Chitsauko 15
Aruma Anodzidzisa uye Anobhabhatidza
Aruma akatendeuka pazvivi zvake uye akaenda kumaNifai muchivande, achivadzidzisa shoko raAbhinadhai. Aruma akataurira vanhu kuti vave nerutendo muna Jesu Kristu uye vatendeuke.
Munguva dzemasikati Aruma aihwanda murugwezhwa rwemiti padyo nedziva rainzi Mvura dzaMormoni.
Avo vakatenda dzidziso dzaAruma vakaenda kuMvura dzaMormoni vakabhabhatidzwa. Aruma akabhabhatidza vanhu mazana maviri nevana kupinda muChechi yaKristu.
Aruma achigadza vapirisita kuti vadzidzise vanhu. Akataurira vapirisita kuti vadzidzise rutendeuko nerutendo muna Jesu Kristu. Akatiwo havafanire kukakavadzana asi vabatane.
Vanhu vaAruma vaidanana nekushandirana. Vaigoverana zvinhu zvose zvavaiva nazvo uye vachitenda nekuva vakadzidza nezvaJesu Kristu, Mununuri wavo.
Varanda vaMambo Noa vakaona Aruma achidzidzisa vanhu. Mambo akati Aruma akanga achikonzera maNifai kumupandukira, saka akatumira mauto kuti avauraye.
Mwari vakayambira Aruma kuti mauto aMambo Noa akanga ari kuuya. Vanhu vakaunganidza mhuri dzavo, zvipfuyo, nezvimwe zvinhu zvavo uye vakatizira murenje.
Mwari vakasimbisa vanhu vaAruma kuitira kuti vakwanise kutiza kubva kumauto aMambo Noa. Mauto akatsvaga asi haana kumbovawana.
Mushure mekufamba murenje kwemazuva masere, vanhu vaAruma vakasvika kunharaunda yakanaka yaive nemvura yakachena yaiyerera nemairi. Ipapo vakadyara zvirimwa uye vakavaka zvivako.
Vanhu vaida kuti Aruma ave mambo wavo, asi Aruma akati Mwari vakanga vasingade kuti vave naMambo. Mwari vaida kuti vasununguke.