1 Ā, i pahawa ake i te tīmatanga o te tau toru ngahuru mā ono o te whakahaeretanga a ngā kaiwhakawā i runga i te iwi o Nīwhai, ka riro i a Hipirona aua mea tapu kua tukuna ki a Heramana e Arami.

2 Ā, he tangata tika ia, ā, i tōtika tana haere i te aroaro o te Atua; ā, ka ū ia ki te mahi pai i ngā wā katoa ki te pupuri i ngā whakahaunga a te Ariki tōna Atua; ā, i pērā anō tana teina.

3 Ā, i pahawa ake, nā, ka mate anō hoki a Moronai. Ā pēnei te whakamutunga o te tau toru ngahuru mā ono o te whakahaeretanga a ngā kaiwhakawā.

4 Ā, i pahawa ake, nā, i te tau toru ngahuru mā whitu o te whakahaeretanga a ngā kaiwhakawā, i reira tētahi ope tāngata nunui, neke atu anō i te rima mano, whā rau tāngata, me ā rātou hoawahine me ā rātou tamariki, ka wehe atu i te whenua o Harahemara ki roto i te whenua whakateraki.

5 Ā, i pahawa ake i a Hakota, he tangata tino pākiki ia, nō reira ka haere atu ia me te waihanga ake i tētahi kaipuke tino nui rawa atu, i ngā rohe o te whenua Mōmona, e tata atu ana ki te whenua Whakangaromanga, ā, ka whakamānutia atu ki te moana uru, e tata atu ana ki te whenua whāiti e ārahina atu ana ki te whenua whakateraki.

6 Ā nana, he tokomaha ngā Nīwhai i kuhu atu ai ki roto rā, ā, ka mānu atu me ngā ō maha, me ngā wahine hoki me ngā tamariki; ā, ka haere whakateraki atu rātou. Ā pēnei whakamutua ai te tau toru ngahuru mā whitu.

7 Ā, i te tau toru ngahuru mā waru, ka waihanga tēnei tangata i ētahi atu kaipuke. Ā, ka hoki mai te kaipuke tuatahi, ā, ka kuhu atu ngā tāngata tokomaha ki roto rā; ā, he maha anō ā rātou ō i kawea atu ai e rātou, ā, ka haere whakateraki atu anō rātou.

8 Ā, i pahawa ake, nā, kāore he rongo kōrero mō rātou i muri atu. Ā, e whakaaro ana mātou kua toromia iho rātou i ngā rire o te moana. Ā, i pahawa ake, nā, ka mānu atu tētahi kaipuke; ā, kāore e mōhiotia ana ki hea haere ai.

9 Ā, i pahawa ake i tēnei tau he tokomaha ngā tāngata i haere atu ai ki te whenua whakateraki. Ā pēnei whakamutua ai te tau toru ngahuru mā waru.

10 Ā, i pahawa ake i te tau toru ngahuru mā iwa o te whakahaeretanga a ngā kaiwhakawā, ka mate a Hipirona anō hoki, ā, kua haere atu a Koriatono ki te whenua whakateraki i tētahi kaipuke, ki te kawe ō atu ki te iwi kua haere atu ki taua whenua.

11 Nō reira ka tika haere mō Hipirona ki te tuku iho i aua mea tapu, i mua i tōna matenga, ki runga i te tama a Heramana, kua karangatia anōtia ko Heramana, kua huaina ia ki te ingoa o tōna matua.

12 Nana ināianei, ka tuhia aua whaowhaonga katoa i riro ai i a Heramana, ā, ka tukuna atu ki waenganui i ngā tamariki a te tangata puta noa i te whenua, hāunga aua wāhi kua whakahaua e Arami kia kaua e tukua atu.

13 Hei aha koa, ko te tikanga ia kia puritia taputia ēnei mea, ā, kia tukuna iho i tētahi whakatipuranga ki tētahi whakatipuranga; nō reira, i tēnei tau, kua whakatauhia ērā ki runga i a Heramana, i mua i te matenga o Hipirona.

14 Ā, i pahawa ake anō hoki i tēnei tau i reira ētahi kaitītore kua haere atu ki waenganui i ngā Rāmana; ā, ka whakaohoohokia anōtia rātou kia riri ki ngā Nīwhai.

15 Waihoki i tēnei tau anō ka heke iho mai rātou me tētahi tauā tino rahi ki te pakanga ki te iwi o Moronaihā, ki te tauā rānei o Moronaihā, heoi anō, i patua rātou, ā, ka āia atu anō ki ō rātou ake whenua, he nui anō te aituā i pā ai ki a rātou.

16 Ā pēnei ka whakamutua te tau toru ngahuru mā iwa o te whakahaeretanga a ngā kaiwhakawā i runga i te iwi o Nīwhai.

17 Ā pēnei whakakōpanihia te tuhinga a Arami, me Heramana tana tama, me Hipirona anō hoki, ko ia tana tama.