1 Ināianei ā i pahawa ake i te tīmatanga o te tau toru ngahuru o te whakahaeretanga a ngā kaiwhakawā, i runga i te rā tuarua o te marama tuatahi, ka whiwhi a Moronai i tētahi pukapuka mai i a Heramana, e kōrero ana mō ngā āhuatanga o te iwi i tērā takiwā o te whenua.

2 Ā, koinei ngā kupu i tuhia ai e ia, e mea ana: E Moronai, e tōku tuakana e arohaina nuitia ana, i roto i te Ariki, i roto anō hoki i ngā whakapātaritari o te pakanga; nana, e tōku tuakana aroha, he paku kōrero anō tāku e pā ana ki tō mātou pakanga i tēnei wāhi o te whenua.

3 Nana, e rua mano ngā tama o aua tāne i mauria iho mai ai e Amona ki waho i te whenua o Nīwhai—nā e mōhio ana koe koinei ngā uri o Rāmana, ko ia te mātāmua o tō tātou tupuna matua a Rīhai;

4 Nā, ehara i te mea me whakaatu atu au ki a koe e pā ana ki ā rātou whakarerenga iho me tō rātou whakapono kore rānei, nā te mea e mōhio ana koe e pā ana ki ēnei mea katoa—

5 Nō reira kāti noa māku te kī atu ki a koe kua hiki rākau whawhai ngā mea rua mano o ēnei taiohi tāne, ā, e hiahia ana kia tū ai au hei kaiārahi mō rātou; ā, kua haere mai mātou ki te tiaki i tēnei whenua.

6 Ināianei ā, e mōhio ana hoki koe e pā ana ki te kawenata i kawenatahia ai e ō rātou mātua, kia kaua rātou e hiki ake i ā rātou rākau whawhai ki ō rātou tuākana ki te whakaheke toto.

7 Engari i te tau rua ngahuru mā ono, i tā rātou kitenga atu i ō tātou whakamamaetanga me ō mātou whakapātaritaritanga mō rātou anō, whano rātou ka whati i te kawenata i meatia nei e rātou me te hiki ake i ā rātou rākau whawhai hei tiaki i a tātou.

8 Engari kāore au i tuku i a rātou kia whati ai i tēnei kawenata i mea ai rātou, i runga i te whakaaro mā te Atua tātou e whakakaha, ā, ka kore e nui atu ō tātou pōuritanga nā te whakatutukiranga i te oati i oati ai rātou.

9 Engari nana, anei tētahi mea hei haringa nui mō tātou. Nana rā, i te tau rua ngahuru mā ono, i hīkoi au, a Heramana, i te upoko o ēnei taiohi tāne rua mano ki te pā o Huria, ki te āwhina i a Anatipu, nāu nei i whakatū ai hei kaiārahi i runga i te iwi i taua wāhi o te whenua.

10 Ā, i hono atu au ki āku tama rua mano, (nā te mea e tika ana kia karangatia rātou he tama) ki te tauā a Anatipu, i hari nui a Anatipu i taua kaha; nana rā, kua whakawhāitihia tana tauā e ngā Rāmana nā te mea he tokomaha rawa ō tātou tāne i patua ai e ō rātou tauā, nā tērā kua whaitake tātou hei tangi.

11 Hei aha koa, ka tau ō tātou ngākau i tēnei, nā, kua mate rātou i runga i te whakaaro ki tō rātou whenua me tō rātou Atua, āe rā, kei te hari rātou.

12 Ā, he tokomaha anō hoki ngā mauhere i mauria atu ai e ngā Rāmana, he kaiwhakahau matua katoa rātou, nā te mea kāore tētahi atu i tohungia ai e rātou. Ā, e whakaaro ana mātou kei te whenua o Nīwhai rātou ināianei; kei te tika tēnei mehemea kāore anō rātou kia patua.

13 Ināianei ā koinei ngā pā kua riro atu i ngā Rāmana i runga i te whakahekenga i ngā toto o ō tātou tāngata mārohirohi tokomaha:

14 Ko te whenua o Manati, arā, te pā o Manati rānei, me te pā o Tēroma, me te pā o Kumeni, me te pā o Anatipara.

15 Ā, koinei ngā pā i riro i a rātou i taku taenga atu ki te pā o Huria; ā, kite ana au i a Anatipu rātou ko ana tāngata e whakarīrā ana ki te whakamaioro i te pā.

