Pagka-Agosto 27, 1831, si Propeta Joseph Smith ug pipila ka mga elder mibalik sa Ohio gikan sa ilang biyahe ngadto sa Zion, o Independence, Missouri. Panahon sa pagbiyahe padulong ug gikan sa Missouri, ang pipila sa mga elder dunay mga panaglalis sa usag usa, apan nasulbad ra sa kadaghanan ang nagkasumpaki nilang mga pagbati. Pagka-Septyembre 11, nadawat sa Propeta ang pinadayag nga narekord diha sa Doktrina ug mga Pakigsaad 64. Niini nga pinadayag, ang Ginoo misugo sa mga miyembro sa Simbahan sa pagpasaylo sa usag usa ug mitudlo kanila kabahin sa mga sakripisyo nga Iyang gikinahanglan sa mga Santos sa ulahing mga adlaw.
Pagka-Septyembre 1831, si Joseph Smith ug ang iyang pamilya mibalhin gikan sa Kirtland, Ohio, ngadto sa Hiram, Ohio, nga mga 48 ka kilometro sa habagatang silangan sa Kirtland. Pagka-Oktubre 30, 1831, nadawat niya ang pinadayag nga narekord diha sa Doktrina ug mga Pakigsaad 65. Niini nga pinadayag gitudlo sa Ginoo nga ang ebanghelyo maadto sa tanang kanasuran agi og pangandam sa Ikaduhang Pag-anhi sa Manluluwas ug nga ang mga Santos kinahanglan nga mag-ampo alang sa paglambo sa gingharian sa Dios.
Septyembre 1, 1831Si Ezra Booth ug Isaac Morley mibalik sa Ohio gikan sa ilang misyon ngadto sa Missouri.
Septyembre–Disyembre, 1831Mihimo og nagsunod-sunod nga sulat si Ezra Booth nga nanaway ni Joseph Smith ug sa Simbahan ug gimantala kini sa pamantalaan nga Ohio Star.
Gipaniguro sa Ginoo kanato ang Iyang kaandam sa pagpasaylo kanato ug misugo kanato sa pagpasaylo sa usag usa
Dapita ang mga estudyante sa paghunahuna og higayon nga anaa sila sa makaluya o lisud nga sitwasyon ug mibuhat og mga butang nga ilang gimahayan, sama sa pagpangita og sayop sa uban o pagkamabingkilon.
Unsa ang inyong mga hunahuna human ninyo gikonsiderar ang unsay inyong nasulti o nabuhat?
Dapita ang mga estudyante sa paghunahuna og higayon nga dunay tawo nga nanaway o nakig-away kanila.
Nganong lisud man ang pagpasaylo sa tawo nga ingon niana ang pagtratar kaninyo?
Dapita ang mga estudyante sa pagpangita og mga kamatuoran samtang magtuon sila sa Doktrina ug mga Pakigsaad 64 nga makatabang kanila nga makasabut kon unsaon nga mapasaylo ug nganong importante ang pagpasaylo niadtong nakapasakit kanila.
Pahinumdumi ang mga estudyante nga si Propeta Joseph Smith ug usa ka grupo sa mga elder miuli sa Kirtland, Ohio, pagka-Agosto 27, 1831, gikan sa ilang misyon ngadto sa Missouri. Panahon niini nga misyon, ang pipila sa mga elder dunay mga panaglalis sa usag usa ug mabingkilon nga mga pagbati. Sama pananglit, si Ezra Booth naglagot nga siya ug ang iyang kompanyon sa misyon, si Isaac Morley, naglakaw ra padulong sa Missouri samtang ang uban mibiyahe pinaagi sa karwahe o sakayan; si Edward Partridge nakiglalis sa Propeta kabahin sa kalidad sa yuta nga giplanuhan nilang paliton sa Missouri; ug ang pipila sa mga elder naglalis samtang nakasinati sila og kakapoy, init nga temperatura, ug peligruso nga mga kahimtang sa Suba sa Missouri. Mga duha ka semana human makauli ang mga elder sa Ohio, nadawat ni Joseph Smith ang pinadayag nga narekord diha sa Doktrina ug mga Pakigsaad 64.
