“Ang Doktrina ug mga Pakigsaad mao ang usa ka tinipon nga balaan nga mga pagpadayag ug dinasig nga mga pahayag nga gihatag aron sa pagpahimutang ug pagdumala sa gingharian sa Dios dinhi sa yuta sa ulahing mga adlaw” (pasiuna sa Doktrina ug mga Pakigsaad, paragraph 1). Kini nga mga pagpadayag nadawat pinaagi ni Propeta Joseph Smith ug sa pipila sa iyang mga sumusunod ug “naglakip og pagdapit sa tanan nga mga katawhan sa tanan nga dapit sa pagpaminaw sa tingog [ni] Ginoong Jesukristo, namulong ngadto kanila alang sa ilang temporal nga kaayohan ug sa ilang walay katapusan nga kaluwasan” (pasiuna sa Doktrina ug mga Pakigsaad, paragraph 1).
Ang pinakaunang dunay petsa nga seksyon sa Doktrina ug mga Pakigsaad naglangkob sa mga pulong nga gipamulong ngadto ni Joseph Smith sa anghel nga si Moroni niadtong 1823, dihang ang pamilyang Smith nagpuyo duol sa Palmyra, New York. Atol niana nga pagbisita, gipaambit ni Moroni ang pipila ka importanting mga panagna gikan sa Daan ug sa Bag-ong mga Tugon, lakip ang usa nga gikan ni Malaquias mahitungod sa gisaad nga misyon ni propeta Elijah sa katapusang mga adlaw. Kana nga panagna, nga narekord sa Doktrina ug mga Pakigsaad 2, mahinungdanon para sa atong panabut sa plano sa Langitnong Amahan sa pagtubos sa Iyang mga anak.
Ulahi nga bahin sa tuig 1816Ang pamilyang Smith mibalhin gikan sa Vermont ngadto sa Palmyra, New York.
Tingpamulak niadtong 1820Ang Dios nga Amahan ug si Jesukristo mipakita ni Joseph Smith.
Septyembre 21–22, 1823Gibisita ni anghel Moroni si Joseph Smith (Doktrina ug mga Pakigsaad 2).
Nobyembre 19, 1823Namatay ang magulang ni Joseph Smith nga si Alvin.
Enero 18, 1827Naminyo si Joseph Smith ug Emma Hale.
Ang Doktrina ug mga Pakigsaad naglangkob sa mga pagpadayag nga gihatag kang Joseph Smith ug sa nagsunod nga mga propeta
Sa dili pa magklase, ilista sa pisara ang lisud nga mga sitwasyon, mga kahimtang o mga pagdesisyon nga giatubang sa mga young adult. (Ikonsiderar nga ilakip ang pipila sa mosunod: kinsa ang minyoan, mga oportunidad sa edukasyon, pagpili og trabaho, pagpamugos sa mga kaubanan, ug tintasyon.)
Agig dugang sa unsay naa sa pisara, unsa pa ang ubang lisud nga mga sitwasyon, mga kahimtang, o mga desisyon ang giatubang sa mga young adult?
Ipahunahuna sa mga estudyante ang mga hagit nga ilang giatubang o gipaabut nga atubangon. Dapita sila sa pagpangita sa mga kamatuoran samtang tun-an nila ang pasiuna sa Doktrina ug mga Pakigsaad sa leksyon karon aron matabangan sila nga masayud unsaon sa pagkadawat og balaang giya ug kahupayan nga makatabang nila niini nga mga kahimtang.
Ipasabut nga ang Doktrina ug mga Pakigsaad naglangkob sa pasiuna diin daklit nga gisaysay ang mga hitabo sa Pagpahiuli, nga naghulagway sa unsang paagi nahimo ang Doktrina ug mga Pakigsaad, ug nagpasabut sa unsang paagi kini nga sagradong volume sa kasulatan makapanalangin sa kinabuhi sa tanang anak sa Langitnong Amahan.
Dapita ang pipila ka mga estudyante nga magpuli-puli sa pagbasa og kusog sa mga paragraph 1–3 sa pasiuna sa Doktrina ug mga Pakigsaad. Hangyoa ang klase sa pagsunod ug ipapangita ang mga pulong nga nagpasabut kon unsa ang Doktrina ug mga Pakigsaad ug kon nganong tun-an nato kini.
