Leksyon 52

Doktrina ug mga Pakigsaad 132:34–66; Opisyal nga Pahayag 1

Pasiuna ug Timeline

Samtang nagtrabaho si Propeta Joseph Smith sa dinasig nga mga kausaban sa Biblia niadtong 1831, nangutana siya sa Ginoo ngano nga ang pipila ka karaang mga patriyarka ug mga hari nga Israelite adunay daghang asawa. Nianang higayuna, ang Propeta nagsugod sa pagdawat og pagpadayag kabahin sa dinaghan nga kaminyoon. Sa misunod nga katuigan ang Ginoo misugo sa Propeta ug sa ubang mga miyembro sa Simbahan sa pagsunod sa baruganan sa dinaghan nga kaminyoon. Niadtong Hulyo 12, 1843, sa Nauvoo, Illinois, ang Propeta midiktar sa pagpadayag nga karon narekord sa Doktrina ug mga Pakigsaad 132, diin ang Ginoo mipadayag sa mga kamatuoran kabahin “sa bag-o ug walay katapusan nga pakigsaad sa kaminyoon” (D&P 131:2). Kini nga leksyon naghisgot sa Doktrina ug mga Pakigsaad 132:34–66, nga naglakip sa mga pagtulun-an sa Ginoo mahitungod sa dinaghan nga kaminyoon ug sa Iyang tambag ngadto nila ni Joseph ug Emma Smith.

Human makabalhin ang mga Santos ngadto sa Walog sa Salt Lake sa kasadpang Estados Unidos, nagsugod sila sa pagbuhat sa dinaghan nga kaminyoon sa dayag nga paagi. Gikan sa mga 1860 ngadto sa mga 1880, ang gobyerno sa Estados Unidos mipasar og mga balaod batok sa dinaghan nga kaminyoon. Human nag-ampo nga nagtinguha og giya gikan sa Ginoo ug nakadawat og pagpadayag, si Presidente Wilford Woodruff miandam sa Manipesto niadtong Septyembre 23–24, 1890, nga sa katapusan misangpot sa paghunong sa pagbuhat og dinaghan nga kaminyoon sa mga miyembro sa Simbahan. Ang Manipesto, nga narekord sa Doktrina ug mga Pakigsaad isip Opisyal nga Pahayag 1, giisyu ngadto sa publiko niadtong Septyembre 25, 1890.

Mayo–Hulyo 1843Si Emma Smith miuyon sa dinaghang kaminyoon ni Joseph Smith apan naglisud sa pagdawat sa maong binuhatan.

Hulyo 12, 1843Ang pagpadayag nga narekord sa Doktrina ug mga Pakigsaad 132 gidiktar.

Hunyo 27, 1844Si Propeta Joseph Smith ug ang iyang igsoon nga si Hyrum gipatay didto sa Bilanggoan sa Carthage, sa Carthage, Illinois.

Hulyo 24, 1847Si Presidente Brigham Young ug ang ubang mga Santos miabut sa Walog sa Salt Lake.

Agosto 29, 1852Ubos sa direksyon ni Presidente Brigham Young, si Elder Orson Pratt mitudlo sa publiko sa baruganan sa dinaghan nga kaminyoon.

mga 1860–mga 1880Ang gobyerno sa Estados Unidos mipasar og mga balaod nga nagdili sa dinaghan nga kaminyoon.

Septyembre 25, 1890Si Presidente Wilford Woodruff miisyu sa Manipesto, nga karon anaa sa Opisyal nga Pahayag 1.

Oktubre 6, 1890Atol sa kinatibuk-ang komperensya sa Simbahan, ang Manipesto gidawat sa mga miyembro sa Simbahan isip mando ug mahinungdanon.

Mga Sugyot alang sa Pagtudlo

Doktrina ug mga Pakigsaad 132:34–50

Ang Ginoo nagtudlo mahitungod sa gahum sa pagbugkos nga gihatag ngadto ni Propeta Joseph Smith

Mogamit sa aprubado nga mga materyal

Ang kurikulum nga mga materyal sa seminary ug institute gihatag isip nag-unang mga kapanguhaan aron matabangan ka nga makaandam ug magtudlo og epektibong mga leksyon. Pwede kang mogamit og dugang nga mga kapanguhaan, sama sa mga pagtulun-an gikan sa Unang Kapangulohan ug sa Korum sa Napulog Duha ka mga Apostoles, mga magasin sa Simbahan, mga essay sa hilisgutan sa ebanghelyo, ug sa ubang kasaligan nga mga tinubdan samtang nagsuporta ka sa panabut sa mga estudyante bahin sa scripture block. Pagpili og mga materyal sa leksyon sa maalamong paagi aron ang mga leksyon makaugmad sa pagtuo ug mga pagpamatuod sa mga estudyante. Pagmabinantayon sa dili kasaligang mga tinubdan sa impormasyon, ilabi na kon ang maong mga tinubdan nangagpas lang o pagpaukyab lang sa mga hilisgutan sa leksyon o nagtudlo og mga ideya nga klarong wala ma-establisar sa Simbahan.

