Leksyon 25: Doktrina ug mga Pakigsaad 66–70

Leksyon 25

Doktrina ug mga Pakigsaad 66–70

Pasiuna ug Timeline

Niadtong Oktubre 29, 1831, si William E. McLellin, usa ka bag-ong kinabig sa Simbahan, midangup sa Ginoo uban sa lima ka mga pangutana ug nag-ampo nga makadawat sa mga tubag pinaagi ni Propeta Joseph Smith. Si William dayon mihangyo sa Propeta sa pagpangutana sa Ginoo mahitungod kaniya. Si Joseph, kinsa wala masayud mahitungod sa pag-ampo ni William o sa lima ka mga pangutana, nangutana sa Ginoo ug nakadawat sa pinadayag nga narekord diha sa Doktrina ug mga Pakigsaad 66. Kini nga pinadayag nagdetalye sa gisaad nga mga panalangin ug piho nga tambag kalabut sa espiritwal nga kahimtang ni William ug sa iyang tawag sa pagsangyaw sa ebanghelyo.

Pagka-Nobyembre 1831, ang mga naghupot sa priesthood sa Simbahan nagpundok alang sa usa ka serye nga komperensya sa Hiram, Ohio, aron hisgutan ang pagmantala sa mga pinadayag nga nadawat ni Propeta Joseph Smith gikan sa Ginoo hangtud nianang panahona. Panahon sa komperensya, ang Ginoo mihatag sa pinadayag nga narekord diha sa Doktrina ug mga Pakigsaad 1, nga Iyang gitawag nga maoy Iyang pasiuna sa basahon sa mga pinadayag nga imantala. Ang Ginoo mihatag usab sa pinadayag nga narekord diha sa Doktrina ug mga Pakigsaad 67, diin namulong Siya ngadto niadtong misukit-sukit sa pinulongan sa mga pinadayag nga nadawat sa Propeta.

Panahon sa komperensya, upat ka mga kaigsoonan mihangyo ni Joseph Smith sa pagpangutana sa Ginoo mahitungod sa Iyang kabubut-on alang kanila. Agig tubag, nadawat sa Propeta ang pinadayag nga narekord diha sa Doktrina ug mga Pakigsaad 68. Ang pinadayag naglakip og tambag alang niadtong gitawag sa pagsangyaw sa ebanghelyo, dugang nga panabut kon unsay matawag nga kasulatan, mga instruksyon mahitungod sa pagtawag og mga bishop, ug usa ka sugo nga tudluan sa mga ginikanan ang ilang mga anak sa mga baruganan ug mga ordinansa sa ebanghelyo.

Sa panahon niini nga mga komperensya, gisangunan si Oliver Cowdery sa pagdala sa manuskrito sa tinigum nga mga pinadayag ni Joseph Smith gikan sa Ohio padulong sa Missouri alang sa pag-imprinta. Pagka-Nobyembre 11, 1831, gidiktar ni Joseph Smith ang pinadayag nga narekord diha sa Doktrina ug mga Pakigsaad 69, nga nagsugo ni John Whitmer sa pag-uban kang Oliver ngadto sa Missouri ug sa pagpadayon sa pagkolekta og makasaysayanon nga mga materyal isip Church historian ug recorder. Pagkasunod adlaw sa usa ka komperensya sa Hiram, Ohio, nadawat sa Propeta ang pinadayag nga narekord diha sa Doktrina ug mga Pakigsaad 70. Niana nga pinadayag, ang Ginoo mitudlo og unom ka tawo nga modumala sa pagmantala sa mga pinadayag.

Oktubre 29, 1831Ang Doktrina ug mga Pakigsaad 66 nadawat.

Nobyembre 1–2, 1831Ang mga elder sa usa ka komperensya sa Simbahan nga gipahigayon sa Hiram, Ohio, naghisgot sa pagmantala sa mga pinadayag sa Ginoo ngadto ni Joseph Smith (ang Basahon sa mga Sugo). Panahon sa komperensya, nadawat sa Propeta ang Doktrina ug mga Pakigsaad 67–68.