16 Āe rā, i te pēhia ō rātou tīnana me ō rātou wairua, nā te mea kua kaha rawa tā rātou whawhai i te awatea, ā, kua whakarīrā i te pō ki te whakamaioro i ō rātou pā; ā, pēnei ka pāngia rātou e ngā whakamamaetanga nui o ia āhua, o ia āhua.

17 Ināianei ā i ū ō rātou whakaaro ki te wikitōria i roto i tēnei wāhi, ki te mate rānei; nō reira e tika ana kia whakaaro koe ko tēnei ope iti nāku i hari mai, āe rā, i puta ake ngā manako nui me te hari nui i aua tama āku.

18 Ināianei ā i pahawa ake, nā, i te kitenga o ngā Rāmana kua whiwhi kaha anō a Anatipu ki tana tauā, kātahi rātou ka whakahaua e Amonoro kia kaua e whakaeke atu ki te pā o Huria, ki a mātou rānei, ki te whawhai.

19 Ā, pēnei i whakamakautia mātou e te Ariki; nā te mea kua whakaeke mai rātou ki a mātou i tēnei tō mātou āhua tino ngoikore rawa me kore pea rātou e whakangaro i tō mātou tauā iti; engari pēnei i tiakina mātou.

20 I whakahaua rātou e Amonoro kia puritia aua pā kua riro i a rātou. Ā, pēnei whakamutua ai te tau rua ngahuru mā ono. Ā, i te tīmatanga ake o te tau rua ngahuru mā whitu kua whakaritea mātou me tō mātou pā e mātou anō mō te tiakanga.

21 Nā, i te hiahia anō mātou kia whakaeke mai ngā Rāmana ki runga i a mātou; nā te mea kāore mātou i te hiahia ki te whakaeke atu ki runga i a rātou i ō rātou pākaha.

22 Ā, i pahawa ake, nā, i tukuna atu e mātou ētahi tūtei huri noa, huri noa, ki te mātaki i ngā haerenga o ngā Rāmana, nā, kia kore rātou e hipa atu i a mātou i te pō, kia kore rānei e whakaeke atu ki runga i ērā atu o ō mātou pā whakateraki i te awatea.

23 Nā te mea i mōhio mātou kāore ērā pā i te kaha rawa ki te whawhai atu ki a rātou; nō reira i te hiahia mātou, mehemea ka hipa atu rātou i a mātou, ki te taka iho ki runga i tō rātou hiku, ā, pēnei ka huaki atu ki te taha hiku i te wā tonu e whakaekea ana tō rātou upoko. I whakapono mātou ka taea rātou e mātou; engari nana, i te nanu mātou i tēnei tō mātou hiahia.

24 Kāore rātou i māia kia tōhipa atu tō rātou tauā katoa i a mātou, kāore rānei i māia rātou kia pērātia ki tētahi wāhi, he wehi nō rātou kei tokoitiiti rātou, ā, kei hinga.

25 Kāore rānei rātou i māia kia hīkoi iho ki te pā o Harahemara; kāore rānei rātou i māia ki te whakawhiti atu i te awa o Hairona, ki te pā o Nīwhaihā.

26 Ā, pēnei i ū ō rātou whakaaro kia puritia ai e ā rātou tauā ngā pā katoa i riro ai i a rātou.

27 Ināianei ā i pahawa ake i te marama tuarua o tēnei tau, he maha ngā ō i haria mai ai e ngā matua o ērā tama rua mano āku.

28 Hei āpiti anō i tonoa mai ngā tāne rua mano ki a mātou mai i te whenua o Harahemara. Ā, pēnei i whakaritea mātou me ō mātou tāngata tekau mano, me ngā ō mā rātou, me ā rātou hoawahine anō hoki, me ā rātou tamariki.

29 Ā, pēnei ka kite ngā Rāmana i te tupuranga o ā mātou tauā ia rā, ia rā, me ngā ō e haria mai ana hei whakakaha i a mātou, ka wehi haere rātou, ā, ka tīmata tā rātou kōkiri atu, me kore pea e taea te whakamutu i tā mātou whakawhiwhi i ngā ō me ngā tautoko.

30 Nā, i tā mātou kitenga atu i ngā Rāmana e āmaimai haere ana i tēnei āhauatanga, ka hiahia mātou ki te whakahaere rautaki ki runga i a rātou; nō reira ka whakahau a Anatipu kia hīkoi atu mātou ko āku tama nonohi ki te pā e tūtata ana, anō nei i te kawe ō atu mātou ki tētahi pā e tūtata mai ana.

