Chitsauko 5: Kufamba Murenje

madzikoma nemunin’ina vachifamba mugwenga

Ishe vaida kuti vanakomana vaRihai vave nemadzimai aizodzidzisa vana vavo vhangeri. Vakataurira Rihai kuti atumire vanakomana vake kudzokera kuJerusarema kunotora mhuri yaIshmaeri.

1 Nifai 7:1–2

Nifai nemadzikoma ake vakadzokera kuJerusarema. Vakataurira Ishmairi izvo zvaidiwa naIshe kuti aite. Ishmairi akatenda kwavari, uye iye nemhuri yake vakaenda nevanakomana vaRihai.

1 Nifai 7:3–5

Apo pavakanga vachifamba murenje, Ramani naRemueri nevamwe vemhuri yaIshmaeri vakashatirwa. Vaida kudzokera kuJerusarema.

1 Nifai 7:6–7

Nifai akayeuchidza Ramani naRemueri zvose zvavakanga vaitirwa naIshe. Akavataurira kuti vave nerutendo rwakakura. Vakashatirirwa Nifai asi havana kudzokera kuJerusarema.

1 Nifai 7:8–13, 16, 21

Nifai, madzikoma ake, naZoramu pashure vakazoroora vanasikana vaIshmaeri.

1 Nifai 16:7

Ishe vakataurira Rihai kuti aenderere mberi nerwendo rwake. Mangwanani akatevera Rihai akawana chibhora chebhurasi chainzi Riahona kunze kwetende yake. Chainongedzera nzira yekuenda nayo murenje.

1 Nifai 16:9–10

Mhuri yaRihai yakaunganidza zvekudya nembeu uye vakarongedza matende avo. Vakafamba nemurenje kwemazuva akawanda, vachitevera kwavairatidzwa neRiahona.

1 Nifai 16:11–16

Nifai nemadzikoma ake vaishandisa uta nemiseve kuvhima zvekudya apo pavaifamba.

1 Nifai 16:14–15

Uta hwaNifai hwesimbi hwakatyoka, uye uta hwemadzikoma ake hwakarasikirwa nesimba rahwo. Madzikoma ake vakange vasisakwanise kuuraya mhuka, saka munhu wese akanga ava nenzara. Ramani naRemueri vakashatirwa.

1 Nifai 16:18–21

Nifai akagadzira uta hwechitanda uye akabvunza baba vake uko kwekuti anovhima. Rihai akatambira nzira muRiahona. Nifai akatevera nzira yaakapihwa uye akawana dzimwe mhuka.

1 Nifai 16:23, 26, 30–31

Riahona yaishanda chete apo mhuri yaRihai payainge yakatendeka, yakashinga, uye ichiteerera.

1 Nifai 16:28–29

Nifai akadzoka nemhuka dzaakanga awana. Munhu wese akafara kuwana zvekudya. Vakava neurombo kuti vakanga vamboshatirwa, uye vakatenda Mwari nekuvaropafadza kwavakanga vaita.

1 Nifai 16:32

Kufamba kwakanga kusiri nyore. Kazhinji mhuri yaRihai yakanga yakaneta, iine nzara, nenyota. Ishmaeri akafa uye vanasikana vake vakasuwa. Vakatsutsumwa kuna Rihai.

1 Nifai 16:34–35

Ramani naRemueri vakatsutsumwawo. Havana kubvuma kuti Ishe vakanga vataura kuna Nifai. Vaida kuuraya Rihai naNifai uye vagodzokera kuJerusarema.

1 Nifai 16:37–38

Izwi raIshe rakataura kuna Ramani naRemueri. Rakavataurira kuti vasashatirirwe Rihai naNifai. Ramani naRemueri vakatendeuka.

1 Nifai 16:39

Mhuri yaRihai yakaenda mberi nerwendo rwavo rwainetsa. Mwari vakavabatsira uye vakavasimbisa. Vana vakazvarwa. Rihai naSaria vakave nevamwe vanakomana vaviri, vainzi Jakobho naJosefa.

1 Nifai 17:1–3; 1 Nifai 18:7

Mushure mekufamba murenje kwemakore masere, mhuri yaRihai yakasvika kumahombekombe kwegungwa. Ipapo vakawana muchero nehuchi. Vakadaidza nzvimbo iyi kuti Bhaundifuru.

1 Nifai 17:4–6