Atol sa buhat sa paghubad sa Basahon ni Mormon niadtong 1829, wala magkasinabut si Joseph Smith ug Oliver Cowdery mahitungod ni Apostol Juan kon kini namatay ba o buhi gihapon dinhi sa yuta. Gipangutana ni Propeta Joseph Smith ang Ginoo pinaagi sa Urim ug Thummim ug nadawat ang pagpadayag nga narekord sa Doktrina ug mga Pakigsaad 7. “Ang pagpadayag mao ang usa ka hinubad nga saysay sa talaan nga gibuhat diha sa papel katalan ni Juan” (D&P 7 ulohan nga seksyon) ug nagtudlo nga gitugutan sa Ginoo si Juan sa iyang tinguha nga mabuhi ug modala sa mga kalag ngadto kang Jesukristo hangtud sa Ikaduhang Pag-anhi.
Samtang naghubad sa 3 Nephi sa Basahon ni Mormon, nakakat-on si Joseph ug Oliver mahitungod sa awtoridad sa pagbunyag. Niadtong Mayo 15, 1829, nangadto sila sa kakahoyan duol sa umahan ni Joseph Smith sa Harmony, Pennsylvania, ug nag-ampo mahitungod niini nga awtoridad. Agig tubag sa ilang pag-ampo, mipakita si Juan Bautista isip nabanhaw nga personahe ug mitugyan kanila sa Aaronic Priesthood. Ang mga pulong nga gipamulong ni Juan Bautista anaa sa Doktrina ug mga Pakigsaad 13.
Niadtong Hunyo 1829, dihang hapit na mahuman ang paghubad sa Basahon ni Mormon sa balay ni Peter Whitmer Sr. sa Fayette, New York, nakadawat si Propeta Joseph Smith og pagpadayag nga naglangkob sa mga instruksyon mahitungod sa pagtukod sa Simbahan ni Kristo. Kini nga pagpadayag narekord isip Doktrina ug mga Pakigsaad 18, mitawag ni Oliver Cowdery ug David Whitmer sa pagsangyaw sa ebanghelyo ug gipili sila aron mangita og dose ka tawo nga moserbisyo isip mga Apostoles. Gidetalye usab sa pagpadayag ang daghang katungdanan niadtong pagatawagon nga mga Apostoles.
Abril 1829Gipadayon ni Joseph Smith ug Oliver Cowdery ang paghubad sa bulawang mga palid.
Si Juan nga Hinigugma usa ka nabalhin sa pagkahimaya nga binuhat nga nagtrabaho sa pagdala sa mga kalag ngadto kang Kristo hangtud sa Ikaduhang Pag-anhi
Ipakita ang usa ka yawe, ug ipahulagway sa mga estudyante unsa ang gamit niini.
Unsay mahitabo kon wala kay tukma nga yawe sa usa ka butang?
Dapita ang usa ka estudyante sa pagbasa og kusog sa mosunod nga pamahayag ni Presidente Russell M. Nelson sa Korum sa Napulog Duha ka mga Apostoles:
Imahe
Presidente Russell M. Nelson
“Ang mga yawe importante ug mahinungdanon. Kadaghanan nato magdala og mga yawe sulod sa atong mga bulsa o pitaka bisan asa ta moadto. Ang ubang mga yawe dili lang kay importante ug mahinungdanon; mga bililhon kini, puno sa gahum ug dili makita! Kini adunay mahangturong kahulugan” (Russell M. Nelson, “Keys of the Priesthood,” Ensign, Okt. 2005, 40).
Unsang klaseha sa mga yawe ang dunay mahangturong kahulugan? (Mga yawe sa priesthood.)
Dapita ang mga estudyante samtang magtuon sila sa Doktrina ug mga Pakigsaad 7 ug 13 sa pagpangita sa mga kamatuoran nga makatabang nila sa pagsabut kon unsa nga mga panalangin ang maablihan sa mga yawe sa priesthood ngari kanato.
Ipasabut nga samtang nagtrabaho si Joseph Smith ug Oliver Cowdery sa paghubad sa Basahon ni Mormon niadtong Abril 1829, nagkalahi ang ilang opinyon kabahin ni Apostol Juan. Dapita ang mga estudyante sa pagbasa og hilum sa ulohan nga seksyon sa Doktrina ug mga Pakigsaad 7, nga mangita sa gipangutana ni Joseph ug ni Oliver mahitungod ni Juan.
Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 7:1–8. Hangyoa ang klase sa pagsunod, nga mangita kon unsay nakat-unan ni Joseph Smith ug Oliver Cowdery mahitungod ni Apostol Juan.
