Leksyon 50

Doktrina ug mga Pakigsaad 129–30

Pasiuna ug Timeline

Niadtong Pebrero 9, 1843, si Propeta Joseph Smith mihatag og mga instruksyon ngadto ni Parley P. Pratt ug sa uban kon unsaon sa pag-ila tali sa langitnong mga mensahero ug sa dautang mga espiritu. Kining mga instruksyon narekord diha sa Doktrina ug mga Pakigsaad 129. Niadtong Abril 2, 1843, ang Propeta nakigkita sa mga miyembro sa Simbahan sa Ramus, Illinois, ug mitudlo sa doktrina kabahin sa lain-laing mga hilisgutan sa ebanghelyo, lakip sa Dios nga Kapangulohan, sa Ikaduhang Pag-anhi ni Jesukristo, ug kon unsaon nga makadawat kita sa mga panalangin sa Dios. Kining mga pagtulun-an narekord diha sa Doktrina ug mga Pakigsaad 130.

Pebrero 7, 1843Si Elder Parley P. Pratt miabut sa Nauvoo, Illinois, gikan sa iyang misyon sa England.

Pebrero 9, 1843Si Propeta Joseph Smith mihatag sa mga instruksyon nga narekord sa Doktrina ug mga Pakigsaad 129.

Abril 1, 1843Si Propeta Joseph Smith ug ang uban mibiyahe ngadto sa Ramus, Illinois.

Abril 2, 1843Si Propeta Joseph Smith mihatag sa mga instruksyon nga narekord sa Doktrina ug mga Pakigsaad 130.

Mga Sugyot alang sa Pagtudlo

Doktrina ug mga Pakigsaad 129

Si Propeta Joseph Smith mihatag sa mga instruksyon kon unsaon sa pag-ila sa nangalagad nga mga anghel gikan sa dautan nga mga espiritu

Sa dili pa ang klase, isulat ang mosunod nga pangutana diha sa pisara: Unsaon nako sa pagkahibalo nga ang usa ka butang gikan ba sa Dios o gikan sa ubang tinubdan?

Kon magsugod na ang klase, pangutan-a ang mga estudyante unsaon nila sa pagtubag kini nga pangutana. Dapita ang mga estudyante samtang magtuon sila sa Doktrina ug mga Pakigsaad 129 karon sa pagpangita sa sundanan nga gihatag ni Propeta Joseph Smith sa pag-ila sa mini nga mga espiritu.

Hangyoa ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 129.

Aron matabangan ang mga estudyante nga makasabut sa makasaysayanong background sa Doktrina ug mga Pakigsaad 129, ipasabut nga atol sa miting sa mga sakop sa Unang Kapangulohan ug sa Korum sa Napulog Duha ka mga Apostoles niadtong Hunyo 27, 1839, si Propeta Joseph Smith mitudlo mahitungod sa “tulo ka mahinungdanon nga mga yawe diin ang sakto nga matang sa pagpangalagad sa mga anghel ug sa mga espiritu mahimo nga mailhan” (D&P 129, ulohan sa seksyon). Hinoon, si Elder Parley P. Pratt wala makatambong niana nga miting. Niadtong Pebrero 9, 1843, si Elder Pratt, kinsa bag-o lang nauli gikan sa usa ka misyon sa England, ug ang uban nakigkita ni Propeta Joseph Smith, ug gisubli sa Propeta ang mga instruksyon nga iyang gihatag sa kaniadto.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 129:1–9. Hangyoa ang klase sa pagsunod, nga mangita sa “tulo ka mahinungdanon nga mga yawe” (bersikulo 9) nga makatabang kanato sa pag-ila tali sa langitnong mga mensahero ug sa dautan nga mga espiritu.

• Base sa mga pagtulun-an ni Propeta Joseph Smith, unsaon nato sa pag-ila tali sa langitnong mga mensahero ug sa dautang mga espiritu?

• Agig dugang niini nga mga instruksyon, unsa pa ang gihatag sa Dios kanato aron kita matabangan sa pag-ila sa mga pagpanglingla ni Satanas?

