1 Ā, i pahawa ake, nā, ko ngā Amareki me ngā Amurono me ngā Rāmana i noho ai i te whenua o Amurono, me te whenua anō hoki o Herama, ā, i noho ai anō hoki i te whenua o Hiruharama, hei whakarāpoto, i ngā whenua katoa huri noa, ko ngā mea kīhai i whakatahuritia, ā, kīhai i tango ki runga i a rātou te ingoa o Anati-Nīwhai-Rīhai, nā, i whakaohokia ake rātou e ngā Amareki me ngā Amurono kia riri ai ki ā rātou teina.

2 Ā, ka tino nui haere tō rātou mauāhara ki a rātou, nā konā pū anō tīmata ai rātou ki te haututū ki tō rātou kīngi, nā konā kāore rātou i hiahia ko ia hei kīngi mō rātou; nō reira, ka hāpai patu rātou ki te iwi o Anati-Nīwhai-Rīhai.

3 Nā, ka whakatau iho te kīngi i te kīngitanga ki runga i tōna tama, ā, ko Anati-Nīwhai-Rīhai tōna ingoa.

4 Ā, ka mate te kīngi i taua tau tonu i tīmata ai ngā Rāmana ki te whakariterite kia pakanga ai ki te iwi o te Atua.

5 Nā, i te kitenga atu o Amona rātou ko ana teina, me te hunga katoa kua haere tahi mai i ngā whakaritenga a ngā Rāmana kia whakangaro i ā rātou teina, ka haere mai rātou ki te whenua o Miriana, ā, i reira tūtaki ai a Amona ki ana teina katoa; ā, mai i reira ka haere rātou ki te whenua o Ihimaera kia rūnanga ai rātou ko Ramoni, me tōna tuakana a Anati-Nīwhai-Rīhai me aha tā rātou hei tiaki i a rātou anō i ngā Rāmana.

6 Nā, kāore i reira tētahi o ngā wairua i te iwi katoa i tahuri ai ki te Ariki, i whakaae ki te hāpai patu ki ō rātou tuākana; kāo, kāore rawa rātou i pai kia whakariterite kau mō te pakanga; āe rā, i whakahau anō tō rātou kīngi i a rātou kia kaua rātou e pērā ai.

7 Nā, koinei ngā kupu i kōrero ai ia ki te iwi e pā ana ki te take: E whakawhetai ana au ki tōku Atua, e tōku iwi aroha, mō tō tātou Atua nui nāna nei i tono mai i runga i tōna painga ā tātou teina, arā, ko ngā Niwhai, ki a tātou ki te kauhau ki a tātou, me te whakapakepake i a tātou i ngā whakarerenga iho a ō tātou tūpuna whakarihariha.

8 Ā nana, e whakawhetai ana au ki tōku Atua nui mōna i homai ki a tātou tētahi wāhi o tōna Wairua kia whakangāwari ai i ō tātou ngākau, nā konei tūwhera ai i tētahi ara whakawhitiwhiti kōrero ki ā tātou teina, ki ngā Nīwhai.

9 Ā nana, e whakawhetai ana anō au ki tōku Atua, nā te tūwheratanga ake i tēnei ara whakawhitinga kōrero kua whakapakepakehia tātou mō ō tātou hara, me ngā kōhuru maha kua mea nei tātou.

10 Ā, e whakawhetai ana au anō hoki ki tōku Atua, āe rā, ki tōku Atua nui, mōna i tuku ki a tātou kia taea ai e tātou te rīpenetā i ēnei mea, waihoki, mōna hoki tātou i muru i ō tātou hara maha me ngā kōhuru i mea ai tātou, ā, kua tangohia atu te kaniawhea i ō tātou ngākau, he mea nā ngā mahi pai o tana Tama.

