Leksyon 14

Doktrina ug mga Pakigsaad 35–36; 39–40

Pasiuna ug Timeline

Sa tingtugnaw sa 1830, si Sidney Rigdon ug Edward Partridge mibiyahe gikan sa Ohio ngadto sa New York aron sa pakigkita ni Propeta Joseph Smith. Ang duha ka lalaki nakadungog sa gipahiuli nga ebanghelyo nga gisangyaw ni Oliver Cowdery, Parley P. Pratt, Ziba Peterson, ug Peter Whitmer Jr. sa Kirtland, Ohio. Sa wala madugay human si Sidney ug Edward miabut sa Fayette, nadawat ni Joseph Smith ang mga pagpadayag alang sa matag usa kanila. Sa pagpadayag nga girekord diha sa Doktrina ug mga Pakigsaad 35, ang Ginoo mihatag ni Sidney Rigdon og piho nga mga responsibilidad sulod sa bag-ong gipahiuli nga Simbahan. Sa pagpadayag nga girekord diha sa Doktrina ug mga Pakigsaad 36, gitawag sa Ginoo si Edward Partridge sa pagsangyaw sa ebanghelyo.

Human sa pipila ka semana, si James Covel, kinsa usa ka Methodist sulod sa mga 40 ka tuig, mibisita ni Propeta Joseph Smith ug nakigsaad sa Ginoo sa pagsunod sa bisan unsa nga sugo nga ihatag kaniya pinaagi sa Propeta. Ang sangputanan, sa Enero 5, 1831, nadawat sa Propeta ang pagpadayag nga girekord diha sa Doktrina ug mga Pakigsaad 39. Diha niini, misugo ang Ginoo ni James Covel nga magpabunyag ug magsangyaw sa gipahiuli nga ebanghelyo. Hinoon, sa adlaw human ang pagpadayag nadawat, si James mibiya sa Fayette, New York, nga wala mabunyagi ug “mibalik sa iyang kanhi nga mga baruganan ug katawhan” (Manuscript History of the Church, vol. A-1, p. 92, josephsmithpapers.org). Dayon ang Ginoo mihatag ni Joseph Smith sa pagpadayag nga girekord diha sa Doktrina ug mga Pakigsaad 40, nagpasabut nga ang kang James Covel nga “kahadlok sa pagpanggukod ug ang mga kabalaka sa kalibutan maoy nakaingon kaniya sa pagsalikway sa pulong [sa Dios]” (D&P 40:2).

Oktubre 29, 1830Misangyaw si Oliver Cowdery, Parley P. Pratt, Ziba Peterson, ug Peter Whitmer Jr. sa ebanghelyo didto sa amihanang silangan sa Ohio sulod sa pipila ka mga semana.

Sayo sa Disyembre 1830Si Sidney Rigdon ug Edward Partridge mibiyahe gikan sa Ohio ngadto sa New York aron sa pakigkita ni Propeta Joseph Smith.

Disyembre 7, 1830Ang Doktrina ug mga Pakigsaad 35 nadawat.

Disyembre 9, 1830Ang Doktrina ug mga Pakigsaad 36 nadawat.

Disyembre 11, 1830Si Edward Partridge gibunyagan ni Joseph Smith.

Enero 2, 1831Ang ikatulong komperensya sa Simbahan gihimo, ug gianunsyo ni Joseph Smith nga ang mga Santos kinahanglang magpundok sa Ohio.

Enero 1831Si James Covel, usa ka ministro sa Methodist, nahimong kaila ni Joseph Smith.

Enero 5, 1831Ang Doktrina ug mga Pakigsaad 39 nadawat.

Enero 6, 1831Ang Doktrina ug mga Pakigsaad 40 nadawat.

Mga Sugyot alang sa Pagtudlo

Doktrina ug mga Pakigsaad 35

Nagtawag ang Ginoo ni Sidney Rigdon ngadto sa mas dako nga trabaho

Sa dili pa ang klase, isulat ang mosunod nga pangutana diha sa pisara: Unsa ang imong nasinati nga nagtabang kanimo nga mahibalo nga ang Ginoo nakaila kanimo ug interesado sa palakaw sa imong kinabuhi?