Nobyembre 11, 1831Ang Doktrina ug mga Pakigsaad 69 nadawat.

Nobyembre 12, 1831Ang Doktrina ug mga Pakigsaad 70 nadawat.

Nobyembre 20, 1831Si Oliver Cowdery ug John Whitmer mibiya sa Ohio aron moadto sa Missouri dala ang mga pinadayag nga iimprinta sa Basahon sa mga Sugo.

Mga Sugyot alang sa Pagtudlo

Doktrina ug mga Pakigsaad 66

Ang Ginoo mitambag ni William E. McLellin ug misugo kaniya sa pagsangyaw sa ebanghelyo ug sa pagbiya sa pagkadili matarung

Hangyoa ang mga estudyante sa paghunahuna og panahon sa dihang gusto nilang molambo o mouswag sa espiritwal nga paagi.

Unsaon ninyo pagkasayud nga nag-uswag kamo sa espiritwal nga paagi?
Unsaon ninyo pagkasayud unsa ang angay nga tutukan aron molambo sa espiritwal nga paagi?

Dapita ang mga estudyante sa pagpangita og mga kamatuoran samtang tun-an nila ang Doktrina ug mga Pakigsaad 66 nga makagiya nila sa ilang mga paningkamot sa pag-uswag sa espiritwal nga paagi.

Aron matabangan ang mga estudyante nga makasabut sa konteksto sa kasaysayan sa Doktrina ug mga Pakigsaad 66, ipasabut nga ang hintungdan sa pinadayag diha sa Doktrina ug mga Pakigsaad 66 mao si William E. McLellin, kinsa nabunyagan pagka-Agosto 1831. Wala madugay human sa iyang bunyag giordinahan siya isip usa ka elder ug miuban ni Hyrum Smith sulod sa pipila ka semana isip misyonaryo. Pagka-Oktubre, mibiyahe siya ngadto sa Ohio alang sa usa ka komperensya sa Simbahan ug nahimamat si Propeta Joseph Smith. Pagka-Oktubre 29, sekreto nga nag-ampo si William, mihangyo sa Ginoo sa pagpadayag sa mga tubag sa lima ka piho nga mga pangutana pinaagi ni Joseph Smith. (Walay dokumento nga nadiskubrihan nga nagrekord kon unsa kadto nga mga pangutana.) Wala mosulti sa Propeta mahitungod sa iyang pag-ampo o sa iyang mga pangutana, mihangyo si William og usa ka pagpadayag. Samtang gidiktar sa Propeta ang pinadayag nga narekord diha sa Doktrina ug mga Pakigsaad 66, nakita ni William nga sa pagkatinuod ang Ginoo mitubag sa matag usa sa iyang mga pangutana. Isip kabahin sa pinadayag, mihatag ang Ginoo kang William og piho nga mga instruksyon ug mga pasidaan nga nakatabang kaniya nga makahibalo sa iyang kahimtang atubangan sa Ginoo ug unsa ang gikinahanglan niyang buhaton aron mouswag sa espiritwal nga paagi.

Hangyoa ang usa ka estudyante sa pagbasa og kusog sa Doktrina ug mga Pakigsaad 66:1–2. Hangyoa ang klase sa pagsunod, nga mangita kon unsay gisulti sa Ginoo mahitungod sa espiritwal nga pag-uswag ni William McLellin.

Unsa ang gisulti sa Ginoo mahitungod sa espiritwal nga pag-uswag ni William?

Dapita ang mga estudyante sa pagbasa og hilum sa Doktrina ug mga Pakigsaad 66:3, nga mangita kon unsay gisulti sa Ginoo kang William nga kinahanglan pa niyang buhaton. Hangyoa ang mga estudyante sa pag-report kon unsay ilang makit-an.