Doktrina ug mga Pakigsaad 130

Si Propeta Joseph Smith miklaro ug mitudlo sa doktrina

Aron matabangan ang mga estudyante nga makasabut sa konteksto sa Doktrina ug mga Pakigsaad 130, ipakita ang mosunod nga makasaysayanong summary, ug dapita ang usa ka estudyante sa pagbasa niini og kusog:

Niadtong Abril 1, 1843, si Propeta Joseph Smith, gikuyugan ni William Clayton, Orson Hyde, ug J. B. Backenstos, mibiyahe ngadto sa Ramus, Illinois, aron mobisita sa pamilya ug mga higala. Pagkasunod buntag, ang Propeta mipahigayon og miting sa Simbahan uban sa mga Santos sa Ramus. Atol sa miting, si Elder Orson Hyde misangyaw og sermon nga naglakip sa iyang interpretasyon sa 1 Juan 3:2, Pinadayag 19:11, ug Juan 14:23.

Human sa miting, ang Propeta ug ang iyang mga kauban miadto sa panimalay sa igsoong babaye ni Joseph Smith nga si Sophronia Smith McCleary aron maniudto. Atol sa pagpaniudto, ang Propeta misulti ni Elder Hyde nga siya “mohatag og pipila ka mga koreksyon” ngadto kaniya. Mapainubsanong mitubag si Brother Hyde, “Dawaton kini sa mapasalamatong paagi.” Dayon gikorihian sa Propeta ang dili sakto nga interpretasyon sa mga kasulatan ni Elder Hyde ug mitudlo og doktrina kabahin sa nagkalain-laing mga hilisgutan. (Tan-awa sa The Joseph Smith Papers, Journals, Volume 2: Disyembre 1841–Abril 1843,ed. Andrew H. Hedges ug uban pa [2011], 321–25.)

Bahina ang klase ngadto sa tulo ka grupo. Dapita ang usa ka grupo sa pagbasa sa hilum sa 1 Juan 3:2, nga mangita kon unsay gitudlo ni Apostol Juan nga mahitabo sa matinud-anon sa Ikaduhang Pag-anhi ni Jesukristo. Dapita ang laing grupo nga mobasa sa hilum sa Pinadayag 19:11, nga mangita kon unsay gitudlo ni Juan mahitungod sa pagpakita ni Jesukristo sa panahon sa Iyang Ikaduhang Pag-anhi. Hangyoa ang ikatulo nga grupo sa pagbasa og hilum sa Juan 14:23, nga mangita kon unsay gisulat ni Juan mahitungod sa panalangin nga madawat sa mga matarung. Human sa igong panahon, dapita ang usa ka estudyante gikan sa matag grupo sa pagreport unsay nakit-an sa iyang grupo.

Ipasabut nga atol sa iyang sermon sa Ramus, si Elder Hyde sayop nga mihubad niini nga mga bersikulo sa kasulatan. Gigamit niya ang 1 Juan 3:3 ug Pinadayag 19:11 sa pagtudlo nga “kon siya [si Jesukristo] magpakita kita mahisama kaniya [ug] siya makita nga nagsakay og puti nga kabayo—isip usa ka manggugubat, [ug] tingali kita makabaton sa sama nga espiritu—ang atong Dios usa ka manggugubat.” Dayon si Orson Hyde mikutlo sa Juan 14:23 ug mitudlo nga “pribilehiyo nato nga magpuyo ang Amahan [ug] ang Anak diha sa atong mga kasingkasing.” (Sa The Joseph Smith Papers, Journals, Volume 2: Disyembre 1841–Abril 1843, 323.)

Dapita ang usa ka estudyante sa pagbasa og kusog sa Doktrina ug mga Pakigsaad 130:1–3. Hangyoa ang klase sa pagsunod, nga mangita unsa ang gipasabut ni Propeta Joseph Smith samtang iyang gikorihian ang mga pagtulun-an ni Elder Hyde.

• Sumala sa bersikulo 1, sa unsang paagi magpakita ang Manluluwas sa Iyang Ikaduhang Pag-anhi?

