Seksen 54
Revelesen i go long Profet Joseph Smith bilong Newel Knight, long Kirtland, Ohio, 10 Jun 1831. Ol memba bilong Sios husat i stap long Thompson, Ohio, i no bin wanbel wantaim sampela askim i go wantaim pasin bilong givim ol samting wantaim bel. Pasin bilong tingim ol yet na pasin mangal i bin soim aut. Bihain long wok bilong em long ol lain ol i kolim ol Shakers (lukim het tok long seksen 49), Leman Copley i bin brukim kavanen bilong em long dediketim bikpela fam bilong em olsem wanpela ples bilong ol man long stap long ol Seint husat i wok long kamap i kam long Colesville, New York. Bikos long dispela, Newel Knight (lida bilong ol memba husat i stap long Thompson) na ol narapela elda i bin kam long Profet na askim em long wanem samting ol i bai wokim. Profet i bin askim Bikpela and kisim dispela revelesen, we i tokim ol memba long Thompson long lusim fam bilong Leman Copley na raun i go long Missouri.
1–6, Ol Seint i mas holim pas dispela gospel kavanen long kisim marimari bilong God; 7–10, Ol i mas wet isi long taim bilong pen.
1 Lukim, olsem Bikpela i tok, olsem tu Alpa na Omega, stat na pinis, olsem tu em husat bin dai long diwai kros long ol sin bilong dispela wol—
2 Lukim, tru, tru, mi tokim yu, wokman bilong mi Newel Knight, yu sanap strong long opis dispela mi bin makim yu long en.
3 Na sapos ol brata bilong yu laik long abrusim ol birua bilong ol, larim ol tanim bel long ol sin bilong ol, na kamap tru tru na daunim ol yet long ai bilong mi na bel bilong em i buruk wantaim sori.
4 Na bikos dispela kavanen em ol i bin mekim wantaim mi i nau i buruk, olsem tu dispela i kamap olsem i stap nating olgeta na i nogat pawa.
5 Na tok lukaut i go long em husat dispela asua i kamap long em, long wanem em i moabeta long em long i dring solwara insait long dip bilong solwara.
6 Tasol blesim ol dispela lain husat i holimpasim dispela kavanen and harim tok long dispela komanmen, long wanem ol i bai kisim marimari bilong God.
7 Olsem na, statim wok nau na ronowe long dispela graun, nogut ol birua bilong yupela bai kam pait agens long yupela; na mekim raun bilong yupela, na makim husat yupela laikim long kamap lida bilong yupela, na long peim ol mani long yupela.
8 Na olsem yupela bai kisim raun bilong yupela i go long ol ples long wes, long dispela graun long Missouri, i go olsem long arere bilong ples bilong ol lain bilong Leiman.
9 Na bihain long yupela i pinisim raun bilong yupela, lukim, mi tokim yupela, painim strong long lukautim yupela yet, inap mi redim wanpela ples bilong yupela.
10 Na gen, yupela i mas wet isi long taim bilong pen inap mi bai kam; na, lukim, mi kam kwiktaim, na pe bilong mi i stap wantaim mi, na ol husat i painim mi hariap bai painim malolo long sol bilong ol. Em tasol. Amen.