Unsa nga mga pulong o hugpong sa mga pulong ang naghatag og kahulugan kon unsa ang Doktrina ug mga Pakigsaad?
Unsa ang nakita ninyong mga rason sa pagtuon sa Doktrina ug mga Pakigsaad nga importante kaninyo?
Sa pisara, ilista ang mga rason nganong tun-an ang Doktrina ug mga Pakigsaad nga nakit-an sa mga estudyante. Samtang mopaambit ang mga estudyante sa ilang mga panabut, siguroa nga ilang mahibaloan ang mosunod nga baruganan nga anaa sa mga paragraph 1 ug 3: Kon atong tun-an ang Doktrina ug mga Pakigsaad, madungog nato ang tingog sa Manluluwas nga namulong kanato sa atong panahon.
Aron matabangan ang mga estudyante nga mas makasabut niini nga baruganan, dapita sila sa pagbasa og hilum sa Doktrina ug mga Pakigsaad 18:34–36, nga mangita kon unsay gisulti sa Ginoo mahitungod sa mga pulong niini nga pagpadayag.
Unsa ang nakita ninyong mahinungdanon mahitungod sa pagpasabut sa Manluluwas bahin sa mga pulong niini nga pagpadayag?
Unsa ang inyong mga kasinatian sa pagkadungog ug pagkaila sa tingog sa Ginoo pinaagi sa inyong pagtuon sa mga kasulatan?
Awhaga ang mga estudyante nga tinguhaon ang pagpaminaw sa tingog sa Ginoo nga namulong kanila pinaagi sa paghimo og tumong sa pagbasa sa Doktrina ug mga Pakigsaad matag adlaw.
Dapita ang usa ka estudyante sa pagbasa og kusog sa paragraph 6 sa pasiuna, ug ipapangita sa klase ang mga sitwasyon nga sa kasagaran mopatultol ngadto sa mga pagpadayag nga narekord sa Doktrina ug mga Pakigsaad.
Unsa nga mga pulong niini nga paragraph ang naghulagway sa mga sitwasyon diin kining mga pagpadayag nadawat?
Basi sa unsay gihimo ni Joseph Smith ug sa uban aron madawat kini nga mga pagpadayag, unsa nga baruganan ang atong makat-unan mahitungod sa pagkadawat og giya gikan sa Ginoo? (Human makatubag ang mga estudyante, isulat sa pisara ang mosunod nga baruganan: Kon magtinguha kita og tabang ug mag-ampo panahon sa panginahanglan, ihatag kanato sa Ginoo ang giya nga atong gikinahanglan.)
Sa unsang paagi kaha ang pagtuon sa mga pagpadayag diha sa Doktrina ug mga Pakigsaad makapalambo sa atong pagtuo nga ang Ginoo mohatag kanato og giya?
Dapita ang pipila ka estudyante nga ipaambit ang ilang pagpamatuod bahin niini nga baruganan.
Usa ka anghel mipakita kang Joseph Smith agig tubag sa iyang pag-ampo
Ipasabut nga ang pinakaunang seksyon sa Doktrina ug mga Pakigsaad miabut isip resulta sa pag-ampo ug pagpangayo og tabang ni Propeta Joseph Smith sa Ginoo panahon sa panginahanglan. I-summarize sa daklit ang Joseph Smith—Kasaysayan 1:29–39 pinaagi sa pagpasabut nga tulo ka tuig human sa Unang Panan-awon, nag-ampo si Joseph Smith aron masayud unsa na ang iyang reputasyon sa atubangan sa Ginoo. Agig tubag, gibisitahan siya sa langitnong mensahero nga si Moroni. Ang anghel misulti sa batan-on nga si Joseph nga ang Dios dunay ipabuhat kaniya, nga lakip ang paghubad sa karaang rekord nga nasulat sa bulawan nga mga palid. Gikutlo dayon ni Moroni ang daghang mga tudling gikan sa Biblia, lakip ang dinasig nga pagpahiuyon sa panagna nga makita sa Malaquias 4:5–6 nga naghisgot bahin sa misyon ni propeta Elijah. Kini nga panagna, sigun sa gihatag sa anghel nga si Moroni ngadto ni Joseph, narekord sa Doktrina ug mga Pakigsaad 2.
Ipabasa og kusog sa usa ka estudyante ang Doktrina ug mga Pakigsaad 2:1. Hangyoa ang klase sa pagsunod, nga mangita sa unsay gisulti sa Ginoo nga Iyang buhaton sa wala pa ang Ikaduhang Pag-anhi.