Dapita ang mga estudyante sa paglista diha sa pisara sa mga sugo ug tambag nga gihatag sa Ginoo nga tingali lisud sundon sa pipila ka mga young adult. Hangyoa ang mga estudyante sa pagpili og usa o duha sa mga ehemplo nga nalista ug sa lakbit ipasabut ngano nga ang mga young adult maglisud sa pagsunod niana nga sugo.

Dapita ang mga estudyante sa paghunahuna mahitungod sa usa ka sugo nga tingali lisud nilang sundon sa personal. Dapita ang mga estudyante sa pagpangita og mga doktrina ug mga baruganan samtang magtuon sila sa Doktrina ug mga Pakigsaad 132:34–66 nga makatabang nila nga molambo ang ilang pagtuo ug pasalig sa pagsunod sa mga sugo sa Ginoo.

Aron matabangan ang mga estudyante nga makasabut sa konteksto sa pagpadayag nga narekord sa Doktrina ug mga Pakigsaad 132, dapita ang usa ka estudyante sa pagbasa og kusog sa mosunod nga parapo [paragraph]:

Si Propeta Joseph Smith mireport nga “usa ka anghel nagpakita ngadto kaniya sa tulo ka higayon tunga-tunga sa 1834 ug 1842 ug misugo kaniya sa pagpadayon sa dinaghan nga kaminyoon ” (“Plural Marriage in Kirtland and Nauvoo,” Gospel Topics, topics.lds.org). Ang Propeta nagduha-duha sa pagsunod sa baruganan. Iyang gihulagway ngadto sa usa ka higala “ang kalisud sa paghunahuna nga iyang nasinati sa pagbuntog sa pagsupak sa iyang mga pagbati” sa pagbuhat niini (Eliza R. Snow, Biography and Family Record of Lorenzo Snow [1884], 69). Ang makasaysayanong mga ebidensya nagsugyot nga misulay siya sa pagsunod sa sugo sa tunga-tunga sa mga 1830. Hinoon, wala kini mahitabo hangtud sa sayong bahin sa 1840 nga ang Propeta nagsugod sa pagsunod sa sugo sa matinguhaon ug mitudlo sa baruganan sa dinaghan nga kaminyoon ngadto sa uban. Bisan og gidiktar ni Joseph Smith ang Doktrina ug mga Pakigsaad 132 niadtong ting-init sa 1843, ang pipila ka mga baruganan sa pagpadayag nadawat sa sayong bahin niadtong 1831 sumpay sa dinasig nga hubad sa Propeta sa Daang Tugon. (Tan-awa sa “Plural Marriage in Kirtland and Nauvoo,” topics.lds.org.)

Dapita ang mga estudyante sa pagbasa og hilum sa Doktrina ug mga Pakigsaad 132:1–2 nga mangita sa pangutana nga gipangutana ni Joseph Smith sa Ginoo. Hangyoa sila sa pagreport kon unsay ilang nakit-an.

Ipasabut nga ang pulong puyo-puyo sa Daang Tugon nagpasabut ngadto sa usa ka babaye kinsa legal nga naminyo sa usa ka lalaki apan adunay mas ubos nga kahimtang kay sa usa ka asawa. Ang mga puyo-puyo dili kabahin sa pagbuhat sa dinaghan nga kaminyoon sa atong dispensasyon.

Dapita ang usa ka estudyante sa pagbasa og kusog sa Doktrina ug mga Pakigsaad 132:34–36. Hangyoa ang klase sa pagsunod, nga mangita kon nganong si Abraham nakigminyo ni Hagar.

• Sumala sa mga bersikulo 34–35, nganong si Abraham nakigminyo ni Hagar?

Hisguti nga “subay sa balaod [nga ang] usa ka lalaki adunay usa lang ka asawa, gawas kon ang Ginoo nagsugo pinaagi sa pagpadayag (Jacob 2:27–30)” (Giya ngadto sa mga Kasulatan, “Kaminyoon, Pagminyo,” scriptures.lds.org).

