Seksen 12
Revelesen i go long Profet Joseph Smith bilong Joseph Knight Snr., long Harmony, Pennsylvania, long Mei 1829. Joseph Knight i bin bilip long ol dispela tokaut bilong Joseph Smith long lukaut bilong em long ol Buk bilong Momon plet na dispela wok bilong tanim tok ol i wok long en long dispela taim. Planti taim em i bin givim sampela kain halivim long Joseph Smith na man husat i wok long halivim em long rait, dispela i halivim ol long go het wantaim tanim tok. Long askim bilong Joseph Knight, Profet i bin askim Bikpela na bin kisim dispela revelesen.
1–6, Ol wokman long gaden wain bai kisim salvesen; 7–9, Olgeta husat i gat laik long wok na husat i fit na inap long wok ken halivim long dispela wok bilong Bikpela.
1 Wanpela bikpela na naispela wok bai kamap klostu namel long ol pikinini manmeri bilong dispela graun.
2 Lukim, mi God; putim yau na harim tok bilong mi, em i stap laip na i gat pawa olsem bikpela naip em tupela sait bilong em i sap tru na i ken katim skru na kuru insait long bun, olsem na putim yau na harim tok bilong mi.
3 Lukim, dispela gaden i wait na redi long katim na bungim; olsem na, husat manmeri i laik long katim na bungim larim em suim naip bilong em wantaim olgeta strong bilong em, na katim na bungim taim dispela de i stap yet, olsem em i bai putim i go antap long hamamas bilong sol bilong em dispela salvesen bilong oltaim oltaim long kingdom bilong God.
4 Na tu, husat manmeri bai suim naip bilong em na katim na bungim, dispela sem manmeri God i bai singautim ol.
5 Olsem na, sapos yu askim mi bai yu kisim; sapos yu nok long dua em bai op long yu.
6 Nau, olsem yu bin askim, lukim, mi tokim yu, holim pas ol komanmen bilong mi, na traim long painim na bringim i kamaut na kamapim dispela pait bilong Saion.
7 Lukim, mi tokim yu, na tu long olgeta dispela lain husat i gat laik long bringim i kamaut na kamapim dispela wok;
8 Na tu nogat man i ken halivim long dispela wok tasol man husat i gat daun pasin na i gat planti lav insait long em, i gat feit, i gat hop, na i gat siariti, na i mas gat pasin bilong kontrolim ol filings bilong em long olgeta samting, ol wanem samting i stap ananit long lukaut bilong em.
9 Lukim, mi em lait na laip bilong dispela wol, husat mi tokaut long ol dispela toktok, olsem na harim gut wantaim olgeta strong na save bilong yu, na bihain bai Bikpela bai i singautim yu. Amen.