Unsa ang atong makat-unan gikan niini nga mga bersikulo kon unsaon kita sa pagtabang sa Ginoo aron molambo sa espiritwal nga paagi? (Human makatubag ang mga estudyante, isulat ang mosunod diha sa pisara: Makapakita ang Ginoo kanato sa unsay kinahanglan natong hinulsulan.)
Unsa ang pipila ka mga paagi nga ang Ginoo mahimong mopakita kanato sa mga butang nga kinahanglan natong hinulsulan?

Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan. Hangyoa ang klase sa pagpaminaw sa usa ka paagi nga madapit nato ang Ginoo sa pagpakita kanato kon unsay kinahanglan natong hinulsulan:

“Usa sa mga pangutana nga kinahanglan gayud natong ipangutana sa atong Langitnong Amahan diha sa pribado nga pag-ampo mao kini: ‘Unsa man ang akong nabuhat karon, o wala nabuhat, nga wala Nimo ikahimuot? Kon masayud lang ko, maghinulsol ko sa tibuok nakong kasingkasing sa walay paglangay.’ Kana nga mapainubsanong pag-ampo matubag” (Henry B. Eyring, Do Not Delay,” Ensign, Nob. 1999, 34).

I-summarize ang Doktrina ug mga Pakigsaad 66:4–9 pinaagi sa pagpasabut nga ang Ginoo misulti ni William McLellin nga kinahanglan siyang mokuyog ni Samuel H. Smith sa usa ka misyon ngadto sa silangan nga mga dapit ug mosangyaw sa ebanghelyo. Misulti usab ang Ginoo kaniya nga wala pa siya tawaga nga moadto sa yuta sa Zion apan nga kon makahimo, mopadala siya og kwarta sa pagtabang niadtong nag-establisar sa Zion.

Hangyoa ang usa ka estudyante sa pagbasa og kusog sa Doktrina ug mga Pakigsaad 66:10. Hangyoa ang klase sa pagsunod, nga mangita sa tambag ug pasidaan sa Ginoo ngadto ni William. Tingali kinahanglan nimong ipasabut nga ang pulong nga masamok nagpasabut nga dunay gipas-an o nabug-atan.

Unsa nga tintasyon ang giingon sa Ginoo nga gipanglimbasugan ni William?
Unsa nga doktrina ang gitudlo niini nga bersikulo mahitungod sa kahibalo sa Ginoo? (Bisan og mogamit sila og lahi nga mga pulong, kinahanglang mahibaloan sa mga estudyante ang mosunod nga doktrina: Ang Ginoo nahibalo sa atong piho nga mga kahuyang ug mga tintasyon.)
Nganong importante man nga masabtan nga ang Ginoo nasayud sa atong piho nga mga kahuyang ug mga tintasyon?
Sa unsang paagi kini nga kamatuoran dunay kalabutan sa doktrina nga atong nahibaloan diha sa bersikulo 3?

Ipasabut nga agi ug dugang sa pagkahibalo sa atong mga kahuyang ug mga tintasyon, ang Ginoo nahibalo sa atong mga kalig-on ug mga abilidad. Tungod kay nakaila Siya sa matag usa kanato, makagiya Siya kanato nga molambo sa espiritwal nga paagi ug makapasidaan kanato sa mga kakuyaw nga tingali makababag sa atong espiritwal nga paglambo. Kon modangup kita Kaniya, nasayud ang Ginoo unsaon kita sa pagtabang kon tintalon kita ug moabut sa pagtabang kanato (tan-awa sa D&P 62:1).

Dapita ang mga estudyante nga mainampoong magtinguha nga masayud kon unsay gikinahanglan nila nga hinulsulan ug unsay gusto sa Langitnong Amahan nga ilang buhaton aron mas mapaduol Kaniya. Pagpamatuod nga ang mga panalangin moabut sa ilang kinabuhi kon mosunod sila sa tambag sa Ginoo ug maghinulsol sa ilang mga sala.

