1 Nana, i pahawa ianei ake, nā, i tino hari nui te iwi o Nīwhai, nā te mea kua whakaputaina rātou anō i ngā ringaringa o ō rātou hoariri; nō reira i tuku whakawhetai rātou ki te Ariki tō rātou Atua; āe rā, i nui tā rātou inoi me tā rātou nohopuku, ā, i koropiko rātou ki te Atua i runga i te hari tino nui.

2 Ā, i pahawa ake i te tau tuangahuru mā iwa o te whakahaeretanga a ngā kaiwhakawā i runga i te iwi o Nīwhai, nā, ka haere mai a Arami ki tana tama a Heramana, ā, ka kī mai ki a ia: E whakapono ana rānei koe ki ngā kupu kua kōrerotia e au ki a koe e pā ana ki ērā tuhinga kua puritia?

3 Ā, ka kī atu a Heramana ki a ia: Āe rā, kei te whakapono au.

4 Ā, ka kī atu a Arami anō: E whakapono ana rānei koe i a Ihu Karaiti, koia e haere mai ai?

5 Ā, ka kī ake ia: Āe rā, kei te whakapono au ki ngā kupu katoa kua kōrerotia nei e koe.

6 Ā, ka kī atu anō a Arami ki a ia: Māu ngā whakahaunga e pupuri?

7 Ā, ka kī ake ia: Āe rā, māku āu whakahaunga e pupuri i runga i tōku ngākau katoa.

8 Kātahi a Arami ka kī atu ki a ia: Kua manaakitia koe; ā, mā te Ariki koe e whakakake i tēnei whenua.

9 Engari nana, he mea anō tāku hei poropiti atu ki a koe; engari kaua koe e whāki atu i tāku e poropiti nei ki a koe; āe rā, ko tāku e poropititia nei ki a koe e kore nei e whakamōhiotia atu, tae atu ki te wā e whakatutukihia ai te poropititanga; nō reira tuhia ngā kupu e kōrero ai ahau.

10 Ā, koinei ngā kupu: Nana, e kite ahau i tēnei iwi pū anō, ko ngā Nīwhai, e ai ki te wairua o te poropititanga kei roto nei i ahau, hei ngā tau whā rau mai i te wā e whakakite ai a Ihu Karaiti i a ia anō ki a rātou, ka memeha atu i te whakapono kore.

11 Āe rā, kātahi rātou ka kite i ngā pakanga me ngā mate urutā, āe rā, i te hemokai me te whakahekenga toto, tae atu ana ki te wā e mate moa ai te iwi o Nīwhai—

12 Āe rā, ka pēnei rātou nā te mea ka memeha iho rātou i te whakapono kore, ā, ka taka iho ki roto i ngā mahinga o te pōuritanga, me te tūkari, me ngā tūmomo āhuatanga katoa o te kino, āe rā, ko taku kupu tēnei ki a koe, nā te mea ka hara rātou ki te māramatanga me te mātauranga tino nui, āe rā, ko taku kupu tēnei ki a koe, atu i tērā rangi, kāore e pahemo atu te whakatipuranga tuawhā i mua i te putanga mai o tēnei kino nui.

13 Ā, ina tae mai taua rā nui, nana, ka hohoro rawa mai te wā e tatauria ai te hunga o nāianei, ngā uri rānei o te hunga kua tatauria ināianei i waenganui i te iwi o Nīwhai, e kore tonu nei e tatauria ai i waenganui i te iwi o Nīwhai.

14 Engari ko te hunga e toe tonu ana, ā, ngā mea kīhai i whakangaromia i taua rā nui whakawehi, e tatauria ai ki waenganui i ngā Rāmana, ka meinga kia rite ki a rātou, katoa, hāunga ko ētahi mea ruarua e karangatia ai ko ngā apataki a te Ariki; ā, ko rātou ngā mea e whāia ai tae atu ki te wā e mate moa ai rātou. Ināianei ā, nā te kino, ka whakatutukihia tēnei poropititanga.

