitugot sa mga Santos nga lutoson ug abugon gikan sa Distrito sa Jackson.

Unsa nga mga rason ang gihatag sa Ginoo sa pagtugot sa mga Santos sa Missouri nga lutuson ug abugon gikan sa ilang mga panimalay?

Dapita ang usa ka estudyante sa pagbasa og kusog sa Doktrina ug mga Pakigsaad 103:5–7. Hangyoa ang klase sa pagsunod, nga mangita sa tambag ug mga saad ngadto sa mga Santos.

Unsa nga tambag ug saad ang gihatag sa Ginoo ngadto sa mga Santos?
Unsa nga baruganan ang atong mailhan gikan sa tambag ug saad sa Ginoo niini nga mga bersikulo? (Human matubag sa mga estudyante, isulat ang mosunod nga baruganan diha sa pisara: Kon kita mopatalinghug ngadto sa tambag sa Ginoo, kita makabaton og gahum sa pagdaug batok sa kalibutan.)

Dapita ang usa ka estudyante sa pagbasa og kusog sa Doktrina ug mga Pakigsaad 103:8–10. Hangyoa ang klase sa pagsunod, nga mangita sa pahimatngon sa Ginoo ngadto niadtong kinsa dili mopatalinghug sa Iyang mga pulong.

Sumala sa bersikulo 8, unsa ang mahitabo kon kita dili mosunod sa mga sugo? (Human matubag sa mga estudyante, isulat ang mosunod nga baruganan diha sa pisara: Kon kita dili mosunod sa mga sugo, ang kalibutan modaug batok kanato.)

Bahina og duha o tulo ka grupo ang klase ug dapita ang mga estudyante sa paghisgot diha sa ilang mga grupo ang mga tubag ngadto sa mosunod nga mga pangutana. (Mahimo nimong isulat kini nga mga pangutana diha sa pisara o ihatag kini ngadto sa mga estudyante nga handout.)

Unsa ang pipila ka mga ehemplo sa unsa nga paagi ang pagpatalinghug sa tambag sa Ginoo naghatag kanato og gahum sa pagdaug batok sa kalibutan?
Kanus-a ninyo nabati ang tabang sa Ginoo kaninyo midaug batok sa kalibutan samtang kamo nagpatalinghug sa Iyang tambag?

Ipamatuod nga kon kita makugihong naningkamot sa pagpatalinghug sa tambag sa Ginoo ug sa kinasingkasing naghinulsol kon kita nakahimo og sayop, Siya motabang kanato sa pagdaug batok sa dautan nga mga impluwensya niini nga kalibutan. Dapita ang mga estudyante sa pagpamalandong unsa ang ilang buhaton aron mas hingpit nga nagpatalinghug sa tambag sa Ginoo.

Ipasabut nga diha sa Doktrina ug mga Pakigsaad 103:11–20 mipadayag ang Ginoo nga “human sa dako nga kalisdanan,” siya mopahiuli sa Iyang mga katawhan ngadto sa yuta sa Zion “sa tukma nga panahon” (mga bersikulo 12, 20).

Doktrina ug mga Pakigsaad 103:21–40

Ang Ginoo mipadayag kon sa unsa nga paagi matubos ang Zion

Dapita ang daghang mga estudyante sa pagpuli-puli sa pagbasa og kusog gikan sa Doktrina ug mga Pakigsaad 103:21–25. Hangyoa ang klase sa pagsunod, nga mangita kon unsa ang gisugo sa Ginoo ni Propeta Joseph Smith nga buhaton aron sa pagtabang og tubos sa Zion. Hangyoa ang mga estudyante sa pagreport sa unsay ilang nakit-an.

Ipasabut nga diha sa Doktrina ug mga Pakigsaad 103:26–40, ang Ginoo mitawag sa walo ka mga pangulo sa Simbahan sa pagpanawag og mga lalaki ug magtigum og salapi ug mga sangkap aron sa pagtabang sa pagtubos, o pag-angkon og balik, sa yuta sa Zion. Misulti ang Ginoo kanila sa pagpangita og lima ka gatus ka mga lalaki kon mahimo apan dili mominos sa usa ka gatus. Kini nga panaw mailhan nga Kampo sa Zion.

Dapita ang usa ka estudyante sa pagbasa og kusog sa mosunod nga parapo [paragraph]:

Sa katapusan sa miting sa halangdong konseho diin ang mga pangulo sa Simbahan mihisgot sa sitwasyon sa mga Santos sa Missouri, miingon si Joseph Smith nga mobiyahe siya ngadto sa Zion ug motabang sa pagtubos niini. Mga 30 o 40 ka mga lalaki nga nanambong miboluntaryo usab. Sulod sa sunod pipila ka mga bulan, ang walo ka mga pangulo sa Simbahan kinsa gitawag makugihong mitrabaho aron sa pag-andam alang sa panaw. Sa katapusan labaw sa 200 ka mga sakop mikuyog sa Kampo sa Zion alang sa panaw ngadto sa Missouri.