I-summarize ang Doktrina ug mga Pakigsaad 66:11–13 pinaagi sa pagpasabut nga ang Ginoo misaad ni William nga kon sundon niya ang tambag niini nga pinadayag ug palambuon ang iyang katungdanan, makadawat siya og kinabuhing dayon.

Doktrina ug mga Pakigsaad 67

Namulong ang Ginoo ngadto niadtong nagsukit-sukit sa pinulongan sa mga pinadayag nga gihatag ngadto ni Joseph Smith

Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 67. Hangyoa ang klase sa pagsunod, nga mangita sa konteksto sa kasaysayan niini nga pinadayag.

Unsa ang gipamatud-an sa kadaghanan sa mga elder panahon sa komperensya?

Ipasabut nga bisan og daghang mga elder ang nakadawat og espiritwal nga kompirmasyon sa katinuod sa mga pinadayag panahon sa komperensya, ang ubang mga elder wala makadawat.

Dapita ang usa ka estudyante sa pagbasa og kusog sa Doktrina ug mga Pakigsaad 67:1–4. Hangyoa ang klase sa pagsunod, nga mangita kon unsay gisulti sa Ginoo ngadto sa mga elder niini nga komperensya.

Sumala sa bersikulo 3, nganong wala man makadawat ang ubang mga elder og espiritwal nga saksi sa katinuod sa mga pinadayag?

Itudlo ang mga pulong diha sa ulohan sa seksyon nga “pipila sa sukwahi nga panagsultihanay nahimo mahitungod sa pinulongan nga gigamit diha sa mga pagpadayag,” ug ipasabut nga panahon sa komperensya, ang pipila ka mga elder misukit-sukit sa kasaypanan sa mga pinulongan diha sa mga pinadayag. Dapita ang usa ka estudyante sa pagbasa og kusog sa Doktrina ug mga Pakigsaad 67:5–9, ug hangyoa ang klase sa pagsunod, nga mangita kon unsay gisulti sa Ginoo ngadto sa mga nagsukit-sukit sa pinulongan sa mga pinadayag.

Unsa ang giangkon sa Ginoo mahitungod ni Joseph Smith diha sa bersikulo 5?

Ipamatuod nga bisan og dili perpekto ang pinulongan ni Joseph Smith, ang Ginoo mipadayag og kamatuoran ngadto sa Propeta ug mitugot kaniya sa pagpahayag niini gamit ang iyang kaugalingong mga abilidad ug dinasig nga labing maayo nga mga paningkamot.

Unsa nga hagit ang gihatag sa Ginoo niadtong nagtuo nga mas maayo nilang mapahayag ang ilang kaugalingon kay sa pinulongan diha sa mga pinadayag?

Ipasabut nga si William McLellin, usa ka kanhi magtutudlo, midawat sa hagit. Dapita ang usa ka estudyante sa pagbasa og kusog sa mosunod nga istorya:

Miboluntaryo si William McLellin nga mosulay sa pagsulat og usa ka pinadayag nga susama sa unsay gihatag sa Ginoo kaniadto pinaagi ni Propeta Joseph Smith, apan wala siya magmalampuson. Miobserbar si Joseph Smith nga kadtong nakasaksi niining pakyas nga pagsulay sa paghimo og usa kapinadayag “mibag-o sa ilang pagtuo diha sa kahingpitan sa ebanghelyo ug sa kamatuoran sa mga sugo ug mga pinadayag nga gihatag sa Ginoo ngadto sa Simbahan pinaagi sa akong pagkahiman; ug ang mga elder mipadayag og kaandam sa pagpamatuod sa katinuod niini ngadto sa tibuok kalibutan” (Joseph Smith, sa Manuscript History of the Church, vol. A-1, p. 162, josephsmithpapers.org).

