1 Nā, koinei ngā kupu i kauhautia e Amureke ki te iwi i te whenua o Amonaiha, e mea ana:

2 Ko Amureke ahau; ko au te tama a Kirona, koia te tama a Ihimaera, koia tētahi uri o Aminari; ā, koia taua Aminari nāna ngā tuhinga i runga i te pakitara o te temepara i whakamāori, he mea tuhituhi e te ringa o te Atua.

3 Ā, he uri anō a Aminari nō Nīwhai, koia te tama a Rīhai, i puta mai ai i te whenua o Hiruharama, koia tētahi uri o Mānahe, koia te tama a Hōhepa i hokona atu ai ki Ihipa e ngā ringaringa o ōna tuākana.

4 Ā, nana, ehara i te mea he tangata rongo iti ahau i waenganui i te hunga katoa e mōhio ana ki ahau; āe rā, ā, nana, he nui ōku huānga me ōku hoa, ā, kua riro mai anō i ahau ngā taonga maha i runga i te mahi a ōku ringaringa.

5 Hei aha koa, nō muri iho i ēnei katoa, kīhai rawa au i mōhio noa ki ngā huarahi o te Ariki, me āna mea ngaro me tōna mana kāore nei ōna rite. Ko tāku i kī ai kīhai rawa au i mōhio noa ki ēnei mea; engari nana, e pōhēhē ana au, nā te mea kua nui taku kite atu i ana mea ngaro me tōna mana kāore nei ōna rite; āe rā, i roto hoki i te tiakanga i te oranga o tana iwi.

6 Hei ahakoa, nāku taku ngākau i whakapakeke, nā te mea he maha ngā wā i karangatia ai au engari kīhai au i whakarongo atu; nō reira i mōhio au e pā ana ki ēnei mea, engari kīhai au i pirangi kia mōhio; nō reira i haututū tonu atu au ki te Atua, i runga i te whakarihariha o tōku ngākau, tae atu pū anō ki te rangi tuawhā o te marama tuawhitu, koia i te tau tuangahuru o te whakahaeretanga a ngā kaiwhakawā.

7 I ahau e haere ana kia kite i tētahi whanaunga tata, nana i puta mai tētahi anahera a te Ariki ki ahau kātahi ka kī ake: E Amureke, e hoki ki tōu ake whare, nā te mea māu tētahi poropiti a te Atua e whāngai; āe rā, he tangata tapu, he tangata kua kōwhiria e te Atua; nā te mea kua nohopuku ia mō ngā rā maha nā ngā hara o tēnei iwi, ā, e matekai ana ia, ā, māu ia e whakawhiwhi ki roto i tōu whare kātahi ka whāngaia ia, ā, māna koe me tōu whare e manaaki; ā, ka tau iho te manaakitanga a te Ariki ki runga i a koe me tōu whare.

8 Ā, i pahawa ake, nā, i whakarongo au ki te reo o te anahera, ā, ka hoki atu ki tōku whare. Ā, i ahau e haere atu ana ki reira ka kite au i tētahi tangata nā te anahera i kī ai ki ahau: Māu e whakawhiwhi ki roto i tōu whare—ā, nana, ko taua tangata anō tēnei e kōrero ana ki a koutou e pā ana ki ngā mea o te Atua.

9 Ā, ka kī mai te anahera ki ahau, he tangata tapu ia; nā reira e mōhio ana ahau he tangata tapu ia nā te mea nā tētahi anahera a te Atua i kī mai.

10 Hei āpiti anō, e mōhio ana ahau he pono ngā mea kua whakaatuhia nei e ia; nana rā ko taku kupu tēnei ki a koutou, nā, e ora ana te Ariki, waihoki rā nāna tana anahera i tono mai kia whakamōhiotia ēnei mea ki ahau; ā, kua pēneitia e ia i tēnei Arami e noho ana i tōku whare.

11 Nana rā, nāna tōku whare i manaaki, nāna ahau i manaaki, me aku wāhine, me āku tamariki, me tōku matua me ōku huānga; āe rā, kua manaakitia katoatia ōku huānga katoa, ā, kua tau iho te manaakitanga a te Ariki ki runga i a mātou e rite ana ki tāna i kōrero ai.

12 Ināianei ā, i te kōrerotanga a Amureke i ēnei kupu ka ohorere haere te iwi, e kitea ana he nui ake i te kaiwhakaatu kotahi kua whakaatuhia mō ngā mea kua whakahēngia nei rātou, mō ngā mea anō hoki e puta mai ai, e ai ki te wairua o te poropititanga i roto nei i a rāua.

13 Hei aha koa, he tokomaha anō i waenganui i a rātou i whakaaro ai kia uia rāua, kia mau ai rāua i roto i ā rāua kupu mā ā rātou rautaki tinihanga, kia kitea he mea hei whakahē i a rāua, kia tukuna atu rāua ki ō rātou kaiwhakawā e whakawākia ai rāua e rite ana ki te ture, ā, kia whakamatea rāua, kia makaia atu rānei rāua ki roto i te whareherehere, e rite ana ki te hara e whakakitea ai e rātou, e whakahēngia ai rānei e rātou ki a rāua.

14 Nā, ko aua tāngata anō i whai ki te whakangaro i a rāua, he rōia, he tangata kua utua, kua whakataua rānei e te iwi kia whakahaere ai i te ture i ngā wā o ā rātou whakawākanga, hei ngā whakawākanga i ngā hara o te iwi i te aroaro o ngā kaiwhakawā.

15 Nā, he matatau ēnei rōia i roto i ngā mahi tinihanga katoa o te iwi; ā, i pēnei kia whai pūkenga ai rātou i roto i tā rātou tū mahi.

