Бүлэг 10
Есүс баптисм хүртсэн нь
Иохан цөлд олон жил амьдарчээ. Тэрээр тэмээний ноосоор хийсэн хувцас өмсөж зөгийн бал, царцаагаар хооллодог байв. Хүмүүс Иоханы сургаалыг сонсохоор хотуудаас ирдэг байлаа. Тэр Иохан Баптист хэмээх нэрээрээ олонд танигдсан байв.
Иохан Баптист хүмүүст Есүс Христийн тухай зааж сургадаг байв. Тэрээр хүмүүст нүглээ наманчилж баптисм хүртэх ёстойг хэлдэг байв. Нүглээ наманчилсан хүмүүст Иохан баптисм хүртээж байлаа.
Хүмүүс хэрхэн сайхан амьдрах талаар Иохан Баптистаас асуужээ. Ядуустай хуваалцаж, ямагт үнэнийг хэлж, бусдад шударга хандаж байхыг сургав. Мөн Есүс Христ удахгүй ирэх тухай хэлэв. Есүс тэдэнд Ариун Сүнсний бэлэг өгөх болно гэв.
Нэгэн өдөр Иохан Баптист хүмүүст Иордан голд баптисм хүртээж байх үед Есүс Христ түүн дээр хүрч ирэв. Тэрээр Иоханаас өөрт нь баптисм хүртээхийг хүслээ. Есүс үргэлж Бурханы зарлигуудад дуулгавартай байсан тул наманчлах шаардлагагүй гэдгийг Иохан мэддэг байв. Тиймээс Иохан Есүсийг баптисм хүртэх хэрэггүй гэж боджээ.
Гэвч Бурхан бүх хүмүүсийг баптисм хүртэхийг тушаасан. Тиймээс Есүс Иохан Баптистийг өөрт нь баптисм хүртээж өгөөч гэв. Есүс баптисм хүртэн Бурханы зарлигуудыг дагаж бидэнд үлгэр дууриал үзүүлсэн юм.
Есүсийг уснаас гарахад Ариун Сүнс Түүн дээр ирэв. “Энэ бол миний хайрт Хүү, Түүнд миний таалал оршдог” хэмээн Бурхан тэнгэрээс хэлэв. Есүс бол Бурханы Хүү мөн хэмээн Иохан Баптист гэрчлэв.
Матай 3:16–17; Иохан 1:33–36; Есүс бол Христ 150