Unsa ang gipadayag sa bersikulo 3 mahitungod ni Juan? (Naa gihapon si Juan sa yuta isip nabalhin sa pagkahimaya nga binuhat, nagtrabaho sa pagdala sa mga kalag ngadto kang Kristo, ug magpabilin hangtud sa Ikaduhang Pag-anhi.)
Sumala sa bersikulo 7, unsay gisulti sa Manluluwas nga ihatag niya kang Pedro, Santiago, ug Juan? (Ang gahum ug mga yawe sa pagpangalagad.)
Aron matabangan ang mga estudyante nga makasabut sa mga pulong nga “mga yawe niini nga pagpangalagad” (D&P 7:7), pasabta nga si Presidente Joseph Fielding Smith mipasabut sa mga pulong isip “ang awtoridad [sa] Kapangulohan sa Simbahan sa ilang dispensasyon” (Church History and Modern Revelation [1953], 1:49).
Gitugyan ni Juan Bautista ang Aaronic Priesthood ngadto ni Joseph Smith ug Oliver Cowdery
Pahinumdumi ang mga estudyante nga “ang ebanghelyo ni Jesukristo nawala gikan sa yuta pinaagi sa pagbiya sa kamatuoran nga nahinabo human sa yutan-on nga pangalagad sa mga Apostoles ni Kristo. Ang pagbiya sa kamatuoran [apostasiya] nahimo nga kinahanglanon sa pagpahiuli sa ebanghelyo” (Giya ngadto sa mga Kasulatan, “Pagpahiuli sa Ebanghelyo,” scriptures.lds.org). Ang mga yawe ug awtoridad sa pagpahigayon sa mga ordinansa sa priesthood ug pagdumala sa Simbahan nawala sa yuta atol niini nga apostasiya.
Ipasabut nga samtang naghubad si Joseph Smith ug Oliver Cowdery sa 3 Nephi sa Basahon ni Mormon niadtong Mayo 1829, nakat-unan nila ang mahitungod sa awtoridad sa pagbunyag. Nagtinguha nga masayud pa og dugang, nangadto sila sa kakahoyan duol sa umahan ni Joseph Smith sa Harmony, Pennsylvania, aron mangutana sa Dios.
Dapita ang usa ka estudyante sa pagbasa og kusog sa ulohan nga seksyon sa Doktrina ug mga Pakigsaad 13, ug pangutan-a ang klase kon si kinsa ang mipakita ni Joseph ug Oliver agig tubag sa ilang mga pag-ampo.
Dapita ang usa ka estudyante sa pagbasa og kusog sa Doktrina ug mga Pakigsaad 13, ug hangyoa ang klase sa pagpangita kon unsay gisulti ni Juan Bautista mahitungod sa mga yawe sa Aaronic Priesthood dihang gitugyan niya ang priesthood ngadto ni Joseph ug ni Oliver.
Unsa nga doktrina ang atong makat-unan gikan niini nga seksyon mahitungod sa Aaronic priesthood? (Tabangi ang mga estudyante sa pagpangita sa mosunod nga doktrina: ang Aaronic Priesthood naghupot sa mga yawe sa pagpangalagad sa mga anghel, sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala.)
Aron matabangan ang mga estudyante nga mas makasabut sa kahulugan sa yawe sa pagpangalagad sa mga anghel, dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Isip usa ka batan-ong tighupot sa Aaronic Priesthood, wala ako maghunahuna nga makakita ako og anghel, ug natingala ako kon unsa ang kalabutan sa ingon nga mga pagpakita ngadto sa Aaronic Priesthood.
“Apan ang pagpangalagad sa mga anghel mahimo usab nga dili makita. Ang mga mensahe sa anghel mahimong ikahatag pinaagi sa tingog o pinaagi sa mga hunahuna o mga pagbati lamang nga gipahayag ngadto sa salabutan” (Dallin H. Oaks, “The Aaronic Priesthood and the Sacrament,” Ensign, Nob. 1998, 39).