Kon nagsugod ang klase, dapita ang pipila ka mga estudyante sa pagpakigbahin sa ilang mga kasinatian uban sa klase.

Samtang ang mga estudyante nagtuon sa Doktrina ug mga Pakigsaad 35 karon, dapita sila sa pagpangita alang sa usa ka kamatuoran nga nagpakita nga ang Ginoo nakaila kanila ug interesado sa palakaw sa ilang mga kinabuhi.

Ipasabut nga sa tinglarag sa 1830, si Oliver Cowdery, Parley P. Pratt, Ziba Peterson, ug Peter Whitmer Jr. mibiya gikan sa New York padulong sa ilang misyon ngadto sa kasadpang Missouri (tan-awa sa D&P 32). Gikumbiser ni Parley P. Pratt ang grupo sa paghunong diha sa dapit sa Kirtland, Ohio, sa ilang paglakaw. Samtang didto, ilang gipakigbahin ang gipahiuli nga ebanghelyo ngadto ni Sidney Rigdon, usa ka kaila ni Parley ug usa ka ministro sa Reformed Baptist, ug sa mga miyembro sa iyang kongregasyon. Sa mubo nga panahon, si Sidney Rigdon ug labaw sa 120 ka tawo gibunyagan diha dapit sa Kirtland, gibana-bana nga gidoble ang gidak-on sa mga miyembro sa Simbahan. Matinguhaong makigkita ni Propeta Joseph Smith, si Sidney Rigdon ug ang iyang higala nga si Edward Partridge mibiyahe ngadto sa Fayette, New York, nga niabut sayo sa Disyembre 1830. Human sa ilang pag-abut sa Fayette, si Sidney mipahayag sa iyang tinguha nga mahibalo sa kabubut-on sa Ginoo kalabut kaniya. Agi og tubag sa iyang pangutana, nadawat ni Joseph Smith ang pagpadayag nga gilangkob diha sa Doktrina ug mga Pakigsaad 35.

Dapita ang mga estudyante sa pagbasa og hilum sa Doktrina ug mga Pakigsaad 35:1–3 nga mangita alang sa unsay gisulti sa Ginoo ngadto ni Sidney Rigdon.

• Unsa nga mga pulong o mga hugpong sa mga pulong ang nagpakita nga ang Ginoo nakamatngon ni Sidney?

• Unsa ang gitudlo sa bersikulo 3 kanato mahitungod sa unsay nahibaloan sa Ginoo ug buhaton alang kanato? (Human matubag sa mga estudyante, isulat ang mosunod nga doktrina diha sa pisara: Ang Ginoo nakaila kanato ug nagtabang sa pag-andam kanato alang sa buhat nga Siya mitawag kanato sa pagbuhat.)

Aron sa pagtabang sa imong estudyante nga mas makasabut og maayo ug mobati sa importansya niini nga doktrina, ipakita ang mosunod nga pamahayag ni Presidente Henry B. Eyring sa Unang Kapangulohan, ug dapita ang usa ka estudyante sa pagbasa og kusog:

“Ang inyong kinabuhi mabinantayong gibantayan, ingon man ang ako. Ang Ginoo nahibalo og unsay Iyang gusto nga angay ninyong buhaton ug unsay angay ninyong mahibaloan sa pagbuhat niini. Siya maloloy-on ug Siya nakahibalo sa tanan. Busa, ikaw makahimo uban ang pagsalig sa pagpaabut nga Siya nag-andam og mga kahigayunan alang kanimo nga makakat-on alang sa serbisyo nga imong ihatag. Dili ka makaila niadto nga mga kahigayunan sa hingpit, ingon nga ako dili makaila. Apan kon imong ibutang ang espiritwal nga mga butang og una sa imong kinabuhi, ikaw mapanalanginang mobati nga gigiyahan ngadto sa siguro nga pagkat-on, ug ikaw maagni sa pagbuhat og labaw ka maayo. Kamo makaila sa dili madugay nga ang inyong gahum sa pag-alagad gidugangan, ug kamo magmapasalamaton” (Henry B. Eyring, “Education for Real Life,” Ensign Okt. 2002, 18–19).