• Sumala sa bersikulo 36, unsa ang gitudlo sa Ginoo ni Joseph Smith mahitungod sa pagkamasulundon sa Iyang mga sugo? (Bisan unsa ang gisugo sa Ginoo sakto, ug kon kita mosunod Kaniya, “pagaisipon kini ngari [kanato] alang sa pagkamatarung.”)

• Nakahibalo unsay atong mahimo mahitungod ni Abraham, ngano nga ang sugo sa pagsakripisyo ni Isaac lisud gayud alang ni Abraham?

• Sa unsa nga paagi nga ang sugo sa Ginoo ngadto ni Abraham sa pagsakripisyo ni Isaac matandi ngadto sa Iyang sugo ngadto sa unang mga Santos sa paghimo sa dinaghan nga kaminyoon?

Dapita ang usa ka estudyante sa pagbasa og kusog sa Doktrina ug mga Pakigsaad 132:37. Hangyoa ang klase sa pagsunod, nga mangita unsay nadawat nila ni Abraham, Isaac, ug Jacob tungod sa ilang pagkamasulundon sa mga sugo sa Dios. Hangyoa ang mga estudyante sa pagreport sa unsay ilang nakit-an.

• Unsa nga mga baruganan ang atong mahibaloan tungod sa pagkaandam ni Abraham sa pagsunod sa mga sugo sa Dios, bisan kon kini lisud nga buhaton? (Human makatubag ang mga estudyante, isulat ang mosunod nga baruganan diha sa pisara: Kon kita mosunod sa mga sugo sa Dios, bisan kon kini lisud nga buhaton, makadawat kita sa Iyang gisaad nga mga panalangin.)

Hisguti ang lista sa mga sugo nga gisulat sa mga estudyante diha sa pisara, ug itudlo nga ang katapusang panalangin nga atong madawat sa pagsunod sa mga sugo sa Dios mao ang kahimayaan. Dapita ang mga estudyante sa pagpili og usa sa mga sugo diha sa pisara, ug hangyoa sila sa paghulagway sa ubang mga panalangin nga atong madawat sa pagsunod niana nga sugo.

• Agig dugang sa pagkahibalo nga kita mapanalanginan kon kita mosunod sa mga sugo, unsa pa ang makatabang nato sa pagsunod sa usa ka sugo kon kini lisud nga buhaton?

Ipakita ang mosunod nga istorya ni Lucy Walker. Ipasabut nga si Lucy mao ang usa sa daghang asawa ni Joseph Smith. Dapita ang usa ka estudyante sa pagbasa og kusog sa istorya. Hangyoa ang klase sa pagsunod, nga mangita kon unsa ang inisyal nga reaksyon ni Lucy Walker sa baruganan sa dinaghan nga kaminyoon ug unsay iyang gibuhat aron makaangkon og pagpamatuod niana nga baruganan.

“Sa dihang unang gihisgutan ni Propeta Joseph Smith ang baruganan sa dinaghan nga kaminyoon ngari nako gibati nako ang kasuko ug maong misulti ko kaniya, tungod sa akong mga pagbati ug edukasyon nga supak sa bisan unsa [niana nga] matang. Apan gipaniguro niya kanako nga kini nga doktrina gipadayag ngadto kaniya sa Ginoo, ug nga ako adunay katungod sa pagdawat og pagpamatuod sa balaang gigikanan niini alang sa akong kaugalingon. Gitambagan ko niya nga mag-ampo sa Ginoo” (Lucy Walker, affidavit, Disyembre 17, 1902, Church History Library, Salt Lake City).

“O, nag-ampo gyud ko og maayo. … Hapit na ang kadlawon pagkahuman sa lain na pod nga gabii nga walay kinatulgan. Samtang nagluhod ko nga mainitong nangamuyo, ang akong kwarto napuno sa balaang impluwensya. Ngari nako ikatandi kini sama sa mahayag nga bidlisiw sa adlaw nga milusot sa maitom nga panganud.

“… Ang akong kalag napuno sa kalma, matam-is nga kalinaw nga sukad wala nako nasinati kaniadto. Hilabihan nga kalipay ang mipuno sa akong tibuok pagkatawo ug ako nakadawat og gamhanan ug dili masalikway nga pagpamatuod sa kamatuoran sa [dinaghan nga kaminyoon]. Kini nga pagpamatuod naghatag og gamhanang impluwensya ngadto sa kalag bisan sa tanang tintasyon ug mga pagsulay sa kinabuhi” (Lucy Walker Kimball, “Brief Biographical Sketch,” Church History Library, Salt Lake City, 11).

