1 Ināianei ā, i pahawa ake, nā, ka haere atu ngā tama a Arami ki waenganui i te iwi, ki te whakapuaki i te kupu ki a rātou. Ā, ko Arami hoki, koia anō, kīhai i taea te whakatā, ā, ka haere atu anō hoki ia.

2 Nā, kāore mātou e kōrero anō e pā ana ki tā rātou kauhautanga, atu i te mea, nā, i kauhau rātou i te kupu, me te pono, e rite ana ki te wairua o te poropititanga me te whakakitenga; ā, i kauhau rātou i runga i te āhua o te ritenga tapu o te Atua i karangatia nei rātou.

3 Ināianei ā, ka hoki atu au ki tētahi kōrero mō ngā pakanga i waenganui i ngā Nīwhai me ngā Rāmana, i te tau tuangahuru mā waru o te whakahaeretanga a ngā kaiwhakawā.

4 Nana rā, i pahawa ake, nā, ka huri ngā Hōrama hei Rāmana; nō reira, i te tīmatanga o te tau tuangahuru mā waru ka kite ngā Nīwhai i te whakaekenga mai o ngā Rāmana ki runga i a rātou; nō reira i whakarite rātou mō te pakanga; āe rā, ka whakahuihui rātou i ā rātou tauā i te whenua o Herehona.

5 Ā, i pahawa ake, nā, ka haere mai ngā Rāmana me ā rātou manomano; ā, i haere mai rātou ki roto i te whenua o Anationuma, koia te whenua o ngā Hōrama; ā, ko Herahemena te ingoa o tō rātou rangatira.

6 Ināianei ā, i te mea ko ngā Amareki ngā tino tangata kino ake, ngā tino kaikōhuru kino ake i ngā Rāmana, i roto i tō rātou āhua ake anō, nō reira, ka whakatūria e Herahemana ngā kaiwhakahau matua i runga i ngā Rāmana, ā, he Amareki, he Hōrama katoa rātou.

7 Nā, ka meatia tēnei e ia kia mau tonu ai tō rātou mauāhara ki ngā Nīwhai, kia meinga ai rātou e ia kia ngohengohe ki a ia hei whakaoti i tana rautaki.

8 Nana rā, ko tana rautaki ia kia whakaohooho ake i ngā Rāmana ki te riri ki ngā Nīwhai; i pēnei ia kia neke ake ai tōna mana ki runga i a rātou, ā, kia neke ake anō hoki tōna mana ki runga i ngā Nīwhai mā te kukume i a rātou ki roto i te hereheretanga.

9 Ināianei ā, ko te rautaki o ngā Nīwhai ko te tiakanga o ō rātou whenua, me ō rātou kāinga, me ā rātou hoawāhine, me ā rātou tamariki, kia tiakina ai ērā i ngā ringaringa o ō rātou hoariri; ā, kia tiakina anō hoki ō rātou tikanga me ō rātou ritenga, āe rā, me tō rātou herekoretanga, kia taea ai e rātou te koropiko i te Atua e rite ana ki ā rātou hiahia.

10 Nā te mea i mōhio rātou ki te taka atu ki ngā ringaringa o ngā Rāmana, nā, ka whakangaro ngā Rāmana i ngā tāngata katoa e koropiko ana i runga i te wairua me te pono ki te Atua pono e ora ana.

11 Āe rā, i mōhio anō rātou ki tō ngā Rāmana mauāhara nunui ki ā rātou teina, arā, ko ngā Anati-Nīwhai-Rīhai, kua karangatia ko te iwi o Amona—ā, kua kore rātou e hāpai patu, āe rā, kua uru rātou ki roto i tētahi kawenata e mea ana kua kore rātou e hāpai patu, ā, kāore rātou i pai kia takahi—nō reira, ki te taka iho rātou ki ngā ringaringa o ngā Rāmana ka whakangaromia rātou.

12 Ā, kāore ngā Nīwhai e tuku kia whakangaromia rātou; nō reira rātou tuku whenua atu ai ki a rātou hei whenua tuku iho mō rātou.

13 Ā, ka homai e te iwi o Amona tētahi wāhi nui o ā rātou rawa hei tautoko i ō rātou tauā; ā, pēnei kua meinga ngā Nīwhai, ko rātou anake, hei tū atu ki ngā Rāmana, ko rātou nei he uri nō Rāmana rāua ko Remuere, me ngā tama a Ihimaera, me te hunga katoa i tītore atu i ngā Nīwhai, ko rātou nei ngā Amareki me ngā Hōrama, me ngā uri o Noa.

14 Nā, he rite te rahi o ērā uri, kua tata rite ki te rahi o ngā Nīwhai; ā, pēnei ka meinga ngā Nīwhai kia tatau atu ki ō rātou tuākana, tae atu ki te whakaheke toto.

