Pagka-Pebrero 16, 1832, si Propeta Joseph Smith ug Sidney Rigdon nagtrabaho sa dinasig nga mga pag-usab sa Biblia (nailhan isip ang Hubad ni Joseph Smith). Samtang naghubad si Joseph Smith sa Juan 5:29, siya ug si Sidney namalandong sa kahulugan sa bersikulo ug gipakita og usa ka panan-awon, nga gi-rekord diha sa Doktrina ug mga Pakigsaad 76. Niini nga panan-awon, gimatud-an sa Manluluwas ang Iyang katinuod ug kabalaan, mitudlo mahitungod sa pagkapukan ni Satanas ug sa mga anak sa kapildihan, ug mipadayag sa kinaiyahan sa tulo ka gingharian sa himaya ug niadtong makapanunod niini.
Ang Doktrina ug mga Pakigsaad 76 itudlo sa duha ka leksyon. Kini nga leksyon naglangkob sa Doktrina ug mga Pakigsaad 76:1–49, nga naglakip sa gisaad sa Ginoo nga mga panalangin ngadto sa mga matinud-anon, ang pagsaksi ni Joseph Smith ug Sidney Rigdon sa Amahan ug Anak, ug usa ka pagsaysay sa pagkapukan ni Lucifer ug sa mga anak sa kapildihan.
Enero 25, 1832Giorden si Joseph Smith isip Presidente sa Halangdon nga Pagkapari panahon sa usa ka komperensya sa Simbahan sa Amherst, Ohio.
Ulahing bahin sa Enero 1832Si Joseph Smith ug Sidney Rigdon mibalik sa Hiram, Ohio, aron motrabaho sa dinasig nga hubad sa Bag-ong Tugon.
Marso 24–25, 1832Si Joseph Smith ug Sidney Rigdon gikuha sa panon sa mga manggugubot panahon sa kagabhion, gibun-og pag-ayo, ug gipapilitan og alkitran ug mga balahibo didto sa Hiram, Ohio.
Ang Ginoo misaad og mga panalangin niadtong moserbisyo Kaniya
Dapita ang mga estudyante sa paghunahuna og higayon sa diha nga nakabasa sila o gisultihan og usa ka butang nga nagtuo sila nga tinuod apan nasayran sa kaulahian nga sayop diay. Hangyoa ang usa o duha ka estudyante sa paghulagway sa ilang kasinatian.
Unsa ang atong mahimo aron makakat-on ug mahibalo sa kamatuoran?
Ipasabut nga si Propeta Joseph Smith adunay susama nga kasinatian sa iyang pagsabut kon unsay mahitabo kanato human niining kinabuhia. Ang Propeta nagpuyo sa usa ka panahon dihang kadaghanan sa mga simbahan nga Kristiyano nagtuo nga ang sunod nga kinabuhi naglangkob lamang sa langit o sa impyerno: ang mga matarung moadto sa langit ug ang dautan moadto sa impyerno. Samtang mipadayon si Joseph Smith ug Sidney Rigdon sa paghubad sa Biblia didto sa Hiram, Ohio, namalandong sila niini nga pagtuo sa langit o impyerno lamang.
Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 76. Hangyoa ang klase sa pagpangita kon unsay hinungdan nga nagduha-duha ang Propeta niini nga konsepto sa sunod nga kinabuhi, ug dapita ang mga estudyante sa pag-report sa unsay ilang makit-an.
Ipasabut nga samtang namalandong ang Propeta, ang Ginoo mipakita kaniya ug ni Sidney Rigdon og usa ka panan-awon nga nagpakita og mga detalye sa plano sa kaluwasan (tan-awa sa D&P 76:11–112). Samtang gipakita sa Ginoo kining mahimayaon nga panan-awon, misaad Siya og dagkong mga panalangin sa mga miyembro sa Simbahan kinsa matinuoron ug matinud-anon (tan-awa sa D&P 76:1–10).
I-summarize ang Doktrina ug mga Pakigsaad 76:1–5 pinaagi sa pagpasabut nga kini nga mga bersikulo naghulagway sa mga hiyas sa Ginoo, lakip sa Iyang kaalam, gahum, mahangturong kinaiyahan, kalooy, ug grasya.
Dapita ang usa ka estudyante sa pagbasa og kusog sa Doktrina ug mga Pakigsaad 76:5–6. Hangyoa ang klase sa pagsunod, nga mangita niadtong makadawat sa kalooy ug grasya sa Ginoo ug kinsa ang Ginoo mahimuot nga mopasidungog.