Dapita ang usa ka estudyante sa pagbasa og kusog sa Doktrina ug mga Pakigsaad 64:1–4. Hangyoa ang klase sa pagsunod, nga mangita kon unsay gisulti sa Ginoo ngadto sa mga elder.
Unsa nga doktrina ang gitudlo niini nga mga bersikulo kanato mahitungod sa Ginoo? (Ang Ginoo mapuanguron, mapasayloon, ug maloloy-on. Ikonsiderar ang pagsulat niini nga doktrina diha sa pisara.)
Kon usa kamo niadtong mga elder nga mireklamo o mabingkilon, unsa kaha ang inyong bation sa pagkasayud nga ang Ginoo adunay kalooy diha kaninyo ug mipasaylo kaninyo?
Aron sa paghatag sa mga estudyante og oportunidad nga mopasabut ug mopamatuod niini nga doktrina, ipakita ang mosunod nga mga pangutana, ug hangyoa ang mga estudyante sa pagpili og usa ug ipaambit ang ilang tubag ngadto sa partner:
Unsaon ninyo sa pagtudlo niini nga doktrina sa usa ka tawo kinsa gusto nga maghinulsol apan nahadlok nga ang Ginoo dili makapasaylo kaniya?
Giunsa ninyo pagkahibalo nga tinuod kini nga doktrina?
Dapita ang mga estudyante sa pagbasa og hilum sa Doktrina ug mga Pakigsaad 64:5–7, nga mangita kon unsay gisulti sa Ginoo mahitungod ni Propeta Joseph Smith. Sa dili pa mobasa ang mga estudyante, ipasabut nga ang mga pulong nga “nangita og higayon batok kaniya nga walay hinungdan” diha sa bersikulo 6 nagpasabut nga ang pipila sa mga elder nangita og sayop diha sa Propeta nga walay maayong rason.
Unsa ang gisulti sa Ginoo mahitungod ni Joseph Smith?
Ipasabut nga sama sa tanang mga tawo, si Joseph Smith adunay mga kahuyang ug kinahanglan nga mangayo og kapasayloan sa Ginoo alang sa iyang mga sala.
Unsa ang atong makat-unan gikan sa bersikulo 7 mahitungod sa unsay kinahanglan natong buhaton aron makaangkon og kapasayloan?
Dapita ang usa ka estudyante sa pagbasa og kusog sa Doktrina ug mga Pakigsaad 64:8–11. Hangyoa ang klase sa pagsunod, nga mangita kon unsay gitudlo sa Ginoo sa mga elder mahitungod sa pagpasaylo.
Sumala sa bersikulo 8, unsa ang gibuhat sa mga disipulo sa Manluluwas nga gibuhat usab sa mga elder diha sa usag usa ug ngadto sa Propeta panahon sa ilang misyon?
Unsa nga mga baruganan mahitungod sa pagpasaylo ang atong makat-unan gikan niini nga mga bersikulo? (Ang mga estudyante mahimong makat-on og pipila ka mga baruganan, lakip ang mosunod: Kon magdumili kita sa pagpasaylo sa uban, nagdala kita og kasakit sa atong kaugalingon. Kon kita dili mopasaylo sa uban, magpabilin kitang gipanghimaraut sa atubangan sa Ginoo. Ang Ginoo nagmando kanato sa pagpasaylo sa tanang tawo. Makasalig kita sa Ginoo sa paghukom sa binuhatan sa uban ug sa pagganti kanila sa makiangayong paagi.)
Sa unsang paagi kaha ang mga baruganan nga gitudlo sa Ginoo diha sa mga bersikulo 8–11 nakatabang sa mga elder nga nasilo sa binuhatan o mga pulong sa uban?
Ipasabut nga mahimong lisud alang sa pipila ka mga tawo—ilabi na niadtong seryusong napasakitan sa usa ka tawo ug tingali nagkinahanglan og panahon sa pagpasaylo—sa pagsabut nganong magpabilin kita nga gipanghimaraut sa atubangan sa Ginoo kon dili kita mopasaylo sa uban. Ipasabut nga ang magpabilin nga gipanghimaraut sa atubangan sa Ginoo mao ang “pagkasinilutan nga sad-an sa Dios”—nagpasabut nga wala nato maangkon ang Iyang pagpasaylo (Giya ngadto sa mga Kasulatan, “Gisilutan, Pagkasinilutan,” scriptures.lds.org).