• Unsay gibuhat ni Lucy Walker aron makaangkon og pagpamatuod niining malisud nga sugo?

• Sa unsang paagi kaha ang ehemplo ni Lucy Walker makatabang og usa ka tawo nga naglisud sa pagdawat o pagsunod og sugo gikan sa Dios?

Hangyoa ang mga estudyante sa paghunahuna og usa ka tawo nga ilang personal nga nailhan o gikan sa mga kasulatan kinsa misunod og malisud nga sugo ug napanalanginan tungod sa iyang pagkamasulundon. Hangyoa usab sila sa pagkonsiderar unsa ang gibuhat niana nga tawo nga nakatabang niya nga magmasulundon. Dapita ang pipila ka mga estudyante sa pagpakigbahin sa ilang mga ehemplo ngadto sa klase. Ikonsiderar ang pagpakigbahin sa imong kaugalingong ehemplo.

Ipamatuod nga kita makadawat sa mga panalangin sa Dios kon kita mosunod sa Iyang mga sugo, bisan kon kini lisud nga buhaton. Awhaga ang mga estudyante sa pagtino unsay ilang mabuhat sa pagtabang nila nga mas makasunod sa mga sugo sa Dios.

Dapita ang usa ka estudyante sa pagbasa og kusog sa Doktrina ug mga Pakigsaad 132:38–40. Hangyoa ang klase sa pagsunod, nga mangita sa uban nga naghimo sa baruganan sa dinaghan nga kaminyoon.

• Sumala sa bersikulo 39, ngano nga importante nga ang dinaghan nga kaminyoon ipahigayon niadtong kinsa naghupot “sa mga yawe niini nga gahum”—nagpasabut sa mga yawe sa priesthood sa pagbugkos? (Kini nagpakita nga ang Ginoo mitugot sa mga kaminyoon.)

• Sumala sa bersikulo 40, unsa ang gisulti sa Ginoo nga Iyang buhaton pinaagi ni Joseph Smith? (Itudlo nga ang paghimo sa dinaghan nga kaminyoon kabahin “sa pagpahiuli sa tanang mga butang” [D&P 27:6] gikan sa nangaging mga dispensasyon.)

I-summarize ang Doktrina ug mga Pakigsaad 132:41–48 pinaagi sa pagpasabut nga ang Ginoo naghisgot sa hilisgutan bahin sa panapaw sumpay sa dinaghan nga kaminyoon. Ang Ginoo mitudlo nga kon si bisan kinsa ang naghimo sa dinaghan nga kaminyoon ubos sa mga sirkumstansya nga wala itugot sa Ginoo, siya sad-an sa panapaw. Ang Ginoo misiguro sa Propeta nga ang tanang mga kaminyoon, lakip sa dinaghan nga kaminyoon, nga gipahigayon “sa [Iyang] pulong ug sumala sa [Iyang] balaod” (bersikulo 48) ug pinaagi sa gahum sa priesthood sa pagbugkos (bersikulo 46) “pagaduawon sa mga panalangin … ug [walay] panghimaraut diha sa yuta ug didto sa langit” (bersikulo 48).

Dapita ang usa ka estudyante sa pagbasa og kusog sa Doktrina ug mga Pakigsaad 132:49–50. Hangyoa ang klase sa pagsunod, nga mangita sa mga panalangin nga gisaad sa Ginoo kang Joseph Smith.

• Unsa nga mga panalangin ang gisaad sa Ginoo kang Joseph Smith?

• Sumala sa bersikulo 50, ngano nga ang Ginoo misaad ni Joseph Smith sa samang mga panalangin nga Iyang gihatag ni Abraham?

Doktrina ug mga Pakigsaad 132:51–66

Ang Ginoo mitambag ni Emma Smith ug mihatag og mga instruksyon kabahin sa dinaghan nga kaminyoon

Hangyoa ang mga estudyante sa pagkonsiderar ngano nga ang sugo sa pagbuhat sa dinaghan nga kaminyoon lisud dili lang ni Propeta Joseph Smith apan ilabi na sa iyang asawa nga si Emma. Dapita ang usa ka estudyante sa pagbasa og kusog sa mosunod nga parapo [paragraph]:

Ang pagkamasulundon sa Propeta sa baruganan sa dinaghan nga kaminyoon usa ka lisud kaayong pagsulay alang kaniya ug sa iyang pinalangga kaayong asawa nga si Emma. Bisan pa sa iyang pag-uyon niadtong Mayo 1843 nga si Joseph magminyo og dugang nga mga asawa, si Emma padayong naglisud sa pagdawat sa pagbuhat sa dinaghan nga kaminyoon. “Usab-usab ang iyang panan-aw sa dinaghan nga kaminyoon, dunay higayon nga nagsuporta siya niini ug sa ubang mga higayon misaway niini” (“Plural Marriage in Kirtland and Nauvoo,” Gospel Topics, topics.lds.org). Sumala sa narekord sa Doktrina ug mga Pakigsaad 132:51-57, ang Ginoo piho nga namulong sa Iyang “sulugoon nga babaye,” nga si Emma, naghatag kaniya og tambag ug instruksyon kabahin sa dinaghan nga kaminyoon.

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 132:52–54, 56. Hangyoa ang klase sa pagsunod, nga mangita sa mga sugo sa Ginoo ug sa mga saad ngadto ni Emma Smith.

• Unsa ang gisugo sa Ginoo nga buhaton ni Emma?

Itudlo nga ang pulong laglag sumala sa paggamit niini nga mga bersikulo nagpasabut sa pagsalikway o ipahimulag gikan sa Dios (tan-awa sa Mga Buhat 3:22–23; 1 Nephi 22:20; D&P 25:15). Si Propeta Joseph Smith nakadawat og sama nga estrikto nga pasidaan nga siya pagalaglagon, o isalikway, kon dili siya mohimo sa dinaghan nga kaminyoon ug itudlo kini ngadto sa uban (tan-awa sa Biography and Family Record of Lorenzo Snow [1884], 69–70).

• Unsa ang gisaad sa Ginoo kang Emma Smith kon siya magmasulundon sa Iyang mga sugo?

I-summarize ang Doktrina ug mga Pakigsaad 132:57–62 pinaagi sa pagpasabut nga ang Ginoo misulti ni Emma nga Siya “uban sa [iyang bana, si Joseph], sama nga [Siya] nakig-uban ni Abraham” (bersikulo 57). Ang Ginoo misubli nga kadtong kinsa mosulod sa dinaghan nga kaminyoon sumala sa Iyang balaod ug awtoridad “wala makasala,” o gidawat sa Ginoo (bersikulo 61).

Basaha og kusog ang Doktrina ug mga Pakigsaad 132:63, nga magsugod sa mga pulong nga “kay sila gihatag ngadto kaniya.” Hangyoa ang klase sa pagsunod, nga mangita sa rason nga gihatag sa Ginoo sa pagpasiugda sa paghimo sa dinaghan nga kaminyoon.

• Unsa ang gipasabut sa mga pulong nga “modaghan ug mopuno sa yuta”?

Dapita ang usa ka estudyante sa pagbasa og kusog sa Jacob 2:30. Hangyoa ang klase sa pagsunod, nga mangita kon sa unsa nga paagi kini nga bersikulo makatabang kanato nga mas makasabut sa mga pagtulun-an sa Ginoo nga narekord sa Doktrina ug mga Pakigsaad 132:63.

• Unsa ang gipasabut sa “mopasanay og binhi ngadto [sa Ginoo]” (Jacob 2:30)?

• Base sa Jacob 2:30 ug Doktrina ug mga Pakigsaad 132:63, unsa ang usa ka rason nga ang Ginoo mipasiugda sa dinaghan nga kaminyoon? (Human makatubag ang mga estudyante, isulat sa pisara ang mosunod nga baruganan: Ang Ginoo usahay moestablisar sa dinaghan nga kaminyoon aron makahatag og dugang nga mga oportunidad alang sa Iyang mga anak sa pagpasanay og matarung nga mga anak ngadto Kaniya.)

Itudlo nga ang mga paningkamot sa unang mga Santos sa pagsunod sa baruganan sa dinaghan nga kaminyoon “miresulta sa pagkatawo sa daghang mga anak diha sa mga panimalay sa matinud-anong mga Santos sa Ulahing mga Adlaw” (“Plural Marriage and Families in Early Utah,” Gospel Topics, topics.lds.org; tan-awa usab sa commentary sa manwal sa estudyante alang sa Doktrina ug mga Pakigsaad 132:63).

Tabangi ang mga estudyante sa pagtubag og lisud nga mga pangutana

Ang mga estudyante mapangutana og lisud nga mga pangutana mahitungod sa Simbahan sa tibuok nilang kinabuhi. Ang paghatag sa mga estudyante og husto nga impormasyon ug pagtabang kanila nga makakita og kasaligang mga tinubdan makatabang nila sa paghunahuna ug sa pagpasabut sa lisud nga mga hilisgutan. Ang pagtugot sa mga estudyante nga maghisgot ug magpraktis sa pagtubag og lisud nga mga pangutana sa usa ka palibut nga puno sa pagtuo makalig-on sa ilang pagsalig sa pakig-istorya sa uban mahitungod sa ebanghelyo.