Unsay atong makat-unan gikan niini nga kasinatian ug sa mga pulong sa Ginoo diha sa mga bersikulo 5–9 kalabut sa unsay ipadayag sa Ginoo pinaagi sa Iyang mga propeta? (Bisan og ang mga estudyante mogamit og lahi nga mga pulong, kinahanglan silang mahibalo sa mosunod nga kamatuoran: Ipadayag sa Dios ang kamatuoran pinaagi sa Iyang mga propeta bisan pa sa ilang mga kahuyang o kakulangan.)

Mahimo nimong dapiton ang pipila ka mga estudyante sa pagpaambit sa ilang pagpamatuod niini nga doktrina. Pagpamatuod sa katinuod sa mga pinadayag nga gihatag sa Ginoo ngadto sa Simbahan pinaagi sa Iyang buhi nga mga propeta.

I-summarize ang Doktrina ug mga Pakigsaad 67:10–14 pinaagi sa pagsulti sa mga estudyante nga ang Ginoo misaad sa mga elder nga kon tangtangon nila sa ilang kaugalingon ang kasina ug kahadlok ug magmapainubsanon, makakita sila sa Manluluwas. Mipasabut ang Ginoo nga dili sila makaharong sa Iyang atubangan karon, apan miawhag Siya kanila sa pagpadayon diha sa pagpailub hangtud nga sila mahingpit.

Doktrina ug mga Pakigsaad 68

Ang Ginoo mipasabut sa kahulugan sa kasulatan, mitambag niadtong gitawag sa pagsangyaw sa ebanghelyo, mipadayag og mga kamatuoran mahitungod sa tawag sa usa ka bishop, ug mihatag og instruksyon sa mga Santos sa Zion

Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 68. Hangyoa ang klase sa pagpangita kon unsay nakaaghat niini nga pagpadayag.

Dapita ang usa ka estudyante sa pagbasa og kusog sa Doktrina ug mga Pakigsaad 68:1. Hangyoa ang klase sa pagpangita sa sugo nga gihatag sa Ginoo ngadto ni Orson Hyde.

Unsaon man ni Orson pagsangyaw ang ebanghelyo? (Pinaagi sa Espiritu sa buhi nga Dios.)

Ipasabut nga diha sa bersikulo 2, ang Ginoo miingon nga ang sugo nga Iyang gihatag ngadto ni Orson Hyde usa ka ehemplo alang sa uban nga gitawag sa pagsangyaw sa ebanghelyo. Hangyoa ang usa ka estudyante sa pagbasa og kusog sa Doktrina ug mga Pakigsaad 68:3–5. Dapita ang klase sa pagpangita kon nganong importante alang niadtong gitawag sa pagsangyaw sa ebanghelyo sa pagbuhat niini pinaagi sa Espiritu.

Unsa nga kamatuoran ang atong makat-unan gikan sa bersikulo 4 mahitungod sa unsay mahitabo kon ang mga sulugoon sa Ginoo mamulong kon dasigon sa Espiritu Santo? (Human makatubag ang mga estudyante, isulat sa pisara ang mosunod nga kamatuoran: Kon ang mga sulugoon sa Ginoo dasigon sa Espiritu Santo, ang ilang mga pulong mao ang pulong sa Ginoo ug modala sa katawhan ngadto sa kaluwasan.)

Ipasabut nga kadtong gi-orden sa pagsangyaw sa ebanghelyo, kon dasigon sa Espiritu, makapahibalo sa pulong sa Ginoo ngadto sa ilang gitudloan ug makatabang kanila nga makaangkon og pagpamatuod sa kamatuoran. Agig dugang, ang mga pulong sa mga propeta, mga manalagna, ug mga tigpadayag ingon nga gihatag pinaagi sa Espiritu Santo giisip nga kasulatan (tan-awa sa D. Todd Christofferson, “Ang Panalangin sa Kasulatan,” Liahona, Mayo 2010, 35). Si Presidente J. Reuben Clark Jr. (1871–1961) sa Unang Kapangulohan namahayag nga ang mga propeta, mga manalagna, ug mga tigpadayag “dunay katungod, gahum, ug awtoridad sa pagpahayag sa hunahuna ug kabubut-on sa Dios ngadto sa katawhan, ubos sa tanang gahum ug awtoridad sa Presidente sa Simbahan … , kay siya ang Propeta, Manalagna, ug Tigpadayag sa tibuok Simbahan” (“When Are Church Leaders’ Words Entitled to Claim of Scripture?” Church News, Hulyo 31, 1954, 9–10).