Aron matabangan ang mga estudyante nga makasabut sa relasyon tali sa pagpasaylo sa uban ug sa pagdawat og kapasayloan sa Ginoo, dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball(1895–1985). Awhaga ang mga estudyante sa pagpaminaw og mga ideya kon nganong magpabilin kita nga gipanghimaraut kon dili kita mopasaylo sa uban.
Imahe
Presidente Spencer W. Kimball
“Tungod kay ang pagpasaylo usa ka bug-os nga panginahanglan aron makabaton og kinabuhing dayon, sa kasagaran ang tawo maghunahuna: Sa unsang paagiha nako maangkon kana nga pasaylo? Usa sa daghang nag-una nga mga hinungdan ang makita nga gikinahanglan dayon: Ang tawo kinahanglan gayud nga mopasaylo aron mapasaylo. …
“Siya nga dili mopasaylo sa uban mipugong sa iyang kaugalingon nga makaangkon og kapasayloan. Kini usa ka kamatuoran nga gitudlo sa Ginoo diha sa sambingay sa walay kalooy nga sulugoon kinsa mihangyo nga mapasaylo apan wala malooy sa tawo nga nangayo og pasaylo kaniya. (Mat. 18:23–35.)” (Spencer W. Kimball, The Miracle of Forgiveness [1969], 261–69).
Unsa nga mga panabut ang inyong naangkon gikan sa pamahayag ni Presidente Kimball kon nganong kinahanglan nga mopasaylo kita sa uban?
Ipasabut nga ang pagpasaylo sa uban wala magpasabut nga tugutan nato sila nga mopadayon sa pagpasakit kanato o nga dili nato sila patubagon sa ilang mga binuhatan. Hinoon, ang pagpasaylo sa uban nagpasabut sa paghikalimot sa kasuko ug kasilag ug sa pagsalig diha sa hustisya sa Ginoo, nga nagtugot sa makaayong gahum sa Ginoo diha sa atong kinabuhi.
Dapita ang mga estudyante sa pagkonsiderar kon aduna bay tawo nga kinahanglan nilang pasayloon. Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley (1910–2008). Hangyoa ang klase sa pagpaminaw sa unsay ilang mabuhat kon sila nanlimbasug sa pagpasaylo og tawo.
Imahe
Presidente Gordon B. Hinckley
“Mohangyo ako kaninyo sa pagpangamuyo sa Ginoo alang sa kalig-on nga mopasaylo. … Mahimong dili kini sayon, ug mahimong dili kini dali. Apan kon magtinguha kamo niini sa kinasingkasing ug mougmad niini, kini gayud moabut” (Gordon B. Hinckley, “Of You It Is Required to Forgive,” Ensign, Hunyo 1991, 5).
Pagpamatuod nga bisan kon mahimong lisud kaayo kini ug nagkinahanglan og panahon sa pagpasaylo niadtong nakapasakit o nakasala kanato, uban sa tabang sa Ginoo, makahimo kita niini. Awhaga ang mga estudyante sa pag-ampo alang sa kalig-on sa pagpasaylo niadtong nakasala kanila.
Ipasabut nga diha sa Doktrina ug mga Pakigsaad 64:12–14, gipadayag sa Ginoo kon kinsa ang makadawat og disiplina sa Simbahan. Mipasabut ang Ginoo nga ang pagpahigayon og disiplina sa Simbahan wala magpasabut nga dili kita personal nga mopasaylo sa uban. Ang katuyoan sa disiplina sa Simbahan mao ang pagtabang niadtong nakasala aron maghinulsol, sa pagsiguro nga ang balaod sa Dios gipatuman, ug sa pagpanalipod sa Simbahan.
Dapita ang usa ka estudyante sa pagbasa og kusog sa Doktrina ug mga Pakigsaad 64:15–17. Hangyoa ang klase sa pagpangita kon unsay gisulti sa Ginoo mahitungod sa tulo ka tawo kinsa nakatampo sa panagbingkil panahon sa misyon ngadto sa Missouri ug sa pagbalik ngadto sa Ohio.
Base sa mga bersikulo 15–16, unsa ang inyong masabtan mahitungod ni Ezra Booth ug Isaac Morley?