31 Ā, ko te tikanga ia me hīkoi atu mātou kia tata atu ki te pā o Anatipara, anō nei i te haere mātou ki te pā ki tua atu, kei roto i ngā rohe e tata ana ki te takutai moana.

32 Ā, i pahawa ake, nā, i hīkoi atu mātou, anō nei i a mātou ā mātou ō, kia haere atu ai ki taua pā.

33 Ā, i pahawa ake, nā, ka hīkoi atu a Anatipu me tētahi wāhi o tana tauā, e mahue ana te toenga atu hei tiaki i te pā. Engari kāore ia i hīkoi atu tae atu ki te wā kua haere kē atu au me taku tauā iti, ā, kua whakatata atu ki te pā o Anatipara.

34 Ināianei ā, kei roto i te pā o Anatipara te tauā kaha rawa a ngā Rāmana e noho ana; āe rā, ko te mea nunui ake.

35 Ā, i pahawa ake, nā, i te wā i whakamōhiotia rātou e ā rātou tūtei, ka puta mai rātou me tā rātou tauā, ā, ka hīkoi mai ki a mātou.

36 Ā, i pahawa ake, nā, ka tahuti whakateraki atu mātou i a rātou. Ā, pēnei tā mātou ārahi atu i te tauā kaha rawa a ngā Rāmana;

37 Āe rā, tae atu ki tētahi pāmamaotanga āhua nui, nā konā i tā rātou kitenga atu i te tauā a Anatipu e aruaru ana i a rātou, i runga i tō rātou kaha, kāore rātou i huri whakatematau, whakatemauī rānei, engari ka tōtika tonu atu tā rātou aru i a mātou; ā, e whakapae ana mātou, i te hiahia rātou ki te whakamate i a mātou i mua i tā Anatipu hopu i a rātou, ā, pēnei kia kore ai rātou e karapotia e tō mātou iwi.

38 Ināianei ā, i te kitenga o Anatipu i te mōreareatanga whano ka pā mai, ka kaha ake te hīkoi o tana tauā. Engari nana, kua pō; nō reira kāore rātou i hopu i a mātou, kāore rānei a Anatipu i hopu i a rātou; nō reira i noho hōpuni mātou mō te pō.

39 Ā, i pahawa ake, nā, i mua i te tākiritanga o te ata, nana, i te aruaru mai ngā Rāmana i a mātou. Nā, kāore mātou i te tino kaha ki te whawhai ki a rātou; āe rā, kāore au i tuku i āku tama nonohi kia taka iho ki roto i ō rātou ringaringa; nō reira hono tonu tā mātou hīkoi, ā, ka whakatika atu tā mātou hīkoi ki roto i te koraha.

40 Nā, kāore rātou i māia kia huri whakatematau, kia huri whakatemauī rānei kei karapotia rātou; kāore rānei au e huri whakatematau, e huri whakatemauī rānei kei hopu rātou i ahau, kāore i taea e mātou te tū atu ki a rātou, engari ka whakamatea, ā, ka whakatika tā rātou mawhiti atu; ā, pēnei tā mātou tahutitanga atu i te koraha mō te roanga atu o taua rā, tae noa atu ki te pō.

41 Ā, i pahawa ake anō, i te tākiritanga o te ata ka kite mātou i ngā Rāmana kei runga i a mātou, ā, i tahuti atu mātou i tō rātou aroaro.

42 Engari i pahawa ake, nā, kāore i roa tā rātou arumanga i a mātou kātahi ka tū rātou; ā, i te ata o te rangi tuatoru o te marama tuawhitu.

43 Ināianei ā, kāore mātou i te mōhio mehemea kua hopungia rātou e Anatipu kāore rānei, engari nāku i kī atu ki aku tāne: Nana, kāore mātou i te mōhio hāunga i te mea kua tū rātou kia whakaeke atu tātou ki a rātou, kia hopungia tātou i tā rātou māhanga;

44 Nō reira he aha tā koutou, e aku tama, ka whakaae rānei koutou kia haere ki te whawhai ki a rātou?

45 Ināianei ā ko taku kupu tēnei ki a koutou, e tōku tuakana aroha e Moronai, nā, kāore ahau i kite atu i te toa e rite nei te nui o te māia, e kāo, kāore kau i waenganui i ngā Nīwhai katoa.