Sa unsang mga paagi ang mga pulong sa mga sulugoon sa Ginoo nakatabang sa paggiya kaninyo ngadto sa kaluwasan?

Ipasabut nga diha sa Doktrina ug mga Pakigsaad 68:6–35, ang Ginoo mitawag sa matinud-anon nga mga elder sa pagsangyaw sa ebanghelyo ug sa pagbunyag sa mga tumutuo. Mipadayag usab Siya og mga instruksyon sa pagtawag og mga bishop ug sa mga lumulupyo sa Zion.

Hangyoa ang usa ka estudyante sa pagbasa og kusog sa Doktrina ug mga Pakigsaad 68:25–27. Hangyoa ang klase sa pagpangita sa instruksyon nga gihatag sa Ginoo ngadto sa mga ginikanan sa Zion.

Unsa ang gisugo sa Ginoo sa mga ginikanan diha sa bersikulo 25? (Ang Ginoo misugo sa mga ginikanan sa pagtudlo sa ilang mga anak aron makasabut sa doktrina sa paghinulsol, pagtuo diha kang Kristo, bunyag, ug sa gasa sa Espiritu Santo.)
Unsa ang gisulti sa Ginoo nga mahitabo sa mga ginikanan nga wala motudlo niini nga mga baruganan ug mga ordinansa ngadto sa ilang mga anak?

I-summarize ang Doktrina ug mga Pakigsaad 68:28–35 pinaagi sa pagpasabut nga agig dugang sa tambag ngadto sa mga ginikanan nga “motudlo sa ilang mga anak sa pag-ampo, ug sa paglakaw nga matarung sa atubangan sa Ginoo” (D&P 68:28), ang mga Santos gisugo sa pagbalaan sa adlawng Igpapahulay, mohinumdom sa pagbuhat sa ilang mga buluhaton, ug molikay sa pagtinapulan. Ang Ginoo mipahayag usab sa iyang wala pagkahimuot sa pagkadautan ug kahakog sa uban sa mga lumulupyo sa Zion.

Doktrina ug mga Pakigsaad 69–70

Ang Ginoo misugo ni John Whitmer sa pagpadayon sa iyang mga katungdanan isip Church historian ug mitudlo og unom ka tinugyanan sa Iyang mga pinadayag

I-summarize ang Doktrina ug mga Pakigsaad 69 pinaagi sa pagpasabut nga ang Ginoo misugo ni John Whitmer sa pag-uban kang Oliver Cowdery samtang iyang dad-on ang mga pinadayag ngadto sa Missouri aron mamantala. Gisultihan sa Ginoo si John Whitmer nga ang iyang mga katungdanan isip Church historian “alang sa kaayohan sa simbahan, ug alang sa nagtubo nga mga kaliwatan” (D&P 69:8).

I-summarize ang Doktrina ug mga Pakigsaad 70 pinaagi sa pagpasabut nga ang Ginoo mitudlo og unom ka tawo, lakip ni Propeta Joseph Smith, isip mga tinugyanan sa mga pinadayag nga dunay responsibilidad sa pagmantala niini ngadto sa kalibutan.

Tapusa pinaagi sa pagdapit og pipila ka mga estudyante sa pagpaambit og baruganan o doktrina nga gitudlo niini nga mga pinadayag nga makahuluganon ngadto kanila ug dayon ipasabut nganong importante kini kanila. Awhaga ang mga estudyante sa paggamit niini nga mga kamatuoran pinaagi sa pagsunod sa bisan unsa nga mga pag-aghat nga ilang madawat.