• Unsa ang gipasabut sa mga pulong “kana nga panag-uban nga ania kanato dinhi maanaa kanato didto,” sa bersikulo 2? (Kon gikinahanglan, ipasabut nga ang pulong panag-uban nagpasabut sa unsa nga paagi ang mga tawo dunay inter-aksyon sa usag usa. Ang mga relasyon nga atong maangkon diha sa presensya sa Ginoo mahisama niadtong atong natagamtaman karon, apan maglakip kini sa “mahangturong himaya.”)

• Unsa nga bakak ang gikorihian sa Propeta sa bersikulo 3?

I-summarize ang Doktrina ug mga Pakigsaad 130:4–13 pinaagi sa pagpasabut nga niini nga mga bersikulo ang Propeta mitudlo nga ang panahon “giihap,” o gikalkulo, “sumala sa planeta diin [ang tawo] nagpuyo” (bersikulo 4). Mipasabut usab siya nga ang “mga anghel kinsa mangalagad [kanato] niini nga yuta [mao] kadto kinsa sakop o nahisakop niini” (bersikulo 5). Dayon gipasabut sa Propeta nga ang yuta mahimong celestial nga gingharian ug nga kadtong kinsa makapanunod sa celestial nga gingharian makadawat og “puti nga bato,” nga mao ang Urim ug Thummim nga nagpadayag sa langitnong mga butang (mga bersikulo 10–11). Si Propeta Joseph Smith mipanghimatuod usab niini nga panagna nga ang Estados Unidos makasinati og gubat nga magsugod sa estado sa South Carolina (tan-awa sa mga bersikulo 12–13; tan-awa usab sa D&P 87).

Ipakita ang litrato ni Jesukristo sa Iyang Ikaduhang Pag-anhi.

• Ngano kaha nga dunay gusto nga makahibalo sa eksakto nga petsa sa Ikaduhang Pag-anhi ni Jesukristo?

Ipasabut nga sa panahon ni Joseph Smith usa ka inila nga Kristiyano nga tigsangyaw nga ginganlan og William Miller nangangkon nga ang Ikaduhang Pag-anhi ni Jesukristo mahitabo tali sa tingpamulak sa 1843 ug sa tingpamulak sa 1844, ug daghan kinsa misunod ni William Miller nagtuo nga ang Abril 3, 1843, mao ang eksakto nga petsa niini nga panghitabo (tan-awa sa The Joseph Smith Papers, Journals, Volume 2: Disyembre 1841–Abril 1843, 326, note 717). Usa ka adlaw sa wala pa kining petsa nga gitagna, si Propeta Joseph Smith mikorihir niining bakak nga panagna samtang siya nagtudlo sa mga Santos didto sa Ramus pinaagi sa pagpakigbahin sa usa sa iyang kasinatian sa dihang nag-ampo siya aron makahibalo sa panahon sa Ikaduhang Pag-anhi.

Dapita ang usa ka estudyante sa pagbasa og kusog sa Doktrina ug mga Pakigsaad 130:14–17. Hangyoa ang klase sa pagsunod, nga mangita kon unsay nakat-unan ni Joseph Smith mahitungod sa Ikaduhang Pag-anhi sa Manluluwas.

• Unsa ang atong makat-unan gikan niini nga mga bersikulo mahitungod sa Ikaduhang Pag-anhi ni Jesukristo? (Tabangi ang mga estudyante nga makasabut nga ang Ginoo wala mopadayag sa eksakto nga petsa sa Iyang Ikaduhang Pag-anhi ngadto ni Joseph Smith. Mahimo nimong dapiton ang mga estudyante sa pagbasa sa Mateo 24:36.)

• Unsa ang gisulti sa Ginoo nga buhaton ni Joseph Smith diha sa bersikulo 15?

