1 Nā, i pahawa ake i muri iho i tā Amureke whakakapi i ēnei mea te kōrero, i neke atu rātou i a rātou anō mai i te whakaminenga, ā, ka whakawhiti atu ki roto i te whenua o Herehona.

2 Āe rā, ko te toenga atu o ngā teina, whai muri iho i tā rātou kauhautanga atu i te kupu ki ngā Hōrama, ka whakawhiti atu anō rātou ki roto i te whenua o ngā Hōrama.

3 Ā, i pahawa ake, nā, whai muri iho i te rūnangatanga tahi o te wāhi rongonui o ngā Hōrama e pā ana ki ngā kupu i kauhautia atu ki a rātou, i riri rātou nā te kupu, nā te mea nāna tō rātou tinihanga i whakangaro; nō reira kāore i pai ki a rātou te whakarongo atu ki ngā kupu.

4 Ā, i tonoa e rātou, ā, ka whakahuihui tahi i te iwi katoa puta noa i te whenua, ā, ka kōrerorero ki a rātou e pā ana ki ngā kupu kua kōrerotia nei e rātou.

5 Nā, kāore ō rātou kaiwhakahaere me ō rātou pirihi me ō rātou kaiako i whakamōhio atu i te iwi e pā ana ki ō rātou hiahia; nō reira i kite huna nei rātou i ngā hinengaro o te iwi katoa.

6 Ā, i pahawa ake, nā, whai muri iho i tā rātou kite atu i ngā hinengaro o te iwi katoa, kua makaia atu te hunga i tautoko ai ki ngā kupu kua kōrerotia nei e Arami rātou ko ana teina i te whenua; ā, he tokomaha rātou; ā, i whakawhiti mai rātou anō hoki ki roto i te whenua o Herehona.

7 Ā, i pahawa ake, nā, ka minita a Arami rātou ko ana teina ki a rātou anō hoki.

8 Nā, i te riri te iwi o ngā Hōrama ki te iwi o Amona e noho nei i te whenua o Herehona, ā, ko te kaiwhakahaere matua o ngā Hōrama, koia nei tētahi tangata kino, ka tono atu ia ki roto i te iwi o Amona e hiahia ana kia makaia atu e rātou i tō rātou whenua te hunga i whakawhiti atu ai i a rātou ki roto i tō rātou whenua.

9 Ā, he maha ngā kupu whakawetiweti i hakaina atu ai e ia ki a rātou. Ināianei ā kāore i wehi te iwi o Amona i ā rātou kupu; nō reira kīhai rātou i maka atu i a rātou ki waho, engari i whiwhi rātou i te hunga rawakore katoa o ngā Hōrama i whakawhiti atu ai ki a rātou; ā, i whāngai rātou i a rātou, ā, i whakakākahutia rātou, ā, i tuku whenua atu rātou ki a rātou hei whenua tuku iho mō rātou; ā, i whakaratorato rātou e rite ana ki ngā mea i hiahia ai rātou.

10 Nā tēnei i whakaoho ake ai ngā Hōrama ki te riri ki te iwi o Amona, ā, ka tīmata tā rātou hanumi atu ki ngā Rāmana me te whakaoho ake i a rātou ki te riri ki a rātou.

11 Ā, pēnei tīmata ai ngā Hōrama me ngā Rāmana ki te whakariterite mea mō te pakanga atu ki te iwi o Amona, me ngā Nīwhai anō hoki.

12 Ā, ka whakamutu pēnei te tau tuangāhuru mā whitu o te whakahaeretanga a ngā kaiwhakawā i runga i te iwi o Nīwhai.

13 Ā, ka wehe atu te iwi o Amona i te whenua o Herehona, ā, ka haere mai ki roto i te whenua o Mereke, ā, ka tukuna atu te whenua o Herehona hei wāhi mō ngā tauā o ngā Nīwhai, kia whawhai atu ki ngā tauā o ngā Rāmana me ngā tauā o ngā Hōrama; ā, i reira tīmata ai te pakanga i waenganui i ngā Rāmana me ngā Nīwhai, i te tau tuangahuru mā waru o te whakahaeretanga a ngā kaiwhakawā; ā, ka tukuna tētahi tuhinga mō ngā pakanga a muri ake nei.

14 Ā, ka hoki atu a Arami, me Amona, me ā rāua teina, me ngā tama tokorua a Arami ki te whenua o Harahemara, whai muri iho i tā rātou meinga hei taputapu i ngā ringaringa o te Atua i te kukumetanga i ngā Hōrama tokomaha ki te rīpenetātanga; ā, i āia atu ngā mea katoa i kūmea ai ki te rīpenetātanga i tō rātou whenua; engari kei a rātou he whenua hei whenua tuku iho mō rātou i te whenua o Herehona, ā, kua hāpai patu rātou ki te tiaki i a rātou anō, me ā rātou hoawāhine, me ā rātou tamariki, me ō rātou whenua.

15 Nā, i te mea kua pōuri a Arami nō te kino o tana iwi, āe rā nō ngā pakanga, me ngā whakahekenga toto, me ngā tautohetohenga kei waenganui i a rātou; i te mea kua haere atu ki te whakapuaki i te kupu, kua tonoa rānei ki te whakapuaki i te kupu, i waenganui i te iwi katoa i ia pā, i ia pā; me tana kitenga atu i te whakapakeke haeretanga o ngā ngākau o te iwi, me tā rātou pāmamae nā te uauatanga o te kupu, i tino pōuri rawa tōna ngākau.

16 Nō reira, ka meatia e ia kia huitahi ai ana tama, kia tukuna atu e ia ki tēnā me tēnā tōna tohutohu haepapa, takitahi, e pā ana ki ngā mea o te tika. Ā, kei a tātou tētahi tuhinga mō ana whakahaunga, nāna i tuku ki a rātou e rite ana ki tāna ake tuhinga.