Seksen 75
Revelesen i go long Profet Joseph Smith, long Amherst, Ohio, 25 Jenueri 1832. Dispela seksen i gat tupela narakain revelesen (nambawan i stap long ves 1 i go long 22 na nambatu i stap long ves 23 i go long 36) i kam long sem de. Dispela taim i bin wanpela konferens long we ol i bin wanbel na sapotim na odenim Joseph Smith olsem Presiden bilong Hai Prishud. Sampela elda i bin laik long save moa long ol wok bilong ol yet long dispela taim nau. Ol dispela revelesen i bin kam bihain.
1–5, Ol elda husat stap wantaim feit na husat i autim toktok bilong gospel bai kisim laip oltaim oltaim; 6–12, Beten long kisim Spirit bilong Bel Isi, husat i save tisim olgeta samting; 13–22, Ol elda bai sindaun long jasim ol dispela lain husat i no laikim dispela tok bilong ol; 23–36, Ol famili bilong ol misinari bai kisim halivim long Sios.
1 Tru, tru, mi tokim yupela, mi husat i toktok olsem wantaim nek bilong Spirit bilong mi, olsem Alpa na Omega, Bikpela bilong yupela na God bilong yupela—
2 Harim gut, O yupela husat i bin givim ol nem bilong yupela long go aut na tokaut long gospel bilong mi, na long katim gaden wain bilong mi.
3 Lukim, mi tokim yupela olsem em i laik bilong mi olsem yupela i mas go aut na noken isi isi, na tu noken les tasol wok wantaim olgeta strong bilong yupela—
4 Litimapim nek bilong yupela olsem wantaim krai bilong wanpela biugel, na tokaut long dispela toktru olsem ol revelesen na komanmen mi bin givim yupela.
5 Na olsem, sapos yupela stap wantaim feit yupela bai kisim mekpas yupela bin bungim, na kisim kraun bilong ona, na glori, na laip i no save pinis, na laip oltaim oltaim.
6 Olsem na, tru mi tokim yu wokman William E. McLellin, mi stopim dispela oda em mi bin givim i go long em long go long ol kantri long hap long is;
7 Na mi givim i go long em wanpela nupela oda na wanpela nupela komanmen, dispela mi, Bikpela, i korosim em long ol tok baksait bilong bel bilong em;
8 Na em i bin sin; tasol, mi fogivim em na tokim em gen, Yu go long ol dispela kantri long hap long saut.
9 Na larim wokman bilong mi Luke Johnson i go wantaim em, na tok strong long ol dispela samting we mi bin tokim ol—
10 Na singaut long nem bilong Bikpela long kisim Spirit bilong Bel Isi, olsem em bai tisim ol long olgeta samting em i gutpela long ol—
11 Na beten oltaim olsem bai ol i no inap hap i dai; na inap olsem ol i wokim dispela, mi bai stap wantaim tupela i go inap long pinis bilong laip long dispela graun.
12 Lukim, dispela em i laik bilong Bikpela God bilong yu long yutupela. Em tasol. Amen.
13 Na gen, tru olsem Bikpela i tok, larim wokman bilong mi Orson Hyde na wokman bilong mi Samuel H. Smith kisim raun bilong tupela i go long ol kantri long hap long is, na tokaut long ol samting mi tokim ol; na inap olsem ol i stap wantaim feit, lukim, mi bai stap wantaim ol inap i go long pinis bilong laip long dispela graun.
14 Na gen, tru mi tok i go long wokman bilong mi Lyman Johnson, na i go long wokman bilong mi Orson Pratt, ol bai kisim raun bilong ol i go long ol kantri long hap long is; na lukim, na lukim gen, mi bai stap wantaim ol tu, inap i go long pinis bilong laip long dispela graun.
15 Na gen, mi tok i go long wokman bilong mi Asa Dodds, na i go long wokman bilong mi Calves Wilson, olsem ol tu bai kisim raun bilong ol i go long kantri long wes, na tokaut long gospel bilong mi, olsem tasol mi tokim ol.