15 Ā, i pahawa ake i te mea kua whakahuihui tahi ngā tauā a ngā Rāmana i te whenua o Anationuma, nana, kua whakarite ngā tauā a ngā Nīwhai kia tūtaki ki a rātou i te whenua o Herehona.

16 Nā, ko te rangatira o ngā Nīwhai, ko te tangata rānei kua whakataua hei rangatira nui i runga i ngā Nīwhai—nā, ko te rangatira nui te kaiwhakahau i runga i ngā tauā katoa o ngā Nīwhai—ā, ko Moronai tōna ingoa;

17 Ā, ka riro i a Moronai te tikanga katoa me te whakahaeretanga katoa o ā rātou pakanga. Ā, kua rua ngahuru mā rima tau noa iho tōna pakeke i te wā i whakataua ia hei rangatira nui i runga i ngā tauā a ngā Nīwhai.

18 Ā, i pahawa ake, nā, ka tūtaki ia ki ngā Rāmana i ngā rohe o Herehona, ā, kua mau hoari tōna iwi, me ngā hemita, me ngā tūmomo patu katoa o ia āhua, o ia āhua.

19 Ā, i te kitenga atu a ngā Rāmana i te iwi o Nīwhai, i tā Moronai whakarite rānei i tana iwi ki ngā ārai uma me ngā puapua, āe rā, ki ngā mea ārai anō hoki hei tiaki i ō rātou māhunga, ā, kua kākahutia ki ngā kahu mātotoru—

20 Nā, kāore te tauā a Herahemena i te whakaritea pērāhia; i a rātou ā rātou hoari me ā rātou hemita anake, ā rātou kōpere me ā rātou pere, ā rātou kōhatu me ā rātou kōtaha; ā, i tahanga rātou, hāunga ko tētahi hiako kua whītikina i ō rātou hope; āe rā, i tahanga katoa rātou, hāunga ko ngā Hōrama me ngā Amareki;

21 Engari kāore ō rātou ārai uma, ā rātou puapua rānei—nō reira, i te tino mataku rawa rātou i ngā tauā a ngā Nīwhai nā ō rātou tōpuni tauwhāinga, hei aha koa hira noa ake tō rātou tokomahatanga i tō ngā Nīwhai.

22 Nana, i pahawa ianei ake, nā, kāore ō rātou māia kia huaki mai ki ngā Nīwhai i roto i ngā rohe o Herehona; nō reira, ka wehe atu rātou i te whenua o Anationuma ki roto i te koraha, ā, tawhio haere ana i te koraha, atu ki te taha o te awa o Hairona, kia kuhu ai i te whenua o Manati kia riro i a rātou te whenua; nā te mea kāore rātou i whakaaro ka mōhio ngā Nīwhai ki hea rātou haere ai.

23 Engari i pahawa ake, i taua wā tonu i wehe atu rātou ki roto i te koraha ka tuku tūtei a Moronai ki roto i te koraha ki te tirotiro i tō rātou hōpuni; ā, ko Moronai, anō hoki, e mōhio ana ki ngā poropititanga a Arami, ka tukuna ētahi tāngata ki a ia, e tono ana ki a ia kia uia atu ai te Ariki ki te wāhi e haere ai ngā tauā a ngā Nīwhai ki te tiaki i a rātou anō i ngā Rāmana.

24 Ā, i pahawa ake, nā, ka tau mai te kupu a te Ariki ki a Arami, kātahi ka whakamōhiotia atu e Arami ngā karere a Moronai, nā, kei te hīkoi ngā tauā a ngā Rāmana taiāwhio noa i te koraha, kia haere atu ai rātou ki roto i te whenua o Manati, kia huaki atu ki te wāhi ngoikore o te iwi. Ā, ka haere aua karere, ā, ka kawea atu taua karere ki a Moronai.

25 Nā, waiho ana e Moronai tētahi wāhi o tana tauā i te whenua o Herehona, kei haere mai noa tētahi wāhi o ngā Rāmana ki roto i te whenua, ā, kei riro i a rātou te pā, ka haria te toenga atu o tana tauā kātahi ka hīkoi atu ki roto i te whenua o Manati.

26 Ā, ka meatia e ia kia huihui tahi ai te iwi katoa i tērā takiwā o te whenua i a rātou anō ki te pakanga atu ki ngā Rāmana, hei tiaki i ō rātou māra me tō rātou whenua, i ō rātou tikanga me ō rātou tikanga herekoretanga; nō reira i rite rātou mō te taenga mai a ngā Rāmana.