Unsa ang gisulti sa Ginoo nga Iyang buhaton sa wala pa ang Ikaduhang Pag-anhi?
Aron matabangan ang mga estudyante nga mas makasabut sa ulahing adlaw nga misyon ni Elijah nga gihisgutan niini nga pagpadayag, i-display ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog. Awhaga ang mga sakop sa klase sa pagpaminaw kon unsay ipasabut sa priesthood sumala sa gipadayag ni Elijah.
Imahe
Elder David A. Bednar
“Si Elijah usa ka propeta sa Daang Tugon kinsa pinaagi kaniya dagkong mga milagro ang nahimo. …
“‘Nakakat-on kita gikan sa pagpadayag sa ulahing mga adlaw nga si Elijah naghupot sa gahum sa pagbugkos sa Melchizedek Priesthood ug mao ang katapusang propeta nga naghupot niini sa wala pa si Jesukristo’ (Bible Dictionary, “Elijah”). …
“Si Elijah mipakita uban ni Moises didto sa Bungtod sa Transpigurasyon (tan-awa sa Mateo 17:3) ug mihatag niini nga awtoridad ngadto nila ni Pedro, Santiago, ug Juan. Si Elijah mipakita og usab uban ni Moises ug sa uban niadtong Abril 3, 1836, sa Templo sa Kirtland ug mitugyan sa mao gihapong mga yawe ngadto ni Joseph Smith ug ni Oliver Cowdery” (David A. Bednar, “Ang mga Kasingkasing sa mga Anak Mobati,”Liahona, Nob. 2011, 24).
Ngano nga ang gahum sa priesthood alang sa pag-seal [pagbugkos] importante kaayo sa buhat sa ulahing mga adlaw alang sa kaluwasan sa mga anak sa Dios?
Aron matabangan ang mga estudyante nga mas makasabut sa kamahinungdanon sa gahum sa priesthood sa pag-seal nga gipadayag pinaagi ni Elijah, i-display ang mosunod nga pagpasabut ni Elder Bruce R. McConkie (1915–1985) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog.
Imahe
Elder Bruce R. McConkie
“Ang gahum sa priesthood sa pag-seal mao ang gahum sa pagbugkos ug pag-seal dinhi sa yuta … ug sa paghimo nga ang buhat mapamatud-an sa langit. …
“… Kon ang mga ordinansa sa kaluwasan ug pagkahimaya ipahigayon pinaagi o sa direksyon sa nanaghupot sa mga yawe [sa priesthood], ang mao nga mga tulumanon ug mga pagpahigayon moepekto gayud ug balido niining kinabuhia ug sa kinabuhi nga moabut” (Bruce R. McConkie, Doctrinal New Testament Commentary [1965], 1:389, 424).
Ipabasa og kusog sa usa ka estudyante ang Doktrina ug mga Pakigsaad 2:2 samtang magsunod ang klase, nga mangita kon unsa ang impluwensya sa pag-anhi ni Elijah nganha sa mga pamilya. Ipa-report sa usa ka estudyante unsay ilang nakit-an.
Aron matabangan ang mga estudyante sa pag-analisar sa kahulugan sa bersikulo 2, i-display ang mosunod nga duha ka pahayag, ug dapita ang usa ka estudyante sa pagbasa og kusog sa unang pahayag ug lain usab nga estudyante mobasa og kusog sa ikaduha. Ipapangita sa klase ang timailhan sa pagkatawo sa mga amahan ug sa mga anak nga maoy gihisgutan diha sa bersikulo 2.
Imahe
Elder Bruce R. McConkie
Mitudlo si Elder Bruce R. McConkie nga sa panagna nga “si Elijah motanom diha sa kasingkasing sa mga anak sa mga saad nga gihimo ngadto sa mga amahan,” ang mga pulong “mga amahan” nag-refer kang “Abraham, Isaac, ug Jacob, ngadto kang kinsa ang saad gihimo. Unsa ang mga gisaad? Mao kini ang mga saad nga magpadayon ang pundok sa pamilya ngadto sa kahangturan” (Bruce R. McConkie, Millennial Messiah [1982], 267).