11 Ināianei ā nana, e aku teina, i te mea koinei anake i taea ai hei mahi (nā te mea ko tātou ngā mea tino ngaro rawa o ngā tāngata katoa) kia rīpenetā ai i ō tātou hara katoa me ngā kōhuru katoa kua mahia e tātou, me te mea anō i te Atua kia tangohia atu ērā i ō tātou ngākau, nā te mea koinā anake i taea ai e tātou kia rīpenetā tika ai i te aroaro o te Atua kia tangohia atu tō tātou poke—

12 Nā, e aku tino teina aroha, i te mea kua tangohia atu e te Atua ō tātou poke, ā, kua kānapa haere ā tātou hoari, tēnā, kia kaua tātou e whakapoke anō i ā tātou hoari i ngā toto o ā tātou teina.

13 Nana, ko taku kupu tēnei ki a koutou, Kāo, tukua tātou kia pupuri ai i ā tātou hoari kia kore ai e poke i ngā toto o ā tātou teina; nā te mea tērā pea, mēnā ka whakapoke anō tātou i ā tātou hoari kua kore e taea te horoi kia kānapa mā roto i te toto o te Tama a tō tātou Atua nui e whakahekea ai mō te whakamārietanga o ō tātou hara.

14 Ā, kua aroha mai te Atua nui ki a tātou, ā, kua whakamōhio mai i ēnei mea ki a tātou kia kore ai tātou e ngaro; āe rā, nāna ēnei mea i whakamōhio mai ki a tātou i mua, nā te mea e aroha ana ia i ō tātou wairua pērā i tana aroha ki ā tātou tamariki; nō reira, i runga i tana aroha e torotoro ana ia i a tātou, he mea nā ngā anahera, kia whakamōhiotia mai te mahere o te whakaoranga ki a tātou me ngā whakatipuranga anō hoki e haere ake nei.

15 Auē, anō te aroha nui o tō tātou Atua! Ināianei ā nana, i te mea kua whakapaua e tātou ō tātou kaha kia tangohia atu ō tātou poke i a tātou, ā, kua whakakānapahia ā tātou hoari, tukua tātou kia hunaia ai ērā kia kānapa tonu ai, hei whakaaturanga ki tō tātou Atua hei te rā whakamutunga, hei te rā rānei e kūmea ai tātou kia tū ai i tōna aroaro kia whakawākia ai, kāore i whakapokea ā tātou hoari i ngā toto o ā tātou teina mai i tana wāwāhitanga mai i tana kupu ki a tātou nā konā kua mā tātou.

16 Ināianei ā, e aku teina, ki te whai ā tātou teina ki te whakangaro i a tātou, nana, ka huna atu tātou i ā tātou hoari, āe rā, ka tanumia rawatia ērā e tātou ki roto i te hōhonutanga o te whenua, kia kānapa tonu ai ērā, hei whakaaturanga kīhai tātou i hāpai ake i aua mea, hei te rā whakamutunga; ā, ki te whakangaro ō tātou tuakana i a tātou, nana, ka haere atu tātou ki tō tātou Atua, ā, ka whakaorangia.

17 Ināianei ā, i pahawa ake, nā, i te whakakapinga o te kīngi i ēnei kīanga, ā, i te huihui tahi anō te iwi, i kawea atu e rātou ā rātou hoari, me ngā rākau whawhai katoa i whakamahia ai mō te whakahekenga i ngā toto tangata, ā, i tanumia e rātou i roto i ngā hōhonutanga o te whenua.

18 Ā, i meatia tēnei e rātou, ki tā rātou titiro he whakaaturanga ki te Atua, ki ngā tāngata anō hoki, kia kore anō rātou e whakamahi ai i ngā rākau whawhai mō te whakahekenga iho i ngā toto tangata; ā, i pēnei rātou, e oati ana, ā, e kawenata ana ki te Atua, nā, he pai ake te tuku atu i ō rātou oranga i te whakaheke i ngā toto o ō rātou tuākana; ā, mahue te tango atu i te teina ka hoatu kē rātou ki a ia; mahue te whakapau i ō rātou rā i runga i te hakirara ka tino mahi kē rātou ki ō rātou ringaringa.

19 Ā, pēnei tātou kite ai, kūmea ana ēnei Rāmana kia whakapono ai, ā, kia mōhio ai ki te pono, i tokatū moana rātou, ā, he pai kē ake te tuku kia whakamamaetia ai rātou i te mahi hara; ā, pēnei tātou kite ai kua tanumia e rātou ā rātou rākau whawhai o te maungārongo, i tanumia rānei e rātou ngā rākau whawhai o te pakanga, mō te maungārongo.