27 Ā, i pahawa ake, nā, ka meatia e Moronai kia huna ai tana tauā i te raorao e tata ana ki te tahatika o te awa o Hairona, ki te taha uru o te awa o Hairona i te koraha.

28 Ā, ka whakanohoia e Moronai ngā tūtei ki ngā wāhi e pātata ana, kia mōhio ai ia hei āhea haere mai ai te hōpuni o ngā Rāmana.

29 Ināianei ā, i te mea kua mōhio a Moronai ki ngā whakaaro a ngā Rāmana, arā, i te hiahia rātou ki te whakangaro i ā rātou teina, ki te whakaeke tikanga rānei, ā, ki te kukume iho i a rātou ki roto i te hereheretanga kia whakapūmautia e rātou tētahi kīngitanga mō rātou anō ki runga i te whenua katoa;

30 Ā, i te mōhio anō ia ko te hiahia anake o ngā Nīwhai ko te tiaki i ō rātou whenua, me tō rātou herekoretanga, me tō rātou hāhi, nō reira i whakaaro ia ehara i te hara kia tiakina ērā mea e ia mā te rautaki; nō reira, nā ana tūtei i kite ai ia i te huarahi e haere ai ngā Rāmana.

31 Nō reira, ka whakawehewehe ia i tana tauā, ā, ka mauria tētahi wāhi ki roto i te raorao, ā, ka hunaia rātou i te taha rāwhiti, i te taha tonga anō hoki o te puke Ripira;

32 Ā, ka hunaia atu e ia te toenga atu ki te raorao i te uru, i te taha uru o te awa o Hairona, ā, i raro hoki i ngā rohe o te whenua o Manati.

33 Ā, pēnei kua whakanohoia e ia tana tauā e rite ana ki tana hiahia, kua rite ia ki te tūtaki i a rātou.

34 Ā, i pahawa ake, nā, ka haere ake nei ngā Ramana ki runga i te puke i te taha raki, ki te wāhi i reira tētahi wāhi o te tauā a Moronai e huna ana.

35 Ā, i te wā i hipa atu ngā Rāmana i te puke o Ripira, kātahi ka tomo ki roto i te raorao, kātahi ka tīmata ki te whakawhiti i te awa o Hairona, ko te tauā e huna atu ana i te puke ki te taha tonga, i ārahina nei e tētahi tangata ko Rīhai tōna ingoa, ā, nāna tana tauā i ārahi atu, ā, ka karapotia ngā Rāmana ki te taha rāwhiti, arā, tō rātou hiku.

36 Ā, i pahawa ake, nā, i te kitenga o ngā Ramana i ngā Nīwhai e whakaeke ana ki runga i a rātou i tō rātou hiku, ka whakatahuritia atu rātou ki muri, ā, ka tīmata ki te tatau atu ki te tauā a Rīhai.

37 Ā, ka tīmata te mahi whakamate i ngā taha e rua, engari i te kino rawa ake te āhua ki te taha o ngā Ramana, nā tō rātou tahangatanga i kaha hahau hoki ngā Nīwhai i a rātou ki ā rātou hoari me ā rātou hemita, nā konā puta ake te mate i te nuinga o ngā patunga.

38 Heoi kei tērā atu taha, ka hinga iho tētahi tangata i tēnā wā, i tēnā wā i waenganui i ngā Niwhai, nā ā ratou hoari me te hekenga o te toto, i te mea kua tiakina ngā wāhi o te tīnana, arā, ngā tino wāhi o te tīnana e nui nei te ora kua tiakina i ngā hahautanga a ngā Rāmana, nā ō rātou ārai uma, me ō rātou puapua, me ō rātou ārai māhunga; ā, pēnei ka kawe tonu atu ngā Nīwhai i te mahi whakamate i waenganui i ngā Rāmana.

39 Ā, i pahawa ake, nā, ka wehi haere ngā Rāmana, nā te whakangaromanga nui i waenganui i a rātou, tae atu ana ki tā rātou tahutitanga atu whakateawa o Hairona.

40 Ā, i arumia rātou e Rīhai rātou ko ana tāngata; ā, ka āia atu rātou e Rīhai ki roto i ngā wai o Hairona, ā, ka whakawhiti atu rātou i ngā wai o Hairona. Ā, ka puritia e Rīhai ana tauā ki runga i ngā tahatika o te awa o Hairona kei whakawhiti atu rātou.

41 Ā, i pahawa ake, nā, ka tūtaki a Moronai rātou ko tana tauā ki ngā Rāmana i te raorao, i tērā atu taha o te awa o Hairona, ā, ka tīmata tā rātou takanga atu ki runga i a rātou ki te patupatu i a rātou.

