Ol Skripsa
Ol Toktok I Go Pas

Ol Toktok I Go Pas

Doktrin na ol Kavanen em ol grup revelesen na ol tokaut bilong kirapim tingting i kam long Bikpela bilong kamapim na lukautim kingdom bilong God long dispela ples graun long ol dispela las de. Maski olsem planti long ol dispela seksen i bilong ol memba bilong Sios bilong Jisas Krais bilong ol Seint long Las de, ol toksave, ol tok lukaut, na ol gutpela toktok em bilong gutpela bilong olgeta manmeri na i gat i stap insait wanpela askim long olgeta lain long olgeta hap long harim nek bilong Bikpela Jisas Krais, i toktok long ol long gutpela sindaun bilong ol long dispela laip na long salvesen bilong ol bilong oltaim oltaim.

Planti long ol dispela revelesen insait long dispela grup i bin go long Joseph Smith Jnr., nambawan profet na presiden bilong Sios bilong Jisas Krais bilong ol Seint long Las de. Ol narapela i bin go long sampela bilong ol lain husat i bin kam bihain long em long Presidensi (lukim ol het tok long D na K 135, 136, na 138, na ol Tokaut bilong Gavman bilong Sios 1 na 2).

Dispela book bilong Doktrin na ol Kavanen i wanpela bilong ol standat buk bilong Sios i go wantaim Holi Baibel, Buk Momon, na Kina i Gat Bikpela Prais. Tasol, Doktrin na ol Kavanen em i wanpela kain bikos em i no tanim tok bilong pepa bilong bipo, tasol i bin kamap long dispela taim nau na God i bin givim long ol sois profet bilong Em bilong dispela kambek gen bilong holi wok bilong Em na kamapim bilong kingdom bilong God long dispela ples graun long ol dispela de. Long ol dispela revelesen, wanpela bai harim isi isi tasol strongpela nek bilong Bikpela Jisas Krais, wok long toktok gen long long dispela dispensesen bilong taim bilong pulap; na dispela wok em i stat long dispela taim em i redi long Nambatu kam bilong Em, long mekim kamap na long wanbel wantaim ol tok bilong ol holi profet long taim wol i bin stat i kam inap nau.

Joseph Smith Jnr., i bin bon long Disemba 23, 1805, long Sharon, Windsor County, Vermont. Long taim em i bin liklik, em i bin muv wantaim famili bilong em i go long ples nau ol i kolim Manchester, long hap wes long New York. Em i bin long dispela taim, taim em i bin stap long dispela hap long taim bilong spring long 1820, taim em i gat fopela ten krismas, em i bin kisim nambawan driman bilong em, we God, Papa bilong Oltaim Oltaim na Pikinini Man bilong Em Jisas Krais, tupela yet, i bin visitim em. Krais i bin tokim em long dispela driman olsem trupela Sios bilong Jisas Krais dispela em i bin stap long Nupela Testamen taim, na dispela i bin lukautim olgeta toktok bilong gospel, i no stap moa long dispela ples graun. Ol narapela soim aut i kam long Bikpela i kam bihain long we ol planti ensel i tisim em; ol soim em long dispela driman olsem God i gat wanpela spesol wok bilong em long wokim long dispela ples graun na olsem long em Sios bilong Jisas Krais bai kambek gen long dispela ples graun.

Bihain long liklik taim i go pinis, God i bin givim Joseph Smith long sampela halivim long tanim tok na putim aut Buk Momon. Long dispela taim tu long Mei, 1829 (lukim D na K 13), Jon bilong Baptais bin odenim em wantaim Oliver Cowdery wantaim Eronik Prishud, na bihain liklik long dispela taim ol Aposol bilong bipo taim Pita, Jems na Jon (lukim D na K 27:12), bin odenim tupela wantaim Melkisedek Prishud. Ol narapela odinesen bin kam bihain we tupela bin kisim ol prishud ki i kam long Moses, Ilaija, Elias, na ol planti profet bilong bipo taim (lukim D na K 110; 128:18, 21). Em i tru, ol dispela odinesen, ol i atoriti bilong God, i kambek gen long ol man long dispela ples graun. Long 6 Epril 1830, aninit long dareksen i kam long God, Profet Joseph Smith i ogenaisim Sios, na olsem trupela Sios bilong Jisas Krais wanpela taim gen i wok olsem wanpela ogenaisesen namel long ol man, wantaim atoriti long tisim gospel na ronim ol odinens bilong salvesen. (Lukim D na K 20 na Kina i Gat Bikpela Prais, Joseph Smith—Histori 1.)

Ol dispela sekret revelesen bin kam olsem bekim long ol beten, long taim bilong nid, na bin kamaut long ol sindaun bilong ol manmeri. Profet na ol lain i wok long halivim em bin wok long painim gutpela toktok i kam long God, na ol dispela revelesen i soim olsem ol i bin kisim ol. Long ol dispela revelesen, man i lukim dispela kambek gen na kamap klia bilong gospel bilong Jisas Krais and bringim kamap dispela dispensesen bilong taim bilong pulap. Dispela muv bilong Sios i go long wes long New York na Pennsylvania i go long Ohio, i go long Missouri, i go long Illinois, na bihain tru i go long Great Basin bilong wes America, na ol bikpela hevi bilong ol Seint long traim long kamapim Saion long dispela ples graun long dispela taim bilong yumi, ol dispela revelesen i soim.

