1 Nā, i pahawa ake, i te wā i kite ai ērā Rāmana ko rātou te hunga i haere atu ai ki te whawhai ki ngā Nīwhai, nā, nō muri iho i ā rātou whawhaitanga maha ki te whakangaro i a rātou, nā, he auare ake tā rātou whai i tō rātou whakangaromanga, ka hoki anō rātou ki te whenua o Nīwhai.

2 Ā, i pahawa ake i tino riri ngā Amareki nā tō rātou hinganga. Ā, i tā rātou kitenga ake tē taea e rātou te ngaki mate i ngā Nīwhai, ka tīmata tā rātou whakaohooho ake i te iwi kia riri ai rātou ki ā rātou teina, arā, te iwi o Anati-Nīwhai-Rīhai; nō reira rātou tīmata anō ai ki te whakangaro i a rātou.

3 Nā, ka whakakāhore atu anō tēnei iwi kia hāpai ake i ā rātou patu, ā, ka tukua iho e rātou kia patua ai e rite ana ki ngā hiahia o ō rātou hoariri.

4 Nā, i te kitenga atu o Amona rātou ko ana teina i tēnei mahi whakangaromanga i waenganui i te hunga i arohaina nuitia e rātou, ā, i waenganui i te hunga i tino arohaina nuitia rātou—nā te mea i atawhaitia rātou anō nei he anahera rātou kua tonoa e te Atua ki te whakaora i a rātou i te whakangaromanga mutunga kore—nō reira, kite ana a Amona rātou ko ana teina i tēnei tino mahi whakangaromanga, ka ohokia rātou e te aroha, ā, ka kī atu rātou ki te kīngi:

5 Tukuna tātou kia whakahuihui tahi ai i tēnei iwi o te Ariki, ā, tukuna tātou kia haere iho ai ki te whenua o Harahemara ki ō tātou teina ngā Nīwhai, ā, kia tahuti atu i ngā ringaringa o ō tātou hoariri, kia kore ai tātou e whakangaromia ai.

6 Engari, ka kī atu te kīngi ki a rātou: Nana, ka whakangaro ngā Nīwhai i a mātou, nā te huhua o ā mātou kōhurutanga me ngā hara kua meatia e mātou ki a ratou.

7 Ā, ka kī atu a Amona: Ka haere au ki te ui atu ki te Ariki, ā, mēnā ka kī mai ia ki a tātou, kia haere iho ki ā tātou teina, ka haere rānei koutou?

8 Ā, ka kī atu te kīngi ki a ia: Āe rā, mēnā ka kī ake te Ariki ki a mātou kia haere, ka haere iho mātou ki ā mātou teina, ā, ka noho mātou hei taurekareka ki a rātou tae noa atu ki te wā kua whakatikaina ki a rātou ngā kōhurutanga huhua me ngā hara huhua kua meatia nei e mātou ki a rātou.

9 Engari ka kī atu a Amona ki a ia: E hē ana tēnā ki te ture o ā tātou teina, koia nei i whakapūmauhia e tōku matua, kia kaua ētahi taurekareka i waenganui i a rātou; nō reira tukua tātou kia haere iho me te whakawhirinaki ki runga i ngā whakaaroha o ā tātou teina.

10 Engari ka kī atu te kīngi ki a ia: Uia te Ariki, ā, mēnā ka kī mai ia ki a tātou kia haere, ka haere tātou; ki te kore ka mate mātou i te whenua.

11 Ā, i pahawa ake, nā, ka haere a Amona ki te ui atu ki te Ariki, ā, ka kī ake te Ariki ki a ia:

12 Whakaputaina atu tēnei iwi i tēnei whenua, kia kore ai rātou e mate; nā te mea e kaha nei te mau o Hātana ki ngā ngākau o ngā Amareki, ko rātou nei e whakaohooho ake i ngā Rāmana ki te riri ki ā rātou teina ki te patupatu i a rātou; nō reira whakaputa atu koutou i tēnei whenua; ā, kua manaakitia tēnei iwi i tēnei whakatipuranga, nā te mea māku rātou e tiaki.

13 Ināianei ā, i pahawa ake, nā, ka haere atu a Amona ki te kōrero ki te kīngi i ngā kupu katoa i kōrerotia ai ki a ia.

14 Ā, i whakahuihui tahi nei i tō rātou iwi katoa, āe rā, ko te iwi katoa o te Ariki, ā, i whakahuihui tahi ai i ā rātou kāhui o ia āhua, o ia āhua kātahi ka wehe atu i te whenua, ā, ka haere ki te koraha nāna nei i whakawehe i te whenua o Nīwhai i te whenua o Harahemara, ā, ka whakawhiti mai kia tata ki ngā rohe o te whenua.

15 Ā, i pahawa ake, nā, ka kī atu a Amona ki a ia: Nana, ka haere atu mātou ko aku teina ki roto i te whenua o Harahemara, ā, ka noho mai koutou ki konei kia hoki rawa mai mātou; ā, ka whakamātauria e mātou ngā ngākau o ō mātou teina kia mōhio ai mēnā ka whakaae mai kia haere mai ai koutou ki roto i tō rātou whenua.

16 Ā, i pahawa ake, nā, i a Amona e haere atu ana ki roto i te whenua, nā, ka tūtaki rātou ko ana teina ki a Arami, i reira i te wāhi kua kōrerotia nei; ā nana, he tūtakinga harikoa tēnei.