Ipasabut nga si Ezra Booth ug Isaac Morley managlahi og reaksyon niini nga pagkorihir. Wala maghinulsol si Ezra ug nag-anam ka masuk-anon batok sa Simbahan ug sa Propeta hangtud nga miapostasiya na siya. Naghinulsol si Isaac sa iyang mga nabuhat ug gipasaylo. Nagpabilin siyang matinud-anon sa tibuok niyang kinabuhi ug sa kaulahian miserbisyo isip bishop ug patriarch.
Unsa nga saad ang gihatag sa Ginoo kang Edward Partridge diha sa bersikulo 17 nga magamit usab ngari kanato?
Pahibaloa ang mga estudyante nga mipili si Edward Partridge nga maghinulsol ug matinud-anon nga miserbisyo isip bishop hangtud sa iyang kamatayon pagka-1840.
Ang Ginoo mihatag sa mga kinahanglanon alang sa pag-establisar sa Zion
Dapita ang mga estudyante sa paghunahuna og higayon dihang mihimo sila og sakripisyo aron sa pagtuman sa Ginoo. Hangyoa ang pipila ka mga estudyante sa pagpakigbahin sa ilang mga kasinatian uban sa klase.
Ipasabut nga diha sa Doktrina ug mga Pakigsaad 64:20–43, ang Ginoo mihulagway sa sakripisyo nga Iyang gikinahanglan sa matag usa kanato. Dapita ang usa ka estudyante sa pagbasa og kusog sa Doktrina ug mga Pakigsaad 64:20–21. Hangyoa ang klase sa pagpangita sa sakripisyo nga gihangyo sa Ginoo nga himoon ni Isaac Morley ug Frederick G. Williams. Dapita ang usa ka estudyante sa pag-report kon unsay iyang nakit-an.
Ipasabut nga si Isaac Morley nanag-iya og dako nga umahan nga mga 32 ka ektarya sa gawas sa Kirtland, Ohio. Human niini nga pagpadayag, andam nga gibaligya ni Isaac ang iyang umahan ug nanimuyo sa Independence, Missouri. Bisan tuod wala hangyoa si Frederick G. Williams sa pagbaligya sa iyang umahan, mipakita gihapon siya og kaandam sa pagsakripisyo. Gigamit niya ang iyang umahan aron mapuy-an ug makapakaon sa mga Santos ug sa wala madugay gipahinungod ang iyang tibuok umahan ngadto sa Simbahan nga wala makadawat og bisan unsa nga bayad.
Dapita ang mga estudyante sa pagbasa og hilum sa Doktrina ug mga Pakigsaad 64:22, nga mangita sa unsay gikinahanglan sa Ginoo kanato.
Sumala sa bersikulo 22, unsa ang gikinahanglan sa Ginoo kanato? (Ang Ginoo nagkinahanglan sa atong mga kasingkasing. Isulat sa pisara kini nga kamatuoran.)
Aron matabangan ang mga estudyante nga mas makasabut niini nga kamatuoran, dapita sila sa pagpasabut kon unsay ilang nasabtan niini gamit ang ilang kaugalingong mga pulong.
I-summarize ang Doktrina ug mga Pakigsaad 64:23–32 pinaagi sa pagpasabut nga ang Ginoo mimando sa Iyang katawhan sa pagsakripisyo pinaagi sa pagbayad og ikapulo. Niining panahona ang pulong nga ikapulo nagpasabut sa tanan nga kontribusyon sa mga Santos ngadto sa Simbahan, dili porsyento sa kinitaan. Ang Ginoo misulti usab kang Newel K. Whitney ug Sidney Gilbert nga dili ibaligya apan ipadayon ang ilang tindahan sa Ohio aron makatabang sila sa pagsangkap sa mga Santos “nga sila makabaton og kabilin sa … Zion” (D&P 64:30). Kini nga mga tawo nakat-on usab nga kon nagbuhat sila sa unsay gusto sa Ginoo nga ilang buhaton nagbuhat sila sa buluhaton sa Ginoo.
Dapita ang usa ka estudyante sa pagbasa og kusog sa Doktrina ug mga Pakigsaad 64:33–34. Hangyoa ang klase sa pagpangita kon unsa pa ang gitudlo sa Ginoo sa mga elder.