Planti bilong ol seksen long stat i lukluk long ol samting bilong tanim tok na raitim na putim aut Buk Momon (lukim ol seksen 3, 5, 10, 17, na 19). Sampela seksen bihain i soim wok bilong Profet Joseph Smith taim em i bin mekim wok bilong tanim tok bilong Baibel wantaim halivim i kam long God. Namel long dispela taim, planti long ol seksen wantaim ol impoten doktrin i bin kam long em. (Lukim long eksampol long seksen 37, 45, 73, 76, 77, 86, 91, na 132, wanwan long ol dispela i gat direk rileisensip wantaim wok tanim tok bilong Baibel).

Long ol dispela revelesen, ol doktrin bilong gospel i givim ol tok klia long ol as samting olsem pasin bilong Godhead, man i kam long wanem hap, trupela stori bilong Satan, as bilong dispela laip, pasin bilong harim tok i bikpela samting, pasin bilong tanim bel i bikpela samting, ol wok bilong Holi Spirit, ol odinens na ol samting yumi nidim long kisim salvesen, as tru bilong dispela ples graun, ol stap long bihain bilong man bihain long Kirap bek na Jasmen, marit rileisensip bilong oltaim oltaim, na pasin oltaim oltaim bilong famili. Olsem tu, ogenaisesen bilong lotu i kamap isi isi wantaim singaut bilong ol bisop, Nambawan Presidensi, Kaunsil bilong ol Twelpela, na ol Seventi na kamapim bilong ol narapela het opis na ol kwarom. Laspela, dispela testimoni we i givim long Jisas Krais—pasin holi bilong Em, strong bilong Em, stretpela pasin bilong Em, lav bilong Em, na kisim bek pawa bilong Em—i mekim dispela buk gutpela tru bilong ol famili bilong dispela ples graun, “dispela buk i gutpela stret long ol memba bilong Sios, wankain olsem ol rits samting bilong olgeta Graun.” (lukim het tok long D na K 70).

Nambawan taim tru ol man bilong rait bilong Joseph Smith, i bin rekotim ol dispela revelesen, na ol Sios memba i bin hamamas long sherim ol kopi ol i bin raitim long han wantaim ol yet. Long kamapim wanpela rekot bilong stap longpela taim moa, ol man bilong rait kisim liklik taim long kopim ol dispela revelesen i go long ol manuskrip rekot buk, we ol Sios lida i bin yusim long redim ol revelesen long printim. Joseph na ol Seint bilong sios long bipo i bin skelim ol dispela revelesen wankain olsem ol i bin skelim dispela Sios: i stap laip, i wok long senis na kamap gutpela, na bai go insait long kamap gutpela moa yet wantaim moa revelesen. Ol i bin luksave tu olsem sampela asua nating i bin kamap long taim ol i wok long kopim ol dispela revelesen na long redim ol long raitim na putim aut. Olsem na, wanpela Sios konferens i bin askim Joseph Smith long 1831 long “stretim ol dispela asua o rong we em inap long painim wantaim Holi Spirit.”

Bihain long ol i bin lukim gen na stretim ol dispela revelesen, ol Sios memba long Missouri i bin stat long printim wanpela buk ol i kolim A Book of Commandments for the Government of the Church of Christ (Wanpela Buk bilong ol Komanmen bilong Gavman bilong Sios bilong Krais), em i gat insait planti long ol revelesen bilong pastaim bilong Profet. Tasol, dispela nambawan taim ol i traim long putim aut ol dispela revelesen i bin pinis, taim ol raskol bin bagarapim print opis bilong ol Seint long Jackson County long 20 Julai, 1833.

Taim em i harim long bagarap bilong print opis long Missouri, Joseph Smith na ol narapela Sios lida bin stat long redi long putim aut ol dispela revelesen long Kirtland, Ohio. Gen long stretim ol asua, kliarim ol toktok, na luksave long ol senis insait long Sios doktrin na ogenaisesen, Joseph Smith bin lukautim ol raitim gut bilong ol toktok bilong sampela revelesen long redim ol long putim aut long 1835 olsem dispela Doctrine and Covenants of the Church of the Latter Day Saints (Ol Doktrin na Kavanen bilong Sios bilong ol Seint long ol Las De). Joseph Smith i bin atoraisim narapela edisen bilong ol Doktrin na Kavanen, em ol i bin putim aut sampela mun tasol bihain long dai bilong Profet long 1844.