• Sumala ni Presidente Eyring, unsa ang pipila ka mga paagi ang Ginoo makaandam kanato alang sa buhat nga Siya nagtawag kanato sa pagtuman?

• Unsa ang atong mabuhat nga makadawat og dugang nga paggiya gikan sa Ginoo aron kita makaandam sa pagbuhat sa Iyang buhat?

Dapita ang usa ka estudyante sa pagbasa og kusog sa Doktrina ug mga Pakigsaad 35:4–6. Hangyoa ang klase sa pagsunod, nga mangita kabahin sa “mahinungdanon nga buhat” (D&P 35:3) nga giandam sa Ginoo ni Sidney Rigdon nga tumanon.

• Sumala sa bersikulo 4, sa unsa nga paagi si Sidney sama ni Juan Bautista? (Ipasabut nga sama ni Juan, si Sidney miandam sa mga tawo pinaagi sa iyang pangalagad sa pagpamati ug pagdawat sa kahingpitan sa ebanghelyo ni Jesukristo. Kadaghanan, kon dili ang tanan, nga gibana-bana og 120 ka mga tawo nga pagsugod gibunyagan didto sa dapit sa Kirtland mga miyembro sa kongregasyon nga Reformed Baptist ni Sidney.)

• Sumala sa bersikulo 6, unsa nga bahin sa “mahinungdanon nga buhat” ang Ginoo nagtawag ni Sidney sa pagbuhat?

I-summarize ang Doktrina ug mga Pakigsaad 35:7–12 pinaagi sa pagpasabut nga gisultihan sa Ginoo si Sidney Rigdon kabahin sa mahinungdanon nga buhat sa Pagpahiuli sa ebanghelyo. Gitudlo sa Ginoo nga Siya nagbuhat og mga “milagro, mga timailhan, ug mga kahibulongan” sumala sa hugot nga pagtuo “niadtong kinsa motuo sa [Iyang] ngalan” (bersikulo 8).

Dapita ang mga estudyante sa pagbasa og hilum sa Doktrina ug mga Pakigsaad 35:13–14 nga mangita sa mga kinaiya niadtong kinsa gitawag sa Ginoo sa pagtabang sa Iyang buhat ug unsa ang buhaton sa Ginoo sa pagtabang kanila. Sa dili pa mobasa ang mga estudyante, ipasabut nga ang “pag-ayag” nagpasabut sa pagbulag sa lugas gikan sa pungango ug panit niini. Kini nga pag-agid-agid nagpasabut ngadto sa mga paningkamot sa Ginoo sa pagpundok niadtong kinsa andam sa pagdawat sa ebanghelyo ug sa pagbulag kanila gikan niadtong kinsa dili andam. (Timan-i: Diha sa 2013 English nga edisyon sa Doktrina ug mga Pakigsaad, ang pulong nga paggiok diha sa bersikulo 13 giilisan og pag-ayag sa pagpakita sa pulong sa orihinal nga pagpadayag.)

• Unsa nga doktrina ang atong maila diha sa bersikulo 13 mahitungod niadtong kinsa gitawag sa Ginoo sa pagtuman sa Iyang buhat? (Mahimong mogamit ang mga estudyante og lahi nga mga pulong, apan siguroha nga ilang maila ang mosunod nga doktrina: Nagtawag ang Ginoo niadtong kinsa mga mahuyang aron sa pagtuman sa Iyang buhat pinaagi sa gahum sa Iyang Espiritu.)

• Ngano kaha ang mga sulugoon sa Dios mahimong hunahunaon nga mahuyang?

• Sumala sa bersikulo 14, unsay gisaad sa Ginoo nga buhaton alang niadtong kinsa nag-alagad Kaniya?