Unsay kahulugan alang kaninyo sa mensahe sa Ginoo diha sa bersikulo 33?
Agig dugang sa pagkinahanglan sa atong kasingkasing, unsa pa ang gikinahanglan sa Ginoo kanato? (Idugang ang mosunod nga mga pulong aron ang kamatuoran diha sa pisara mabasa sama sa mosunod: Ang Ginoo nagkinahanglan sa atong kasingkasing ug sa atong andam nga hunahuna.)
Unsay kahulugan diha kaninyo nga ang Ginoo nagkinahanglan sa inyong andam nga hunahuna?
Ipasabut nga sa mga bersikulo 34–36 ang Ginoo mitudlo nga kon dili kita mosunod Kaniya uban sa atong kasingkasing ug hunahuna, dili kita makatagamtam sa mga panalangin sa Zion. I-summarize ang Doktrina ug mga Pakigsaad 64:37–43 pinaagi sa pagpasabut nga ang Ginoo mipamatuod sa mahimayaong kaugmaon sa Zion.
Dapita ang mga estudyante sa pagkonsiderar kon unsa ka tiunay nga napahinungod ang ilang kasingkasing ngadto sa Ginoo. Awhaga sila nga mainampoong mamalandong kon sa unsang paagi mas hingpit nila nga mahatag ang ilang kasingkasing ug hunahuna ngadto sa Ginoo.
Ang Ginoo nagpahayag nga ang ebanghelyo mopuno sa tibuok yuta
Isulat sa pisara ang mosunod nga dili kompleto nga pamahayag, ug hangyoa ang mga estudyante sa paghunahuna kon unsaon nila sa pagkompleto niini: Usa sa importante nako nga mga responsibilidad isip miyembro sa Simbahan mao ang …
Dapita ang mga estudyante sa pagpangita og kamatuoran samtang magtuon sila sa Doktrina ug mga Pakigsaad 65 nga makatabang nila sa pagkompleto niini nga pamahayag.
Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 65:1–6. Hangyoa ang klase sa pagpangita og usa ka gibalik-balik nga pulong o hugpong sa mga pulong nga makatabang nato sa pagsabut kon unsa ka importante nga responsibilidad ang aduna kita. Hangyoa ang mga estudyante sa pag-report kon unsay ilang makit-an.
Unsa kaha ang gipasabut sa mga pulong nga “pag-andam kamo sa agianan sa Ginoo” ug “pag-andam kamo sa panihapon sa Kordero” diha sa bersikulo 3? (Kining duha ka hugpong sa mga pulong nagpasabut sa pagpangandam alang sa Ikaduhang Pag-anhi sa Ginoo.)
Sumala sa bersikulo 5, unsay gisulti sa Ginoo nga atong buhaton aron makapangandam alang sa Ikaduhang Pag-anhi ni Jesukristo?
Base niini nga mga bersikulo, unsa ang usa ka paagi sa pagkompleto sa pamahayag diha sa pisara? (Human makatubag ang mga estudyante, isulat ang mosunod nga kamatuoran diha sa pisara: Aduna kitay responsibilidad sa pag-andam sa atong kaugalingon ug sa uban alang sa Ikaduhang Pag-anhi ni Jesukristo.)
Sa unsang mga paagi nga makatabang kita sa pag-andam sa atong kaugalingon ug sa uban alang sa Ikaduhang Pag-anhi ni Jesukristo?
Aron sa pagtapos sa leksyon, pagpamatuod sa kaimportante sa pag-andam sa atong kaugalingon ug sa uban alang sa Ikaduhang Pag-anhi sa Ginoo. Pagpamatuod nga ang mga yawe sa gingharian anaa na sa yuta uban sa buhing mga propeta (tan-awa sa D&P 65:2) ug nga ang gipahiuli nga ebanghelyo ni Jesukristo mokaylap ngadto sa mga kinatumyan sa yuta sa pag-andam sa kalibutan alang sa Ikaduhang Pag-anhi. Dapita ang mga estudyante nga magtinguha sa pag-andam sa ilang kaugalingon ug sa uban alang sa Ikaduhang Pag-anhi sa Ginoo.