16 Ā, i pahawa ake, nā, i tīmata rātou ki te uiui i a Amureke, kia raru ai ana kupu i a rātou, kia taupatupatu rānei āna kupu e kōrerotia ai e ia.

17 Nā, kāore rātou i mōhio e āhei ana i a Amureke te mōhio ki ā rātou rautaki. Engari i pahawa ake i a rātou e tīmata ana ki te uiui i a ia, i whēkite ia i ō rātou whakaaro, kātahi ka kī atu ia ki a rātou: E koutou te whakatipuranga parori kē kino, e koutou ngā rōia me ngā tangata arero rua, nā, kei te whakatakotohia e koutou ngā tūāpapa o te rēwera; nā, kei te whakatakotohia e koutou ngā rore me ngā māhanga hei hopu i ngā mea tapu a te Atua.

18 Kei te whakatakotohia e koutou ngā rautaki hei parori ngā huarahi o te hunga tika, ā, kia tōia iho mai te riri a te Atua ki runga i ō koutou māhunga, tae atu pū anō ki te whakangaromanga katoatanga o tēnei iwi.

19 Āe rā, he tika rawa tā Mōhia kōrero, ko ia tō tātou kīngi whakamutunga, i te wā whano ka tuku ake i te kīngitanga, nā te korenga ōna he tangata hei whakatauhia atu, e meatia ana tēnei iwi kia whakakāwanatia e ō rātou ake reo—āe rā, he tika rawa tana kōrero, nā, mēnā ka tae mai te wā e kōwhiri ai tēnei iwi i te hē, arā, mēnā ka tae mai te wā e taka iho ai tēnei iwi ki roto i te hara, ko reira anō rātou pakari ai mō te whakangaromanga.

20 Ināianei ā, ko taku kupu tēnei ki a koutou, nā, he tika rawa tā te Ariki whakawā i ō koutou hara; he tika rawa tāna karanga ki tēnei iwi, mā te reo o āna anahera: E rīpenetā koutou, e rīpenetā, nā te mea kua tata mai te kīngitanga o te rangi.

21 Āe rā, he tika rawa tana karanga, mā te reo o āna anahera: Ka heke iho au ki waenganui i taku iwi e mau ana te mana taurite me te tika i ōku ringaringa.

22 Āe rā, ko taku kupu tēnei ki a koutou, nā, me i kore ngā inoi a te hunga tika, e noho ana i te whenua ināianei, kua torona pū anō koutou ināianei ki te whakangaromanga katoatanga; heoi, ehara mā te waipuke, pērā i ngā tāngata i ngā rā o Noa, engari mā te matekai, mā te urutā hoki, mā te hoari hoki.

23 Engari nā ngā inoi a te hunga tika koutou i tohua ai; nō reira, mēnā ka peia atu e koutou te hunga tika i waenganui i a koutou kātahi ka kore rānei te Ariki e pupuri i tōna ringa; engari ka haere mai ia ki a koutou i runga i tōna riri nanakia; kātahi ka patua koutou e te matekai, e te urutā hoki, e te hoari hoki; ā, kua tata mai te wā ki te kore koutou e rīpenetā.

24 Ināianei ā, i pahawa ake, nā, i nui ake te riri o te iwi ki a Amureke, ā, ka karanga atu rātou, e mea ana: E takahi ana tēnei tangata i ō tātou ture tika, ā, i ō mātou rōia matatau kua kōwhiria nei e mātou.

25 Engari ka whātoro atu a Amureke i tōna ringa, kātahi ka kaha ake tana karanga ki a rātou, e mea ana: E koutou te whakatipuranga parori kē kino, he aha i mau pū ai ō koutou ngākau i a Hātana? He aha koutou e tuku ai i a koutou anō ki a ia kia whai kaha ia ki runga i a koutou, kia whakakāpōhia ō koutou karu, kia kore ai koutou e mārama ki ngā kupu kua korerotia nei, e ai ki tō ērā pono?

26 Nana rā, kua whakapuaki atu ahau i tētahi whakahē ki tō koutou ture? Kāore koutou i te mārama; e kī ana koutou kua whakahē au i tō koutou ture; engari kīhai rawa au, engari kua tautoko aku kōrero i tō koutou ture, hei whakahētanga mō koutou.

27 Ināianei ā nana, ko taku kupu tēnei ki a koutou, nā, kua tīmata te whakatakotoranga iho i te tūāpapa o te whakangaromanga o tēnei iwi e te kino o ō koutou rōia me ō koutou kaiwhakawā.

28 Ināianei ā, i pahawa ake, nā, i te kōrerotanga atu a Amureke i ēnei kupu ka karanga ake te iwi hei whakahē i a ia, e mea ana: Nā, e mōhio ana tātou he tangata tēnei nā te rēwera, nā te mea kua rūkahu ia ki a tātou; nā te mea kua whakahē ia i tō tātou ture. Ināianei ā, e mea ana ia kāore ia i whakahē atu.

29 Hei āpiti anō, kua takahi ia i ō tātou rōia me ō tātou kaiwhakawā.

30 Ā, i pahawa ake, nā, ka puru ngā rōia i ēnei mea ki roto i ō rātou ngākau kia mahara ai i ēnei mea hei whakahē i a ia.

31 Ā, i reira tētahi i waenganui i a rātou ko Tēroma tōna ingoa. Nā, koia tonu te tino kaiwhakahē i a Amureke rāua ko Arami, koia tonu tētahi o ngā tino mea mōhio i waenganui i a rātou, he nui āna mahi hei mahi i roto i te iwi.

32 Nā, ko te taonga tā ēnei rōia tino whai; ā, ka whiwhi taonga rātou e rite ana ki tā rātou mahi.