Ipasabut nga niadtong Abril 2, 1843, human makapaniudto sa balay sa iyang igsoong babaye, si Propeta Joseph Smith mipahigayon og laing miting uban sa mga Santos sa Ramus. Sa ubang mga hilisgutan, nga gisubli sa Propeta ngadto sa mga Santos sa unsay iyang gitudlo ni Orson Hyde ug sa uban atol sa paniudto. Nianang gabhiona, ang Propeta nagpahigayon og laing miting uban sa mga Santos diin iyang giklaro ang importanting mga kamatuoran sa ebanghelyo (tan-awa sa The Joseph Smith Papers, Journals, Volume 2:Disyembre 1841–Abril 1843, 325–26). Kining mga pagtulun-an narekord diha sa Doktrina ug mga Pakigsaad 130:18–23.

Dapita ang usa ka estudyante sa pagbasa og kusog sa Doktrina ug mga Pakigsaad 130:18–19. Hangyoa ang klase sa pagsunod, nga mangita sa usa ka baruganan nga gitudlo ni Propeta Joseph Smith sa mga Santos.

• Unsa nga baruganan ang atong makat-unan gikan niini nga mga bersikulo mahitungod sa kahibalo ug salabutan nga atong maangkon niini nga kinabuhi? (Tabangi ang mga estudyante sa pagpangita sa mosunod nga baruganan: Ang kahibalo ug salabutan nga atong maangkon niini nga kinabuhi madala nato sa Pagkabanhaw.)

Aron matabangan ang mga estudyante sa pagsabut unsay ipasabut sa mga pulong nga kahibalo ug salabutan, ipakita ang mosunod nga pamahayag ni Elder Neal A. Maxwell (1926–2004) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog.

“Ang pulong nga salabutan nga atong masugatan sa seksyon 130 … dili ang kasagaran nga matang sa pagsukod sa ‘IQ’. Kini nga ‘salabutan’ makaila, makakat-on, ug maggamit sa tinuod ug sakto nga mga baruganan; nagpakita kini sa lain-laing kahibalo ug maalamon nga kinaiya. Naghiusa kini sa hunahuna [pangatarungan] ug sa paggamit. Nagpakita kini sa labing taas nga matang sa salabutan, ug ang nahiusa nga resulta mouban nato sa pagkabanhaw” (Neal A. Maxwell, That Ye May Believe [1992], 37).

• Sumala ni Elder Maxwell, unsa ang gipasabut sa pulong nga salabutan sa Doktrina ug mga Pakigsaad 130:18–19?

• Sumala sa bersikulo 19, unsaon nato pagkab-ut og dugang nga kahibalo ug salabutan?

• Ngano kaha nga ang “kakugi ug pagkamasulundon” (bersikulo 19) ngadto sa Dios makatabang nato nga makaangkon og kahibalo ug salabutan? (Tan-awa sa D&P 93:27–28, 36–40.)

• Kanus-a kamo nakakab-ut og kahibalo ug salabutan tungod sa inyong kakugi ug pagkamasulundon?

Ipamatuod nga kon kita makugihon ug masulundon sa mga sugo sa Dios, makaangkon kita og kahibalo ug salabutan nga mopanalangin nato hangtud sa kahangturan. Awhaga ang mga estudyante sa pagpadayon sa pag-angkon og kahibalo ug salabutan pinaagi sa ilang kakugi ug pagkamasulundon ngadto sa Dios.

Dapita ang usa ka estudyante sa pagbasa og kusog sa Doktrina ug mga Pakigsaad 130:20–21. Hangyoa ang klase sa pagsunod, nga mangita sa dugang nga baruganan nga gitudlo ni Propeta Joseph Smith sa mga Santos sa Ramus. (Mahimo nimong ipasabut nga ang “dili mausab nga sugo” nagpasabut nga permanente ug walay kausaban ug ang “gipasikad” nagpasabut base sa [bersikulo 20].)

• Unsa nga baruganan ang atong makita sa bersikulo 21 mahitungod sa pag-angkon og mga panalangin gikan sa Dios? (Tabangi ang mga estudyante sa pag-ila sa mosunod nga baruganan: Kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diha diin kini gipasikad.)