Pahinumdom: Kon ang mga estudyante adunay mga pangutana kabahin sa gihimo ni Joseph Smith sa pagbuhat og dinaghan nga kaminyoon, i-refer ngadto sa Gospel Topics essay “Plural Marriage in Kirtland and Nauvoo” (topics.lds.org) aron matabangan nga matubag ang ilang mga pangutana.

Opisyal nga Pahayag 1

Si Presidente Wilford Woodruff miisyu sa Manipesto, nga misangpot sa paghunong sa paghimo sa dinaghan nga kaminyoon diha sa Simbahan

I-summarize ang Opisyal nga Pahayag 1 pinaagi sa pagpasabut nga human makabalhin ang mga Santos ngadto sa Walog sa Salt Lake, ang dinaghan nga kaminyoon dayag na nga gihimo. Samtang ang dinaghan nga kaminyoon mikatap na diha sa mga Santos, morag wala kini himoa sa kadaghanan sa hamtong nga mga miyembro sa Simbahan. Gikan sa mga 1860 ngadto sa mga 1880, ang gobyerno sa Estados Unidos mipasar og mga balaod sa pagpahunong niini. Niadtong Septyembre 25, 1890, human mainampoong nangayo og giya gikan sa Ginoo ug nakadawat og pagpadayag, si Presidente Wilford Woodruff miisyu sa Manipesto, nga nagtambag sa mga miyembro sa Simbahan “sa paglikay sa paghimo sa bisan unsa nga kaminyoon nga gidili sa balaod sa yuta” (Opisyal nga Pahayag 1). Bisan og diha pay pipila nga nagpahigayon og dinaghan nga kaminyoon human kini maisyu, ang Manipesto sa katapusan mosangpot sa pagtapos sa paghimo sa dinaghan nga kaminyoon sa mga miyembro sa Simbahan.

Tapusa pinaagi sa pagpamatuod nga si Propeta Joseph Smith ug ang misunod nga mga propeta nakadawat ug matinud-anong misunod sa mga sugo sa Dios.

Dugang nga Ideya sa Pagtudlo

Opisyal nga Pahayag 1.

Kon itugot sa panahon, ang mosunod nga ideya sa pagtulun-an mahimong magamit puli sa pag-summarize sa Opisyal nga Pahayag 1.

Dapita ang usa ka estudyante sa pagbasa og kusog sa mosunod nga parapo [paragraph]. Hangyoa ang klase sa pagpaminaw sa pipila ka mga kalisdanan nga nasinati sa mga miyembro sa Simbahan samtang sila misunod sa sugo sa Ginoo sa pagbuhat sa dinaghan nga kaminyoon.

Human mibalhin ang mga Santos sa kasadpan ngadto sa Walog sa Salt Lake, ang paghimo sa dinaghan nga kaminyoon nahimong mas midaghan ug sa katapusan dayag nga gitudlo sa mga lider sa Simbahan. Sa katuigan nga misunod, daghang relihiyoso ug politikanhong mga lider sa Estados Unidos dakong supak sa dinaghan nga kaminyoon, nagkonsiderar niini nga imoral ug dili sibilisado. Ang gobyerno sa Estados Unidos mipasar og mga balaod sa pagpahunong sa paghimo sa dinaghan nga kaminyoon, nga misangpot sa pagkapriso sa gatusan ka mga Santos sa Ulahing mga Adlaw niadtong mga 1880. Nagtuo nga dili makiangayon kini nga mga balaod, daghang mga miyembro sa Simbahan, lakip sa mga lider sa Simbahan, nagtago-tago aron makalikay nga madakpan ug mapriso. Daghang mga pamilya nag-antus gikan sa kunsumisyon, kaguol, ug kakabus. (Tan-awa sa (“The Manifesto and the End of Plural Marriage,” Gospel Topics, topics.lds.org.) Ang mga balaod batok sa daghan og asawa napasar niadtong 1882 ug 1887 mikuha usab sa katungod sa mga lalaki kinsa naghimo og dinaghan nga kaminyoon sa pagbotar ug paghupot og politikanhong katungdanan, misalikway sa katungod sa mga babaye sa pagbotar sa Teritoryo sa Utah, mipaundang sa Simbahan isip usa ka legal nga institusyon, ug nagtugot sa gobyerno sa pag-imbargo sa mga kabtangan sa Simbahan, lakip sa mga templo. Ang Simbahan mikwestyon niini nga mga balaod nga dili pinasubay sa batakang balaod, apan kini sa katapusan gipaluyohan kini sa Korte Suprema sa Estados Unidos.