• Giunsa kaha sa imong hunahuna ang mga kamatuoran nga gitudlo diha sa mga bersikulo 13–14 pagtabang ni Sidney Rigdon niini nga panahon sa iyang kinabuhi? Dapita ang mga estudyante sa pagpamalandong kon unsay kahulugan niini nga mga kamatuoran alang kanila sa ilang mga sitwasyon karon.

I-summarize ang Doktrina ug mga Pakigsaad 35:17–27 pinaagi sa pagpasabut nga gisultihan sa Ginoo si Sidney Rigdon nga siya mipanalangin ni Joseph Smith diha sa iyang kahuyang. Gitawag usab sa Ginoo si Sidney Rigdon sa pagbantay sa Propeta, sa pagtabang kaniya sa pagbuhat sa paghubad sa Biblia, sa pagsangyaw sa ebanghelyo, ug sa paghupot sa mga pakigsaad nga iyang gihimo.

Doktrina ug mga Pakigsaad 36

Ang Ginoo nagpasaylo sa mga sala ni Edward Partridge ug nagtawag kaniya sa pagsangyaw sa ebanghelyo

Ipasabut nga sa dihang miabut ang mga misyonaryo sa Ohio sa tinglarag sa 1830, kadaghanan sa mga miyembro sa kongregasyon ni Sidney Rigdon, lakip ni Lydia Partridge, mituo sa ilang mensahe ug sa wala madugay gibunyagan. Ang bana ni Lydia, si Edward Partridge, nagpabilin nga madudahon ug buot nga makigkita sa Propeta sa dili pa siya mosugot nga pagabunyagan. Human mibiyahe ngadto sa New York ug makigkita sa Propeta, si Edward mitinguha sa pagpabunyag. Duha ka adlaw sa wala pa ang iyang bunyag, ang Ginoo mihatag kaniya og pagpadayag pinaagi ni Joseph Smith. I-summarize ang Doktrina ug mga Pakigsaad 36 pinaagi sa pagpasabut nga ang Ginoo mipasaylo sa mga sala ni Edward ug mitawag kaniya sa pagsangyaw sa ebanghelyo. Misulti siya ni Edward nga ang Espiritu Santo motudlo kaniya sa “malinawon nga mga butang sa gingharian” (D&P 36:2).

Mag-summarize og tag-as nga mga hut-ong sa kasulatan

Pinaagi sa pag-summarize og mga bahin sa hut-ong sa kasulatan kay sa pagbiya niini, makatabang ka sa mga estudyante sa paghupot sa tema sa istorya ug sa kinatibuk-ang kahulugan nga tataw diha sa ilang mga hunahuna. Ang pag-summarize naghatag og sukaranan alang sa pagdiskubre ug pagsabut sa mga baruganan o mga doktrina nga motungha sa kadugayan diha sa hut-ong. Ang pag-summarize makatabang usab sa pagpreserbar sa kaligdong ug sa dagan sa mensahe sa dinasig nga tagsulat.

Doktrina ug mga Pakigsaad 39

Nagsugo si Jesukristo ni James Covel sa pagpabunyag ug sa paghago diha sa Iyang ubasan

Ipakita ang mosunod nga pamahayag ni Sister Linda K. Burton, Kinatibuk-ang Presidente sa Relief Society:

“Ang pagtuman sa mga pakigsaad mahinungdanon alang sa tinuod nga kalipay” (Linda K. Burton, “Ang Gahum, Kalipay, ug Gugma sa Pagtuman sa Pakigsaad,” Liahona, Nob. 2013, 113).

• Kon ang pagtuman sa atong mga pakigsaad nagdala og kalipay, ngano kaha ang mga tawo usahay molapas niini o naghunahuna sa paglapas niini?

Samtang ang mga estudyante nagtuon sa Doktrina ug mga Pakigsaad 39–40, dapita sila sa pagpangita sa mga baruganan nga motabang kanila sa pagpabilin nga tinuod ngadto sa ilang mga pakigsaad uban sa Ginoo.

Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 39, ug hangyoa ang klase sa pagsunod, nga mangita alang kang kinsa kini nga pagpadayag gihatag ug nganong gihatag kini.

I-summarize ang Doktrina ug mga Pakigsaad 39:1–6 pinaagi sa pagpasabut nga si Jesukristo misugod niini nga pagpadayag pinaagi sa pagtudlo nga Siya mohatag niadto kinsa nagdawat Kaniya og gahum nga mahimong Iyang espirituhanong anak nga mga lalaki ug mga babaye. Kita nagdawat Kaniya kon kita nagdawat sa Iyang ebanghelyo pinaagi sa paghinulsol, pagpabunyag, ug pagdawat sa Espiritu Santo.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 39:7–12. Hangyoa ang katunga sa klase sa pagpangita alang sa unsay gitambag sa Ginoo nga buhaton ni James Covel. Hangyoa ang laing katunga sa pagpangita alang sa unsay gisaad sa Ginoo kaniya kon siya mosunod. Dapita ang mga estudyante sa pagreport unsay ilang nakit-an.

• Unsa kaha ang kahulugan nga ang kasingkasing ni James Covel “karon matarung diha sa atubangan” sa Ginoo? (bersikulo 8).

• Ngano kaha nga nagkinahanglan og dakong hugot nga pagtuo alang ni James Covel sa pagsunod sa sugo sa Ginoo aron madawat ang gipahiuli nga ebanghelyo ug magpabunyag? (Tungod kay si James Covel usa ka ministro sa Methodist, kon siya magpabunyag kinahanglan nga iyang biyaan ang iyang posisyon, mga higala, ug kinitaan nga iyang nahimo sa milabay nga 40 ka tuig.)

Ipasabut nga diha sa Doktrina ug mga Pakigsaad 39:13–24, gitawag si James Covel sa pagsangyaw sa ebanghelyo sa Ohio. Ang Ginoo nagtudlo usab kaniya kalabut sa unsay itudlo ug unsaon sa pagtudlo niini.

Doktrina ug mga Pakigsaad 40

Gipadayag sa Ginoo nganong gisalikway ni James Covel ang Iyang mga pulong

Sultihi ang mga estudyante nga sa adlaw nga nadawat ni Joseph Smith ang pagpadayag diha sa Doktrina ug mga Pakigsaad 40, mibiya si James Covel sa Fayette nga wala mabunyagi. Sumala ni Joseph Smith, si James “misalikway sa pulong sa Ginoo, ug mibalik ngadto sa iyang kanhi nga mga baruganan ug katawhan” (Manuscript History of the Church, vol. A-1, p, 92, josephsmithpapers.org).

Dapita ang mga estudyante sa pagbasa og hilum sa Doktrina ug mga Pakigsaad 40:1–3 nga mangita nganong si James Covel wala mosunod sa pulong sa Ginoo. Hangyoa ang mga estudyante sa pagreport sa unsay ilang nakit-an.

• Itandi ang Doktrina ug mga Pakigsaad 40:1 ngadto sa Doktrina ug mga Pakigsaad 39:8. Unsa ang nausab?

• Base sa unsay inyong nakat-unan mahitungod ni James Covel, unsa ang mahitabo kon kita motugyan ngadto sa kahadlok ug mabuntog sa mga kabalaka sa kalibutan? (Human matubag sa mga estudyante, isulat ang mosunod nga baruganan diha sa pisara: Ang kahadlok sa pagpanggukod ug sa mga kabalaka sa kalibutan makahimo kanato sa pagsalikway sa pulong sa Dios ug sa paglapas sa atong mga pakigsaad uban Kaniya.)

Hangyoa ang mga estudyante sa paghisgot uban sa usa ka pares kon sa unsa nga paagi sila motubag sa mosunod nga pangutana:

• Sa unsa nga mga paagi ang mga kabalaka sa kalibutan ug kahadlok sa pagpanggukod makahimo sa usa ka tawo sa pagsalikway sa mga pagtulun-an sa Dios ug palapas sa mga pakigsaad uban Kaniya?

