Chitsauko 12

Mambo Benjamini

Mambo Benjamini akanga ari mambo wemaNifai akarurama. Nerubatsiro rwevamwe varume vakarurama, akaunza runyararo kunyika.

Mazwi aMormoni 1:17–18

Mambo Benjamini akanga achembera uye aida kutaura nevanhu vake. Aida kuvataurira kuti mwanakomana wake Mosaya ndiye aizova mambo aitevera.

Mosaya 1:9–10

Vanhu vakauya kubva kwese kwese munyika uye vakaungana padyo netemberi. Vakaisa tende dzavo kuitira kuti misuwo itarise kutemberi.

Mosaya 2:1, 5–6

Mambo Benjamini akataura ari pashongwe kuitira kuti maNifai vakwanise kumunzwa.

Mosaya 2:7.

Akataurira vanhu vake kuti akanga aedza zvakasimba kuvashandira. Akati nzira yekushandira Mwari ndeye kushandirana.

Mosaya 2:14, 17

Mambo Benjamini akataurira vanhu kuti vateerere mirairo yaMwari. Avo vanochengeta zvakatendeka mirairo yaMwari vanozofara uye nerimwe zuva vanozogara naMwari.

Mosaya 2:41

Mambo Benjamini akati Jesu Kristu akanga achizozvarwa panyika nenguva pfupi. Zita raamai vake raizonzi Maria.

Mosaya 3:5, 8

Jesu aizoita zvishamiso. Aizoporesa vanorwara uye achiunza vakafa kuupenyu. Aizoita kuti mapofu aone uye matsi dzinzwe.

Mosaya 3:5

Jesu aizotambudzikira nekufira zvivi zvevanhu vese. Avo vanotendeuka uye vachiva nerutendo muna Jesu vanozoregererwa zvivi zvavo.

Mosaya 3:7, 11–12

Mambo Benjamini akataurira maNifai kuti varume vakaipa vaizorova Jesu nezvamboko. Zvino vaizomurovera pamuchinjikwa.

Mosaya 3:9

Mushure memazuva matatu Jesu anozomutswa kuvakafa.

Mosaya 3:10

Mushure mekunge Mambo Benjamini ataura, maNifai akawira pasi. Vaiva neurombo nezvivi zvavo uye vakada kutendeuka.

Mosaya 4:1–2

Vanhu vakava nerutendo muna Jesu Kristu, uye vakanamata kuti varegererwe.

Mosaya 4:2

Mweya Mutsvene wakazadza mwoyo yavo. Akaziva kuti Mwari vakanga vavaregerera uye kuti vaivada. Vakanzwa runyararo nerufaro.

Mosaya 4:3

Mambo Benjamini akataurira vanhu kuti vatende muna Mwari. Aida kuti vazive kuti Mwari vakanga vasika zvinhu zvose uye kuti vakachenjera uye vane simba.

Mosaya 4:9

Mambo Benjamini akataurira vanhu kuti vazvininipise uye vanamate mazuva ose. Aida kuti vanhu vake vagare vachiyeuka Mwari uye vave vakatendeka.

Mosaya 4:10–11

Akataurira vabereki kuti vasarega vana vavo vachirwa kana kukakavadzana.

Mosaya 4:14

Akavataurira kuti vadzidzise vana vavo kuti vave vanoteerera uye kuti vadanane nekushandirana.

Mosaya 4:15

Akayambira vanhu kuti vachenjerere zvavaifunga, zvavaitaura, nezvavaiita. Vaifanira kuva vakatendeka uye vachichengeta mirairo kweupenyu hwavo hwese.

Mosaya 4:30

Mambo Benjamini akabvunza vanhu kana vaitenda dzidziso dzake. Vese vakati vaitenda. Mweya Mutsvene wakanga wavashandura, uye vakanga vasisade kutadza.

Mosaya 5:1–2

Vose vakatsidzira, kana kuvimbisa, kuchengeta mirairo yaMwari. Mambo Benjamini akafara.

Mosaya 5:5–6

Mambo Benjamini akapa mwanakomana wake Mosaya mvumo yekuva mambo mutsva. Mushure memakore matatu Mambo Benjamini akafa.

Mosaya 6:3, 5

Mosaya akanga ari mambo akarurama. Akashanda nesimba uye akashandira vanhu vake, sezvakaita baba vake.

Mosaya 6:6–7