Imahe
Presidente Joseph Fielding Smith
“Mipasabut si Presidente Joseph Fielding Smith nga diha sa panagna nga “ang mga kasingkasing sa mga anak mobati sa ilang mga amahan” (D&P 2:2), ang mga pulong nga “ilang mga amahan” nagpasabut sa “atong nangamatay nang katigulangan kinsa namatay nga wala ang kahigayunan nga makadawat sa Ebanghelyo, apan nakadawat sa saad nga moabut ang panahon nga ihatag ra diha kanila ang kahigayunan. Ang mga anak mao kadtong karon nga mga buhi kinsa nag-andam sa mga impormasyon sa kaliwatan ug kinsa nagpahigayon sa pagpuli nga mga ordinansa diha sa mga Templo” (Mga Pagtulun-an sa mga Presidente sa Simbahan: Joseph Fielding Smith [2013], 252).
Kinsa ang “mga amahan” nga gihisgutan niini nga panagna, ug unsa ang mga saad nga kinahanglang itanom diha sa mga kasingkasing sa mga anak?
Unsa ang ubang mga paagi nga ang kasingkasing sa mga anak mobati ngadto sa “ilang mga amahan,” o mga katigulangan?
Sa unsang paagi dunay kalabutan kanato ang panagna nga ang kasingkasing sa mga anak mobati ngadto sa ilang mga amahan? (Human makatubag ang mga estudyante, isulat sa pisara ang mosunod nga kamatuoran: Mobati ang atong mga kasingkasing ngadto sa atong mga katigulangan kon atong ipahigayon sa mga templo ang mga ordinansa para nila.)
Dapita ang usa ka estudyante sa pagbasa og kusog sa Doktrina ug mga Pakigsaad 2:3. Ipapangita sa klase kon unsay mahitabo kon ang gahum sa paghiusa sa mga pamilya alang sa kahangturan wala mapahiuli sa kalibutan.
Sumala niini nga panagna, unsay mahitabo kon ang gahum sa paghiusa sa mga pamilya wala mapahiuli sa kalibutan? (Human makatubag ang mga estudyante, isulat sa pisara ang mosunod nga doktrina: Kon wala ang gahum sa paghiusa sa mga pamilya sa kahangturan, ang kalibutan hingpit nga makawang sa Ikaduhang Pag-anhi ni Jesukristo.)
Ngano kaha nga ang kalibutan “hingpit man nga makawang” (D&P 2:3) sa Ikaduhang Pag-anhi ni Jesukristo kon wala ang pagpahiuli sa gahum sa pag-seal?
Aron matabangan ang mga estudyante nga mas makasabut nga ang kalibutan “hingpit nga makawang” kon wala ang pagpakita ni Elijah niadtong 1836 ug sa pagpahiuli sa iyang mga yawe, i-display ang mosunod nga pagpasabut ni Elder Jeffrey R. Holland sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog.
Imahe
Elder Jeffrey R. Holland
“Kon wala kana [nga gahum sa pag-seal] walay pagkabugkos sa pamilya ang mahitabo sa kahangturan, ug sa pagkatinuod ang pamilya sa tawo magpabilin ra unta sa kahangturan nga ‘walay bisan gamut [mga katigulangan] ni sanga [mga kaliwatan].’ Tungod kay ang ingon niana nga pagkasilyo, pagkahiusa, pagkaluwas sa pamilya sa Dios sa celestial nga paagi mao man ang katapusang katuyoan sa mortalidad, ang bisan unsa nga pagkapakyas dinhi usa na gayud unta ka tunglo, maghimo sa kinatibuk-ang plano sa kaluwasan nga ‘hingpit nga makawang’” (Jeffrey R. Holland, Christ and the New Covenant [1997], 297–98).
Sa unsang paagi kamo ug ang inyong pamilya napanalanginan tungod sa gipahiuli nga gahum sa pag-seal?
Ipakonsiderar sa mga estudyante kon kanus-a mibati ang ilang kasingkasing ngadto sa ilang mga amahan. Ipasabut nga kini nga proseso sa kasagaran maglakip og usa ka tinguha sa pagkat-on pa og dugang mahitungod sa mga ginikanan, mga apohan, ug mga katigulangan ug sa pagpahigayon sa gikinahanglang mga ordinansa sa templo para kanila. Dapita ang pipila ka mga estudyante sa pagpaambit sa ilang mga kasinatian diha sa klase.
Tapusa ang leksyon pinaagi sa pagpamatuod sa mga baruganan niini nga leksyon.