17 Nā, i kī a Amona i te nui o te koa; āe rā, i horomia ake ia i te haringa o tōna Atua, tae atu ana ki te whakapaunga ake o tana kaha; ā, ka hinga iho anō ia ki te whenua.

18 Nā, ehara rānei tēnei i te hari tino nui? Nana, koinei te hari e kore e taea e tētahi te whiwhi hāunga ko te hunga tino rīpenetā anake me te kaiaruaru māhaki o te haringa.

19 Nā, i tino nui mārika te hari o Arami i tana tūtakinga ki ana teina, me te hari o Arona, o Omonere, me Himini; engari nana kāore i nui ake tō rātou hari i ō rātou kaha.

20 Ināianei ā i pahawa ake, nā, ka ārahina atu e Arami ana teina ki te whenua o Harahemara; tae atu ana ki tōna ake kāinga. Ā, ka haere atu rātou ki te kōrero atu ki te kaiwhakawā matua i ngā mea katoa kua meatia ki a rātou i te whenua o Nīwhai, i waenganui i ō rātou tuākana, ngā Ramana.

21 Ā, i pahawa ake, nā, ka tukuna e te kaiwhakawā matua tētahi whakapuakitanga puta noa i te whenua, e hiahia ana ki te reo o te iwi e pā ana ki te whakaaetanga mai o ō rātou tuākana, ko rātou nei te iwi o Anati-Nīwhai-Rīhai.

22 Ā, i pahawa ake, nā, ka puta mai te reo o te iwi, e mea ana: Nana, ka tukuna ake e mātou te whenua o Herehona, kei te taha rāwhiti e tūtata ana ki te moana, e hono ana ki te whenua o Mōmona, kei te taha tonga o te whenua Mōmona; ā, ko tēnei whenua o Herehona te whenua e hoatu ai e mātou ki ō tātou tuākana hei whenua tuku iho.

23 Ā nana, ka whakatūhia e mātou ō tātou tauā i waenganui i te whenua o Herehona me te whenua o Nīwhai, kia tiaki ai mātou i ō tātou tuākana i te whenua o Herehona; ā, ka pēnei tā mātou mō ō mātou tuākana, nā tō rātou wehi ki te hāpai patu ki ō rātou tuākana kei hara rātou; ā, i ahu mai tēnei tō rātou wehi nui nā tā rātou tino rīpenetātanga i mea ai rātou, nā ā rātou kōhurutanga huhua me tō rātou whakariharihatanga kino.

24 Ināianei ā nana, ka pēnei mātou ki ō mātou tuākana, kia riro i a rātou te whenua o Herehona; ā, mā mātou rātou e tiaki i ō rātou hoariri i ō mātou tauā, i runga i te whakaritenga kia homai e rātou tētahi wāhi o ā rātou rawa hei āwhina i a mātou ki te whakakaha i ō mātou tauā.

25 Nā, i pahawa ake, nā, i te rongonga o Amona i tēnei, ka hoki atu ki te iwi o Anati-Nīwhai-Rīhai, ā, i haere tahi anō a Arami, ki roto i te koraha, ki te wāhi i whakatūhia ai ō rātou tēneti, ā, ka whakamōhiotia atu ki a rātou ēnei mea katoa. Ā, ka whakamāramatia atu e Arami ki a rātou tana whakatahuritanga, i te taha i a Amona me Arona, me ana teina.

26 Ā, i pahawa ake, nā, i hua ake i reira te hari nui i waenganui i a rātou. A, ka haere iho rātou ki te whenua o Herehona, ā, ka nōhia e rātou te whenua o Herehona; ā, i karangatia rātou e ngā Nīwhai ko te iwi o Amona; nō reira i whakamōhiotia rātou ki taua ingoa nō muri ake nei.

27 Ā, kei waenganui rātou i te iwi o Nīwhai, ā, i tatauria anōtia i waenganui i te iwi o te hāhi o te Atua. Ā, i mōhiotia anōtia rātou mō tō rātou ngākau nui ki te Atua, ā, ki te tangata anō hoki; nā te mea i tino pono mārire rātou, ā, i tino tōtika mārire rātou i roto i ngā mea katoa; ā, i ū tō rātou whakapono i te Karaiti, tae atu ana ki te mutunga.

28 Ā, he mea whakarihariha rawa atu te whakahekenga i ngā toto o ō rātou tuākana ki a rātou; ā, kīhai i taea rātou e tētahi kia hāpai patu ki ō rātou tuākana; ā, kīhai i titiro ake ki te matenga i runga i tētahi paku mataku, nā tō rātou tūmanako me ō rātou tirohanga o te Karaiti me te aranga; nō reira, kua horomia ake te mate ki a rātou e te wikitōriatanga o te Karaiti i runga rā.

29 Nō reira, ka tukuna e rātou kia mate ai rātou i ō rātou tuākana i runga i ngā āhuatanga whakamamae kino rawa atu me ngā āhuatanga tārū kikino e taea ai e ō rātou tuākana te whakamahi, koinei katoa i mua i tā rātou hāpai ake i te hoari, i te hemita rānei ki te patu i a rātou.

30 Ā, pēnei rātou hei iwi ngākau nui, ā, hei iwi arohaina, he iwi whakamakautia nuitia nō te Ariki.