Unsay kinahanglan natong buhaton aron madawat ang kalooy ug grasya sa Ginoo? (Ipasabut nga niini nga konteksto, ang mahadlok sa Ginoo nagpasabut nga balaanong motahud, morespeto, ug mohigugma Kaniya.)
Kinsa ang gisulti sa Ginoo nga mahimuot Siya nga mopasidungog?
Isulat ang mosunod nga mga pulong sa pisara: Kon balaanon kitang motahud sa Ginoo ug moserbisyo Kaniya diha sa pagkamatarung ug kamatuoran, Siya …
Dapita ang mga estudyante sa pagbasa og hilum sa Doktrina ug mga Pakigsaad 76:7–9, nga mangita sa mga panalangin nga ihatag sa Ginoo niadtong balaanong nagtahud ug nagserbisyo Kaniya. Ikonsiderar ang pagdapit sa mga estudyante sa pagmarka sa unsay ilang nakit-an diha sa ilang mga kasulatan.
Sumala niini nga mga bersikulo, unsa nga mga panalangin ang moabut niadtong kinsa ligdong nga nagtahud ug nagserbisyo sa Ginoo? (Kinahanglan tingali nimong ipasabut nga ang mga pulong nga mga misteryo diha sa bersikulo 7 nagpasabut sa espiritwal nga mga kamatuoran nga mahibaloan lamang pinaagi sa pagpadayag.)
Base niini nga mga bersikulo, unsaon nato sa pagkompleto sa baruganan diha sa pisara? (Human makatubag ang mga estudyante, kompletuha ang pamahayag nga naa sa pisara aron mopakita kini sa mosunod nga doktrina: Kon balaanon kitang motahud sa Ginoo ug moserbisyo Kaniya diha sa pagkamatarung ug kamatuoran, Siya mopadayag og kamatuoran kanato.)
Dapita ang usa ka estudyante sa pagbasa og kusog sa Doktrina ug mga Pakigsaad 76:10. Hangyoa ang klase sa pagsunod, nga mangita kon unsaon sa pagpadayag sa Ginoo og kamatuoran niadtong balaanong nagtahud ug nagserbisyo Kaniya.
Sa unsang paagi ang Ginoo mopadayag og kamatuoran niadtong balaanong nagtahud ug nagserbisyo Kaniya?
Hisguti ang kaimportante nga gisugdan sa Ginoo kining mahinungdanong panan-awon sa kahangturan pinaagi sa pagtudlo sa importanting tahas sa Espiritu diha sa pagdawat og pagpadayag. Dapita ang mga estudyante sa paghunahuna og mga panahon sa dihang natudloan ug nalamdagan sila pinaagi sa Espiritu. Hangyoa ang pipila ka mga estudyante sa pagpaambit sa ilang kasinatian diha sa klase. Mahimo nimong pahinumduman ang mga estudyante nga dili ipaambit ang bisan unsa nga hilabihan ka personal o sagrado.
Sa unsang mga paagi ang kasinatian ni Joseph Smith ug Sidney Rigdon usa ka katumanan sa mga saad nga gisulti diha sa mga bersikulo 5–10?
Sumala sa bersikulo 12, unsa ang epekto sa gahum sa Espiritu diha kanila?
Dapita ang usa ka estudyante sa pagbasa og kusog sa Doktrina ug mga Pakigsaad 76:15–19. Hangyoa ang klase sa pagpangita kon unsay gibuhat ni Joseph Smith ug Sidney Rigdon aron sa pag-andam sa ilang kaugalingon sa pagdawat og pagpadayag.
Unsay gibuhat ni Joseph Smith ug Sidney Rigdon nga miandam kanila sa pagdawat og pagpadayag? (Namalandong sila sa dinasig nga hubad sa Juan 5:29.)
Unsay buot ipasabut sa namalandong sa mga kasulatan? (Ang mga tubag mahimong maglakip sa pagpamalandong ug paghunahuna mahitungod sa inyong gibasa, pagpangutana mahitungod sa inyong gibasa, ug sa pagkonsiderar kon sa unsang paagi ang mga kamatuoran nga inyong nadiskubrihan magamit sa inyong kinabuhi.)
Unsa nga baruganan ang atong makat-unan gikan sa ehemplo ni Joseph Smith ug Sidney Rigdon mahitungod sa unsay atong mahimo aron makadawat og pagpadayag pinaagi sa Espiritu Santo? (Ang mga estudyante kinahanglang mahibalo og baruganan nga susama sa mosunod: Samtang magtuon ug mamalandong kita sa mga kasulatan, nag-andam kita sa atong kaugalingon sa pagdawat og pagpadayag gikan sa Ginoo pinaagi sa Espiritu Santo.)