• Kon ikaw nakasinati sa maong oposisyon sa imong mga paningkamot sa pagtuman sa usa ka sugo sa Ginoo, unsa kaha ang imong reaksyon?

Ipasabut nga kining malisud nga mga sirkumstansya misangpot nga nagtinguha si Presidente Wilford Woodruff sa giya sa Ginoo sa gihimo sa mga Santos kabahin sa dinaghan nga kaminyoon. Niadtong Septyembre 23–24, 1890, si Presidente Woodruff miandam sa Manipesto nga karon nailhan nga Opisyal nga Pahayag 1 diha sa Doktrina ug mga Pakigsaad. Ang Manipesto giisyu dayon niadtong Septyembre 25.

Dapita ang usa ka estudyante sa pagbasa og kusog sa ikaupat nga parapo [paragraph] ug sa katapusan nga kapahayag [sentence] sa ikalima nga parapo [paragraph] sa Opisyal nga Pahayag 1. Hangyoa ang klase sa pagpangita sa unsay gitudlo ni Presidente Woodruff nga buhaton sa mga Santos.

• Unsa ang gisugo ni Presidente Woodruff nga buhaton sa mga Santos?

• Unsa kaha ang reaksyon sa mga miyembro sa Simbahan sa Manipesto?

Ipasabut nga si Elder Brigham H. Roberts, kinsa nagserbisyo kaniadto isip sakop sa Korum sa Seventy, nagsakay og tren padulong sa Siyudad sa Salt Lake sa dihang nakakita siya og artikulo sa pamantalaan nga nagpahibalo sa Manipesto ni Presidente Woodruff. Dapita ang usa ka estudyante sa pagbasa sa mosunod nga kinutlo gikan sa diary ni Elder Roberts:

“Nabasahan nako [ang mga ulohan sa pamatalaan] uban sa katingala. Apan sa wala madugay human sa akong pagbasa niini, kay sama sa kidlap sa kahayag sa akong tibuok kalag ang espiritu miingon—‘Maayo ra ang tanan,’ mao nga napasar kini. Dayon nagsugod ko sa pagpamalandong sa maong butang. Naghunahuna ko sa tanang mga Santos nga nag-antus sa pagpaluyo niana nga doktrina, nakahinumdom ko sa akong kaugalingong pagbiya [ngadto sa England], ang akong kaugalingong pagkabilanggo, naghunahuna ako niana alang sa uban. Nakahinumdom ko unsa nga mga sakripisyo ang gihimo sa akong mga asawa alang niini; unsa ang gihimo sa uban alang niini. Gisangyaw namo kini, gipaluyohan ang pagkabalaan niini gikan sa pulpito, sa pamantalaan, gikan sa pakigpulong. Ang among komunidad milahutay sa tanang matang sa akusasyon gikan sa kalibutan tungod niini—ug kini mao ba ang katapusan? Nakakat-on ko sa pagpaabut nga ang Dios mopaluyo niana nga baruganan ug sa iyang mga Santos kinsa naghimo niini, ug ang pagsalikway niini sa ingon niining paagiha usa ka tinalawan nga paagi nga sa akong pagsige og hunahuna niini mas dili na ko ganahan niini. … Medyo nasagmuyo ako, ug mibati nga nahugno ug gikastigo” (B. H. Roberts Diary, B. H. Roberts Papers, University of Utah, kinutlo sa Ronald W. Walker, “B. H. Roberts and the Woodruff Manifesto,” BYU Studies Quarterly, vol. 22, nu. 3 [1982], 364).

• Ngano nga dako kaayo nga hagit alang kang Elder Roberts ang pagdawat sa tambag nga anaa sa Manipesto?

Dapita ang mga estudyante sa pagbasa og hilum sa unang parapo [paragraph] sa “Excerpts from Three Addresses by President Wilford Woodruff Regarding the Manifesto.” Hangyoa ang mga estudyante sa pagpangita sa usa ka doktrina nga gitudlo ni Presidente Woodruff sa mga miyembro sa Simbahan sa dihang ang Manipesto gipresentar alang sa pagpaluyo nga boto atol sa kinatibuk-ang komperensya.