Ol Seint long Las de i bin gat bikpela laik long ol dispela revelesen na lukim ol olsem ol toksave i kam long God. Long wanpela taim long pinis bilong 1831, planti long ol elda bilong Sios i bin givim strongpela testimoni olsem Bikpela i bin tokaut long sol bilong ol long toktru bilong ol dispela revelesen. Dispela testimoni ol i bin putim aut long 1835 edisen bilong dispela ol Doktrin na Kavanen olsem testimoni ol i raitim bilong ol Twelpela Aposol:

Testimoni bilong ol
Twelpela Aposol long Toktru bilong dispela
Buk bilong ol Doktrin na Kavanen

Dispela Testimoni bilong ol dispela Witnes long dispela Buk bilong ol Komanmen bilong Bikpela, em ol komanmen Em i bin givim long Sios bilong Em long Joseph Smith Jnr., husat Sios i makim long dispela as:

Olsem na, mipela, mipela i redi long autim testimoni long dispela wol bilong ol pikinini bilong God, long olgeta wanwan manmeri i stap laip antap long pes bilong dispela ples graun, olsem Bikpela i putim rekot long ol sol bilong mipela, long Holi Gos husat i kam antap long mipela, olsem ol dispela komanmen i bin kam wantaim gutpela tingting long God, na i gutpela bilong olgeta manmeri na tru ol i tru tok.

Mipela i givim dispela testimoni long dispela wol, Bikpela em i halivim bilong mipela; na long marimari bilong God Papa, na Pikinini Man bilong Em, Jisas Krais, em mipela i kisim tok orait long kisim dispela privilis long autim testimoni go long olgeta wol, long dispela mipela i hamamas moa yet, na beten long Bikpela olgeta taim olsem ol pikinini manmeri bilong dispela graun bai kisim gutpela long dispela.

Dispela em nem bilong ol Twelpela:

  • Thomas B. Marsh

  • David W. Patten

  • Brigham Young

  • Heber C. Kimball

  • Orsan Hyde

  • William E. McLellin

  • Parley P. Pratt

  • Luke S. Johnson

  • William Smith

  • Orsan Pratt

  • John F. Boynton

  • Lyman E. Johnson

Long ol edisen bilong Doktrin na ol Kavanen i kam bihain, ol i bin putim i go insait sampela moa revelesen o ol narapela samting long rekotim ol i putim pinis, taim ol bung na konferens bilong Sios husat i gat atoriti, i wok long kisim na wanbel ol dispela samting. Dispela 1876 edisen bilong dispela buk, Elda Orson Pratt aninit long dareksen bilong Brigham Young i bin redim, bin stretim ol dispela revelesen long oda long taim ol samting i kamap na bin givim ol nupela het tok wantaim tok i go pas olsem em i kamap long long bipo.

Stat wantaim 1835 edisen bilong dispela buk, ol i bin putim ol sevenpela skul bilong lotu wantaim tu; dispela ol i bin kolim ol Lectures on Faith (Ol skul bilong Feit). Ol dispela ol i bin redim long yusim long Skul bilong ol Profet long Kirtland, Ohio, stat long 1834 i go long 1835. Maski ol i bin gutpela bilong doktrin na skul, ol dispela skul i no bin stap long Doktrin na ol Kavanen bihain long 1921 edisen long wanem Joseph Smith i no bin givim long olgeta memba bilong Sios.

Insait long 1981 Inglis edisen bilong Doktrin na ol Kavanen, long nambawan taim, ol i bin putim tripela hap pepa i go insait long en. Ol dispela em seksen 137 na 138, long tokaut long nambawan samting bilong salvesen bilong ol daiman; na Gavman Tokaut bilong Sios 2, i autim tok olsem olgeta memba man bilong Sios husat i stap stretpela ol inap long odenim ol long prishud wantaim nogat wari long kala bilong skin bilong em o em bilong wanem hap.

Ol wanwan nupela edisen bilong Doktrin na ol Kavanen i gat ol asua bilong bipo ol i oraitim na bungim i go insait nupela infomesen, moa yet long ol hap bilong histori long ol seksen het tok. Dispela edisen nau i mekim gut ol det na ol nem bilong ples na stretim ol narapela samting. Ol dispela senis ol i mekim long bringim ol dispela samting i kamap stret wantaim trupela moa yet infomesen bilong histori bilong Sios. Ol narapela spesol samting bilong dispela nupela edisen i gat ol nupela mep ol i soim ol impoten hap we ol i bin kisim ol dispela revelesen, na tu ol gutpela moa yet foto bilong ol hap bilong histori bilong Sios, sekim wantaim ol narapela, buk o hap insait long buk, ol seksen het tok, na ol samari/bikpela tok bilong ol samting i stap insait, olgeta long ol dispela i stap olsem long halivim ol lain husat i ridim ol dispela samting long save gut na hamamas long dispela toksave bilong Bikpela ol i givim insait long Doktrin na ol Kavanen. Ol infomesen bilong ol seksen het tok i bin kam long Manuskrip Histori bilong Sios na History of the Church “Histori bilong Sios” ol i putim aut (olgeta wantaim ol i soim long ol het tok olsem histori bilong Joseph Smith) na ol Joseph Smith Papers “Ol pepa bilong Joseph Smith”.