Ipasabut nga ang panan-awon nga nakita sa Propeta ug ni Sidney Rigdon maoy usa sa labing mahinungdanon nga mga pinadayag sa Pagpahiuli. Ipakita ang mosunod nga pamahayag ni Presidente Wilford Woodruff (1807–1898), ug dapita ang usa ka estudyante sa pagbasa niini og kusog:
Imahe
Presidente Wilford Woodruff
“Akong hisgutan ang ‘Panan-awon’ [sa seksyon 76] lang, isip usa ka pagpadayag nga naghatag og dugang kahayag, dugang kamatuoran ug dugang baruganan kaysa bisan unsa nga pagpadayag nga anaa sa bisan unsa nga basahon nga atong nabasa” (Mga Pagtulun-an sa mga Presidente sa Simbahan: Wilford Woodruff [2004], 133).
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 76:19–24. Hangyoa ang klase sa pagsunod ug sa pagpangita sa unsay nakita ug nadunggan ni Joseph Smith ug Sidney Rigdon.
Unsa ang nakita ni Joseph Smith ug Sidney Rigdon sa panan-awon? Unsay ilang nadunggan?
Dapita ang mga estudyante sa paghisgot uban sa usa ka partner unsa nga doktrinal nga mga kamatuoran kalabut sa Manluluwas nga si Jesukristo ang ilang makita niini nga mga bersikulo. Human sa igong panahon, dapita ang pipila ka mga estudyante sa pagpaambit diha sa klase og usa ka kamatuoran nga ilang nakit-an gikan niini nga mga bersikulo. Hangyoa ang usa ka estudyante sa pagsulat sa doktrinal nga mga kamatuoran diha sa pisara samtang hisgutan kini sa mga estudyante. Lakip sa doktrinal nga mga kamatuoran nga kinahanglang mahibaloan sa mga estudyante mao ang mosunod: Si Jesukristo usa ka buhi, nahimaya nga binuhat. Ang Langitnong Amahan ug si Jesukristo bulag, managlahi nga mga binuhat. Si Jesukristo ang Tiglalang niini nga kalibutan ug sa ubang kalibutan. Pinaagi ni Jesukristo, kita nahimong mga anak ngadto sa Dios.
Isulat ang mosunod diha sa pisara ubos sa lista sa doktrinal nga mga kamatuoran:
Hain niini nga mga kamatuoran ang labi kamong mapasalamaton? Ngano man?
Unsa ang inyong nahibaloan nga tinuod mahitungod sa Manluluwas nga si Jesukristo?
Dapita ang mga estudyante sa pagpili og usa niini nga mga pangutana ug sa pagpaambit sa ilang tubag ngadto sa ilang partner. Human ang mga estudyante nakabaton og igong panahon sa pagpaambit sa ilang mga hunahuna ug pagpamatuod, mahimo nimong ikonsiderar ang pagdapit sa klase sa pagkanta sa “Ako Nasayud nga Akong Manunubos Buhi” (Mga Himno ug mga Awit sa mga Bata, nu. 38) aron dugang nga modapit sa Espiritu sa pagpamatuod sa mga kamatuoran nga inyong gihisgutan.
Nakita ni Joseph Smith ug Sidney Rigdon ang pagsukol ni Lucifer didto sa premortal nga kinabuhi
Dapita ang usa ka estudyante sa pagbasa og kusog sa Doktrina ug mga Pakigsaad 76:25–27. Hangyoa ang klase sa pagsunod, nga mangita kon unsa nga panghitabo ang sunod nga nakita ni Joseph Smith ug Sidney Rigdon sa panan-awon.
Unsa ang nakat-unan ni Joseph Smith ug Sidney Rigdon mahitungod sa unsay gibuhat ni Lucifer didto sa premortal nga kinabuhi?
Ipasabut nga ang ngalan nga Lucifer “nagpasabut nga ‘Usa ka Mahayag’ o ‘Tigdala og Kahayag’” (Giya ngadto sa mga Kasulatan, “Lucifer,” scriptures.lds.org).
Unsa ang nahitabo kang Lucifer tungod kay misukol siya batok sa Bugtong Anak sa Langitnong Amahan, nga si Jesukristo? (Kinahanglan tingali nimong ipasabut nga ang titulo nga Kapildihan nagpasabut sa pagkawala o kalaglagan.)
