Chitsauko 6

Chiroto chaRihai

Rihai akataurira mhuri yake nezve chiratidzo chinokosha chaakavanacho muchiroto. Chiroto chaRihai chakamuita kuti afare pamusoro paNifai naSemu asi akasuwa pamusoro paRamani naRemueri.

1 Nifai 8:2–4

Muchiroto chake Rihai akaona murume akanga akapfeka nguwo chena uyo akataurira Rihai kuti amutevere. Rihai akatevera murume uyu kuenda murenje rine rima uye risina chinhu chipenyu.

1 Nifai 8:5–7

Mushure mekufamba murima kwemaawa mazhinji, Rihai akanamatira rubatsiro.

1 Nifai 8:8

Zvino akaona muti waive nemuchero muchena. Muchero waitapira uyu waiita kuti avo vaiudya vafare.

1 Nifai 8:9–10

Rihai akadya muchero, uye ukamuzadza nerufaro. Aida kuti mhuri yake iravire muchero uyu nokuti aiziva kuti waizovaita kuti vafarewo.

1 Nifai 8:11–12

Rihai akaona rwizi rwaiyerera pedyo nemuti wacho. Kumusoro kwerwizi urwu akaona Saria, Semu, naNifai.

1 Nifai 8:13–14

Rihai akadaidzira kumudzimai nevanakomana vake kuti vauye vazoravira muchero. Saria, Semu, naNifai vakaenda uye vakaravira muchero, asi Ramani naRemueri vakaramba.

1 Nifai 8:15–18

Rihai akaonawo danda resimbi nenzira yakatwasuka uye yakamanikana zvaienda kumuti.

1 Nifai 8:19–20

Akaona vanhu vazhinji vachifamba panzira kana kuti vakananga kunzira. Nokuda kwemhute yerima, vamwe vakatetereka vachisiya nzira uye vakarasika.

1 Nifai 8:21–23

Vamwe vakabatirira zvakasimba kudanda resimbi vakakwanisa kufamba nemurima kusvika kumuti. Vakaravira muchero

1 Nifai 8:24

Vanhu vaive muchivako chikuru kumhiri kwerwizi vaiseka avo vaidya muchero. Vamwe vakanga vadya muchero vakanyara uye vakabva pamuti.

1 Nifai 8:26–28

Rihai akaona vanhu vazhinji muchiroto chake. Vamwe vakanga vakabatirira zvakasimba kudanda resimbi uye vakafamba nemurima kusvika kumuti. Vakaravira muchero Vamwe vakaenda kuchivako chikuru kana kuti vakanyura murwizi kana kuti vakarasika. Ramani naRemueri vakaramba kudya muchero. Rihai akanetseka pamusoro pavo uye akaedza kuvabatsira kuti vateerere mirairo yaMwari.

1 Nifai 8:30–38