42 Ā, ka tahuti atu anō ngā Rāmana i tō rātou aroaro, whakatewhenua o Manati; ā, ka tūtakina anōtia rātou e ngā tauā a Moronai.

43 Nā, i tino kaha ngā Rāmana ki te whawhai i tēnei wā; āe rā, kāore i mōhiotia ngā Rāmana i mua ki te whawhai i runga i te kaha me te māia nui, e kāo, kāore i pēnei noa mai i te tīmatanga rā anō.

44 Ā, ka whakahaua rātou e ngā Hōrama, e ngā Amareki, ko rātou nei ō rātou rangatira nui me ō rātou kaiārahi matua, e Herahemena anō hoki, ko ia tō rātou rangatira nui, ko tō rātou kaiārahi matua me tō rātou kaiwhakahau matua; āe rā, i whawhai rātou anō nei he tarakona, ā, he tokomaha ngā Nīwhai i patua ai e ō rātou ringaringa, āe rā, nā te mea he maha ngā ārai māhunga i weheruatia e ā rātou hahaunga, ā, he maha ō rātou ārai uma i werohia ai, ā, i haua iho ngā ringa maha; ā, i pēnei tā ngā Rāmana patu i runga i te riri nanakia.

45 Hei aha koa, he pūtake pai ake i whakahaua ai ngā Niwhai, nā te mea kāore rātou i te whawhai mō te kīngitanga, mō te mana rānei engari i te whawhai rātou mō ō rātou kāinga me ō rātou tikanga here kore, mō ā rātou hoawāhine me ā rātou tamariki, mō ā rātou mea katoa, āe rā, mō ō rātou ritenga karakia me tō rātou hāhi.

46 Ā, i te mahi rātou i tērā i whakaaro ai rātou ko tō rātou haepapa hei mahi rātou ki tō rātou Atua; nā te mea kua kī atu te Ariki ki a rātou, ki ō rātou tūpuna anō hoki, nā: Mehemea kāore koutou e hē i te hē tuatahi, i te tuarua rānei, kāore koutou e tuku i a koutou anō kia patua iho e ngā ringaringa o ō koutou hoariri.

47 Hei āpiti anō, i kī mai te Ariki: Mā koutou ō koutou whānau e tiaki tae atu ana ki te whakahekenga toto. Nō reira mō tēnei take i whawhai ai ngā Nīwhai ki ngā Rāmana, ki te tiaki i a rātou anō, me ō rātou whānau, me ō rātou māra, me tō rātou whenua, me ō rātou tikanga, me tō rātou whakapono.

48 Ā, i pahawa ake, nā, i te kitenga ake o ngā tāne a Moronai i te riri me te nanakia o ngā Rāmana, whano ka memenge iho, ā, whano ka tahuti atu i a rātou. Ā, ko Moronai, e mōhio ana ki tō rātou hiahia, ka tonoa atu, ā, ka whakahihikongia ō rātou ngākau ki ēnei kupu—āe rā, ko te whakaaro ki ō rātou māra, tō rātou herekoretanga, āe rā, tō rātou herekoretanga i te hereheretanga.

49 Ā, i pahawa ake, nā, ka tahuri atu rātou ki runga i ngā Rāmana, ā, ka karanga ake i runga i te reo kotahi ki te Ariki tō rātou Atua, mō tō rātou herekoretanga me tō rātou whakawāteatanga i te hereheretanga.

50 Ā, ka tīmata tā rātou tū atu ki ngā Rāmana i runga i te kaha; ā, i taua haora pū anō i karanga ai rātou ki te Ariki mō tō rātou herekoretanga, ka tīmata ngā Ramana ki te tahuti atu i tō rātou aroaro; ā, i tahuti atu rātou ki ngā wai o Hairona.

51 Nā, hira noa ake ngā Ramana, āe rā, he nui ake i te takirua mō te tangata kotahi o ngā Nīwhai; hei aha koa, i āia atu rātou nā konā ka whakaminea ngātahitia rātou i roto i te putu kotahi i te raorao i te tahatika o te awa o Hairona.

52 Nō reira ka karapotia rātou e ngā tauā a Moronai, āe rā, i ngā taha e rua o te awa, nana rā, i te taha rāwhiti ngā tāne o Rīhai.

53 Nō reira i te kitenga atu o Herahemena i ngā tāngata o Rīhai i te taha rāwhiti o te awa o Hairona, me ngā tauā a Moronai i te taha uru o te awa o Hairona, nā, i te karapotia rātou e ngā Nīwhai huri noa, ka pākia rātou e te wehi kino.

54 Nā, i te kitenga o Moronai i tō rātou wehi kino, ka whakahaua e ia ana tāngata kia aukati te whakahekenga i ō rātou toto.