Dapita ang usa ka estudyante sa pagbasa og kusog sa Doktrina ug mga Pakigsaad 76:28–29. Hangyoa ang klase sa pagsunod, nga mangita sa unsay gisugo sa Ginoo nga buhaton ni Joseph Smith ug Sidney Rigdon human nila makita ang panan-awon sa premortal nga pagsukol ni Lucifer.
Unsa ang gisugo sa Ginoo nga buhaton ni Joseph ug Sidney?
Sumala sa bersikulo 29, unsa ang gibuhat ni Satanas dinhi sa yuta nga susama sa unsay iyang gibuhat didto sa premortal nga kinabuhi? (Ipasabut nga ang pulong nga miliyok nagpasabut nga palibutan sa hingpit.)
Sa unsang mga paagi si Satanas nakiggubat batok sa mga Santos sa Dios karon?
Nakakita si Joseph Smith ug Sidney Rigdon og usa ka panan-awon sa pag-antus sa mga anak sa kapildihan
I-summarize ang Doktrina ug mga Pakigsaad 76:30 pinaagi sa pagpasabut nga nakita ni Joseph Smith ug Sidney Rigdon ang mahitabo niadtong mabuntog ni Satanas.
Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 76:31–38. Hangyoa ang klase sa pagpangita kon unsay gisulti sa Ginoo niadtong mabuntog ni Satanas.
Sa bersikulo 32, unsa ang ngalan nga gihatag sa Ginoo niadtong mabuntog ni Satanas?
Sumala sa mga bersikulo 31 ug 35, unsa nga mga pagpili ang mosangput ngadto sa pagkahimong mga anak sa kapildihan?
Ipasabut nga si Propeta Joseph Smith mipasabut nga aron mahimong anak sa kapildihan, ang usa ka tawo “kinahanglan modawat sa Espiritu Santo, mabuksan alang kaniya ang kalangitan, ug makaila sa Dios, ug dayon makasala batok kaniya” (Manuscript History of the Church, vol. E-1, p. 1976, josephsmithpapers.org).
Dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball (1895–1985):
Imahe
Presidente Spencer W. Kimball
“Ang sala batok sa Espiritu Santo nagkinahanglan og kahibalo nga imposible gayud kaayo alang sa ordinaryong mga miyembro sa Simbahan sa paghimo sa maong sala” (Spencer W. Kimball, The Miracle of Forgiveness [1969], 123).
Sa mga bersikulo 32–38, unsa ang daw mahinungdanon kaninyo kabahin sa pag-antus nga masinati sa mga anak sa kapildihan sa kahangturan? (Ipasabut nga ang mga pulong nga “sila mao lamang kinsa dili matubos diha sa tukma nga panahon sa Ginoo” [bersikulo 38] nagpasabut nga ang mga anak sa kapildihan mao lamang ang mga tawo nga nakapuyo sa yuta kinsa dili makadawat og usa ka porsyon sa himaya sa Dios human sila mabanhaw [tan-awa sa 1 Mga Taga-Corinto 15:22; D&P 88:27–32].)
Sultihi ang mga estudyante nga diha sa Doktrina ug mga Pakigsaad 76:45–49, nahibaloan ni Joseph Smith ug Sidney Rigdon nga walay usa nga hingpit nga makasabut sa pag-antus sa mga anak sa kapildihan gawas niadtong makasinati mismo niini sa ilang kaugalingon.
Dapita ang usa ka estudyante sa pagbasa og kusog sa Doktrina ug mga Pakigsaad 76:39–43. Hangyoa ang klase sa pagsunod, nga mangita kon unsay mahitabo sa ubang mga anak sa Dios.
Unsay mahitabo sa ubang mga anak sa Dios?
Unsa ang nakahimo sa kaluwasan nga posible alang sa tanang katawhan?
Unsa nga doktrina ang atong makat-unan gikan niini nga mga bersikulo kon si kinsa ang maluwas pinaagi sa Pag-ula ni Jesukristo? (Human makatubag ang mga estudyante, isulat ang mosunod nga doktrina diha sa pisara: Pinaagi sa Pag-ula ni Jesukristo, ang tanang anak sa Dios maluwas gawas sa mga anak sa kapildihan.)
Ipasabut nga niini nga konteksto, ang pulong nga maluwas nagpasabut nga mahimong takus ug makahimo sa pagpanunod og usa ka dapit diha sa usa ka gingharian sa himaya pinaagi sa Pag-ula ni Jesukristo.
Ngano kaha nga kini nga doktrina gitawag man og “maayo nga mga balita” (bersikulo 40)?
Tapusa pinaagi sa pagpaambit sa imong pagpamatuod sa mga kamatuoran nga gihisgutan niini nga leksyon.