Seksen 47
Revelesen i go long Profet Joseph Smith, long Kirtland, Ohio, 8 Mas 1831. John Whitmer husat i bin sev pinis olsem wanpela kuskus long Profet, i bin tingting planti taim Profet i bin askim em long sev olsem man bilong raitim na lukautim ol histori bilong Sios na man bilong lukautim ol rekot bilong Sios, long kisim ples bilong Oliver Cowdery. Em i bin rait olsem, “Mi ting moabeta olsem mi no wokim tasol mi lukim olsem dispela laik bilong Bikpela i mas kamap, na sapos em i laikim olsem, mi laikim olsem em i soim aut long Joseph husat em i Sia.” Bihain long taim Joseph Smith i kisim dispela revelesen, John Whitmer i bin wanbel na sev long opis Profet i makim bilong em.
1–4, Bikpela i makim John Whitmer long lukautim ol histori bilong Sios na long raitim ol samting Profet i tokim em long raitim.
1 Lukim, em i gutpela long mi olsem wokman bilong mi John mas raitim na lukautim stretpela histori na halivim yu, wokman bilong mi Joseph, long raitim olgeta samting mi bai givim yu, inap long taim mi singautim em long ol sampela moa wok.
2 Na gen, tru mi tokim yu olsem em inap tu long toktok insait long ol miting, taim em i gutpela.
3 Na gen, mi tokim yu olsem mi bai makim em long lukautim ol sios rekot na histori olgeta taim nau; long wanem Oliver Cowdery mi bin makim pinis long narapela opis.
4 Olsem na, Spirit bilong Bel Isi bai givim em long raitim ol dispela samting sapos em is stap wantaim feit. Em tasol. Amen.