46 I te mea i karanga atu au ki a rātou he tama nāku (nā te mea he tino taitamariki katoa rātou) nā konei i kī mai rātou ki ahau: Matua, nana kei a tātou tō tātou Atua, ā, kāore ia e tuku kia hinga ai tātou; nā, tukua tātou kia haere atu; kua kore tātou e whakamate i ō tātou tuākana mehemea kua waiho mai tātou e rātou; nō reira tukua tātou kia haere, kei taea te tauā a Anatipu e rātou.

47 Nā, kāore anō rātou kia whawhai noa, heoi, kāore ō rātou wehi i te mate; ā, he nui kē atu tā rātou whakaaro ki te herekoretanga o ō rātou tūpuna i tā rātou whakaaro ki ō rātou ake oranga; āe rā, kua ākona rātou e ō rātou whaea, nā, ki te kore rātou e ngākau ruarua, ka whakaputaina rātou e te Atua.

48 Ā, ka whakahua mai rātou ki ahau i ngā kupu a ō rātou whaea, e mea ana: Kāore mātou i te ngākau ruarua kua mōhio ō mātou whaea ki tēnei.

49 Ā, i pahawa ake, nā, i hoki atu mātou ko taku rua mano ki ēnei Rāmana kua arumia mai mātou. Ināianei ā nana, kua hopu ngā tauā a Anatipu i a rātou, ā, kua tīmata ake tētahi pakanga nanakia.

50 I te ngenge te tauā a Anatipu, nā te roa o tā rātou hīkoi i te wā poto, whano ka taka iho ki roto i ngā ringaringa o ngā Rāmana; ā, me i kore ahau i hoki atu me aku rua mano kua tutuki tā rātou hiahia.

51 Nā te mea kua hinga iho a Anatipu i te hoari, me āna kaiārahi tokomaha, nā tō rātou ngenge, he mea nā te hohoro o tā rātou hīkoi—nō reira i pōraruraru ai ngā tāngata o Anatipu nā te hinganga o ō rātou kaiārahi, ka tīmata tā rātou horo i mua i ngā Rāmana.

52 Ā, i pahawa ake, nā, ka māia ngā Rāmana, ā, ka tīmata ki te aruaru i a rātou; ā, pēnei i te tino kaha te aruaru a ngā Rāmana i a rātou i te wā i whakaeke atu a Heramana ki tō rātou hiku me tana rua mano, ā, ka tīmata ki te tino patupatu rawa i a rātou, nā konā tū ai, ā, tahuri atu ai te tauā katoa o ngā Rāmana ki runga i a Heramana.

53 Nā, i te kitenga o ngā tāngata a Anatipu i te tahuritanga atu a ngā Rāmana, ka whakamine mai anō rātou i ā rātou tāne, ā, ka whakaeke atu anō ki te hiku o ngā Rāmana.

54 Ināianei ā, i pahawa ake, nā, ka karapoti mātou, ko te iwi o Nīwhai, ko te iwi o Anatipu, me taku rua mano, i ngā Rāmana, ā, ka patupatua rātou; āe rā, nā konā meinga ai rātou kia tukuna mai ā rātou rākau whawhai, me rātou anō hei mauhere pakanga.

55 Ināianei ā, i pahawa ake, nā, i te wā i tukuna rātou e rātou anō ki a mātou, nana, ka tatauria e au aua taiohi tāne i whawhai tahi me au, he pairi nōku kei tokomaha o rātou kua whakamatea.

56 Engari nana, he nui taku hari, nō te mea kāore te mea kotahi o rātou kua hinga iho ki te whenua; āe rā, kua whawhai rātou me te mea nei i runga i te kaha o te Atua; āe rā, kāore i mātauria noatia he tangata whawhai i rite ai ki tō rātou kaha whakamīharo; ā, i runga i tēnei kaha nui i taka iho ai rātou ki runga i ngā Rāmana, nā konā whakamataku ai rātou i a rātou; ā, nā tēnei take i tuku rātou i a rātou anō hei mauhere pakanga.

57 Ā, i te mea kāore ō mātou wāhi mō ngā mauhere, hei tiaki i a rātou i ngā tauā a ngā Rāmana, nō reira i tonoa rātou e mātou ki te whenua o Harahemara, ā, i tukuna atu anō hoki tētahi wāhi o ngā tāngata a Anatipu kīhai nei i whakamatea, me rātou; ā, ka whakahonoa te toenga atu e au ki aku Amona taiohi, ā, ka hīkoi atu anō mātou ki te pā o Huria.