Human sa igo nga panahon, hangyoa ang pipila ka mga estudyante sa pagpakigbahin sa ilang mga tubag ngadto sa klase.

• Unsa ang mitabang kanimo sa pagsugakod sa kahadlok sa pagpanggukod ug sa mga kabalaka sa kalibutan aron magpabilin nga matinud-anon ngadto sa Dios ug sa inyong mga pakigsaad?

Dapita ang mga estudyante sa pagpamalandong kon unsay ilang mahimo sa paglikay sa pagtugot sa kahadlok sa pagpanggukod o sa mga kabalaka sa kalibutan sa pagpugong kanila gikan sa matinud-anong pagpuyo sa ebanghelyo. Awhaga sila sa pagbuhat sa bisan unsang mga pag-aghat nga ilang madawat.

Dugang nga mga Ideya sa Pagtudlo

Doktrina ug mga Pakigsaad 35:13–14. “Ang mahuyang nga mga butang sa kalibutan”

Human mabasa ug mahisgutan sa mga estudyante ang Doktrina ug mga Pakigsaad 35:14, dapita ang usa ka estudyante sa pagbasa og kusog sa mosunod nga pamahayag ni Presidente James E. Faust (1920–2007) sa Unang Kapangulohan:

Ang Ginoo adunay importanting buhat alang sa matag usa kanato nga buhaton. Mahimo kang matingala unsaon niini paghimo. Mahimo nimong bation nga walay espesyal o labaw mahitungod kanimo o sa imong abilidad. …

Ang Ginoo makahimo og talagsaong mga milagro sa usa ka tawo nga may ordinaryong abilidad kinsa mapainubsanon, matinud-anon, ug makugihon sa pag-alagad sa Ginoo ug naninguha sa paglambo. … Kini tungod kay ang Dios mao ang katapusang tinubdan sa gahum” (James E. Faust, “Acting for Ourselves and Not Being Acted Upon,” Ensign, Nob. 1995, 47).

• Kanus-a nimo nakita ang Ginoo nagtrabaho pinaagi sa usa ka tawo nga ordinaryo ang abilidad?

Doktrina ug mga Pakigsaad 36:2. “Ang malinawon nga mga butang sa gingharian”

Dapita ang usa ka estudyante sa pagbasa og kusog sa Doktrina ug mga Pakigsaad 36:1–3. Hangyoa ang klase sa pagsunod, nga mangita alang sa unsay gitawag sa Ginoo ni Edward Partridge nga buhaton.

• Unsa ang gitawag sa Ginoo ni Edward Partridge nga buhaton?

• Unsa nga kamatuoran ang atong mailhan diha sa bersikulo 2 mahitungod sa unsay ikatudlo kanato samtang atong madawat ang Espiritu Santo diha sa atong mga kinabuhi? (Kinahanglan ang mga estudyant moila og usa ka baruganan nga susama sa mosunod: Kon atong dawaton ang Espiritu Santo diha sa atong mga kinabuhi, Siya motudlo kanato sa malinawon nga mga butang sa gingharian sa Dios.)

Ipasabut nga ang “malinawon nga mga butang sa gingharian” mao ang mga baruganan sa ebanghelyo, diin, kon sundon, mogiya ngadto sa kalinaw.

• Ngano kaha nga ang gasa sa Espiritu Santo mahinungdanon sa pagtabang kanato nga makakat-on sa malinawon nga mga butang sa gingharian sa Dios?

• Unsa ang mga ehemplo sa mga baruganan sa ebanghelyo nga, kon sundon, makagiya ngadto sa kalinaw?

Doktrina ug mga Pakigsaad 35; 39–40. Sidney Rigdon ug James Covel

Itandi ug ilahi si Sidney Rigdon ug si James Covel. Sa unsa nga paagi ang ilang mga sitwasyon susama? Unsa ang kalainan tali sa ilang mga tubag ngadto sa gipahiuli nga ebanghelyo ni Jesukristo?