15 Ināianei ā i pahawa ake, nā, whai muri iho i tā Arami kōrerotanga atu i ēnei mea ki a Heramana, ka manaakitia ia e ia, me ērā atu anō o āna tama; ā, ka manaakitia anōtia e ia te whenua hei painga mō te hunga tika.

16 Ā, ka kī ake ia: Ko te kupu tēnei a te Ariki te Atua—Ka kangaia te whenua, āe rā, tēnei whenua, ki ngā iwi katoa, ki ngā hapū, ki ngā reo, ki ngā huihuinga tāngata, tae atu ki te whakangaromanga, e mahi kino nei, ina pakari katoa rātou; ā, ka rite anō te mea e puta mai ai ki tāku i kī ai; nā te mea koinei te kanga me te manaakitanga a te Atua ki runga i te whenua, nā te mea tē taea e te Atua te titiro iho ki te hara i runga noa i te pai, ahakoa he iti rawa.

17 Ināianei ā, i te kōrerotanga a Arami i ēnei kupu ka manaakitia e ia te hāhi, āe rā, ko te hunga katoa e ū ai i te whakapono mai i tērā wā haere ake nei.

18 Ā, i te meatanga ake a Arami i tēnei ka wehe atu ia ki waho i te whenua o Harahemara, me te mea nei i te haere ki roto i te whenua o Mereke. Ā, i pahawa ake, nā, kīhai i rangona mōna anō i muri atu; kāore mātou e mōhio ana ki tōna matenga, ki tōna tanumanga rānei.

19 Nana, e mōhio ana mātou ki tēnei, he tangata tika ia; ā, ka rere atu te kōrero i roto i te hāhi, nā, kua kahakina ake ia e te Wairua, kua tanumia rānei ia e te ringa ake o te Ariki, he pērā i a Mohi. Engari nana, e mea ana ngā karaipiture nā te Ariki a Mohi i kāhaki ki a ia anō; ā, e whakapae ana mātou nāna anō a Arami i whakawhiwhi ai i roto i te wairua, ki a ia anō; nō reira, nā tēnei take kāore mātou e mōhio ana i te paku aha e pā ana ki tōna matenga me tōna tanumanga.

20 Ināianei ā, i pahawa ake i te tīmatanga o te tau tuangahuru mā iwa o te whakahaeretanga a ngā kaiwhakawā i runga i te iwi o Nīwhai, nā, ka haere atu a Heramana ki waenganui i te iwi ki te whakapuaki i te kupu ki a rātou.

21 Nana rā, nā ā rātou pakanga ki ngā Rāmana me ngā tautohenga nonohi maha me ngā ngangau kua tupu ake i waenganui i te iwi, ka tika pū anō kia whakapuakina atu te kupu a te Atua ki waenganui i a rātou, āe rā, kia whakaritea ai tētahi tikanga puta noa i te hāhi.

22 Nō reira, ka haere atu a Heramana me ana teina ki te whakapūmau anō i te hāhi puta noa i te whenua katoa, āe rā, i roto i ngā pā katoa puta noa i te whenua e nōhia ana e te iwi o Nīwhai. Ā, i pahawa ake, nā, i whakaritea he pirihi, ā, he kaiako e rātou puta noa i te whenua, i runga i ngā hāhi katoa.

23 Ināianei ā i pahawa ake, nā, whai muri iho i tā Heramana me ana teina whakarite i ngā pirihi me ngā kaiako i runga i ngā hāhi ka tupu ake tētahi tautohetohe i waenganui i a rātou, ā, kīhai i pai ki a rātou ki te whakarongo ki ngā kupu a Heramana me ana teina;

24 Engari ka whakapehapeha haere rātou, kua neke ake i runga i ō rātou ngākau ake, nā te nui whakaharahara o ā rātou taonga; nō reira ka whairawa haere i ō rātou ake karu, ā, kua kore rātou e whakarongo ki ā rātou kupu, ki te hīkoi tōtika i mua i te Atua.