20 Ā, i pahawa ake, nā, i whakariterite ō rātou tuākana, ngā Rāmana mō te pakanga, ā, ka haere ake ki te whenua o Nīwhai ki te whakangaro i te kīngi, ā, kia whakanohohia tētahi atu i tōna tūranga, ā, ki te whakangaro anō i te iwi o ngā Anati-Nīwhai-Rīhai i te whenua.

21 Nā, kite ana te iwi i tō rātou whakaekenga mai ki a rātou ka haere atu rātou kia tūtaki ai ki a rātou, ā, ka takoto whārōrō iho rātou i runga i te whenua i mua i a rātou, ā, ka tīmata tā rātou karanga ake ki te ingoa o te Ariki; ā, i pēnei tō rātou āhua i te whakaekenga mai o ngā Rāmana ki runga i a rātou, ā, ka tīmata ki te patupatu i a rātou ki te hoari.

22 Ā, pēnei kāore he mea hei ārai atu, i patua ai e rātou te kotahi mano mā rima o rātou; ā, e mōhio ana mātou kua manaakitia rātou, nā te mea kua haere atu rātou kia noho tahi ki tō rātou Atua.

23 Nā, i te kitenga atu o ngā Rāmana kāore ā rātou teina e tahuti atu i te hoari, kāore rānei rātou e tahuri atu ai ki te ringa matau, ki te ringa mauī rānei, engari ka takoto iho rātou, ā, ka mate, ā, ka whakamoemititia te Atua tae atu ana ki tō rātou matenga ki raro i te hoari—

24 Nā, i te kitenga atu o ngā Rāmana i tēnei ka whakamutua tā rātou patupatu i a rātou; ā, he tokomaha te hunga i pupuhi ai ō rātou ngākau mō ā rātou teina i hinga ai i raro i te hoari, nā te mea i rīpenetā rātou mō ngā mea i mahia ai e rātou.

25 Ā, i pahawa ake, nā, ka makaia iho e rātou ā rātou rākau whawhai, ā, kīhai rātou i mau anō ki aua mea, nā te mea i pāmamae rātou nā ngā kōhuru i mahia ai e rātou; ā, ka heke iho rātou pērā i ā rātou teina, e whakawhirinaki ana rātou i runga i te aroha o te hunga i hāpai ake ai ō rātou ringa ki te patu i a rātou.

26 Ā, i pahawa ake, nā, he nui ake te hunga i hono mai ai ki te iwi o te Atua i taua rā i te hunga i patua ai; ā, he tangata tika te hunga i patua ai, nō reira kāore ō mātou take kia rangirua ai mātou ki tō rātou whakaoranga.

27 Ā, kāore he tangata kino kotahi i whakamatea ai i waenganui i a rātou; engari he nui ake i te kotahi mano ngā mea i kukume ai ki te mātauranga o te pono; pēnei ka kite tātou he maha ngā huarahi e mahi ai te Ariki kia whakaorangia tana iwi.

28 Nā, ko ngā Amareki rātou ko ngā Amurono te wāhi nui o te hunga o ngā Rāmana i patu ai i ā rātou teina tokomaha, ko te wāhi nui o rātou he mea nō te ritenga o ngā Nīho.

29 Nā, kāore he Amareki, he Amurono rānei, he tangata rānei nō te ritenga o ngā Nīho i waenganui i te hunga i hono mai ai ki te Ariki, engari he uri tūturu rātou nō Rāmana rāua ko Remuere.

30 Ā, ka kite mārama tātou, i muri iho i te whakamāramatanga a te Wairua o te Atua i tētahi iwi, me te whiwhi i tētahi mātauranga nui e pā ana ki te tika, kātahi ka taka atu ki roto i te hara me te hē, ka pakeke ake tā rātou haere, ā, pēnei ka kino ake tō rātou āhua i tō rātou mehemea kīhai rawa rātou i mōhio ki ēnei mea.