Aron matabangan ang mga estudyante nga makasabut sa relasyon tali sa tigpangalagad nga mga anghel ug sa Aaronic Priesthood, i-display ang mosunod nga pamahayag ni Elder Oaks, ug dapita ang usa ka estudyante sa pagbasa niini og kusog:
Imahe
Elder Dallin H. Oaks
“Sa kinatibuk-an, ang mga panalangin sa espirituhanong panag-uban ug komunikasyon anaa lamang niadtong limpyo. … Pinaagi sa mga ordinansa sa Aaronic Priesthood sa pagbunyag ug sa sakrament, malimpyuhan kita sa atong mga sala ug gisaaran nga kon kita mosunod sa atong mga pakigsaad makabaton kita kanunay sa Iyang Espiritu nga mag-uban kanato. Mituo ako nga kana nga saad wala lamang magpasabut sa Espiritu Santo apan usab sa pagpangalagad sa mga anghel, kay ang ‘mga anghel mamulong pinaagi sa gahum sa Espiritu Santo; busa, sila namulong sa mga pulong ni Kristo’ (2 Ne. 32:3). Mao nga kadtong naghupot sa Aaronic Priesthood moabli sa pultahan alang sa tanang miyembro sa Simbahan kinsa makaambit sa takus nga paagi sa sakrament aron makapahimulos sa pakig-uban sa Espiritu sa Ginoo ug sa pagpangalagad sa mga anghel” (Dallin H. Oaks, “The Aaronic Priesthood and the Sacrament,” 39).
Sumala ni Elder Oaks, sa unsang paagi ang mga ordinansa sa Aaronic Priesthood nagtabang kanato nga makadawat sa pagpangalagad sa mga anghel?
Ipasabut nga tungod kay ang Aaronic Priesthood naghupot sa yawe sa pagpangalagad sa mga anghel, ang tanang miyembro sa Simbahan makatagamtan niini nga panalangin.
Aron matabangan ang mga estudyante nga makasabut sa relasyon tali sa “ebanghelyo sa paghinulsol” (D&P 13:1) ug sa Aaronic Priesthood, i-display ang mosunod nga pamahayag ni Elder Oaks, ug dapita ang usa ka estudyante sa pagbasa niini og kusog:
Imahe
Elder Dallin H. Oaks
“Kita gimandoan sa paghinulsol sa atong mga sala ug sa pagduol ngadto sa Ginoo uban sa mapainubsanong kasingkasing ug mahinulsulong espiritu ug sa pag-ambit sa sakrament agi og pagsunod sa mga pakigsaad niini. Kon atong bag-uhon ang atong mga pakigsaad sa bunyag niini nga paagi, ang Ginoo mobag-o sa makalimpyo nga epekto sa atong bunyag. …
“Dili nato mapalabihan og sulti ang kamahinungdanon sa Aaronic Priesthood niini nga sitwasyon. Ang tanan niining importanting mga lakang kabahin sa kapasayloan sa mga sala gihimo pinaagi sa makaluwas nga ordinansa sa bunyag ug sa makabag-o nga ordinansa sa sakrament. Kining duha ka ordinansa gidumala pinaagi sa mga tighupot sa Aaronic Priesthood ubos sa direksyon sa bishopric, kinsa naggamit sa mga yawe sa ebanghelyo sa paghinulsol ug sa bunyag ug sa kapasayloan sa mga sala” (Dallin H. Oaks “The Aaronic Priesthood and the Sacrament,” 38).
Sa unsa nga paagi ang mga yawe sa Aaronic Priesthood makatabang kanato sa pagdawat sa mga panalangin sa Pag-ula ni Jesukristo?
Ipasabut nga sa wala madugay human sa pagpakita ni Juan Bautista, mipakita si Pedro, Santiago, ug Juan ni Joseph Smith ug Oliver Cowdery ug mitugyan kanila sa Melchizedek Priesthood ug sa mga yawe sa gingharian sa Dios (tan-awa sa D&P 27:12–13; tan-awa usab sa Larry C. Porter, “The Restoration of the Aaronic and Melchizedek Priesthoods,” Ensign, Dis. 1996, 33). Ang Melchizedek Priesthood ug ang mga yawe nga gitugyan naglangkob sa gahum ug awtoridad sa pag-organisar ug pagdumala sa Simbahan ni Jesukristo ug sa pagpahigayon sa dugang pa nga mga makaluwas nga ordinansa.
Mihatag ang Ginoo sa mga instruksyon alang sa pagtukod sa Iyang Simbahan ug mitawag ni Oliver Cowdery ug David Whitmer sa pagsangyaw og paghinulsol
I-display ang pipila ka butang nga gikonsiderar sa imong mga estudyante nga bililhon.
Unsa ang naghimo sa butang nga bililhon?
Pilay inyong ibayad sa matag usa ka butang?
Ipakita ang usa ka litrato sa daghang tawo, ug ipahulagway sa mga estudyante ang bili sa usa ka tawo. Dapita sila sa pagpangita sa mga kamatuoran diha sa Doktrina ug mga Pakigsaad 18 nga naghulagway kon unsa sila ka bililhon sa Ginoo sa personal nga paagi.