Doktrina ug mga Pakigsaad 105:1–19

Ang katubsanan sa Zion gilangan “sulod sa usa ka mubo nga panahon”

Pagpakita og usa ka mapa sa Kirtland, Ohio, ug Distrito sa Jackson, Missouri (sama sa mapa nu. 9, “Agianan sa Kampo sa Zion, 1834,” niini nga manwal).

Ipasabut nga daghang mga miyembro sa Kampo sa Zion nga naghinamhinam sa pag-apil sa lakaw ug gitan-aw sa positibo nga paagi ang kasinatian. Bisan pa niana, nakasugat usab sila og mga kalisud. Ang grupo mibiyahe og labaw sa 1448 ka kilometro nga batoong yuta. Kadaghanan naglakaw ug milakaw og 32 ug 64 ka kilometro kada-adlaw. Nag-antus sila sa kainit, kaalimuot, ulan, lapok, guba nga kasangkapan, kakulang sa mga pagkaon ug tubig, sakit ug dugoon nga mga tiil. Usahay, ang pipila napugos sa ilang kauhaw sa pag-inom og tubig sa kalapukan o tubig gikan sa marka sa tunob sa kabayo human sa unos sa ulan. Ang pipila ka mga miyembro sa kampo mibagulbol mahitungod sa mga kahimtang sa lakaw.

Kon kamo kabahin sa Kampo sa Zion, sa unsa nga paagi kaha kini nga kasinatian misulay kaninyo?

Pahibaloa ang mga estudyante nga human ang Kampo sa Zion miabut sa Missouri, ilang nahibaloan nga si Gobernador Daniel Dunklin dili mopadala sa mga sundalo sa estado aron sa pagtabang sa mga Santos sa pagbalik ngadto sa ilang mga yuta. Bisan pa niining makaluya nga balita, ang Kampo sa Zion mipadayon ngadto sa Distrito sa Clay. Sa Hunyo 22, 1834, samtang sila nagkampo tali sa silangan ug kasadpan nga mga simangan sa Suba sa Fishing, nga amihanan lang sa Distrito sa Jackson, Missouri, ang Ginoo mihatag sa pagpadayag nga gi-rekord diha sa Doktrina ug mga Pakigsaad 105.

Dapita ang pipila ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 105:1–6. Hangyoa ang klase sa pagsunod, nga mangita sa unsay nagpugong sa mga Santos sa pagtubos sa Zion.

Unsa ang nagpugong sa mga Santos sa pagtubos sa Zion?
Sumala sa bersikulo 5, unsa ang mao lamang nga paagi nga ang Zion matukod?

Ipasabut nga ang tambag sa Ginoo niini nga mga bersikulo dili lamang gipatumong ngadto sa mga Santos sa Missouri. Sa Doktrina ug mga Pakigsaad 105:8–9, ang Ginoo mipanton sa ubang mga miyembro sa Simbahan tungod kay sila midumili sa pag-uban sa Kampo sa Zion o sa pagpadala og salapi aron sa pagsuporta sa nag-antus nga mga Santos sa Missouri.

Dapita ang pipila ka mga estudyante sa pagpuli-puli sa pagbasa og kusog sa Doktrina ug mga Pakigsaad 105:9, 16–17. Hangyoa ang klase sa pagsunod, nga mangita sa mga sangputanan sa mga kalapasan sa mga Santos.

Unsa ang pipila sa mga sangputanan sa mga kalapasan sa mga Santos?
Kon kamo nahimo nga miyembro sa Kampo sa Zion, unsa nga mga hunahuna o mga pagbati kaha kamo aduna human sa 1448 ka kilometro nga lakaw ug unya nahibaloan nga ang Ginoo dili buot kaninyo nga makig-away aron sa pag-angkon og balik sa Zion?

Ipasabut nga pipila sa mga miyembro sa Kampo sa Zion mibiya sa kamatuoran tungod kay gibati nila nga ang Kampo sa Zion napakyas sa dihang ang mga Santos sa Missouri wala ipabalik ngadto sa ilang mga panimalay ug mga yuta. Hinoon, daghan ang nagpabilin nga matinud-anon.

