Seksen 41
Revelesen i go long Profet Joseph Smith bilong Sios, long Kirtland, Ohio, 4 Februari 1831. Dispela revelesen i soim Profet na ol elda bilong Sios long beten long kisim “lo” bilong God (lukim seksen 42). Joseph Smith bin kam long New York na kamap tasol long Kirtland na wanpela Sios memba long ples klostu tasol ol i kolim Thompson, Ohio, “askim Brata Joseph na Sidney [Rigdon] … long stap wantaim em na em bai givim tupela ol haus na ol samting.” Dispela revelesen tok klia long we Joseph na Sidney mas stap na tu singaut i go long Edward Partridge long kamap nambawan bisop bilong Sios.
1–3, Ol elda bai ronim Sios wantaim spirit bilong revelesen; 4–6, Ol trupela disaipol bai kisim na holim pas lo bilong Bikpela; 7–12, Bikpela i makim Edward Partridge olsem bisop bilong Sios.
1 Harim gut, O yupela ol pipol bilong mi, mi Bikpela na God bilong yupela mi tok, yupela husat mi hamamas long blesim wantaim bikpela blesing moa yet, yupela husat i harim tok bilong mi; na yupela husat i no harim tok bilong mi na karim nating nem bilong mi, bai mi tok nogut long yupela wantaim ol tok nogut i hevi tru.
2 Harim gut, O yupela ol elda bilong sios bilong mi husat mi singautim yupela pinis, lukim mi givim yupela wanpela komanmen, olsem yupela bai bungim wantaim yupela yet long tok orait long tok bilong mi;
3 Na long beten bilong yupela wantaim feit yupela bai kisim lo bilong mi, olsem bai yupela inap save long ronim sios bilong mi na gat olgeta samting long ai bilong mi.
4 Na mi bai kamap bikman bilong yupela taim mi kam; na lukim, mi kam kwiktaim, na yupela bai mekim olsem lo bilong mi bai stap.
5 Husat ol bai kisim lo bilong mi na bihainim, dispela lain ol disaipol bilong mi; na husat ol lain i tok ol i kisim tasol i no bihainim, dispela ol lain i no disaipol bilong mi, na yupela bai rausim ol long namel bilong yupela;
6 Long wanem em i no stret olsem ol dispela samting bilong ol pikinini bilong dispela kingdom bai go long lain husat i no stap stret, o long ol dok, o noken tromoi ol kina bilong yupela long ai bilong ol pik.
7 Na gen, em i stret olsem wokman bilong mi Joseph Smith Jnr., bai wokim wanpela haus, bilong em long stap na tanim tok.
8 Na gen, em i stret olsem wokman bilong mi Sidney Rigdon bai stap olsem i luk gut long em, inap olsem em i holim pas ol komanmen bilong mi.
9 Na gen, mi bin singautim wokman bilong mi Edward Partridge; na mi givim wanpela komanmen, olsem sios bai makim em, na odenim em olsem bisop long sios, long lusim olgeta narapela wok bilong em na long givim olgeta taim bilong em long wok bilong sios;
10 Long lukautim gut olgeta samting mi bai givim long em aninit long ol lo bilong mi long dispela de taim mi bai givim ol.
11 Na dispela long wanem bel bilong em i nogat sin long ai bilong mi, long wanem em i olsem Nathanael bilong bipo, husat i nogat gris tingting.
12 Ol dispela toktok mi givim long yupela, na ol i gutpela long ai bilong mi; olsem na, lukaut gut long hau yu kisim ol, long wanem bekim bilong ol bai kam long sol bilong yupela long de bilong jasmen. Em tasol. Amen.