Ipasabut nga niadtong Hunyo 1829, hapit na mahuman ang paghubad sa Basahon ni Mormon sa balay ni Peter Whitmer Sr. sa Fayette, New York, ug nakadawat si Propeta Joseph Smith og pagpadayag nga narekord sa Doktrina ug mga Pakigsaad 18. Sa mga bersikulo 1–5, gipaniguro sa Ginoo kang Oliver Cowdery nga tinuod ang mga pulong nga iyang gisulat atol sa paghubad. Gitawag usab si Oliver sa Ginoo nga tukuron ang Iyang Simbahan diha sa ebanghelyo nga anaa sa Basahon ni Mormon. Sa Doktrina ug mga Pakigsaad 18:9, ang Ginoo mitawag ni Oliver Cowdery ug ni David Whitmer sa pagsangyaw og paghinulsol.
Dapita ang usa ka estudyante sa pagbasa og kusog sa Doktrina ug mga Pakigsaad 18:10, ug hangyoa ang klase sa pagpangita sa mga doktrina nga gitudlo ni Oliver Cowdery ug ni David Whitmer. (Isugyot nga markahan sa mga estudyante ang mosunod nga doktrina diha sa ilang mga kasulatan: Ang bili sa mga kalag mahinungdanon sa panan-aw sa Dios.)
Dapita ang usa ka estudyante sa pagbasa og kusog sa Doktrina ug mga Pakigsaad 18:11–12. Hangyoa ang klase sa pagpangita unsay gihimo sa Manluluwas tungod sa bili sa matag usa nato ka kalag.
Unsay gihimo sa Manluluwas tungod sa bili sa matag usa nato ka kalag? (Ang bili sa atong mga kalag mahinungdanon kaayo nga giantus ni Jesukristo ang atong mga kasakit, aron maghinulsol kita ug moduol Kaniya. Isulat sa pisara kini nga doktrina.)
Sa unsang paagi ang pagkahibalo sa bili nga gibutang sa Manluluwas diha ninyo makaapekto sa inyong kaandam nga maghinulsol ug magpaduol Kaniya?
Dapita ang mga estudyante sa pagbasa og hilum sa Doktrina ug mga Pakigsaad 18:13–16 nga mangita sa unsay gitudlo sa Ginoo mahitungod sa pagtabang sa uban nga maghinulsol ug moduol Kaniya. Ipasabut nga ang mga pulong “pagsangyaw og paghinulsol” (D&P 18:14) nagpasabut sa pagtabang sa mga tawo nga makabalik sa Dios.
Sumala sa bersikulo 13, unsay bation sa Manluluwas kon maghinulsol kita sa atong mga sala?
Unsa nga baruganan ang atong makat-unan gikan niini nga mga bersikulo mahitungod sa unsay mahitabo kon motabang kita sa uban nga makahinulsol ug moduol kang Kristo? (Kon motabang kita sa uban nga maghinulsol ug moduol kang Kristo, mobati kita og kalipay uban nila sa gingharian sa Langitnong Amahan.)
Dapita ang pipila ka mga estudyante sa pagpaambit og ilang mga kasinatian sa pagtabang sa uban nga moduol kang Kristo ug sa kalipay nga ilang gibati sa paghimo niini.
Awhaga ang mga estudyante sa paghimo og plano aron makatabang og tawo nga mouswag sa ilang paningkamot nga makahinulsol ug moduol kang Kristo.
I-summarize ang Doktrina ug mga Pakigsaad 18:17–25 pinaagi sa pagpasabut nga gitambagan sa Ginoo si Oliver Cowdery ug David Whitmer bahin sa misyonaryo nga buhat ug mipasabut nga kadtong maghinulsol, mabunyagan, ug molahutay sa katapusan maluwas.
Ang Ginoo mipadayag sa tawag ug misyon sa Napulog Duha ka mga Apostoles
I-summarize ang Doktrina ug mga Pakigsaad 18:26–40 pinaagi sa pagpasabut nga gipahibalo sa Ginoo si Oliver Cowdery ug David Whitmer nga ang Napulog Duha ka mga Apostoles tawagon sa pagsangyaw sa ebanghelyo sa tibuok kalibutan. Gisangunan usab sa Ginoo ang umaabut nga mga Apostoles nga magmalimpyo ug sa pagpamahayag sa ebanghelyo sumala sa gahum sa Espiritu Santo. Si Oliver Cowdery, ug David Whitmer gitawag sa pagpangita sa mga tawo nga gitawag sa Ginoo nga mahimong Napulog Duha ka mga Apostoles. Sa miabut nga adlaw, gitawag usab si Martin Harris nga motabang sa pagpangita sa Napulong Duha.
Tapusa pinaagi sa pagdapit sa pipila ka estudyante nga mopaambit sa ilang mga pagpamatuod sa usa sa mga kamatuoran nga gitudlo sa leksyon karon.