Dapita ang pipila ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 105:10–14. Hangyoa ang klase sa pagsunod, nga mangita sa mga katuyoan sa Ginoo sa paglangan sa katubsanan sa Zion.

Unsa ang mga katuyoan sa Ginoo sa paglangan sa katubsanan sa Zion? (Pahinumdumi ang mga estudyante nga ang pagtuga diha sa bersikulo 12 nagpasabut ngadto sa pagtuga og gahum nga gisaad sa Ginoo nga ihatag diha sa Templo sa Kirtland [tan-awa sa D&P 95:8].)

Dapita ang usa ka estudyante sa pagbasa og kusog sa Doktrina ug mga Pakigsaad 105:18–19. Hangyoa ang klase sa pagsunod, nga mangita sa mga panalangin nga gisaad sa Ginoo niadtong kinsa “mopatalinghug sa [Iyang] mga pulong” (bersikulo 18).

Unsa ang gisaad sa Ginoo ngadto niadtong kinsa mopatalinghug sa Iyang mga pulong?
Unsa nga baruganan ang atong mailhan gikan niini nga mga bersikulo? (Human matubag sa mga estudyante, isulat ang mosunod nga baruganan diha sa pisara: Ang Dios mopanalangin og dako niadtong kinsa nagpadayon sa pagpatalinghug sa Iyang pulong kon ang ilang hugot nga pagtuo gisulayan.)

Ipasabut nga kadtong kinsa matinud-anon sa panahon ug human sa lakaw sa Kampo sa Zion natudloan sa personal ni Propeta Joseph Smith ug giandam alang sa umaabut nga pagkapangulo diha sa Simbahan.

Dapita ang usa ka estudyante sa pagbasa og kusog sa mosunod nga pamahayag ni Presidente Wilford Woodruff (1807–1898):

“Didto ako sa Kampo sa Zion uban sa Propeta sa Dios. Nakita nako ang pagdumala sa Dios diha kaniya. Nakita nako ang gahum sa Dios diha kaniya. Nakita nako nga siya usa ka Propeta. …

“Sa dihang ang mga miyembro sa Kampo sa Zion gitawag, daghan kanamo wala pa gayud sukad magkakita; dili gyud kami kaila ug daghan ang wala makakita sa propeta. … Daghan mi og nahimo, bisan kon ang mibiya sa kamatuoran ug ang wala motuo nangutana sa daghang higayon, ‘Unsa may inyong nahimo?’ Nakabaton mi og kasinatian nga dili gayud unta maangkon sa bisan unsang paagi. Nakabaton mi og kahigayunan sa pagtan-aw sa nawong sa propeta ug nakahigayon mi pagbiyahe og liboan ka milya uban kaniya, ug nakakita sa mga gibuhat sa Espiritu sa Dios diha kaniya, ug ang mga pagpadayag ni Jesukristo kaniya ug ang katumanan niadto nga mga pagpadayag.

“Ang kasinatian nga [among] naangkon sa pagbiyahe sa Kampo sa Zion mas dako og bili kay sa bulawan” (Mga Pagtulun-an sa mga Presidente sa Simbahan: Wilford Woodruff [2011], 152, .)

Tan-awa ang baruganan nga gisulat diha sa pisara: “Ang Dios mopanalangin og dako niadtong kinsa nagpadayon sa pagpatalinghug sa Iyang pulong kon ang ilang hugot nga pagtuo gisulayan.”

Unsaon kaha ninyo sa pagpakiglabut niini nga baruganan ngadto sa mga young adult ug ang mga pagsulay sa hugot nga pagtuo nga ilang nasinati karon?
Kanus-a kamo o ang usa ka tawo nga inyong kaila mipadayon sa pagpatalinghug sa mga pulong sa Ginoo bisan atol sa pagsulay sa hugot nga pagtuo?

Awhaga ang mga estudyante sa paghukom karon sa pagpadayon og pagpatalinghug sa mga pulong sa Ginoo bisan kon ang ilang hugot nga pagtuo gisulayan.

Doktrina ug mga Pakigsaad 105:20–41

Ang Ginoo nagtudlo sa mga Santos unsay kinahanglan gayud nilang buhaton sa dili pa matubos ang Zion

Ipasabut nga diha sa Doktrina ug mga Pakigsaad 105:20–41, ang Ginoo misaad sa mga Santos nga kon sila mosunod sa Iyang pulong sila makabaton og “gahum human sa daghan nga mga adlaw” sa pagtubos sa Zion (bersikulo 37).

Tapusa pinaagi sa pagpamatuod bahin sa mga kamatuoran nga giila niini nga leksyon, ug dapita ang mga estudyante sa paggamit niini nga mga kamatuoran.