Seksen 119
Revelesen i go long Profet Joseph Smith, long Far West, Missouri, 8 Julai, 1838, long bekim long dispela askim wantaim daunpasin: “O Bikpela! Soim long ol wokman bilong yu hamas yu laikim long ol pipol bilong yu i mas givim long taiting long ol samting bilong ol.” Dispela lo bilong taiting, olsem ol memba bilong sios i save long en tede, Bikpela i no bin givim long Sios bipo long dispela revelesen. Dispela wod taiting long dispela beten yumi toktok long en nau tasol na long ol revelesen bipo (64:23; 85:3; 97:11) i bin min olsem i no wanpela ten tasol, tasol olgeta ofa ol memba i givim long laik bilong ol yet, o ol kontribiusen ol i givim, long ol mani bilong Sios. Bipo Bikpela i bin givim long Sios dispela lo bilong konsekreisen na lukaut bilong ol samting, we ol memba, nambawan stret dispela em ol elda husat bai lid, mekim wanpela kavanen we bai stap oltaim oltaim. Bikos planti bilong ol dispela lain i no bin holimpas long dispela kavanen, Bikpela kisim bek dispela long wanpela taim na long ples bilong em bin givim dispela lo bilong taiting long olgeta Sios. Profet i bin askim Bikpela hamas em i laikim long ol long givim long holi wok. Dispela bekim i kam long dispela revelesen.
1–5, Ol Seint i mas baim ol samting antap moa long ol i nidim na bihain givim, olsem taiting, wanpela ten long interes bilong ol long wanwan yia; 6–7, Dispela samting bai mekim ples Zion i kamap holi.
1 Tru, olsem Bikpela i tok, mi laikim olgeta samting antap moa long ol i nidim long putim long han bilong bisop bilong sios bilong mi long Zion,
2 Long mekim haus bilong mi, na long stretim as tingting bilong Zion na bilong dispela prishud, na bilong ol dinau bilong Presidensi bilong Sios bilong mi.
3 Na dispela bai kamap stat bilong taiting bilong ol pipol bilong mi.
4 Na bihain long dispela, ol dispela lain husat i peim taiting bilong ol i peim wanpela ten bilong olgeta interes bilong ol long wanwan yia; na dispela bai kamap wanpela lo long ol bilong oltaim, bilong holi prishud bilong mi, Bikpela i tok.
5 Tru mi tokim yupela, dispela bai kamap olsem olgeta dispela lain husat i bung long ples Zion bai givim taiting long ol samting ol i gat planti moa long en, na bai luksave long dispela lo, o Bikpela bai lukim olsem ol i no stap stret long stap namel long yupela.
6 Na mi tokim yupela, sapos ol pipol bilong mi i no luksave long dispela lo, long mekim em i stap holi, na mekim Zion holi long mi wantaim dispela lo, olsem ol lo na ol jasmen bilong mi bai inap long stap long en, olsem em bai stap holi stret, lukim, tru mi tokim yupela, dispela bai no inap kamap wanpela ples bilong Zion long yupela.
7 Na dispela bai stap olsem wanpela eksampol long olgeta stek bilong Saison. Em tasol. Amen.