Ilista ang mosunod nga mga kasulatan diha sa pisara: Malaquias 3:10–12; Mateo 11:28–30; 2 Nephi 32:3; D&P 58:42–43. Dapita ang mga estudyante sa pagbasa og hilum niini nga mga bersikulo, nga mangita sa balaod o sugo nga gitudlo ug sa mga panalangin nga atong madawat kon kita mosunod niana nga balaod o sugo. Hangyoa ang mga estudyante sa pagreport sa unsay ilang nakit-an.

Ipasabut nga samtang ang ubang mga panalangin nga atong madawat tungod sa pagkamasulundon sa mga balaod sa Dios moabut dayon, ang ubang panalangin mahimong dili dayon moabut apan nagkinahanglan og padayon nga pagsunod sa taas nga panahon.

• Ngano kaha nga importanting masabtan nga ang ubang gisaad nga mga panalangin sa Dios tungod sa pagkamasulundon dili man dayon moabut kanato?

• Unsa ang pipila ka mga ehemplo sa mga panalangin ang inyong nadawat tungod sa inyong pagkamasulundon sa mga balaod sa Dios? (Mahimo usab nimong ipakigbahin ang usa ka kasinatian.)

Paghatag og mga pangutana nga makadapit og inspirasyon

Si Presidente Henry B. Eyring sa Unang Kapangulohan mitudlo nga ang pipila ka pangutana nagdapit og inspirasyon. Mitambag siya sa mga magtutudlo sa paghatag og mga pangutana “nga modapit sa mga indibidwal sa pagsiksik sa ilang mga hunahuna alang sa mga pagbati.” Mga pangutana nga motugot sa mga estudyante sa pagpamalandong sa milabay nga mga kasinatian kay sa maghinumdom lang og impormasyon ang makaandam nila nga matudloan sa Espiritu. Si Presidente Eyring miingon, “Human makapangutana, mahimo kitang maghulat og gamay sa maalamong paagi sa dili pa motawag sa usa ka tawo aron motubag. Bisan kadtong dili mosulti maghunahuna og espirituhanong mga kasinatian. Kana makadapit sa Espiritu Santo” (“The Lord Will Multiply the Harvest” [gabii uban sa usa ka General Authority Peb. 6, 1998], 6).

Dapita ang mga estudyante sa pasulat og usa o daghang mga panalangin nga gusto nilang madawat ingon man sa piho nga mga sugo nga ilang sundon aron madawat kadto nga mga panalangin. Mahimo nimong pahinumduman ang mga estudyante nga ang labing importante nga hinungdan sa pagtuman sa mga sugo mao ang gugma alang sa Ginoo (tan-awa sa Juan 14:15).

Ipasabut nga isip kabahin sa panapos nga pakigpulong sa Propeta ngadto sa mga Santos sa Ramus, iyang gikorihian pag-usab ang mga pagtulun-an ni Orson Hyde mahitungod sa Dios nga Kapangulohan.

Dapita ang usa ka estudyante sa pagbasa og kusog sa Doktrina ug mga Pakigsaad 130:22–23. Hangyoa ang klase sa pagsunod, nga mangita sa doktrina nga gitudlo sa Propeta mahitungod sa Dios nga Kapangulohan.

• Unsa nga doktrina ang gitudlo niini nga mga bersikulo kabahin sa Dios nga Kapangulohan? (Human motubag ang mga estudyante, isulat ang mosunod nga mga pamahayag sa doktrina diha sa pisara: Ang Dios nga Amahan ug ang Iyang Anak, nga si Jesukristo, managlahi nga mga indibidwal nga dunay pisikal nga mga lawas sa unod ug mga bukog. Ang Espiritu Santo usa ka personahe sa Espiritu.)

• Ngano kaha nga importante man alang kanato nga makasabut niini nga doktrina?

Tapusa pinaagi sa pagpaambit sa imong pagpamatuod sa doktrina ug mga baruganan nga nahisgutan sa leksyon karon. Dapita ang mga estudyante sa paggamit niini nga mga kamatuoran aron sila makaangkon sa gisaad nga mga panalangin.