Seksen 108
Revelesen i go long Profet Joseph Smith, long Kirtland, Ohio, 26 Disemba, 1835. Dispela seksen em i bin kisim olsem bekim long askim bilong Lyman Sherman, husat pastaim ol sios lida bin odenim em wanpela seventi na husat i bin kam long Profet wantaim wanpela askim long revelesen long mekim klia wok bilong em.
1–3, Lyman Sherman kisim fogivnes long ol sin bilong em; 4–5, Em bai go wantaim ol elda husat i lidim Sios; 6–8, Bikpela i singautim em long autim toktok bilong gospel na strongim ol brata bilong em.
1 Tru olsem Bikpela i tokim yu, wokman bilong mi Lyman: Mi fogivim ol sin bilong yu, long wanem yu bin harim tok bilong mi long kam antap long dispela ples long dispela moning long kisim kaunsel long em husat mi makim.
2 Olsem na, larim sol bilong yu i mas malolo long stap bilong yu long sait bilong spirit, na noken agensim moa nek bilong mi.
3 Na kirap na wok na lukaut moa long nau na i go bihain long holimpas ol promis bilong yu, we yu bin mekim na mekim i stap, na Bikpela bai blesim yu wantaim ol bikpela tru blesing.
4 Wet isi isi inap dispela bung bilong lotu bai kamap bilong ol wokman bilong mi, bihain mi bai tingim yu wantaim ol nambawan elda bilong mi, na kisim privilis thru long odinesen wantaim ol narapela elda bilong mi husat mi bin makim.
5 Lukim, dispela em i promis bilong Papa long yu sapos yu go het yet long stap wantaim mi.
6 Na dispela bai kamap long yu long dispela de taim yu bai gat privilis long autim toktok bilong gospel bilong mi long wanem hap mi bai salim yu, long nau na i go bihain long dispela taim.
7 Olsem na, strongim ol brata bilong yu long olgeta toktok bilong yu, long olgeta beten bilong yu, long olgeta tok bilong yu bilong strongim bel, na long olgeta samting yu wokim.
8 Na lukim, na lukim gen, mi stap wantaim yu long blesim yu na mekim yu stap fri oltaim. Amen.