Chitsauko17

Aruma neVanhu Vake Vanopukunyuka

Rimwe rezuva apo vanhu vaAruma pavaishanda muminda yavo, mauto echiRamani akayambuka muganhu akapinda munyika yavo.

Mosaya 23:15

MaNifai akatya uye vakamhanyira kuguta kuti vadzivirirwe. Aruma akavataurira kuti varangarire Mwari uye vaizovabatsira. MaNifai vakatangisa kunamata.

Mosaya 23:26-28

Ishe vakapfavisa mwoyo yamaRamani, uye havana kukuvadza maNifai. MaRamani vakange varasika apo pavaiedza kuwana vanhu vaMambo Rimuhai.

Mosaya 23:29-30

MaRamani akavimbisa Aruma kuti havaizonetsa vanhu vake kana akavaudza nzira yekudzokera nayo kunyika yavo. Aruma akavaratidza nzira.

Mosaya 23:36

Asi maRamani haana kuchengeta chivimbiso chavo. Vakaisa varindi vachitenderedza nyika, uye Aruma nevanhu vake vakange vasisina kusununguka.

Mosaya 23:37.

Mambo wemaRamani akaita kuti Amuroni ave mutongi pamusoro pavanhu vaAruma. Amuroni akanga ambove muNifai uye aive mupirisita akaipa waMambo Noa.

Mosaya 23:39; Mosaya 24:8-9

Amuroni akaita kuti vanhu vaAruma vashande zvakasimba zvikuru. Vakanamatira rubatsiro, asi Amuroni akati ani nani zvake anenge abatwa achinamata aizourawa. Vanhu vakaramba vachinamata nechemumwoyo yavo.

Mosaya 24:10–12

Mwari vakanzwa minamato yavo uye vakavasimbisa zvokuti basa ravo rakaratidzika serakareruka. Vanhu vakava norufaro uye nemwoyo murefu.

Mosaya 24:14–15

Mwari vakafadzwa nekuti vanhu vaive vakatendeka. Vakataurira Aruma kuti vaizovabatsira kuti vapukunyuke kubva kumaRamani.

Mosaya 24:16-17

Panguva dzeusiku vanhu vakaunganidza zvokudya nezvipfuyo zvavo. Rungwanani rwaitevera Mwari vakaita kuti maRamani vakotsire apo Aruma nevanhu vake pavaibva muguta.

Mosaya 24:18 –20

Mushure mekufamba kwemazuva gumi nemaviri, vanhu vakasvika muZarahemura, uko Mambo Mosaya nevanhu vake vakavagashira.

Mosaya 24:25