• Unsa nga doktrina ang gitudlo ni Presidente Woodruff sa mga miyembro sa Simbahan? (Ang mga estudyante kinahanglan moila sa doktrina nga susama sa mosunod: Ang Ginoo dili gayud motugot sa Presidente sa Simbahan nga mopahisalaag sa Simbahan.)

• Sa unsang paagi kaha ang pagsabut niini nga doktrina nakatabang sa mga miyembro sa Simbahan, sama ni Elder Roberts, kinsa naglisud sa pagdawat sa tambag nga anaa sa Manipesto?

Dapita ang duha ka estudyante nga magpuli-puli sa pagbasa og kusog sa ikaunom ug ikapito nga parapo [paragraph] sa “Excerpts from Three Addresses by President Wilford Woodruff Regarding the Manifesto [Mga Kinutlo gikan sa Tulo ka Pakigpulong ni Presidente Wilford Woodruff Bahin sa Manipesto].” Hangyoa ang klase sa pagsunod, nga mangita unsay gipadayag sa Ginoo nga mahitabo kon ang mga Santos wala mohunong sa paghimo og dinaghan nga kaminyoon.

• Unsay mahitabo kon ang mga Santos wala mohunong sa paghimo og dinaghan nga kaminyoon?

• Unsa ang gisulti ni Presidente Woodruff nga andam niyang buhaton kon ang Dios wala pa mohatag kaniya niini nga pagpadayag ug sugo?

• Unsa nga doktrina ang atong makat-unan mahitungod sa mga propeta ug pagpadayag gikan sa mga pagtulun-an ni Presidente Woodruff? (Tabangi ang mga estudyante sa pag-ila sa mosunod nga doktrina: Ang Ginoo naghatag og padayon nga pagpadayag ngadto sa Iyang mga propeta sumala sa panginahanglan ug mga sirkumstansya sa Iyang Simbahan ug katawhan. Isulat kini nga doktrina diha sa pisara.)

• Ngano kaha nga importante nga makahibalo nga ang Ginoo naghatag og padayon nga pagpadayag ngadto sa Iyang mga propeta sumala sa mga panginahanglan ug mga sirkumstansya sa Iyang Simbahan ug katawhan?

Dapita ang usa ka estudyante nga humanon sa pagbasa og kusog ang istorya ni Elder Roberts. Hangyoa ang klase sa pagpaminaw unsay nakatabang niya nga molambo ang pagpamatuod sa Manipesto.

“Sa wala madugay nagsugod ko sa paghinumdom sa kidlap sa kahayag nga miabut nako sa dihang una akong nakadungog [sa Manipesto], ug sa katapusan ang akong mga pagbati nahisubay niini. Tingali ako nakalapas sa pagpadayon sa unang pagpamatuod nga akong nadawat kabahin niini, ug nagtugot sa akong kaugalingong paghukom, ug sa akong kaugalingong mubo og panan-aw, tawhanong rason sa pagpakigbatok sa inspirasyon sa Dios ug sa pagpamatuod nga gihatag niini nga ang Manipesto eksakto. Sa dihang kini nga kamatuoran nagsugod sa pagsulod sa akong hunahuna naghinulsol ko sa akong mga sayop ug nanghangyo nga matinguhaon sa espiritu sa Dios alang sa pagpamatuod ug sa hinay-hinay miabut kini” (B. H. Roberts Diary, kinutlo sa “B. H. Roberts and the Woodruff Manifesto,” 365).

• Sa unsa nga paagi nga ang kasinatian ni Elder Roberts makatabang sa usa ka tawo nga naglisud sa pagsunod sa lider ug sa tambag sa mga propeta sa Ginoo?

Ipasabut nga adunay pipila ka mga miyembro sa Simbahan nga mipadayon sa pagsulod ngadto sa bag-ong dinaghan nga mga kaminyoon human nahatag ang Manipesto. Niadtong 1904, si Presidente Joseph F. Smith mihatag og ikaduhang manipesto ug mipahibalo “nga gidili ang tanang [dinaghan] nga mga kaminyoon, ug kon si bisan kinsa nga opisyal o miyembro sa Simbahan nga mopadayon sa pagpahigayon o mosulod ngadto sa maong kaminyoon siya … i-excommunicate” (sa Conference Report, Abr. 1904, 75). Kini nga polisiya nagpadayon karon.

Tapusa pinaagi sa pagpakigbahin sa imong pagpamatuod nga ang Ginoo naggiya sa Simbahan ug sa mga miyembro niini sumala sa ilang mga sirkumstansya pinaagi sa pagpadayag ngadto sa Iyang mga propeta.