Chitsauko 27

Koriho

Mumwe murume ainzi Koriho akauya muZarahemura. Akanga asingatendi muna Jesu Kristu uye aiparidza kuti izvo zvakanga zvataurwa nevaporofita pamusoro peMuponesi zvaive zvisiri zvechokwadi.

Aruma 30:6, 12-14

Koriho akataurira vanhu kuti vaive mapenzi kutenda kuti Jesu aizouya panyika uye kuti aizotambudzikira zvivi zvavo.

Aruma 30:16

Akati vanhu havaizorangwa nokuda kwezvivi zvavo nokuti kwakanga kusina upenyu mushure merufu. Vanhu vazhinji vakatenda Koriho. Vakave vakaipa.

Aruma 30:17-18

Koriho akaedza kuparidzira vanhu vaAmoni, asi havana kumuteerera. Vakamusunga uye vakaenda naye kuna Amoni, uyo akamumanikidza kuti abude muguta.

Aruma 30:19-21

Koriho akaenda kunyika yaGideoni, asi vanhu veko havanawo kumuteerera. Mutongi mukuru akamutumira kuna Aruma.

Aruma 30:21, 29

Aruma akabvunza Koriho kana aitenda munaMwari. Koriho akati akanga asingatendi. Aruma akapupura kuti kuna Mwari uye kuti Kristu achauya.

Aruma 30:37-39

Koriho aida kuti Aruma aite chishamiso chaizoratidza kuti kuna Mwari. Koriho akati aizotenda muna Mwari kana akange aona chiratidzo chesimba raMwari.

Aruma 30:43

Aruma akataurira Koriho kuti akanga atoona zviratidzo zvakawanda zvesimba raMwari kuburikidza nemagwaro matsvene uye neuchapupu hwevaporofita vose.

Aruma 30:44

Aruma akati nyika nezvinhu zvose zviri pairi uye nokufamba kwenyika dziri mudenga zviratidzowo zvekuti kuna Mwari.

Aruma 30:44

Koriho akanga achiri kungoramba kuzvitenda. Aruma akasuwa nekuda kweuipi hwaKoriho uye akamuyambira kuti mweya wake waigona kuparadzwa.

Aruma 30:45-46

Koriho akanga achirikuda chiratidzo chairatidza kuti kuna Mwari. Aruma akati chiratidzo chaibva kuna Mwari chaiva chekuti Koriho aisazokwanisa kutaura.

Aruma 30:48-49

Mushure mekunge Aruma ataura izvi, Koriho akatadza kutaura.

Aruma 30:50

Koriho akanyora kuti aiziva kuti chiratidzo ichi chaibva kuna Mwari uye kuti akanga agara achiziva kuti kuna Mwari. Akakumbira Aruma kuti anamate uye kuti abvise chituko.

Aruma 30:52, 54

Aruma aiziva kuti kana Koriho akakwanisa kutaura aizonyepa zvakare kuvanhu. Aruma akati Ishe vaizosarudza kana Koriho aizotaura zvekare.

Aruma 30:55

Ishe havana kudzorera kwaniso yekutaura kuna Koriho. Koriho akafamba imba nemba, achipemha zvekudya.

Aruma 30:56

Mutongi mukuru akatumira tsamba nemunyika yose achitaura zvakanga zvaitika kuna Koriho. Akataurira avo vakanga vatenda mazwi aKoriho kuti vatendeuke. Vanhu vakatendeuka.

Aruma 30:57-58

Koriho akaenda kunogara nemaZoramu. Rimwe zuva apo paaipemha, akatsikwa-tsikwa kusvika afa.

Aruma 30:59