16 Na em husat i stap wantaim feit bai winim olgeta samting, na bai mi litimapim long las de.
17 Na gen, mi tok i go long wokman bilong mi Major N. Ashley, na wokman bilong mi Burr Riggs, larim ol kisim raun bilong ol tu i go long hap long saut.
18 Na tu, larim olgeta dispela lain kisim raun bilong ol, olsem mi bin tok strong long ol, long go long wanpela haus i go long narapela haus, na long go long wanpela ples i go long narapela ples, na long wanpela siti i go long narapela siti.
19 Na long wanem kain haus yupela i go, na ol i kisim yupela i go insait, lusim blesing bilong yupela antap long dispela haus.
20 Na insait long wanem haus yupela i go, na ol i no larim yupela i go insait, yupela bai lusim dispela haus kwiktaim, na rausim pipia graun i stap long lek bilong yupela olsem witnes agensim ol.
21 Na yupela bai pulap wantaim hamamas tru na stap hamamas; na lukaut long dispela, olsem long de bilong jasmen yupela bai kamap jas bilong dispela haus, na kotim ol;
22 Na em bai stap orait moa long ol hiden long dispela de bilong jasmen, moa long dispela haus; olsem na, yupela mas redi na kirap i go na stap wantaim feit, na yupela bai winim olgeta samting, na bai mi litimapim yupela long las de. Em tasol. Amen.
23 Na gen, tru olsem Bikpela i tokim yupela, O yupela ol elda bilong sios bilong mi, husat i bin givim nem bilong yupela olsem yupela inap save long laik bilong em long yupela—
24 Lukim, mi tokim yupela, olsem em i wok bilong sios long halivim ol famili bilong ol dispela lain, na tu long halivim ol famili bilong ol dispela lain husat Bikpela i singautim ol na em i mas kamap olsem i salim ol i go long dispela wol long tokaut long gospel i go long dispela wol.
25 Olsem na, mi, Bikpela, givim long yupela dispela komanmen, olsem yupela kisim ol haus bilong ol famili bilong yupela, inap olsem ol brata bilong yupela i laik long opim bel bilong ol.
26 Na larim ol dispela lain husat inap long kisim ol haus bilong ol famili bilong ol, na sapot bilong sios long ol, bai no inap long feil long go insait long dispela wol, sapos long is o long wes, o long not, o long saut.
27 Larim ol askim, na ol bai kisim; nok long dua na em bai i op long ol, na em bai soim aut i kam long antap, tru i kam long Spirit bilong Bel Isi, long wanem hap ol bai go.
28 Na gen, tru mi tokim yupela, olsem olgeta wanwan man husat inap long givim ol samting bilong ol famili bilong ol yet, larim em givim, na em bai no inap long lusim pe bilong em; na larim em wok insait long sios.
29 Larim olgeta wanwan man i mas wok hat long olgeta samting. Na ol les man bai no inap i gat hap bilong ol insait long sios, inap olsem em i tanim bel na stretim laip bilong em.
30 Olsem na, larim wokman bilong mi Simeon Carter na wokman bilong mi Emer Harris i bung wantaim long dispela ministri;
31 Na tu wokman bilong mi Ezra Thayre na wokman bilong mi Thomas B. Marsh;
32 Tu wokman bilong mi Hyrum Smith na wokman bilong mi Reynolds Cahoon;
33 Na tu wokman bilong mi Daniel Stanton na wokman bilong mi Seymour Brunson;
34 Na tu wokman bilong mi Sylvester Smith na wokman bilong mi Gideon Carter;
35 Na tu wokman bilong mi Ruggles Eames na wokman bilong mi Stephen Burnett;
36 Na tu wokman bilong mi Micah B. Welton na tu wokman bilong mi Eden Smith. Em tasol. Amen.