Seksen 17
Revelesen i go long Profet Joseph Smith, bilong Oliver Cowdery, David Whitmer, na Martin Harris long Fayette, New York, long Jun 1829, bipo long ol i lukim ol dispela plet em Buk bilong Momon rekot i stap. Joseph na man husat i wok long halivim em long rait, Oliver Cowdery, i bin painim aut taim ol i wok long wokim wok bilong tanim tok long dispela Buk bilong Momon plet olsem ol bai makim tripela spesol witnes (lukim Ita 5:2–4; 2 Nifai 11:3; 27:12). Holi Spirit bin givim strongpela tingting long Oliver Cowdery, David Whitmer, na Martin Harris taim ol yet bin kisim strongpela laik long kamap olsem ol dispela tripela witnes. Profet i bin askim Bikpela, na dispela revelesen i bin kam olsem bekim insait long Yurim na Tumim.
1–4, Long feit dispela Tripela Witnes bai lukim ol dispela plet na ol narapela tambu samting; 5–9, Krais i givim strongpela testimoni olsem Buk bilong Momon em i santu wok i kam long God.
1 Lukim, mi tokim yupela, olsem yupela mas gat tras long toktok bilong mi, sapos yupela wokim dispela wantaim olgeta bel bilong yupela, yupela bai gat sans long lukim ol dispela plet, na tu dispela brosplet, dispela bainat bilong Laban, dispela Yurim and Tumim, em Bikpela i bin givim long brata bilong Jerad antap long maunten, taim em i bin toktok wantaim Bikpela long pes bilong em, na ol dispela mirakel samting em Bikpela i bin givim long Lihai taim ol i stap long ples i nogat man, long arere bilong solwara Retsi.
2 Na long feit bilong yupela tasol bai yupela bai gat sans long lukim ol, em tu wantaim dispela feit em ol profet bilong taim bipo i bin gat.
3 Na bihain long dispela yupela bin kisim feit, na bin lukim wantaim ai bilong yupela, yupela bai tokaut long ol narapela long pawa bilong Bikpela.
4 Na dispela bai yupela wokim olsem bai wokman bilong mi Joseph Smith Jnr., bai no inap kisim bagarap, olsem mi bai kamapim gutpela as tingting bilong ol pikinini manmeri bilong dispela graun insait long dispela wok.
5 Na yupela bai tokaut olsem yu bin lukim ol dispela samting, olsem tasol wokman bilong mi Joseph Smith Jnr., i bin lukim ol; na olsem tu em long pawa bilong mi em i bin lukim ol, na em i bikos em i bin gat feit.
6 Na em i bin tanim tok long dispela buk, em dispela hap em mi tok strong long em long wokim, na olsem tasol Bikpela bilong yupela na God bilong yupela i stap laip dispela em i tru.
7 Na nau, yupela bai kisim dispela sem pawa, na dispela sem feit, na dispela sem spesol pawa olsem tasol em;
8 Na sapos yupela bihainim ol dispela komanmen hia bilong mi, em mi givim long yupela, get bilong hel bai nogat pawa agensim yupela; na marimari bilong mi bai inap long yupela, na bai mi litimapim yupela long las de.
9 Na mi, Jisas Krais, Bikpela bilong yupela na God bilong yupela, tokaut pinis long yupela, olsem bai mi ken bringim kamap gutpela as tingting bilong mi bilong ol pikinini manmeri bilong dispela graun. Amen.